ဇန်နဝါရီလ ၁၈ ၊ ၂၀၂၁
တရုတ်ရဲ့ ဖျော်ဖြေရေးနယ်ပယ်ဟာ ကော်ပီကူးတာတွေချည်း တစ်မိုးလုံးဖျောက်ဆိတ်ဖြစ်နေပါတယ်။
တရုတ်ရုပ်ရှင်ထုတ်လုပ်ရေးသမားတွေဟာ ဇာတ်ညွှန်းကောင်းကောင်းနဲ့ ကိုယ်ပိုင်ဖန်တီးလိုက်တဲ့ ဇာတ်အိမ်တွေကနေ ခပ်ဝေးဝေးလက်ရှောင်နေကြပြီး ကော်ပီတွေချည်း လှိမ့်ထုတ်နေတာ စိတ်ပျက်စရာကောင်းပေမယ့် နှစ်တိုင်းနှစ်တိုင်း အဲသလိုပဲ ဖြစ်နေတာပါပဲ။ အဲဒီလိုလုပ်တာတွေကလည်း ကိုယ်ပိုင်ဖန်တီးနိုင်စွမ်းနည်းတာထက် တကမ္ဘာလုံးက၊ နိုင်ငံပေါင်းစုံက ထုတ်လုပ်မှုတွေကို ကော်ပီကူးပြီး ဈေးပေါပေါနဲ့ ထုတ်လုပ်တဲ့နည်း၊ ကုန်ကျစားရိတ်သက်သာအောင်လုပ်တဲ့နည်းပဲဖြစ်ပါတယ်။
မကြာသေးခင်ကပဲ တရုတ်ရုပ်ရှင်ကားနှစ်ခုမှာ အိုင်ဒီယာခိုးထားတာပေါ်သွားခဲ့ပြီး တရုတ်ရုပ်ရှင်နဲ့ ရုပ်မြင်သံကြားနယ်ပယ်ထဲက လူ ၁၁၁ဦး က အဲဒီရုပ်ရှင်နှစ်ကားကို ဖယ်ရှားဖို့ ပူးတွဲစာကို လက်မှတ်ရေးထိုးခဲ့ကြပါတယ်။ တရုတ်လူမှုကွန်ရက် ဝီဘိုပေါ်မှာ ရုပ်ရှင်နှစ်ကားကို ပိတ်ပင်ဖို့ တောင်းဆိုတာထောင်နဲ့ချီတဲ့ဆွေးနွေးမှုတွေဖြစ်ပေါ်ခဲ့ပါတယ်။ ရီရှောင်ရှင်းရဲ့ ဟာသ 'Bath Buddy' ဟာ ဟာအီကွမ် ဖန်တီးထားတဲ့ ၂၀၁၁ တောင်ကိုရီးယားဝဘ်တွန်း 'God of Bath' ကနေ မျက်နှာပြောင်တိုက်ပြီး ကူးယူထားခဲ့တာပါ။ Box Office မှာ ယွမ် ၄၃၅သန်း ငွေဝင်ခဲ့တဲ့ စာရေးဆရာဂေါင်ကျင်းမင် ရိုက်ကူးခဲ့တဲ့ 'The Yin-Yang Master' ဆိုတဲ့ စိတ်ကူးယဉ်ရုပ်ရှင်ဟာ မာဗယ်လ်ရဲ့ ၂၀၁၆ Doctor Strange နဲ့ တိုက်ရိုက်ဆင်တူနေတဲ့ဇာတ်ကွက်တွေအများကြီးပါတာကိုတွေ့ခဲ့ကြရလို့ ဝေဖန်မှုတွေမိုးမွှန်သွားပါတယ်။ ‘The Yin-Yang Master’ နဲ့ ပတ်သက်လို့ ပြောစရာတွေဖြစ်လာခဲ့ပြီးတဲ့နောက် နောက်ဆုံးမှာတော့၊ ၂၀၂၀ ဒီဇင်ဘာ ၃၁ မှာ ဂေါင်ကျင်းမင်ဟာ ဝီဘိုမှာ တောင်းပန်စကားဆိုခဲ့ပါတယ်။
နောက်ထပ်စိတ်ဝင်စားစရာကောင်းတာက အဲဒီ ဂေါင်ကျင်းမင်ဟာ အရင်ကလည်း ကော်ပီကူးခဲ့တဲ့ ရာဇဝင်ရှိသူတစ်ယောက်ဖြစ်ပါတယ်။ ၂၀၀၆ ခုနှစ်တုံးက သူ့စာအုပ် ‘Never-Flower in Never-Dream’ ဟာ စာရေးဆရာ ကျွမ်းယုရဲ့ ‘In and Out of the Circle’ ဝတ္ထုရဲ့ အဓိက ဇာတ်ကြောင်း ၁၂ ခု နဲ့ တခြားသော ဆင်တူအကြောင်းအရာ ၅၇ခုတို့ကို ကူးယူထားခဲ့တယ်ဆိုတာ ပေါ်ပေါက်ခဲ့လို့ မူရင်း ဝတ္ထုဆရာကို တရားဝင်တောင်းပန်ဖို့ ပေကျင်းတရားရုံးက အမိန့်ချမှတ်ခဲ့ပါတယ်။ အဲဒီစာအုပ်ဟာ ၆၀၀,၀၀၀ လောက် ရောင်းချခဲ့ရပါတယ်။ ခိုးကူးတဲ့အတွက် ပြစ်ဒဏ်က ယွမ် ၂၀၀,၀၀၀ (အမေရိကန်ဒေါ်လာ ၂၅၀၀၀) လျော်ကြေးပေးရတာပါ။
