စက်တင်ဘာ ၁၉၊ ၂၀၂၀
တနင်္သာရီတိုင်းဒေသကြီး အတွင်းရှိ မြိတ်နှင့် ထားဝယ်မြို့နယ်တို့တွင် အသွားအလာ ကန့်သတ်ထားသည့် ရန်ကုန်ပြန် ခရီးသွား ရာဇဝင်ရှိသော သံဃာတော် နှစ်ပါး အပါအဝင် ငါးဦးတွင် COVID-19 ရောဂါပိုး တွေ့ရကြောင်း စက်တင်ဘာလ ၁၈ ရက်နေ့ ညပိုင်းက ကျန်းမာရေးနှင့် အားကစား ဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
အဆိုပါ COVID-19 ပိုးတွေ့ရှိသူများမှာ မြိတ်တွင် လေးဦးနှင့် ထားဝယ်တွင် တစ်ဦး ဖြစ်ပြီး ရန်ကုန်မြို့မှ ရောက်ရှိလာသူများ ဖြစ်ကာ သက်ဆိုင်ရာ မြို့နယ် နှစ်မြို့နယ်တွင် အသွားအလာ ကန့်သတ်စောင့်ကြည့်မှု (Quarantine) ဝင်နေသူများ ဖြစ်သည်။ ကျန်းမာရေးနှင့် အားကစား ဝန်ကြီးဌာနမှ စက်တင်ဘာလ ၁၈ ရက်နေ့ ညက ထုတ်ပြန်လိုက်သည့် COVID-19 ပိုးတွေ့ရှိသူ ၁၆၈ ဦးတွင် ၎င်းတို့ ပါဝင်လာခြင်းဖြစ်သည်။
လက်ရှိတွင် အဆိုပါ COVID-19 ပိုးတွေ့သူ ငါးဦးကို သက်ဆိုင်ရာ မြို့နယ်ရှိ ပြည်သူ့ဆေးရုံကြီးများသို့ ပို့ဆောင်ထားကြောင်း တိုင်းကျန်းမာရေးဌာနမှ တာဝန်ရှိသူထံမှ သိရသည်။
ထို့ကြောင့် တနင်္သာရီတိုင်းဒေသကြီး အတွင်း၌ COVID-19 ရောဂါ ကူးစက်ခံရသူများမှာ စက်တင်ဘာလ ၁၉ ရက်နေ့ နံနက်ပိုင်းအထိ ထားဝယ်ခရိုင်တွင် လေးဦး၊ မြိတ်ခရိုင်တွင် ကိုးဦးနှင့် ကော့သောင်းခရိုင်တွင် လေးဦး၊ စုစုပေါင်း ၁၇ ဦးအထိ ရှိနေပြီး ယင်းတို့အထဲမှ ၁၁ ဦးမှာ ပြည်တွင်း ကူးစက်ခံရသူများဖြစ်ကာ ကျန် ခြောက်ဦးမှာ ပြည်ပမှ ပြန်လာသူများ ဖြစ်ကြောင်း သိရသည်။
