အောက်တိုဘာ ၂၂

လိင်တူစုံတွဲများကို လက်တွဲဖော်အဖြစ် လက်မှတ်ထိုးခွင့်ပြုသည့် ဥပဒေဆိုင်ရာ အသိအမှတ်ပြုနည်းလမ်းကို ပုပ်ရဟန်းမင်းကြီး ဖရန်စစ်က ပွင့်ပွင့်လင်းလင်း ထောက်ခံကြောင်း ထုတ်ဖော်ခဲ့ရာ ယင်းက ကက်သလစ်အသင်း တော်အတွင်းရှိ ၎င်း၏ ကွန်ဆာတေးဗစ် အတိုက်အခံများကို ဒေါသထွက်စေဖွယ် ရှိသည်။

ပုပ်ရဟန်းမင်းကြီး ဖရန်စစ်၏ မှတ်ချက်စကားများသည် အောက်တိုဘာ ၂၁ ရက် ရောမရုပ်ရှင်ပွဲတော်၌ ပွဲဦးထွက်ပြသခဲ့သည့် မှတ်တမ်းရုပ်ရှင် Francesco ၏ အင်တာဗျူးတစ်ခုတွင် ပြောကြားထားခြင်း ဖြစ်သည်။

“လိင်တူဆက်ဆံသူတွေဟာ မိသားစုတစ်စုထဲမှာ ရှိဖို့ အခွင့်အရေးတစ်ခု ရှိပါတယ်၊ သူတို့ဟာလည်း ဘုရားရဲ့ သားတော် သမီးတော်တွေပါပဲ၊ သူတို့ဟာ မိသားစုတစ်စုအတွက် အခွင့်အရေး ရှိပါတယ်၊ ဒါနဲ့ပတ်သက်လို့ ဘယ်သူ့ကိုမှ ပစ်ပယ်မထားသင့်သလို စိတ်မချမ်းမြေ့အောင်လည်း မလုပ်သင့်ပါဘူး၊ ကျွန်ုပ်တို့ ဖန်တီးရမှာက လိင်တူချင်းလက်ထပ်သူတွေကို တန်းတူညီမျှအခွင့်အရေးပေးထားတဲ့ ဥပဒေတစ်ခု ဖန်တီးရမှာပါ၊ အဲဒီနည်းနဲ့ သူတို့တွေကို ဥပဒေအရ လွှမ်းခြုံပေးနိုင်မှာပါ၊ ဒီအတွက် ကျွန်ုပ် ရပ်တည်ပါတယ်” ဟု ပုပ်ရဟန်းမင်းကြီးက ပြောသည်။

အက်ဂျန်နီ အဖင်နီစကိုင်း ရိုက်ကူးပြီး ရုပ်ရှင်ဇာတ်ကားတစ်ကားစာ ကြာမြင့်ချိန် ရှိသည့် အဆိုပါ မှတ်တမ်းရုပ်ရှင်သည် ပြီးခဲ့သည့် ခုနစ်နှစ်ခွဲ ကာလအတွင်း ပုပ်ရဟန်းမင်းကြီး၏ ရာထူးကာလအတွင်း ဇာတ်လမ်းကို ပြောပြထားပြီး COVID-19 ကပ်ရောဂါမတိုင်မီ ၎င်းသွားရောက်ထားခဲ့သည့် ခရီးစဉ်များနှင့် ခရစ်ယာန်အသင်းတော်ကို လွှမ်းမိုးခဲ့သည့် လိင်ပိုင်းဆိုင်ရာ စော်ကားမှု မကောင်းသတင်းများအပေါ် ၎င်း၏ ကိုင်တွယ်ပုံတို့ကို လွှမ်းခြုံပါဝင်ထားသည်။

သဘာဝပတ်ဝန်းကျင်၊ ဆင်းရဲနွမ်းပါးမှု၊ ရွှေ့ပြောင်းသွားလာမှုနှင့် သာတူညီမျှမရှိမှု တို့အပါအဝင် ၎င်း၏ ပုပ်ရဟန်းမင်း ရာထူးကာလအတွင်း ဖရန်စစ် လုပ်ဆောင်ခဲ့သည့် ဝိသေသ လက္ခဏာရပ်များ ဖြစ်သည့် ကိစ္စရပ်များကို ယင်း မှတ်တမ်းရုပ်ရှင်က အဓိက အခြေပြုထားသည်။

