ဇွန် ၆

ဘင်္ဂလားဒေ့ရှ်နိုင်ငံ ကော့ဘဇားဒေသမှ အာဏာပိုင်များသည် ကိုရိုနာဗိုင်းရပ်စ် ကူးစက်ဖြစ်ပွားမှု ဘေးများကြောင့် ဒေသရှိ အချို့နေရာများကို အနီရောင်ဇုန်အဖြစ် သတ်မှတ်ကြေညာပြီး ကော့ဘဇား အုပ်ချုပ်ရေးနယ်မြေကို လော့ဒေါင်းချလိုက်ပြီ ဖြစ်သည်။

အစိုးရက တစ်နိုင်ငံလုံး လော့ဒေါင်းချထားသည်ကို ရုပ်သိမ်းလိုက်အပြီး သီတင်းတစ်ပတ်မှာပင် ကမ္ဘာ့အကြီးဆုံး ဒုက္ခသည်စခန်းရှိရာ ကော့ဘဇားတွင် COVID-19 ကူးစက်ဖြစ်ပွားမှုနှုန်း ရုတ်ခြည်းတိုးမြင့်လာခြင်း ဖြစ်သည်။

ကိုရိုနာဗိုင်းရပ်စ် တားဆီးကာကွယ်ရေးဆိုင်ရာ ဌာနေကော်မတီက သောကြာနေ့ အစည်းအဝေးတွင် ကော့ဘဇားအုပ်ချုပ်ရေးနယ်မြေအား လော့ဒေါင်းချရန် ဆုံးဖြတ်ခဲ့ခြင်း ဖြစ်ကြောင်း နယ်မြေအုပ်ချုပ်ရေးမှူး ကာမယ်ဟိုစိန်က ပြောသည်။ ယနေ့ စနေနေ့မှသည် ဇွန် ၂၀ ရက်အထိ လော့ဒေါင်း အသက်ဝင်မည် ဖြစ်သည်။

နယ်မြေအတွင်း COVID-19 လူနာသည် လက်ရှိအထိ ၈၇၇ ဦး ရှိနေပြီး ကော့ဘဇားဆာဒါအူပါဇီလာအရပ်သည် ကူးစက်ဖြစ်ပွားမှု အမြင့်ဆုံးဖြစ်ကာ ၃၆၄ ဦး ရှိသည်။

ရိုဟင်ဂျာဒုက္ခသည်စခန်းများအတွင်း ကိုရိုနာဗိုင်းရပ်စ် စမ်းသပ်တွေ့ရှိသူ ဒုက္ခသည် ၃၅ ဦး ရှိသည်။

လော့ဒေါင်းအမိန့်အရ သီးခြားအုပ်စုများ၊ မိသားစုများ၊ လူမှုရေးအဖွဲ့များနှင့် နိုင်ငံရေးစုရုံးမှုများကို အာဏာပိုင်များက တားမြစ်ပိတ်ပင်သွားမည်ဖြစ်သည်။

လူတိုင်းအားလုံး အိမ်ထဲမှာပင် နေကြရမည်ဖြစ်ပြီး အစိုးရနှင့် ပုဂ္ဂလိက သယ်ယူပို့ဆောင်ရေးယာဉ်များ ရပ်နားထားရမည် ဖြစ်သည်။

မရှိမဖြစ် ကုန်စည်များ သယ်ဆောင်သော ယာဉ်များကိုသာ နံနက် ၈ နာရီမှ ည ၈ နာရီအထိ ခွင့်ပြုပေးထားမည်ဖြစ်ကြောင်း သိရသည်။