နိုင်ငံတကာ အသိုင်းအဝိုင်းကို အမျက်ထွက်စေခဲ့တဲ့ နောက်ထပ်ဇာတ်ကားတစ်ခုကတော့ ဒစ်စနီပစ်ဆာရဲ့ ၂၀၀၆ ကာတွန်းကား ‘Cars’ ကော်ပီကူးထားတဲ့ ၂၀၁၆ ခုနှစ်ထွက် ‘The Autobots’ ဖြစ်ံပါတယ်။ အဲဒီကားဟာ ဝင်ငွေ ယွမ်၂.၂ သန်းဝင်ခဲ့ပါတယ်။ တရုတ် ရုပ်ရှင်ကြည့်သူတွေအတွက် ‘The Autobots’ ရဲ့ ပိုစတာတွေကိုကြည့်ရင် ‘Cars’ ရဲ့ တရားဝင်တရုတ်ဗားရှင်းလို့ဆိုရလောက်အောင်ကို တော်တော်ဆင်တူနေတာပါ။ ဒစ်စနီက ထုတ်ဝေသူ Blue MTV ‘မူပိုင်ခွင့်ချိုးဖောက်မှုနှင့် မမျှတမှုယှဉ်ပြိုင်မှု’ တို့နဲ့ တရားစွဲပြီး လျော်ကြေးငွေ ယွမ် လေးသန်း (အမေရိကန်ဒေါ်လာ ၆၀၁,၀၀၀) တောင်းဆိုခဲ့ပါတယ်။ ရုပ်ရှင်ထုတ်လုပ်ရေးရဲ့ ရည်မှန်းချက်နဲ့ပတ်သက်ပြီး မေးခွန်းများတွေလည်း ပေါ်ပေါက်ခဲ့ပါတယ်။ တရုတ် ကာတွန်းကားတွေဟာ အမျိုးသားရုပ်ရှင်ရုံ ဒါမှမဟုတ် အစိုးရပိုင် CCTV မှာ ပြသရင် အစိုးရက တစ်မိနစ်ကို ယူရို ၃၀၀၀နှုန်း ထောက်ပံ့ပါတယ်။ ဒါက ရုပ်ရှင်သူခိုးတွေအတွက် အာမခံကြေးနှစ်ဆ ပေးသလိုဖြစ်လာပါတယ်။ ရှစ်ဆယ့်ငါးမိနစ်ကြာ ရုပ်ရှင်ဟာ Box Office မှာ ယူရိုခြောက်သန်းဝင်ငွေရတဲ့အပြင် အစိုးရဆီကနေ ၂၅၅, ၀၀၀ ယွမ် ထောက်ပံ့ကြေးရပါသေးတယ်။
ဇာတ်ညွှန်းအတွက် ဂုဏ်ပြုဆုတွေရရှိခဲ့တဲ့ ဒဲရက် ဆန် ရိုက်ကူးခဲ့တဲ့ ၂၀၁၉ ခုနှစ် အချစ်ရာဇဝတ်ကား ‘Better Days' ဟာလည်း ဟီကာရှီနို ကိုင်ဂို ရေးသားတဲ့ ‘The Devotion of SuspectX’ လို့ဆိုတဲ့ ဂျပန်လျှို့ဝှက်ဆန်းကြယ်ဝတ္ထုကို ခိုးထားတာဖြစ်ပါတယ်။ တရုတ်ဆိုရှယ်မီဒီယာအသုံးပြုသူတွေက ဒစ်စနီရဲ့ ‘Zootopia’ ပိုစတာကစလို့ ကာတွန်းဇာတ်ကောင်တွေအထိ တော်တော်များများ ကူးယူခဲ့တဲ့ ၂၀၁၆ခုနှစ်ထွက် ‘Crazy Toy City’ကိုလည်း အတော်လေးကိုပြစ်တင်တုံ့ပြန်ခဲ့ကြပါတယ်။ CCTV ရဲ့ ၂၀၀၇ခုနှစ်ထွက် ကာတွန်းကား ‘Big Mouth Dodo’နဲ့ ၂၀၁၁ခုနှစ်ထွက် ကာတွန်းဇာတ်လမ်းတွဲ ‘Train Hero’တို့ဟာ ဂျပန်ရဲ့ ‘Crayon Shin-Chan’ နဲ့ ‘Hikarian: