အောက်တိုဘာ ၂၁
နာဂေါ်နိုကာရာဘတ်ခ်တိုက်ပွဲရဲ့ ရှေ့တန်းစစ်မျက်နှာမှာတည်ရှိနေတဲ့ အဇာဘိုင်ဂျန်က တာတာမြို့ဟာ ပြီးခဲ့တဲ့ရက်တွေက အာမေးနီးယားရဲ့လက်နက်ကြီးပစ်ခတ်မှုတွေကို ထပ်တလဲလဲခံနေကြရပြီး ပြည်သူတွေဟာ ကိုရိုနာဗိုင်းရပ်စ်ရဲ့ခြိမ်းခြောက်မှုကိုတောင် မေ့လျော့နေကြပါတယ်။
အာမေးနီးယားနဲ့ အဇာဘိုင်ဂျန်အကြား သွေးထွက်သံယိုတိုက်ပွဲတွေကြောင့် နိမ့်ကျနေတဲ့ကျန်းမာရေးစနစ်တွေ ထိခိုက်ခံရပြီး ဗိုင်းရပ်စ်ပျံ့နှံ့မှုအရှိန်မြင့်လာမှာကို စိုးရိမ်တယ်လို့ ကမ္ဘာ့ကျန်းမာရေးအဖွဲ့ (WHO) က ပြောဆိုခဲ့ပါသေးတယ်။
WHO ရဲ့ ပြောရေးဆိုခွင့်ရှိသူ တာရစ်ဂျက်ဆာရီဗစ်က ၎င်းတို့ထပ်တလဲလဲ ပြောခဲ့တဲ့အတိုင်း ကိုဗစ်-၁၉ က နိုင်ငံ နယ်စပ်မရွေးဖြတ်ကျော်ကူးစက်နေတာဖြစ်တယ်လို့ ပြီးခဲ့တဲ့သီတင်းပတ်က သတိပေးခဲ့ပါတယ်။
အဇာဘိုင်ဂျန် ရှေ့တန်းစစ်မျက်နှာ တာတာမြို့က မြေအောက်ခန်းတွေမှာ စစ်ဘေးရှောင်ပုန်းအောင်းနေတဲ့ မိသားစုတွေဟာလည်း ဗိုင်းရပ်စ်ခြောက်လှန့်မှုတွေကို တားဆီးနိုင်ဖို့ သူတို့တတ်နိုင်သလောက် ကြိုးစားကာကွယ် နေကြပါတယ်။
မြေအောက်ခန်းက စစ်ဘေးရှောင်တွေဟာ ရေချိုးဖို့နဲ့ အစားအစာအချို့ပြန်နွေးဖို့လိုတဲ့အခါမှသာ သူတို့ရဲ့တိုက်ခန်းတွေဆီ ပြန်တက်သွားကြပြီး ကုတင်နဲ့ အိပ်ရာခင်းတွေ ခင်းကျင်းထားတဲ့ မြေအောက်ခန်းထဲဆီ ပြန်ဆင်းပြီး နေကြပါတယ်။
အချို့တိုက်တွေရဲ့အပြင်ဘက်နံရံတွေဟာလည်း လက်နက်ကြီးဒဏ်တွေကြောင့် ပျက်စီးနေပြီဖြစ်ပါတယ်။
ပျက်စီးနေတဲ့နေအိမ်တွေနဲ့ ရိက္ခာအကန့်အသတ်နဲ့နေရတဲ့သူတို့အဖို့ နှာခေါင်းစည်းနဲ့ ခပ်ခွါခွါနေရမယ့်စဉ်းမျဉ်းဆိုတာက ဒုတိယဦးစားပေးအဆင့်သာ ဖြစ်ပုံရပါတယ်။
ပြင်ပနဲ့ထိတွေ့ဆက်ဆံရတာဆိုလို့ အနီးအနားရွာက အကူအညီလာပေးတဲ့ ဆွေမျိုးအနည်းငယ်နဲ့ အစိုးရရဲ့ထောက်ပံ့မှုတွေလာပေးတဲ့ လုပ်သားတွေသာ ရှိပါတယ်။ ဒါပေမယ့် လူတစ်ယောက်ကနေ မြောက်အောက်ခန်းထဲက တခြားလူတွေကိုပါ ရောဂါကူးစက်ခံရမယ့်အန္တရာယ်ကတော့ စိုးရိမ်ဖွယ်အခြေအနေဖြစ်ပါတယ်။
