အောက်တိုဘာ ၂၈

ထိုင်းနိုင်ငံမြို့တော်ဘန်ကောက်သည် ဘုရင်မင်းမြတ် မဟာဝါဇီရလောင်ကွန်း လွန်ခဲ့သောဆယ်စုနှစ်အကျော် အိမ်ရှေ့စံဘဝက သိုသိုသိပ်သိပ်နေထိုင်ခဲ့သည့် သာယာအေးချမ်းလှသော ဘာဗေးရီးယားရေကန်ဒေသနှင့် ကီလိုမီတာပေါင်း ၈ ၈၀၀ (၅ ၄၆၈ မိုင်) မက ဝေးကွာသည်။  

ဂျာမနီနိုင်ငံတွင် လျှို့ဝှက်စွာနေထိုင်ရန်အတွက် အသက် ၆၈ နှစ်ရှိ ဝါဇီရလောင်ကွန်း၏ မဖြစ်နိုင်သောရွေးချယ်မှုသည် ထိုနိုင်ငံရှိ လူပြိန်းကြိုက်သတင်းစာများနှင့် လူနေမှုဘဝဆိုင်ရာ တီဗီအစီအစဉ်များ၏  ရှာရှာဖွေဖွေကဏ္ဍများတွင် အဓိကသတင်းအကြောင်းအရာဖြစ်လာခဲ့သည်မှာ ကြာပြီဖြစ်သည်။ ထိုသို့သောသတင်းများတွင် ဝါဇီရလောင်ကွန်း ဈေးဝယ်စင်တာများသွားသည့်အခါ ကို့ရို့ကားယားဝတ်စားဆင်ယင်မှုနှင့် အခြား ထူးဆန်းစွာ ပြုမူနေထိုင်ခြင်းကဲ့သို့သော အကြောင်းအရာများလည်းပါသည်။  

ကမ္ဘာ့အခွင့်ထူးခံနှင့်အချမ်းသာဆုံးတော်ဝင်မိသားစုများအနက် မျိုးဆက်တစ်ဦးဖြစ်သည့် ဝါဇီရလောင်ကွန်းသည် ဂါမစ်ချ်ပါတီကာချန်မြို့ ဘာဗေးရီးယားနှင်းဆီးလျှောအပန်းဖြေစခန်းက Alpine ဇိမ်ခံဟိုတယ်၌ အချိန်ဖြုန်းလေ့ရှိပြီး ၎င်းနှင့်နောက် လိုက်အခြွေအရံများနေထိုင်ရန်  ဟိုတယ်ကို အပြတ်ငှားရမ်းထားကြောင်း သတင်းများတွင် ဖော်ပြကြသည်။ 

ယခုအခါ ထိုင်းနိုင်ငံတွင် ဘုရင်အာဏာကိုကန့်သတ်ရန်နှင့်ဖွဲ့စည်းပုံအခြေခံဥပဒေသစ် တောင်းဆိုခြင်းများနှင့်အတူ ဒီမိုကရေစီအရေးဆန္ဒပြပွဲများရင်ဆိုင်နေရချိန်၌ ဝါဇီရလောင်ကွန်းသည် ၂၀၁၆ ခုနှစ် နန်းတက်သည့်အချိန်မှစ၍ ၎င်း၏အချိန်အများစုကို ဂျာမနီ၌ ကုန်ဆုံးရန်ဆုံးဖြတ်ချက်သည် နှစ်နိုင်ငံစလုံးအတွက် နိုင်ငံရေးပြဿနာဖြစ်လာခဲ့သည်။  

ထိုင်းဘုရင်မင်းမြတ်မိသားစုသည် ယခုအခါ ဘန်ကောက်သို့ရောက်ရှိနေသော်လည်း ၎င်းအကြောင်းနှင့်လှုပ်ရှားမှုဆိုင်ရာသတင်းများသည် အတင်းအဖျင်းကဏ္ဍမှထွက်၍ ဂျာမနီရှိ အဓိကသတင်းစာများ၏ ရှေ့ဆုံးစာမျက်နှာများ၌ နေရာယူလာကြသည်။ 

