စက်တင်ဘာလ ၁၁ရက်
၂၀၂ဝပြည့်နှစ်အထွေထွေရွေးကောက်ပွဲအတွက် ပြည်သူ့ရှေ့ဆောင်ပါတီ (PPP) အနေနဲ့ မဲဆွယ်ကာလ အတွင်းမှာ Tiktok ပြိုင်ပွဲတွေနဲ့ လူငယ်တွေစိတ်ဝင်စားလာအောင် ပြုလုပ်ပြီး မဲဆွဲစည်းရုံးသွားမယ်လို့ ပြည်သူ့ ရှေ့ဆောင်ပါတီ ဒုဥက္ကဋ္ဌဖြစ်တဲ့ ဦးကျော်ဇေယျက မဇ္ဈိမသတင်းဌာန ကိုပြောပါတယ်။
ဓာတ်ပုံ - သက်ကို /မဇ္ဈိမ
“အခုအစီစဉ်တွေဆွဲထားပါတယ်။ အွန်လိုင်းမီဒီယာကပါ။မနေ့ကပဲ Facebook(လူမှုကွန်ရက်စာမျက်နှာ) က Boots လုပ်လို့မရဘူး။ ပိုက်ဆံအကုန်ကျခံပါမယ်ဆိုတာတောင် ဟိုကလက်မခံတော့ဘူး။ အွန်လိုင်းကနေတတ် နိုင်သလောက် ဂိမ်းပြိုင်ပွဲလေးတွေ၊ အခုခေတ်စားနေတဲ့ Tiktok ၊ ပါတီရဲ့မူဝါဒလေးတွေကိုထည့်သွင်းပြီးတော့ ပြိုင်ပွဲလေးတွေပါ။ လူငယ်လေးတွေစိတ်ဝင်စားအောင် ပြိုင်ပွဲဖိတ်ခေါ်ပါမယ်။ PPP ရဲ့မူဝါဒ သူတို့ကိုလည်းထိုက် ထိုက်တန်တန်ဆုလေးတွေပေးပြီးတော့ အွန်လိုင်းမီဒီယာကို အားကိုးပြီးတော့ မဲဆွယ်စည်းရုံးဖို့ပြင်ဆင်နေ ပါတယ် “ လို့ ပါတီ ဒုတိယဥက္ကဋ္ဌဖြစ်သူ ဦးကျော်ဇေယျ က ပြောပါတယ်။
၂၀၂၀ ပြည့်နှစ်အထွေထွေရွေးကောက်ပွဲအတွက် ပြည်ထောင်စုရွေးကောက်ပွဲကော်မရှင်က စက်တင်ဘာ ၇ရက်နေ့က ထုတ်ပြန်ကြေညာချက်မှာတော့ ရွေးကောက်ပွဲဝင်မယ့် ပါတီတွေအနေနဲ့ Stay at Home (နေအိမ်မှာနေထိုင်ရေး) သတ်မှတ်ထားတဲ့ ပြည်နယ်၊တိုင်းဒေသကြီး ၊ မြို့နယ်နဲ့ကျေးရွာတွေကို မဲဆွယ်စည်းရုံးခြင်း ၊ အိမ်တိုင်ရာရောက်မဲဆွယ်စည်းရုံးခြင်းတွေမပြုလုပ်ရဘူးလို့ ထုတ်ပြန်ထားပါတယ်။
ဓာတ်ပုံ - သက်ကို /မဇ္ဈိမ
လက်ရှိ COVID-19 ရောဂါတွေ တစ်ကျော့ပြန် ပြန်လည်ဖြစ်ပွားတာတွေအပြင် ပြည်ထောင်စုရွေးကောက်ပွဲ ကော်မရှင်ရဲ့ သတင်းထုတ်ပြန်ချက်တွေအရ နိုင်ငံရေးပါတီငယ်တွေအနေနဲ့ ယှဉ်ပြိုင်စည်းရာရုံးမှာ အခက်အခဲ ဖြစ်နေတယ်လို့လည်း ဦးကျော်ဇေယျက ပြောပါတယ်။
“အာဏာရလက်ရှိပါတီ ကို အတိုက်ခံပါတီငယ်လေးတွေက ယှဉ်ပြိုင်ဖို့ရာ စည်းရုံးရေးမှာတော်တော်အခက်ခဲဖြစ် သွားပါတယ်။ ဒီ COVID-19 ကာလမှာ အဲလောက်ပဲပြောချင်ပါတယ် “ လို့ ဦးကျော်ဇေယျက ပြောပါတယ်။
ရန်ကုန်တိုင်းဒေသသကြီးအတွင်းက မြို့နယ် ၄၅ မြို့နယ်အနက် ၂၈ မြို့နယ်ဟာ Stay at Home (နေအိမ်မှာ နေထိုင်ရေး) အစီစဉ်မှာ အကျုံးဝင်ကြောင်းကို ကျန်းမာရေးနှင့်အားကစားဝန်ကြီးဌာနက ထုတ်ပြန်ကြေညာခဲ့ ပါတယ်။
ဓာတ်ပုံ - သက်ကို /မဇ္ဈိမ
ကျန်းမာရေးနဲ့အားကစားဝန်ကြီးဌာနအနေနဲ့ ကူးစက်ရောဂါများ ကာကွယ်နှိမ်နင်းရေးဥပဒေ ပုဒ်မ ၂၁ ပုဒ်မခွဲ (ခ) ပါ လုပ်ပိုင်ခွင့်အရ စက်တင်ဘာလ ၉ ရက်နေ့ ညပိုင်းက ရန်ကုန်မြို့အတွင်းရှိမြို့နယ် ၂၁ မြို့နယ် ကို Stay at Home (နေအိမ်တွင်နေထိုင်ရေး) အစီစဉ်မှာ အကျုံးဝင်ကြောင်း ကြေညာခဲ့တာကြောင့် မူလက ကြေညာ ထားတဲ့ ခုနှစ်မြို့နယ်အပါအဝင် Stay at Home အစီစဉ်မှာ ပါဝင်တဲ့ မြို့နယ် ၂၈ မြို့နယ်ရှိပြီဖြစ်ပါတယ်။
