ရွေးကောက်ပွဲတွင် ထူးခြားဖြစ်စဉ် ၁၁၉မှုဖြစ်၊ သင်္ကန်းဝတ်၊ သီလရှင်ဝတ်ဖြင့် မဲပေးမှု ၂ကြိမ်ရှိဟုဆို

ရွေးကောက်ပွဲတွင် ထူးခြားဖြစ်စဉ် ၁၁၉မှုဖြစ်၊ သင်္ကန်းဝတ်၊ သီလရှင်ဝတ်ဖြင့် မဲပေးမှု ၂ကြိမ်ရှိဟုဆို

နေပြည်တော်၊ နိုဝင်ဘာ ၁၀ ။ ။ ပြီးခဲ့သည့် တနင်္ဂနွေနေ့က ကျင်းပခဲ့သည့် သမိုင်းဝင် ၂၀၁၅ အထွေထွေရွေးကောက်ပွဲတွင် မဲရုံပြင်ပနှင့် မဲရုံတွင်း ထူးခြားဖြစ်စဉ် ၁၁၉မှုဖြစ်ပွားခဲ့သည်ဟု ရဲတပ်ဖွဲ့ လုံခြုံရေးဆပ်ကော်မတီ၏ အစီရင်ခံစာကို ကိုးကားပြီး ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးတင်အေးက နိုဝင်ဘာ ၁၀ရက်၊ ညနေ ၆နာရီတွင် ပြောသည်။

အစီရင်ခံစာပါ ထူးခြားဖြစ်စဉ်များအနက် မဲရုံတွင်ဖြစ်ပွားမှု(၈၈)ကြိမ်နှင့် မဲရုံပြင်ပဖြစ်ပွားမှု(၃၁)မှုတို့ဖြစ်ပြီး မဲရုံတွင်းဖြစ်စဉ်များအနေဖြင့် သံဃာ၊ သီလရှင်ဝတ်ဖြင့် မဲပေးမှု ၂ကြိမ်အပါအဝင် မဲပေးစဉ် သေဆုံးမှု (၃)ကြိမ် ဖြစ်ပွားခဲ့သည်။

ထို့ပြင် မဲလက်မှတ်ဆုတ်ဖြဲမှု(၂)ကြိမ်၊ ကိုယ်စားမဲပေးမှု(၃)ကြိမ်၊ မဲလက်မှတ်ထပ်မံထုတ်ပေးမှုနှင့် မဲမှားမှု ၁၄ကြိမ်၊ မဲရုံပြောင်းရွှေ့မှု(၁)ကြိမ်၊ မဲရုံနှောက်ယှက်မှု(၆)ကြိမ်၊ မဲပေးစဉ် မူးလဲမှု(၂)ကြိမ်၊ မဲတံဆိပ်တုံး ပျောက်ဆုံးမှု(၁)ကြိမ်နှင့် မဲလက်မှတ် ပျောက်ဆုံးမှု(၁)ကြိမ်တို့ ဖြစ်ပွားခဲ့သည်။

အဆိုပါ ဖြစ်စဉ်များဖြစ်ပွားခဲ့သည့် နေရာဒေသကိုမူ အစီရင်ခံစာကို အကျဉ်းချုပ်ဖတ်ပြသွားသည့် ဦးတင်အေးက ပြောဆိုခဲ့ခြင်း မရှိပေ။

မဲရုံပြင်ပဖြစ်ပွားမှုများအနေဖြင့် မဲပေးရန်ဆော်ဩမှု ၁၃ကြိမ်၊ မဲပေးရန် လာရောက်စဉ် သေဆုံးမှု(၁)ကြိမ်၊ အခြား ဖြစ်ပွားမှု ၁၇ကြိမ်တို့ ဖြစ်သည်။

အဆိုပါ ဖြစ်စဉ်များအား အရေယူပေးရန် အမှုဖွင့်တိုင်ကြားမှု ၁၃မှုနှင့် ကော်မရှင်၏ ဖြေရှင်းပေးမှု ၃၁မှုရှိသည်ဟု ဦးတင်အေးက ပြောသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly

Tags