Oberbayerisches Volksblatt သတင်းစာတွင် မကြာသေးမီက ဖော်ပြထားချက်အရ ဂျာမနီရှိ ဘုရင်စနစ်ဝေဖန်သူများက အစိုးရအနေဖြင့် ထိုင်းဘုရင်အား နိုင်ငံအတွင်းဆက်လက်ထားရှိရန် မသင့်တော်သူ အဖြစ်ကြေညာရန် ဝန်ကြီးချုပ်အန်ဂယ်လာမာကယ်နှင့် နိုင်ငံခြားရေးဝန်ကြီး  ဟိုက်ကိုမားစ်တို့ထံ အသနားခံလွှာပေးပို့ခဲ့ပြီး လူပေါင်း ၁၅၀ ၀၀၀ က ထောက်ခံကြောင်း လက်မှတ်ထိုးခဲ့ကြသည်။ 

ထိုင်းဘုရင်မင်းမြတ်သည် ၎င်းနိုင်ငံ၏အရေးကိစ္စများကိုအရေးစိုက်ရမည့်အစား စိတ်အေးလက်အေး ဇိမ်ကျကျနေရန်သာ ပိုမိုလိုလားကြောင်း ဆောင်းပါးတစ်ပုဒ်တွင် ဖော်ပြထားသည်။  

နိုင်ငံပိုင် ARD Tagesschau သတင်းအစီအစဉ်၏ ဇူလိုင်လ ထုတ်လွှင့်ချက်တွင်လည်း ထိုင်းဘုရင်သည် ဘာဗေးရီးယား၌ စားသောက်ပျော်ပါးနေထိုင်ရသည်ကိုခုံမင်ပြီး ၎င်းမွေးနေ့၌ တိုင်းသူပြည်သားများနှင့်ရှိရမည့်အစား ဘာဗေးရီးယားဇိမ်ခံဟိုတယ်တွင်သာ အချိန်ဖြုန်းချင်သူဖြစ်ကြောင်းနှင့် ပြည်သူများကလည်း ၎င်းတို့ဘုရင်ကို အဆိုးမြင်လာကြပြီဖြစ်ကြောင်း ပြောခဲ့သည်။  

Augsburger Allgemeine Zeitung သတင်းစာက ‘ဂါမစ်ချ်ဇိမ်ခံဟိုတယ်မှာ သိုသိပ်စွာနေထိုင်နေတဲ့ ထိုင်းဘုရင်ရဲ့ လူနေမှုဘဝပုံစံ’ ဟူသောခေါင်းစဉ်ဖြင့် ပြီးခဲ့သည့်လက သတင်းတစ်ပုဒ်ရေးသားခဲ့သည်။  

ဘုရင် ဝါဇီရလောင်ကွန်း၏လုပ်ရပ်များ အထူးသဖြင့် ဂျာမနီ၌နေထိုင်ရင်း ထိုင်းနိုင်ငံရေးတွင် တိုက်ရိုက်ဝင်ရောက်စွက်ဖက်မှုသည် မကြာသေးမီက ဂျာမနီပါလီမန်မှ ပြင်းထန်သောဝေဖန်မှုများကိုဖြစ်ပေါ်စေခဲ့ပြီး အစိုးရက စုံစမ်းစစ်ဆေးမှုပြုပေးရန် ကတိပြုခဲ့ရသည်။ ထိုင်းဘုရင်သည် ၂၀၁၄ ခုနှစ် စစ်အာဏာသိမ်းအပြီး ပထမဆုံးအကြိမ်အဖြစ် ကျင်းပသည့် ယမန်နှစ်ရွေးကောက်ပွဲတွင် အစ်မတော်ဖြစ်သူ ဥဘောရတနာမဟီဒေါ ဝင်ရောက်ယှဉ်ပြိုင်မည့်အစီအစဉ်ကိုလည်း ဝါဇီရလောင်ကွန်းက ဗီတိုအာဏာသုံးကာ ပယ်ချခဲ့သည်။ 