ပုပ်ရဟန်းမင်းကြီးအဖြစ် ဖရန်စစ်သည် ယခင်ကာလအတွင်း လိင်တူ စုံတွဲများအတွက် civil union (ထိမ်းမြားခြင်းလောက် ဥပဒေ အခွင့်အရေး မရဘဲ လက်တွဲဖော်အဖြစ် လက်မှတ်ထိုးခွင့်) များကို မည်သည့်အခါကမှ လူသိ ရှင်ကြား ထောက်ခံခဲ့ခြင်း မရှိပေ။ သို့သော် ၎င်းသည် ယင်းကဲ့သို့ ဥပဒေ အစီအစဉ်နည်းလမ်းများကို ဗျူနိုအေးရိစ်၏ ခရစ်ယာန်ဂိုဏ်းချုပ်ဖြစ်ခဲ့ချိန်က ထောက်ခံချက်ပေးခဲ့သည်။

LGBT ဟု သိကြသော လိင်တူချစ်သူများကို ခရစ်ယာန်အသင်းတော်အနေဖြင့် ပိုမို ကြိုဆိုသင့်သည်ဟု ပြောဆိုထားခဲ့သူဖြစ်သည့် လူသိများသော ဘရင်ဂျီ ဘာသာရေးဂိုဏ်းဝင် ဖာသာ ဂျိမ်းစ် မာတင်ကလည်း “ လိင်တူ လက်ထပ်ထားသူတွေအတွက် တန်းတူညီမျှအခွင့်အရေးပေးဖို့ ပုပ်ရဟန်းမင်းကြီးရဲ့ ထောက်ခံမှုကတော့ LGBTQ တွေအပေါ် ခရစ်ယာန်ဘုရားကျောင်းရဲ့ ထောက်ခံမှုအတွက် အရေးကြီးတဲ့ ခြေလှမ်းတစ်ခု ဖြစ်ပါတယ်၊ ဒါက LGBT ဘရင်ဂျီဂိုဏ်းဝင်တွေအပါအဝင် LGBT ဖြစ်သူတွေအတွက် ၎င်းရဲ့ သင်းအုပ်ဝတ္တရားနဲ့ပတ်သက်တဲ့ ချဉ်းကပ်နည်းလမ်းနဲ့လည်း ဒါက တန်ဖိုးအရည်အသွေးချင်း တူနေပါတယ်၊ ဒါက ဒီလိုမျိုး ဥပဒေတွေကို ဆန့်ကျင်တဲ့ ခရစ်ယာန်ဘုရားကျောင်းတွေ ရှိတဲ့ နိုင်ငံတွေကိုလည်း အားကောင်းတဲ့ အချက်ပြမှုတစ်ခု ဖြစ်ပါတယ်” ဟု တွစ်တာတွင် ရေးခဲ့သည်။

ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်၏ ပြောရေးဆိုခွင့်ရှိသူတစ်ဦးကလည်း ယခုကဲ့သို့ ပုပ်ရဟန်းမင်းကြီးရဲ့ မှတ်ချက်စကားများက အလွန်ပင် အပြုသဘောဆောင်သည့် အရွေ့တစ်ခုဖြစ်သည်ဟု ပြောသည်။ လူများအနေဖြင့် ၎င်းတို့ မည်သူကို ချစ်ခင်နှစ်သက်သည် ဆိုသည့်အတွက်မျှဖြင့် မည်သည့်အခါမှ ဖိနှိပ်ခံ သို့မဟုတ် ခွဲခြားဆက်ဆံခံရခြင်း မရှိသင့်ဆိုပြီး  ဂူတာရက်စ်ကလည်း LGBT အခွင့်အရေးအပေါ် ထောက်ခံလျက် homophobia (လိင်တူချစ်ခြင်းကို ကြောက်သည့် စိတ်ရောဂါ) နှင့်ပတ်သက်၍ ပွင့်ပွင့်လင်းလင်း ပြောထားခဲ့သည်ဟု ၎င်းတို့က ဖြည့်စွက်ပြောသည်။

