မြန်မာနိုင်ငံတွင် အစိုးရသစ်ထွက်ပေါ်လာသော်လည်း မြန်မာနှင့် ထိုင်းနိုင်ငံကြားက ဆက်ဆံရေးကို အနှောင့်အယှက်ဖြစ်လာမည် မဟုတ်ကြောင်း မြန်မာနိုင်ငံဆိုင်ရာ ထိုင်းသံအမတ်ကြီး ပီဆာနုဆူဝါနာဂျာတာက ပြောသည်။
ဘန်ကောက်ပို့စ်နှင့် အင်တာဗျူးရာတွင် ပီဆာနုက မြန်မာနိုင်ငံ၏ အပြုသဘောနိုင်ငံရေးပြောင်းလဲမှုများက အစိုးရသစ်ထွက်ပေါ်လာစေမည်ဖြစ်ပြီး စစ်တပ်ကျောထောက်နောက်ခံ ပြည်ခိုင်ဖြိုးပါတီနှင့် အတိုက်အခံNLD ပါတီတို့က နိုင်ငံပြုပြင်ပြောင်းလဲရေးနှင့် အမျိုးသားပြန်လည်ရင်ကြားစေ့ရေး တည်ဆောက်သွားကြဖို့ မူထားရှိသူများဖြစ်ကြောင်း ပြောသည်။
အာဆီယံနိုင်ငံများကြား ချိတ်ဆက်မှုတည်ဆောက်ခြင်းဖြင့် ထိုင်းကဲ့သို့သော အိမ်နီးချင်းနိုင်ငံများနှင့် နွေးထွေးသော ဆက်ဆံရေး ခိုင်မာသွားစေမည်လည်းဖြစ်ကြောင်း ၎င်းက ပြောသည်။
"အစိုးရရော အတိုက်အခံရောက ပြုပြင်ပြောင်းလဲရေးအတွက် တူညီတဲ့ဦးတည်ချက်ရှိထားသူများဖြစ်တယ်။ ဒါကြောင့် အာဏာအပြောင်းအလဲဖြစ်ရင် တစ်ချို့သော ကိစ္စရပ်တွေကို အလိုက်သင့် ပြုပြင်ပြောင်းလဲသွားမှာဖြစ်တယ်။"ဟု ပီဆာနုက ပြောသည်။