မြေအောက်ခန်းမှာ ပုန်းခိုနေတဲ့ အဇာဘိုင်ဂျန်က ကျောင်းအုပ်ကြီးဖြစ်တဲ့ ဗာဖာဒါအလီယက်ဆိုသူက “ကျွန်တော်တို့တွေ ကိုရိုနာဗိုင်းရပ်စ်နဲ့ စစ်ပွဲကို တစ်ချိန်တည်းမှာပဲ စိုးရိမ်ကြောင့်ကြနေကြရတာပါ။ သန့်ရှင်းဖို့ အရက်ပြန် တွေနဲ့လည်း ပွတ်တိုက်ရတယ်။ ပါးစပ်နှာခေါင်းစည်းတွေကိုလည်း ဆောင်ထားကြပါတယ်။ လိုအပ်တာမှန်သမျှတော့ ရှိတယ်ထင်တာပဲ” လို့ဆိုပါတယ်။
အဇာဘိုင်ဂျန်အမျိုးသမီးတစ်ဦးက “တိုက်ပွဲကြောင့် ကိုရိုနာဗိုင်းရပ်စ်ကို ခဏလောက် မေ့သွားတယ်ဆိုတာ အမှန်ပါပဲ။ ကျွန်မတို့အားလုံး စစ်ပွဲကိုပဲ အာရုံရောက်ပြီး စိုးရိမ်နေကြတာ။ အာမေးနီးယား ရန်သူတွေသိမ်းပိုက် ထားတဲ့ ကျွန်မတို့နယ်မြေတွေကို လွတ်မြောက်စေချင်တယ်” လို့ ပြောပါတယ်။
ရာဆူလ်အလီယက်ဗ်ဆိုသူကလည်း စစ်ပွဲနဲ့ ကိုရိုနာဗိုင်းရပ်စ်ကို ခုလိုပဲ နှိုင်းယှဉ်ပြောပြပါတယ်။
“ကိုဗစ်-၁၉ က စစ်ပွဲနဲ့နှိုင်းယှဉ်လိုက်ရင် မပြောပလောက်ပဘူး။ အာမေးနီးယားတွေက ကိုရိုနာဗိုင်းရပ်စ်ထက်တောင် ပိုဆိုးပါသေးတယ်။ ပထမဆုံး အာမေးနီးယားတွေကိုပဲ အာရုံစိုက်ပြီး သူတို့ကို ရှင်းပစ်ရပါမယ်။ ဘုရားသခင်ရဲ့အကူအညီနဲ့ အချိန်ကျရောက်လာပါပြီ။ အဲဒီကိစ္စရှင်းပြီးမှပဲ ကိုရိုနာဗိုင်းရပ်စ်ဘက်ပြန်လှည့်ရမှာပါ” လို့ဆိုပါတယ်။
ဟင်းသီးဟင်းရွက်တွေဟာ ကိုရိုနာဗိုင်းရပ်စ်တိုက်ဖျက်ဖို့ အကောင်းဆုံးကုထုံးတွေထဲကတစ်ခုလို့ အီဒင်ဆိုသူက ယုံကြည်ထားပါတယ်။
အီဒင်က “ဒါတွေက ရွှေဖရုံတွေပါ။ ကျွန်တော်တို့ ဥယျာဉ်ခြံထဲမှာ စိုက်ပျိုးထားတဲ့သီးနှံတွေပါ။ ဖရုံတွေကို စိတ်ပြီးတော့ သကြားတွေဖြူးလိုက်တယ်။ တစ်ပတ် ၁၀ ရက်လောက်ထားပြီးမှ စားပါတယ်။ ဖရုံတွေက ကျန်းမာရေး နဲ့ညီညွတ်တဲ့အစားအစာတွေဖြစ်ပြီး ကိုရိုနာဗိုင်းရပ်စ်အတွက် အကောင်းဆုံးအစားအစာဖြစ်ပါတယ်။ ကိုရိုနာဗိုင်းရပ်စ်တိုက်ဖျက်ဖို့ ရွှေဖရုံတွေကို စားကြပါတယ်” လို့ဆိုပါတယ်။
အဇာဘိုင်ဂျန်မှာ စက်တင်ဘာလဆန်းကစလို့ အောက်တိုဘာလလယ်အတွင်း ကိုဗစ်-၁၉ ကူးစက်ခံရသူ ၁၅၀ နီးပါးရှိသာရှိခဲ့ရာက ဒီသီတင်းပတ်အတွင်းမှာပဲ တစ်နေ့တာကူးစက်သူ ၆၀၀ ကျော်အထိ တွေ့ရှိခဲ့ပါတယ်။
အဇာဘိုင်ဂျန်သမ္မတ အီဟမ် အလီယက်ဗ်က လာမယ့်သီတင်းနှစ်ပတ်မှာ စာသင်ကျောင်းတွေနဲ့ တက္ကသိုလ်တွေအားလုံးကို ပိတ်ပြီး မြို့တော်ဘာကူရဲ့ မြေအောက်ရထားလိုင်းပြေးဆွဲမှုကိုလည်း ရပ်ဆိုင်းသွားမှာဖြစ်တယ်လို့ ကြေညာခဲ့ပါတယ်။
