စက်တင်ဘာ ၂၁ ရက်

 နိုင်ငံတကာဘဏ်ကြီးတစ်ချို့က ဒေါ်လာ နှစ်ထရီလီယံကျော် ငွေလွှဲပို့ခြင်းကို ဖုံးအပ်ထားသော သံသယဖြစ်ဖွယ် လုပ်ဆောင်မှုပေါင်း ၂၁၀၀ ကျော် လုပ်ဆောင်ခဲ့ကြောင်း BuzzFeed News နှင့် နိုင်ငံတကာ စုံစမ်းထောက် လှမ်းဂျာနယ်လစ်အစုအဖွဲ့ကြီးဖြစ်သည့် International Consortium of Investigative Journalists အဖွဲ့သို့ ပေါက်ကြားလာသော စာရွက်စာတမ်းများအရ သိရသည်။

ICIJ က လက်ခံရရှိသော အစီရင်ခံစာများနှင့် ၁၇၆၀၀ ကျော်သော အခြားသော မှတ်တမ်းများအရ ငွေများသည် ရာဇဝတ်ပြစ်မှုလုပ်သူများထံမှလာသည် သို့မဟုတ် ရာဇဝတ်သားများထံ ပို့ဆောင်ပေးသည်ကို သိသိနှင့်ပင် အကြီးတန်းဘဏ်အရာရှိကြီးများက လိမ်လည်သူများကို ခွင့်ပြုခဲ့သည်ဟု စွဲဆိုထားသည်။

အဆိုပါဘဏ်ကြီးငါးခုမှာ JPMorgan Chase, HSBC, Standard Chartered, Deutsche Bank နှင့် Bank of New York Mellon တို့ဖြစ်ကြသည်။
 
ပြီးခဲ့သည့်နှစ်များအတွင်း တရားမဝင်သော ငွေများ ရွှေ့ပြောင်းစီးဆင်းမှုကို မည်သို့မည်ပုံ အဆင်ပြေဖြစ်မြောက်စေခဲ့သလဲ ဆိုသည်ကို ပြင်ပသို့ ပေါက်ကြားလာခဲ့သည့် ထောင်နှင့်ချီသော စာရွက်စာတမ်းများက ပြသနေသည်။ အဆိုပါ ပေါက်ကြားလာသည့် စာရွက်စာတမ်းများကို ရာနှင့်ချီသော ဂျာနယ်လစ်များက ဝေမျှထားခဲ့သည်။

အဆိုပါ စာရွက်စာတမ်းများသည် ဘဏ္ဍာရေးဆိုင်ရာ ဥပဒေချိုးဖောက်မှုများကို ထောက်လှမ်းတားဆီးရန် ဘဏ္ဍာရေးဝန်ကြီးဌာနအောက်တွင် လည်ပတ်နေသော အေဂျင်စီတစ်ခုဖြစ်သည့် ဘဏ္ဍာရေးအမှုအခင်း ဥပဒေ စိုးမိုးထိန်းသိမ်းရေး ကွန်ရက်နှင့် ပတ်သက်သော ဖိုင် အစုအဖွဲ့၏ တစ်စိတ်တစ်ဒေသလည်း ဖြစ်သည်။

အေဂျင်စီသည် ဖြစ်နိုင်ခြေရှိသော သို့မဟုတ် ပေါ်လွင်ထင်ရှားသော ဘဏ္ဍာရေးဆိုင်ရာ ဥပဒေချိုးဖောက်မှုများကို ထောက်လှမ်းသိရှိချိန် “သံသယရှိ လုပ်ဆောင်ချက်များဆိုင်ရာ အစီရင်ခံစာများ” ကို ပြုစုရသည်။

