အောက်တိုဘာ ၂၅
ပြင်သစ်သမ္မတ အီမန်နျူရယ် မက်ခရွန်အနေနဲ့ စိတ်ကျန်းမာရေး စစ်ဆေးမှု ခံယူဖို့ လိုနေတယ်ဆိုပြီး တူရကီသမ္မတ ရီဆက် အာဒိုဂန်ဘက်က တိုက်ခိုက်ပြောဆိုခဲ့တဲ့ မှတ်ချက်စကားတွေ ထွက်ပေါ်ပြီးနောက် ယင်းကိစ္စနဲ့ ပတ်သက်လို့ ဆွေးနွေးတိုင်ပင်ဖို့ တူရကီဆိုင်ရာ ပြင်သစ်သံအမတ်ကို ပြင်သစ် အစိုးရက အောက်တိုဘာ ၂၄ ရက်မှာ ပြန်လည်ခေါ်ယူထားခဲ့ပါတယ်။
မြေထဲပင်လယ်ဒေသ အရှေ့ပိုင်းရှိ ပင်လယ်ရေကြောင်း အခွင့်အရေး၊ လစ်ဗျား၊ ဆီးရီးယားနဲ့ ယခုနောက်ဆုံး နာဂေါ်နို-ကာရာဘက်ခ် နယ်မြေအရေး အာမေးနီးယားနဲ့ အဇာဘိုင်ဂျန်အကြား ပဋိပက္ခစစ်ပွဲ အပါအဝင် ကိစ္စရပ် တွေနဲ့ပတ်သက်လို့ ပြင်သစ်နဲ့ ယင်းရဲ့ နေတိုးမဟာမိတ်အကြား ရှားစောင်းစေးနဲ့ မျက်ချေး ဆိုသလို ဖြစ်နေခဲ့တာ ဖြစ်ပါတယ်။
ဒါပေမယ့် အစွန်းရောက် အစ္စလမ်ဘာသာကို ဆန့်ကျင်တဲ့ ပြင်သစ်ရဲ့ လော်ကီရေးရာ တန်ဖိုးတွေကို ကာကွယ်ဖို့ မက်ခရွန် ရပ်တည်ကာကွယ်တဲ့ ကမ်ပိန်းတစ်ခုကြောင့် အထူးသဖြင့် လက်ရှိအချိန်မှာ အန်ကာရာအနေနဲ့ အလွန် စိတ်ဆိုးဒေါသထွက်လျက် ရှိပါတယ်။ အစွန်းရောက် အစ္စလမ်ဘာသာကို ဆန့်ကျင်တဲ့ ပြင်သစ်ရဲ့ လော်ကီရေးရာ တန်ဖိုးတွေကို ကာကွယ်ရေးအပေါ်မှာလည်း ယခုလထဲ ပြင်သစ်မှာ တမန်တော် မိုဟာမက်ရဲ့ အငြင်းပွားဖွယ် ကာတွန်းတစ်ခုကို တပည့်တွေကို ပြသခဲ့တဲ့ ကျောင်းဆရာတစ်ဦး ခေါင်းဖြတ်အသတ်ခံရတဲ့ ဖြစ်စဉ်တစ်ခုကလည်း တွန်းအားတစ်ခု ဖြစ်စေခဲ့ပါတယ်။
“သမ္မတ အာဒိုဂန်ရဲ့ မှတ်ချက်စကားတွေက လက်ခံနိုင်စရာ မရှိပါဘူး၊ တရားလွန်ကဲမှုနဲ့ ရိုင်းစိုင်းမှုက နည်းလမ်းတစ်ခု မဟုတ်ပါဘူး၊ အာဒိုဂန်ဘက်က သူ့ရဲ့ မူဝါဒကို လမ်းကြောင်းပြောင်းဖို့ ကျွန်တော်တို့ တောင်းဆိုပါတယ်၊ ဘာလို့လဲဆိုတော့ ဒါက ရှုထောင့်ကဏ္ဍတိုင်းမှာ အန္တရာယ် ရှိလို့ပါ” လို့ ပြင်သစ်သမ္မတရုံး အရာရှိတစ်ဦးက ပြောသွားပါတယ်။