ဘာသာရေး ဝန်းကျင်များတွင် LGBT တန်းတူညီမျှရှိမှုအတွက် ထောက်ခံအားပေးသည့် Ozanne ဖောင်ဒေးရှင်းကလည်း ပုပ်ရဟန်းမင်းကြီး၏ မှတ်ချက်စကားများကို ကြိုဆိုသွားခဲ့သည်။ “ဒါက ကမ္ဘာတစ်ဝန်းမှာ ရှိတဲ့ သန်းနဲ့ချီတဲ့ ယောကျ်ားလျာတွေနဲ့ မိန်းမလျာ တွေကို မျှော်လင့်ချက် ယူဆောင်ပေးမှာဖြစ်သလို သူတို့တွေဟာ မိသားစုတစ်စုထဲမှာ အစိတ်အပိုင်းဖြစ်ခွင့်ရပြီး သူတို့ဟာ မိသားစုတစ်စုအတွက် အခွင့်အရေးရှိတယ်ဆိုတာနဲ့ ပတ်သက်လို့ ပုပ်ရဟန်းမင်းကြီးရဲ့ ဆန္ဒမှန်တစ်ခု ရှိထားတယ်ဆိုတာကို သိရှိစေနိုင်မှာဖြစ်တယ်”  ဟု ပြောသည်။

“သူ့ရဲ့ နှစ်သိမ့်မှု စကားလုံးတွေက LGBT အများအပြား ခံစားထားခဲ့ရတဲ့ နာကျင်မှုအပေါ် နက်ရှိုင်းတဲ့ နားလည်မှုတစ်ခု ရှိတယ်ဆိုတာကို ပြသနေပါတယ်၊ ဒါ့အပြင် LGBT ရဲ့ ယုံကြည်မှုကို သူတို့အပေါ် ခွဲခြားဆက်ဆံဖို့ အကြောင်းရင်းတစ်ခုအဖြစ် ရှုမြင်ကြသူအားလုံးကိုလည်း ဒါက သိသာထင်ရှားတဲ့ စိန်ခေါ်မှုတစ်ခု ဖြစ်စေပါတယ်” ဟု ယင်းက ပြောသည်။

၂၀၁၃ ခုနှစ် မတ်လက ပုပ်ရဟန်းမင်းကြီးအဖြစ် ရွေးကောက်တင်မြှောက်ခံရပြီးနောက်  ဖရန်စစ်သည် ၎င်း၏ အများပြည်သူသို့ ပြောသည့် ထုတ်ပြန်ချက်များတွင် LGBT များနှင့်ပတ်သက်၍ ပိုမို ပြည့်စုံပါဝင်သည့် လေသံ တစ်ခု ထုတ်ဖော်ရန် ကြိုးပမ်းထားခဲ့သည်။

ပုပ်ရဟန်းမင်းကြီး ဖြစ်လာပြီးနောက် မကြာမီ ဂေး ခရစ်ယာန်ဘုန်းကြီးများနှင့်ပတ်သက်၍ မေးခွန်းတစ်ခုကို တုံ့ပြန်စဉ် “ဒါကို ဆုံးဖြတ်ဖို့ ကျွန်ုပ်က ဘယ်သူမို့လဲ” ဟု ပုပ်ရဟန်းမင်းကြီး ဖရန်စစ်က ပြောသည်။

ပြီးခဲ့သည့်လကလည်း ပုပ်ရဟန်းမင်းကြီးသည် LGBT ကလေးငယ်များ၏ မိဘများကို ကိုယ်စားပြုသော အဖွဲ့တစ်ခုကို ပြောကြားရာတွင် “ဘုရားက မင်းတို့ရဲ့ကလေးတွေ သူတို့ ဘယ်သူပဲဖြစ်ဖြစ် မေတ္တာထားတယ်၊ ပုပ်ရဟန်းမင်းကြီးကလည်း မင်းတို့ရဲ့ကလေးတွေကို သူတို့ ဘယ်သူတွေပဲဖြစ်ဖြစ် မေတ္တာထားတယ်၊ ဘာလို့လဲဆိုတော့ သူတို့ဟာ ဘုရားရဲ့ သားတော်သမီးတော်တွေဖြစ်လို့ပါ” ဟု ပြောခဲ့သည်။

လိင်ပိုင်းဆိုင်ရာ စော်ကားမှုကနေ လွတ်မြောက်ခဲ့သူတစ်ဦးဖြစ်ပြီး ပုပ်ရဟန်းမင်းကြီးနှင့် တွေ့ဆုံခဲ့သလို မှတ်တမ်းရုပ်ရှင်တွင်လည်း ပါဝင်ခဲ့သည့် ဟွမ် ကားလို့စ်ကလည်း ၂၀၁၈ ခုနှစ်တွင် ပြောခဲ့ရာတွင် “ သူက ကျွန်တော့်ကို ခုလိုပဲ ပြောတယ်၊ ဟွမ် ကားလို့စ်၊ မင်း ဂေးဖြစ်တာ ကိစ္စမရှိပါဘူး၊ ဘုရားက မင်းကို ဒီလိုမျိုး ဖြစ်စေခဲ့ပြီး မင်းကို ဒီလိုမျိုး ချစ်ခဲ့တယ်၊ ငါ အလေးမထားပါဘူး၊ ပုပ်ရဟန်းမင်းကြီးကလည်း မင်းကို ဒီလိုမျိုးပဲ ချစ်ပါတယ်၊ မင်းဟာ မင်းဘယ်သူ ဆိုတာနဲ့ပဲ ပျော်ရွှင်ရပါမယ် လို့ ကျွန်တော့်ကို ပြောခဲ့တယ်” ဟု ဟွမ် ကားလို့စ်က ပြောခဲ့သည်။