Great Railroad Protector’တို့ကနေ ကော်ပီကူးထားတာဖြစ်နေပြန်ပါတယ်။ ဂီတရုပ်ရှင် musical ‘Memory 5D+’ ကို ဖန်တီးခဲ့တဲ့ တရုတ်ရုပ်ရှင် Huatang ဟာ ၂၀၁၉ ခုနှစ်ကထွက်ခဲ့တဲ့ Chengdu Coco ကာတွန်းကုမ္ပဏီက ထုတ်လုပ်တဲ့ ‘Ne Zha’ နဲ့ ‘ဇာတ်လမ်းဇာတ်ကြောင်း၊ ဇာတ်ကောင်ဒီဇိုင်းနဲ့ ထုတ်လုပ်မှုပစ္စည်းတွေတူညီနေတာကြောင့်’ ပေကျင်းဉာဏပစ္စည်းပိုင်ဆိုင်မှုတရားရုံးမှာ တရားစွဲခံရပြီး စီးပွားရေးဆုံးရှုံးမှုလျော်ကြေး ယွမ်သန်း ၅၀ နဲ့ တရားခွင်ကြေး ယွမ် တစ်သန်း တောင်းခံရပါတယ်။
တရုတ်အာဏာပိုင်တွေဟာ မူပိုင်ခွင့်ချိုးဖောက်တဲ့ ရုပ်မြင်သံကြားဇာတ်လမ်းတွေကို ဖော်ထုတ်ဖို့ ‘ကူးယူမှု ကိုင်တွယ်ရေး အဆင့်မြှင့် တရားစီရင်ရေးဆိုင်ရာ ကျွမ်းကျင်မှုများကိုပေးရေး’ ကော်မတီတစ်ခုကို ၂၀၁၇ ခုနှစ်မှာ ဖွဲ့စည်းခဲ့ပါတယ်။ အဲဒီ ကော်မတီမှာ ဥပဒေရေးရာကျွမ်းကျင်သူ ၁၄ ဦး နဲ့ ရုပ်မြင်သံကြားနယ်ပယ်၊ စာပေနယ်ပယ်တွေက ပညာရှင် ၁၂ ဦး ပါဝင်ပါတယ်။ ရုပ်ရှင်နဲ့ ရုပ်မြင်သံကြားဒရာမာ မူပိုင်ခွင့်တွေအတွက် တရားစွဲဆိုတဲ့ အရေအတွက်ဟာ အတုအယောင် ကုန်ပစ္စည်းတွေထုတ်လုပ်ဖြန့်ချိမှု ပေါများလွန်းလှတယ်လို့ နာမည်ထွက်တဲ့ တိုင်းပြည်မှာ ထိပ်ဆုံးကကိုနေရာယူထားပါတယ်။ အင်တာနက်သုံးသူတွေက သူတို့ရဲ့လုပ်ရပ်တွေဟာ ‘နိုင်ငံကို အရှက်ရစေတာ’၊ အရည်အချင်းရှိတဲ့ သရုပ်ဆောင်တွေရဲ့ ကြိုးပမ်းမှုတွေကို အလဟသဖြုန်းတီးပစ်နေတာ၊ ရင်းနှီးမြှုပ်နှံသူတွေရဲ့ ယုံကြည်မှုတွေကို ချိုးဖောက်နေကြတာဆိုပြီး ရုပ်ရှင်ထုတ်လုပ်သူတွေကို အဆက်မပြတ်ဝေဖန်နေခဲ့ပါတယ်။
ဒါတွေဟာ ‘ အစိုးရ အာဏာ တံခိုးထွားတယ်' ရယ်လို့ ခပ်ကြွားကြွားရှိနေတဲ့ နိုင်ငံတစ်ခုအတွက် သူ့ရဲ့ နာမည်ဆိုးထွက်နေတဲ့ နယ်ပယ်ကို စောင့်ကြည့်ဖို့ ပျက်ကွက်နေတာဟာ နားလည်ရခပ်ခက်ခက်ပါပဲ။ တရုတ်ရုပ်ရှင်ရိုက်ကူးသူတွေဟာ ဖျော်ဖြေရေးနယ်ပယ်မှာ မရှိမဖြစ်လိုနေတဲ့ မိမိကိုယ်ကိုယ် စည်းကမ်းထိန်းသိမ်းတာနဲ့ ရင်းနှီးမြုပ်နှံမှုဆိုင်ရာ စွန့်စားမှု နည်းပါးလှပါတယ်။ တရုတ်ရုပ်ရှင်တွေကို ကမ္ဘာလုံးက နိုင်ငံသားတွေရဲ့ နှလုံးသားနဲ့ စိတ်တွေထဲ စိမ့်ဝင်စေဖို့ကတော့ သူတို့ရဲ့ ဖန်တီးထုတ်လုပ်မှုဟာ အစစ်အမှန် မူရင်းဖြစ်ဖို့လိုနေပါတယ်။