ဒါ့အပြင် တစ်မူထူးခြားတဲ့ လုပ်ဆောင်မှုတစ်ခုအနေနဲ့ ပြင်သစ်အစိုးရဟာ တူရကီဆိုင်ရာ ပြင်သစ်သံအမတ်ကြီးကို ပြန်လည်ခေါ်ယူထားပြီး ဒီအခြေအနေနဲ့ပတ်သက်လို့ သမ္မတ မက်ခရွန်နဲ့ ဆွေးနွေးသွားစေဖို့ ရှိနေတယ်လို့ သိရပါတယ်။
ဒါ့အပြင် ပါရီမြို့ပြင်မှာ ကျောင်းဆရာ ဆန်မြူရယ် ပတ်တီ ခေါင်းဖြတ်သတ်ခံရမှု ဖြစ်စဉ် ဖြစ်ပြီးနောက်မှာလည်း တူရကီသမ္မတဆီကနေ စာနာထောက်ထားကြောင်း မက်ဆေ့ချ် ပေးပို့တာမျိုး မရှိတာကိုလည်း ပြင်သစ်အနေနဲ့ မှတ်ချက်ပြုထားကြောင်း ပြင်သစ်သမ္မတအိမ်တော်မှ အမည်မဖော်လိုသူ တာဝန်ရှိသူတစ်ဦးက ပြောပါတယ်။
အစောပိုင်းတုန်းကတော့ ပြင်သစ်မှာ မွတ်ဆလင် လူနည်းစုအပေါ်မှာ ထားတဲ့ မက်ခရွန်ရဲ့ မူဝါဒတွေနဲ့ပတ်သက်လို့ အာဒိုဂန်က ဝေဖန်ထားခဲ့ပြီး ပြင်သစ်သမ္မတအနေနဲ့ စိတ်ကျန်းမာရေး စစ်ဆေးမှု ခံယူဖို့ လိုနေတယ်လို့ ပြောခဲ့တာ ဖြစ်ပါတယ်။
“ဒီ မက်ခရွန် ဆိုတဲ့ ပုဂ္ဂိုလ်က အစ္စလမ်ဘာသာနဲ့ မွတ်ဆလင်တွေနဲ့ပတ်သက်လို့ ဘာကြောင့် ပြဿနာဖြစ်နေရတာလဲ” လို့ အာဒိုဂန်က မေးခွန်းထုတ်ခဲ့ပါတယ်။
“မက်ခရွန် အနေနဲ့ စိတ်ပိုင်းဆိုင်ရာ ကုသမှု ခံယူဖို့ လိုနေပါပြီ” လို့ အာဒိုဂန်က တိုက်ခိုက်ပြောဆိုခဲ့ပါတယ်။
ဒ့ါအပြင် ၂၀၂၂ ရွေးကောက်ပွဲတွေမှာ မက်ခရွန် ထပ်နိုင်ဖို့ သူ မမျှော်လင့်ဘူးလို့လည်း အာဒိုဂန်က ပြောသွားပါတယ်။
အာဒိုဂန်အနေနဲ့ ၎င်းရဲ့ သဘောထားရပ်တည်ချက်နဲ့ပတ်သက်လို့ အပြောင်းအလဲလုပ်ဖို့ တောင်းဆိုချက်တွေကို အချိန်နှစ်လအတွင်း ပြန်လည် တုံ့ပြန်အဖြေပေးရမှာဖြစ်သလို မြေထဲပင်လယ်အရှေ့ပိုင်းမှာ တူရကီရဲ့ အန္တရာယ် ကြီးတဲ့ စွန့်စားခန်းတွေနဲ့ ကာရာဘက်ခ်အရေး အဇာဘိုင်ဂျန်ကို ထောက်ခံပြီး လုပ်ဆောင်နေတဲ့ တာဝန်မဲ့တဲ့ အပြုအမူတွေကို အဆုံးသတ်ရမယ်လို့ ပြင်သစ်သမ္မတအိမ်တော် တာဝန်ရှိသူတစ်ဦးက ပြောသွားပါတယ်။
“ဒီနှစ်ကုန်မတိုင်မီ အစီအမံတွေကို လုပ်သွားဖို့ လိုပါတယ်” လို့ ၎င်းက ပြောသွားပါတယ်။
