စက်တင်ဘာ ၄
အသံတိတ်နေရသူများကို အင်အားပေးနိုင်မည့်၊ ငြိမ်းချမ်းရေးအတွက် ရိုးသားစွာ လုပ်ဆောင်မည့် နိုင်ငံရေးပါတီများနှင့် ပြည်သူကို အလုပ်အကျွေးပြုသော ခေါင်းဆောင်များကို မဲပေးကြရန် လာမည့် နိုင်ဝင်ဘာလ ရွေးကောက်ပွဲမတိုင်မီ မြန်မာပြည်သူများအား ကက်သလစ် ဘာသာရေးခေါင်းဆောင် ကာဒီနယ် ချားလ်စ် မောင်ဘိုက တိုက်တွန်းလိုက်သည်။
ထိုနိုင်ငံရေးပါတီများနှင့် ခေါင်းဆောင်များသည် အထက်ဖော်ပြပါ တာဝန်များကို ပဋိပက္ခကြောင့် ဒုက္ခဆိုက်နေသည့် မြန်မာနိုင်ငံတွင် ဒီမိုကရေစီမှတစ်ဆင့်၊ စီးပွားရေးဆိုင်ရာ ခိုင်မာသေချာမှုနှင့် လူမျိုး၊ ဘာသာ၊ အသားအရောင် မခွဲခြားဘဲ လုပ်ဆောင်ပေးနိုင်သူများဖြစ်စေရန် ရန်ကုန် ကက်သလစ် ဂိုဏ်းချုပ် ကာဒီနယ် ချားလ်စ် မောင်ဘိုက တိုက်တွန်းကြောင်း စက်တင်ဘာလ ၃ ရက်နေ့ ဗာတီကန် နယူးစ်တွင် ဖော်ပြထားသည်။
ကာဒီနယ် ချားလ်စ် မောင်ဘို၏ မေတ္တာရပ်ခံချက်တွင် ရခဲလှသည့် အခွင့်အရေးနှင့် မဲပေးရမည့် တာဝန်သည် မည်သည့် ဒီမိုကရေစီအတွက်မဆို အရေးကြီးကြောင်း မြန်မာနိုင်ငံသားများကို သတိပေးထားသည်။
ခိုင်မာသော ဒီမိုကရေစီဖြစ်ရေး အားပေးခြင်းသည် ပဋိပက္ခဖြင့် အသားကျပြီး အနာတရဖြစ်နေသော နိုင်ငံအတွက် ကုစားရန် တစ်ခုတည်းသော မျှော်လင့်ချက်လည်းဖြစ်ကြောင်း အာရှ ခရစ်ယာန်ဘုန်းကြီးများ ဖက်ဒရေးရှင်း ညီလာခံ (FABC) ၏ ဥက္ကဋ္ဌလည်း ဖြစ်သူ ကာဒီနယ် ချားလ်စ် မောင်ဘိုက ဗာတီကန် နယူးစ်သို့ ပြောကြားထားသည်။
ထို့အပြင် ကာဒီနယ် ချားလ်စ် မောင်ဘိုက သူ့အနေဖြင့် နိုင်ငံရေးသမားတစ်ယောက် အဖြစ်မဟုတ်ဘဲ မြန်မာ့အသိုင်းအဝိုင်း တစ်ခုလုံး၏ ကောင်းကျိုးနှင့် အားလုံးတန်းတူ ကောင်းစားရေးအတွက်သာ ဆန္ဒရှိသော ဘာသာရေးပုဂ္ဂိုလ် တစ်ဦးအဖြစ် တိုက်တွန်းခြင်း ဖြစ်ကြောင်းလည်း မေတ္တာရပ်ခံချက်တွင် ရှင်းပြထားသည်။
သက်တော် ၇၂ နှစ်အရွယ် ရှိပြီဖြစ်သည့် ကာဒီနယ် ချားလ်စ် မောင်ဘိုက မိမိ ဆန္ဒမဲပေးရမည့်သူများကို အကဲခတ် ဆုံးဖြတ်ကြရန်၊ ကျွန်ုပ်တို့အားလုံး၏ သယံဇာတများကို ဖျက်လိုဖျက်ဆီး လုပ်သွားကြပြီး ကျွန်ုပ်တို့ကို ဆင်းရဲတွင်း နက်စေသည့် လုယူတတ်သူများနှင့် ခရိုနီများကိုလည်း ရှောင်းရှားကြရန် သတိပေးသွားသည်။
၂၀၁၅ ခုနှစ်တွင် ပုပ်ရဟန်းမင်းကြီး ဖရန်စစ်က ရန်ကုန် ကက်သလစ် ဂိုဏ်းချုပ်အဖြစ် ခန့်အပ်ခြင်းခံရသော ကာဒီနယ် ချားလ်စ် မောင်ဘိုသည် မြန်မာအမျိုးသား ရင်ကြားစေ့ရေး၊ ငြိမ်းချမ်းရေးတို့အတွက် မကြာခဏ ပြောဆိုတိုက်တွန်းလေ့ရှိပြီး မြန်မာ့ရွေးကောက်ပွဲတွင် ဘာသာရေး နယ်ပယ်မှ ပုဂ္ဂိုလ်များ မဲပေးခွင့်ရရေး တောင်းဆိုသူနှင့် မြန်မာနိုင်ငံရှိ တရုတ်နိုင်ငံနှင့် ဆက်စပ်သော လုပ်ငန်းများကို ဝေဖန်ပြောဆိုသူလည်း ဖြစ်သည်။