အစဉ်အလာ ဘုရားကျောင်း အဆုံးအမအရ လက်ထပ်ခြင်းက အမျိုးသားတစ်ဦးနှင့် အမျိုးသမီးတစ်ဦးအကြားမှာသာလျင် ဖြစ်နိုင်ပြီး ဘုရားကျောင်းအနေဖြင့် လိင်တူပေါင်းဖက်ခြင်းကို ဥပဒေအရ အသိအမှတ်ပြုခြင်းကို ဆန့်ကျင်ထားခဲ့သည်။

၂၀၀၃ ခုနှစ်တွင် လိင်တူချင်းပေါင်းဖော်မှုကို ဥပဒေအရ အသိအမှတ်ပြုခြင်းကို မည်သည့်အတွက်ကြောင့် ဆန့်ကျင်ရန် လိုသည်ဆိုသည့်နှင့့်ပတ်သက်၍ ဗာတီကန် စာရွက်စာတမ်းတစ်ခုကို စီစဉ်တင်ပြခဲ့ပြီး၊ အဘယ်ကြောင့် ဆိုသော် ၎င်းတို့က အခြေခံ လူ့ကျင့်ဝတ်တန်ဖိုးအချို့ကို ပိတ်ဆို့ပြီး၊ လက်ထပ်ခြင်း၏ အလေ့အထကို တန်ဖိုးကျစေသည်ဟု ဆိုခဲ့သည်။

ထုတ်ပြန်ချက်များကြောင့်လည်း ပုပ်ရဟန်းမင်းကြီး၏ ရှေးရိုးစွဲဝါဒီ အတိုက်အခံများကို ဒေါသထွက်စေခဲ့ပြီး ယင်းသည် ခရစ်ယာန်အသင်းတော်ကို တိုးတက်တီထွင်သော တန်ဖိုးများဆီ ပြောင်းရွှေ့ရန် အားထုတ်မှုတစ်စိတ် တစ်ဒေသအဖြစ် ၎င်းတို့က သတ်မှတ်သည်။ အချို့က လူသိရှင်ကြားပင် ၎င်းအား တိုက်ခိုက်ပြောဆိုထားခဲ့ပြီး မိစ္ဆာဒိဋ္ဌိဟုပင် စွပ်စွဲခဲ့ကြသည်။

ရုရှားနွယ်ဖွား ဆုရဒါရိုက်တာတစ်ဦးဖြစ်သည့် အဖင်နီစကိုင်းက ၎င်းအနေဖြင့် ယခု မှတ်တမ်းရုပ်ရှင်ကို နေအိမ်တွင် ထုတ်လွှင့်ပြသမှုအတွက် ဖြန့်ချိရန် မျှော်လင့်ထားသည်ဟု ပြောသည်။

“ကမ္ဘာကြီးပေါ်က အစွန်းပိုင်း အဖျားပိုင်းတွေဆီ သူ မသွားရောက်နိုင်သေးဘူးဆိုရင် ခုလောလောဆယ်မှာ သူ့ရဲ့ စကားလုံးတွေကပဲ ခရီးသွားနိုင်မှာဖြစ်တယ်၊ ဒါကြောင့်လည်း ခုအချိန်မှာ ဒီရုပ်ရှင်ကို ဖြန့်ချိဖို့ ကျွန်တော့် အတွက် အရေးကြီးနေတာ ဖြစ်တယ်၊ ဒါမှလည်း သူ့ရဲ့ စကားလုံးတွေ၊ သူ့ရဲ့ လုပ်ဆောင်ချက်တွေဟာ ကမ္ဘာတစ်ဝန်း ဖြန့်ကျက်သွားလာနိုင်မှာဖြစ်တယ်” ဟု ၎င်းက ပြောသွားခဲ့သည်။