ဇွန် ၂၃ရက်
ရှမ်းပြည်နယ်၊မြောက်ပိုင်း၊ကွတ်ခိုင်မြို့နယ်၊လွယ်ခန်ကျေးရွာနှင့်ကောင်းခါးကျေးရွာတို့တွင် ဖမ်းဆီးရမိခဲ့သည့် ကျပ်ငွေ ၃ ဒသမ ၃၈ ဘီလီယံကျော်တန်ဖိုးရှိ မူးယစ်ဆေးဝါးနှင့်ဆက်စပ်ပစ္စည်းများကို ဇွန်လ ၂၃ ရက်နေ့ နံနက်ပိုင်းက ကွတ်ခိုင်မြို့တွင် ဖျက်ဆီးခဲ့သည်။
၎င်းမူးယစ်ဆေးဝါးများကို တပ်မတော်မှ ပြီးခဲ့သည့် ဖေဖော်ဝါရီလ ၂၀ ရက်နေ့မှ ဧပြီလ ၉ ရက်နေ့အတွင်း ဖမ်းဆီးရမိခဲ့ခြင်းဖြစ်ပြီး မူးယစ်ဆေးချက်ရာတွင်အသုံးပြုသည့် ဓာတုပစ္စည်းအမျိုးပေါင်း ၄၇မျိုး ၊ ဆက်စပ် ပစ္စည်း ၅၀ မျိုး ၊ စုစုပေါင်း ကာလတန်ဖိုးငွေ ကျပ် ၃ဒသမ ၃၈ ဘီလီယံကျော်တန်ဖိုးတို့ကို ဖျက်ဆီးခဲ့ခြင်းလည်း ဖြစ်သည်။
ယင်းဆက်စပ်ပစ္စည်းများကို ကွတ်ခိုင်မြို့အထွက် အေးရှားဝေါလ်တိုးဂိတ်အလွန်ရှိ ကွင်းပြင်တွင် ဖျက်ဆီးခဲ့ခြင်း ဖြစ်ကြောင်း တပ်မတော်သတင်းမှန်ပြန်ကြားရေးအဖွဲ့၊အတွင်းရေးမှူးဖြစ်သူ ဗိုလ်မှူးချုပ်ဇော်မင်းထွန်းက ဇွန်လ ၂၃ ရက်နေ့ မွန်းလွဲပိုင်းတွင် ပြုလုပ်ခဲ့သည့် တပ်မတော်သတင်းစာရှင်းလင်းပွဲ၌ အတည်ပြုပြောကြားခဲ့ခြင်း ဖြစ်သည်။
“မူဆယ်ခရိုင် ကွတ်ခိုင်မြို့ လွယ်ခန့်ကျေးရွာအနီး က ဓာတုပစ္စည်းနဲ့ဆက်စပ်ပစ္စည်းတွေ မီးရှို့ဖျက်ဆီးခြင်း အခန်းအနားကို ဒီကနေ့ မနက် ၉ နာရီ မှလုပ်ခဲ့ပါတယ်။ ဓာတု ပစ္စည်းအမျိုးအစား က ၄၇ မျိုး ၊ ဆက်စပ်ပစ္စည်း ၅၀မျိုးရှိပါတယ်။ ၂၆ ရက်နေ့ မှ နေရာ လေးနေရာမှ ထပ်မံ ဖျက်ဆီးသွားဖို့ ရှိပါတယ် “ ဟု ဗိုလ်ချုပ် ဇော်မင်း ထွန်းက ပြောသည်။
မူးယစ်ဆေးဝါးဖမ်းဆီးရရှိမှုနှင့်ပတ်သက်၍ လက်ရှိတွင် အမျိုးသား၊ အမျိုးသမီး ၃၃ဦးကို ဖမ်းဆီးထားပြီး ၉၇ ဦးမှာမူ တိမ်းရှောင်နေဆဲဖြစ်ကြောင်း သိရသည်။
ဆက်လက်ဖမ်းဆီးရမိသည့် မူးယစ်ဆေးဝါးများကို ဇွန်လ ၂၆ရက်နေ့တွင် ကျရောက်မည့် (၃၃)ကြိမ်မြောက် အပြည်ပြည်ဆိုင်ရာ မူးယစ်ဆေးဝါးနှင့်တရားမဝင်ရောင်းဝင်မှုတိုက်ဖျက်ရေးနေ့တွင် ရန်ကုန်၊မန္တလေး အပါအဝင်အခြားမြို့ကြီးများတွင် ထပ်မံ ဖျက်ဆီးသွားမည်ဖြစ်ကြောင်း သိရသည်။
