ဇူလိုင် ၃
"အောင်ဆန်း" ရုပ်ရှင်တွင် ဂဠုန်ဦးစောအဖြစ်သရုပ်ဆောင်ရန် သရုပ်ဆောင်ဆုပန်ထွာ၏ အမျိုးသားဖြစ်သူ ကိုဥက္ကာကျော်ကို ပထမအဆင့်ရွေးချယ်ထားကြောင်း Casting Director ဒါရိုက်တာ ပန်းချီစိုးမိုးက မဇ္ဈိမသို့ ဇူလိုင်လ ၃ရက်ကပြောသည်။
Casting Director ဒါရိုက်တာ ပန်းချီစိုးမိုးက “ ရွေးဖို့များတယ်။ မနက်ဖြန်ကို မိတ်ကပ်လိမ်းမှာ။အကြမ်းဖျဉ်းအားဖြင့်တော့ ရွေးဖို့များတယ်။ ကျန်တဲ့သူတွေက မတူတာတွေများတယ်။ သူကတော့ တော်တော်တူတယ်။ အရပ်အမောင်းလည်းနီးစပ်တယ်။ အိုင်တင်လည်းလုပ်နိုင်တယ်။ ဦးစောနေရာ သူဖြစ်ဖို့များတယ်” ဟု မဇ္ဈိမသို့ပြောသည်။
ကိုဥက္ကာကျော်အား ပထမဆင့်အနေဖြင့် ရွေးချယ်ထားပြီးဒုတိယအဆင့်အနေဖြင့် လူတွေ့စစ်ဆေးခြင်း၊သရုပ်ဆောင်မှုစစ်ဆေးခြင်း၊Character Make-up Test ပြုလုပ်ခြင်းများကိုမကြာ မီရက်ပိုင်းတွင် လုပ်ဆောင်သွားမည်ဖြစ်ကြောင်း အောင်ဆန်းရုပ်ရှင် သရုပ်ဆောင်ရွေးချယ်ရေးအဖွဲ့မှ သိရသည်။
မူလက ဂဠုန်ဦးစောအဖြစ်သရုပ်ဆောင်ရန် မြေးဖြစ်သူ ဇော်ဇော်ပိုင်သည် မိဘအုပ်ထိန်းသူများ၏ သဘောဆန္ဒအရ ပါဝင်သရုပ်ဆောင်ရန် မဖြစ်နိုင်တော့သည့်အတွက် အဆိုပါနေရာမှာလစ်လပ်လျက်ရှိသည့် အတွက် သရုပ်ဆောင်ထပ်မံရွေးချယ်ရန် လျှောက်လွှာများ ခေါ်ယူခဲ့ခြင်းဖြစ်သည်။
"အောင်ဆန်း" ရုပ်ရှင်တွင် ဂဠုန်ဦးစောအဖြစ်ပါဝင်သရုပ်ဆောင်ရန် ၂၀၂၀ ခုနှစ် ဇွန်လ ၅ ရက်နေ့တွင်ကြေငြာခေါ်ယူခဲ့ရာ Message Box မှသော်လည်းကောင်း၊ စာတိုက်မှသော်လည်းကောင်း လာရောက်လျှောက်ထားသောလျှောက်လွှာပေါင်း (၂၉) စောင်ကို လက်ခံရရှိခဲ့ပါသည်။
ထိုလျှောက်ထားသူများထဲမှ အသက်အရွယ်၊အရပ်အမောင်း၊ ရုပ်ရည်ဆင်တူမှု စသည်တို့အပေါ်မူတည်၍Casting Director ဒါရိုက်တာ ပန်းချီစိုးမိုးနှင့်ဒါရိုက်တာ လူမင်းတို့မှ စိစစ်ရွေးချယ်ခဲ့ရာကိုဥက္ကာကျော် တစ်ဦးတည်းကိုသာ ရွေးချယ်နိုင်ခဲ့ခြင်းဖြစ်ကြောင်း သိရသည်။
