ဦးသိန်းစိန်ကို သမ္မတအိုဘားမား ဖုန်းဆက်စဉ် အစိုးရသစ်ကိုနိုင်ငံ့တာဝန်များ ငြိမ်းချမ်းစွာ လွှဲပြောင်းပေးမည်ဟု ထပ်မံကတိပြုခဲ့

ဦးသိန်းစိန်ကို သမ္မတအိုဘားမား ဖုန်းဆက်စဉ် အစိုးရသစ်ကိုနိုင်ငံ့တာဝန်များ ငြိမ်းချမ်းစွာ လွှဲပြောင်းပေးမည်ဟု ထပ်မံကတိပြုခဲ့

နေပြည်တော်၊ နိုဝင်ဘာ ၁၂ ။             ။ သမ္မတဦးသိန်းစိန်ထံ အမေရိကန်သမ္မတ အိုဘားမားက နိုဝင်ဘာ ၁၂ရက် နံနက် ၈နာရီခွဲက ဖုန်းဆက်တဲ့အကြောင်း သမ္မတရုံး ဝန်ကြီးဌာနက ထုတ်ပြန်ထားသည်။

သမ္မတဦးသိန်းစိန်ကလည်း အစိုးရ၊ ပြည်ထောင်စု ရွေးကောက်ပွဲ ကော်မရှင် နိုင်ငံရေး ပါတီများနှင့် ပြည်သူများအပါအဝင် နိုင်ငံတကာ အဖွဲ့အစည်းများ၏ ပူးပေါင်း ဆောင်ရွက်ခဲ့မှုများကြောင့်   ရွေးကောက်ပွဲကြီး တည်ငြိမ်အေးချမ်းစွာ ဆောင်ရွက်နိုင်ခဲ့သည်ကို ဂုဏ်ယူသည်ဟု ပြန်လည်ပြောကြားခဲ့သည်။

ရွေးကောက်ပွဲလွန် ကြားကာလတွင်လည်း တည်ငြိမ်အေးချမ်းမှု ရှိစေရန် အရေးကြီးပြီး ၎င်းအနေဖြင့် ပါတီများ နှင့် တွေ့ဆုံရန် ညှိနှိုင်းရန် အစီအစဉ်ရှိသည်ဟု ပြောကြားခဲ့သည်။ ယင်းအပြင် သတ်မှတ်ကာအတွင်း အစိုးရသစ်ကို နိုင်ငံ့တာဝန်များ အေးချမ်းတည်ငြိမ်စွာ လွှဲပြောင်းပေးအပ်နိုင်ရေး ဆောင်ရွက်သွားမည်ဟု အိုဘားမားကို သမ္မတဦးသိန်းစိန်က ကတိပြု ပြောကြားခဲ့သည်။

သမ္မတ အိုဘားမားကမူ လွတ်လပ်ပြီး တရားမျှတသည့် အထွေထွေရွေးကောက်ပွဲကို အောင်မြင်စွာကျင်းပနိုင်သည့်အတွက် နိုင်ငံတော်သမ္မတနှင့် အစိုးရအဖွဲ့ကို ချီးကျူး ဂုဏ်ပြုကြောင်း၊   ရွေးကောက်ပွဲ အောင်မြင်မှုသည် သမ္မတကြီးအနေဖြင့် ဂုဏ်ယူရမည်ဖြစ်ပြီး သမိုင်းမှတ်တိုင် တစ်ရပ်ဖြစ်ကြောင်း၊ သမ္မတကြီး ရဲဝံ့စွာ ဖော်ဆောင်ခဲ့သည့် ပြုပြင်ပြောင်းလဲရေး ဆောင် ရွက်ချက်များသည် မြန်မာနိုင်ငံအတွက် ထူးခြားပြောင်မြောက်သော အနာဂတ်ကို ဖော်ဆောင်နိုင်ခဲ့ပြီဖြစ်ကြောင်း အမေရိကန်နိုင်ငံအနေဖြင့် မြန်မာအစိုးရနှင့် ဆက်လက်ပူးပေါင်းဆောင်ရွက်သွားမည် ဖြစ်ကြောင်း ပြောကြားခဲ့ကြောင်း ပြောကြားခဲ့သည်ဟု သမ္မတ၏ ပြောရေးဆိုခွင့်ရှိသူ ဦးရဲထွဋ်က ၎င်း၏ ဖေ့စ်ဘုတ်တွင် ရေးသားထားသည်။

အမေရိကန်နိုင်ငံ အနေဖြင့် အစိုးရသစ် တာဝန်မယူမီ ကာလအတွင်း လိုအပ်သည်များကို မြန်မာနိုင်ငံ အစိုးရနှင့် ဆက်လက်ပူးပေါင်း ဆောင်ရွက်သွားမည်ဖြစ်ပြီး မြန်မာနိုင်ငံနှင့် ပြည်သူများ၏ တည်ငြိမ်အေးချမ်းမှုနှင့် ချမ်းသာကြွယ်ဝမှုအတွက်လည်း ပိုမို ပူးပေါင်းဆောင်ရွက်သွားနိုင်မည်ဟု မျှော်လင့်ပါကြောင်း ပြောကြားခဲ့သည်ဟု သမ္မတရုံးက ထုတ်ပြန်ထားသည်။

Mizzima Weekly