အတိုက်အခံ Greens ပါတီမှ အမတ်ဖြစ်သူ ဖရီးယော့ဖ်ရှမစ်က ဂျာမနီ၌နေထိုင်ပြီး ထိုင်းနိုင်ငံရေး၌ ကြားဝင်မှုများပြုလုပ်ခြင်းသည် လျော်ကန်မှုမရှိကြောင်း This Week In Asia အစီအစဉ်သို့ ပြောခဲ့သည်။ ပါတီနိုင်ငံခြားရေးမူဝါဒကော်မတီနှင့် အရှေ့တောင်အာရှဆိုင်ရာကျွမ်းကျင်သူ ရှမစ်က ပြီးခဲ့သည့်သီတင်းပတ်၌ နိုင်ငံခြားရေးဝန်ကြီး ဟိုက်ကိုမားစ်နှင့် ပါလီမန်၌တွေ့ဆုံစဉ် အဆိုပါအကြောင်းအရာကို တိုင်ကြားခဲ့သည်။  

ထိုင်းဘုရင်သည် စတန်းဘာ့ဂ်ရေကန်သဘာဝအလှကို အပေါ်စီးမှကြည့်ရှုနိုင်သော တုဇင်းမြို့၌နေအိမ်ပိုင်ဆိုင်ထားကာ ဂျာမနီ၌နေထိုင်ခြင်းသည်ကောင်းသောအရာဖြစ်သော်လည်း နိုင်ငံတွင်း၌ နိုင်ငံခြားသားအကြီးအကဲတစ်ဦးက လွန်လွန်ကဲကဲနှင့်တရားမဝင်ပြုမှုနေမှုကို ဂျာမနီအစိုးရက အဘယ့်ကြောင့် လပေါင်းများစွာသည်းခံနေလဲဆိုသည်ကို သိချင်ကြောင်း ရှမစ်က ပြောသည်။ 

နိုင်ငံကြားရေးဝန်ကြီး မားစ်က အစိုးရအနေဖြင့် ဘာဗေးရီးယားတွင် ထိုင်းဘုရင်နှင့်ပတ်သက်၍ ဖြစ်ပျက်နေသောအကြောင်းအရာများနှင့် ထူးခြားသောသတင်းများကို အပြည့်အဝသတိထားမိကြောင်းနှင့် စုံစမ်းစစ်ဆေးသွားမည်ဖြစ်ကြောင်း ကတိပြုခဲ့သည်။  

မားစ်က “ကျွန်တော်တို့နိုင်ငံထဲရောက်နေတဲ့ ဧည့်သည်တွေက သူတို့နိုင်ငံအတွက် လုပ်ငန်းတွေ လုပ်ဆောင်နေကြတယ်ဆိုတဲ့အချက်ကို ဂျာမနီအစိုးရအမြင်အနေနဲ့ သဘောတူညီမှုမရှိပါဘူး။ အဲဒီအတွက် ရပ်တည်ပေးသွားမှာမဟုတ်ပါဘူး။ ထိုင်းနဲ့ပတ်သက်တဲ့မူဝါဒတွေကို ဂျာမနီမြေပေါ်မှာ မလုပ်သင့်ဘူးဆိုတာကို ရှင်းရှင်းလင်းလင်းပြောရပါမယ်” ဟု ဆိုသည်။ ၂၀၁၉ ခုနှစ်တွင် ပြန်လည်စတင်ခဲ့သော အလားအလာအရှိသော လွတ်လပ်သောကုန်သွယ်မှုဆိုင်ရာသဘောတူညီချက်နှင့်ပတ်သက်ပြီး ဆွေးနွေးမှုများကို ဘုရင့်အပြုအမူများကြောင့် ဆိုင်းငံ့ထားရန် ရှမစ်က ဂျာမနီအစိုးရနှင့်ဥရောပသမဂ္ဂကို တိုက်တွန်းထားသည်။ ထို့ပြင် ရှမစ်က ပါလီမန်ပြန်လည်ကျင်းပမည့် နောက်သီတင်းပတ်တွင် အဆိုပါကိစ္စကို အားတက်သရော ဆက်လိုက်တိုက်တွန်းသွားရန် စီစဉ်ထားသည်။  