စာရွက်စာတမ်း အထောက်အထားများကို ကမ္ဘာတစ်ဝန်းရှိ ဥပဒေစိုးမိုးရေးနှင့် ဘဏ္ဍာရေး ထောက်လှမ်းရေး အုပ်စုများထံ ဖြန့်ဝေ ဝေမျှပေးသော်လည်း အေဂျင်စီအနေဖြင့် ဘဏ္ဍာရေးဥပဒေချိုးဖောက်မှုများနှင့် ချိတ်ဆက် ပတ်သက်နေသော ဘဏ်များကို ရပ်တန့်ရန် ဖိအားမပေးခဲ့ဟု ပေါက်ကြားလာသော စာရွက်စာတမ်းများကို ရရှိထားသည့် Buzzfeed News က ဖော်ပြသည်။

JPMorgan Chase ၊ HSBC နှင့် Deutsche Bank တို့ကဲ့သို့ ဘဏ်ကြီးများသည် မနှစ်မြို့ဖွယ်အခြေအနေတွင် ပါဝင်ပတ်သက်ထားပြီးနောက်မှာပင်  ဥပဒေနှင့်မညီသော ငွေကြေးများ ရွှေ့ပြောင်းမှုကို အဆင်ပြေချောမွေ့စွာ ဖြစ်မြောက်ထားစေခဲ့သည်ဟု Buzzfeed News က ဖော်ပြသည်။

ဖိုင်များသည် ၂၀၀၀ ပြည့်နှစ်မှ ၂၀၁၇ အထိ ဆယ်စုနှစ်နှစ်စုနီးပါးအတွင်း ရွှေ့ပြောင်းမှုများ၊ အရောင်းအဝယ်အလွှဲအပြောင်းများကို အသေးစိတ်ဖော်ပြထားသည်။

“ဒီ အထောက်အထား စာရွက်စာတမ်းတွေကို ဘဏ်တွေက ပြုစုပြီး အစိုးရတွေကို ဝေမျှခဲ့ပေမယ့် အများပြည်သူကို အသိမပေးဘဲ ထားခဲ့ပါတယ်၊ ဒါကြောင့် ဘဏ်လုပ်ငန်းဆိုင်ရာ အကာအကွယ် အတုအယောင်တွေကို ဖော်ထုတ်ပြသနေသလို ရာဇဝတ်သမားတွေ သူတို့ကို အလွယ်တကူ အသုံးချသွားတာကိုပါ ပြသနေပါတယ်” ဟု Buzzfeed က ဖော်ပြသည်။

“ဘဏ်ရဲ့ ဝန်ထမ်းတွေဘက်က သတိပေးမှုတွေရှိခဲ့ပေမယ့်လည်း လူသေဆုံးစေတဲ့ မူးယစ်စစ်ပွဲတွေကနေ ရတဲ့ အကျိုးအမြတ်တွေ၊ ဖွံ့ဖြိုးဆဲနိုင်ငံတွေကနေ အလွဲသုံးစားလုပ်လာတဲ့ ငွေကြေးတွေ၊ ပွန်ဇီစနစ် Ponzi အစီအစဉ် တစ်ခုကနေတစ်ဆင့် ခိုးလာတဲ့ စုဆောင်းငွေတွေကို ဒီ ဘဏ္ဍာရေးအဖွဲ့အစည်းတွေထဲကနေ အသွင်းအထုတ် စီးဆင်းမှုတွေကို လုပ်ခွင့်ပြုခဲ့ပါတယ်” ဟု ဖော်ပြသည်။

ကမ္ဘာတစ်ဝန်း ဒေါ်လာသန်းချီ ရွှေ့ပြောင်းခဲ့သည့် ပွန်ဇီစနစ်တစ်ခု

HSBC သည် ပွန်ဇီစနစ် Ponzi Scheme (ငွေကြေးရင်းနှီးမြုှပ်နှံမှုနှင့် ဆိုင်သော လိမ်လည်လှည့်ဖြားမှု နည်းတစ်ခု) ဖြစ်သည့် WCM777 နှင့်ပတ်သက်နေသော လိမ်လည်သူများကို ကမ္ဘာတစ်ဝန်း ဒေါ်လာ သန်းချီ ရွှေ့ပြောင်းခွင့် ပြုခဲ့ကြောင်း ဘီဘီစီက ဖော်ပြသည်။