“နိုင်ငံခြားရေးဝန်ကြီး မားစ်ရဲ့မှတ်ချက်တွေက အရေးကြီးတဲ့ ပထမအဆင့်မှာ ရှိခဲ့ပေမယ့် နောက်ထပ် အရေးယူဆောင်ရွက်မှုတွေလုပ်ဖို့ လိုနေပါသေးတယ်။ ထိုင်းနဲ့ ကုန်သွယ်ရေးသဘောတူညီချက်ဆိုင်းငံ့ရေးကိစ္စကိုတင်ပြရတဲ့ရည်ရွယ်ချက်က  ကျွန် တော်တို့ရဲ့ စံတန်ဖိုးတွေအတွက် ရပ်တည်ဖို့နဲ့ ဒီမိုကရေစီကို ထောက်ခံဖို့ ဖြစ်ပါတယ်” ဟုဆိုသည်။  

ထိုင်းနိုင်ငံ၏ တင်းကျပ်သော စည်းမျဉ်းခံဘုရင်ဆိုင်ရာဥပဒေများကို ချိုးဖောက်သည်ဟု အစိုးရ၏စွပ်စွဲမှုကိုခံထားရသော  ထိုင်းဘုရင်စနစ်ကိုဝေဖန်သူ အန်ဒရူးမက်ဂရက်ဂေါမာရှယ်က ဂျာမနီပါလီမန်နှင့်မီဒီယာများမှ ဖိအားပေးမှုများလာခြင်းက နိုင်ငံတွင်း၌လာရောက်နေထိုင်သော ထိုင်းဘုရင်အား မငြင်းဆန်ဝံ့သည့်အခြေအနေသို့ ရောက်ရှိစေနေသည်ဟု ပြောသည်။  

“သံတမန်ရေးရာပြဿနာတွေပေါ်ပေါက်လာတာကြောင့် ထိုင်းဘုရင်အနေနဲ့ ဂါမစ်ရှ်ပါတီကာချန်မြို့မှာ နေတာဟာ ပိုပြီးအရှက်ရစရာဖြစ်လာလိမ့်မယ်လို့ ထင်ပါတယ်။ မီဒီယာရဲ့အာရုံစိုက်မှု တိုးလာတာနဲ့အမျှ ဂျာမနီမှာ သိပ်မထင်မရှား အတိသုခအပြည့်နဲ့နေထိုင်ခဲ့တဲ့ ဘုရင့်ရဲ့နေ့ရက်တွေဟာ မကြာခင် အတိတ်ကဖြစ်ရပ်တစ်ခုသာ ဖြစ်လာလိမ့်မယ်။ သူက အများနဲ့မတူ တမူထူးတဲ့ အဝတ်အစားတွေဝတ်ပြီး ဈေးဝယ်ထွက်တာ ဒါမှမဟုတ် စက်ဘီးပတ်စီးတာတွေကို နှစ်သက်သူဖြစ်ပါတယ်။ သူက အခု မီဒီယာတွေမှာ ပုံသေနေရာယူလာပြီး ရှေ့လျှောက် အာရုံစိုက်ခံရတော့မှာပါ” ဟု ယခင်ဘန်ကောက်အခြေစိုက်သတင်းသမားဖြစ်သူ မာရှယ်က ဆိုသည်။