ထိုလုပ်ဆောင်မှုသည်  ရိုက်စားဂွင်တစ်ခုဖြစ်ကြောင်း အမေရိကန် စုံစမ်းစစ်ဆေးရေးအရာရှိများက ဘဏ်ကို အကြောင်းကြားခဲ့သော်လည်း WCM777 နှင့် အလုပ်လုပ်ကိုင်နေသော လိမ်လည်သူများသည် ဒေါ်လာ ၁၅ သန်း ကျော်ခန့်ကို ဆက်လက်ရွှေ့ပြောင်း၍ ရခဲ့သည်။ သတိပေးချက်ထုတ်သည့် အချိန်တွင် WCM777 သည် ပြည်နယ်သုံးခုတွင် လုပ်ငန်းလုပ်ကိုင်ခြင်းမှ တားမြစ်ခံခဲ့ရသည်။

အဆိုပါ ပွန်ဇီစနစ်သည် ကမ္ဘာတဝန်း မတူညီသော နိုင်ငံများရှိ ဆင်းရဲသော လူအစုအဖွဲ့များကို အဓိက ပစ်မှတ်ထားခဲ့ကြောင်း BBC နှင့် BuzzFeed တို့က ဖော်ပြသည်။

အင်တာပိုက အလိုရှိသော နိုင်ငံရေးသမားတစ်ဦးနှင့် ဆက်နွယ်သော ကြီးမားသည့် အရောင်းအဝယ် ငွေအလွှဲအပြောင်းများကို ဘဏ်ကြီးများက ဆောင်ရွက်ပေးခဲ့

Bank of America ၊ Citibank ၊ American Express တို့နှင့် JP Morgan Chase တို့သည် အင်တာပိုက အလိုရှိနေသော ကာဇက်စတန် မြို့တော်ဝန်ဟောင်းတစ်ဦးနှင့် ဆက်နွယ်နေသည့် ကြီးမားသော အရောင်းအဝယ် ငွေလွှဲပြောင်းမှုများကို ဆောင်ရွက်ပေးခဲ့ကြောင်း BuzzFeed News က ဖော်ပြသည်။

Viktor Khrapunov မိသားစုသည် အရောင်းအဝယ်လုပ်မှုများတွင် ဒေါ်လာာ သန်းနှင့်ချီကို ကိုင်တွယ်ရန် JP Morgan Chase ကို အသုံးပြုခဲ့သည်။ မြို့တော်ဝန်ဟောင်း Khrapunov သည် ဆွစ်ဇာလန်သို့ ထွက်ပြေး သွားခဲ့သော်လည်း ကာဇက်စတန်အစိုးရသည် ၎င်းကို လာဘ်ယူမှု စွဲချက်များဖြင့် စွဲဆိုထားသည်။

ပူတင်၏ အပေါင်းပါတစ်ဦး ဆန်ရှင်ရှောင်ရန်နှင့် ငွေကြေးခဝါချရန် ဘဏ်ကြီးတစ်ခုကို အသုံးပြုခဲ့

ရုရှားသမ္မတ ဗလာဒီမာပူတင်နှင့် အနီးကပ် အပေါင်းပါတွဲဖက်တစ်ဦးသည် ဒဏ်ခတ်ပိတ်ဆို့မှုများကို ရှောင်ရှားရန်နှင့် ငွေကြေးခဝါချရန် Barclays Bank ကို အသုံးပြုခဲ့ကြောင်း BBC က ဖော်ပြသည်။

အမေရိကန်နှင့် အီးယူတို့သည် ၂၀၁၄ ခုနှစ်က ပူတင်နှင့်နီးစပ်သော ဘီလျံနာတစ်ဦးဖြစ်သည့် Arkady Rotenberg အပေါ် အရေးယူဒဏ်ခတ်ခဲ့ပြီး ၎င်းကို အနောက်အုပ်စုဘဏ်များနှင့် လုပ်ငန်းလုပ်ကိုင်ခြင်းမှ ကန့်သတ် ပိတ်ပင်ခဲ့သည်။

Barclays ကမူ အမှားအယွင်း လုပ်ထားသည်ဟု ဝန်ခံခဲ့ခြင်းမရှိပေ။

ဒေါ်လာ ၁၄၂ သန်း တန်ကြေးရှိ သံသယဖြစ်ဖွယ် ငွေလွှဲပြောင်းမှုများ

ယူအေအီး ဗဟိုဘဏ်သည် ၂၀၁၁ ခုနှစ် နှင့် ၂၀၁၂ ခုနှစ်တွင် ဒေါ်လာ ၁၄၂ သန်း လွှဲပြောင်းမှုကို လက်ခံဆောင်ရွက်ပေးခဲ့ပြီး အဆိုပါ ငွေအလွှဲအပြောင်းများက မသင်္ကာဖွယ်ရှိသည်ဟု တံဆိပ်ခတ်ခံထားရကြောင်း BBC က ဖော်ပြသည်။

အဆိုပါ ငွေလွှဲပြောင်းမှုများက သံသယဖြစ်ဖွယ် ရှိသည်ဟု ဗြိတိန်ဘဏ်တစ်ခုက ထုတ်ဖော်မှတ်ချက်ပြုသော်လည်း ယူအေအီး ဗဟိုဘဏ်ကနေတစ်ဆင့် ငွေလွှဲပြောင်းမှုများကို တွန်းတိုက်လုပ်ဆောင်ခဲ့သည့် Gunes General Trading ကုမ္ပဏီကမူ ယင်းတို့ကို ဆောင်ရွက်ရန် ပြည်တွင်းဘဏ္ဍာရေးအဖွဲ့အစည်းများကို ဆက်လက်အသုံးပြုခဲ့သည်။

စနစ်တကျ စီစဉ်ထားသော ဥပဒေချိုးဖောက်မှု၊ အကြမ်းဖက်သမားများနှင့် မူးယစ်ကုန်သည်များအတွက် ငွေကြေးရွှေ့ပြောင်းမှုများ

စနစ်တကျ စီစဉ်ထားသော ဥပဒေချိုးဖောက်မှု၊ အကြမ်းဖက်သမားများနှင့် မူးယစ်ကုန်သည်များအတွက် ငွေကြေးရွှေ့ပြောင်းမှုများကို Deutesche Bank က အဆင်ပြေချောမွေ့အောင် လုပ်ပေးခဲ့သည်ဟု BuzzFeed က ဖော်ပြသည်။

ဘဏ်အနေဖြင့် ငွေကြေးခဝါချမှု လုပ်ငန်းများ ကြိုးပမ်းဆောင်ရွက်နေသည့် ရာဇဝတ်သားများ၏ ဒဏ် ခံနိုင်စွမ်း မရှိဟု Deutsche Bank ရှိ မန်နေဂျာများ၊ ထိပ်တန်းအမှုဆောင်များက သိရှိနေခဲ့ကြောင်း BuzzFeed News က သုံးသပ်ခဲ့သည့် အထောက်အထားစာရွက်စာတမ်းများအရ သိရသည်။

အဆိုပါ ဘဏ်၏ ထုတ်ဖော်ချက်အရ ယင်းအနေဖြင့် အမှားများကနေတစ်ဆင့် လေ့လာသင်ယူခဲ့ကြောင်းနှင့် ယခုအခါ မတူညီသော ဘဏ်တစ်ခုဖြစ်နေပြီဖြစ်ကြောင်း ထုတ်ဖော်သွားခဲ့သည်။