ရန်ကုန်၊မေ ၃၁ 

ချင်းပြည်နယ်၊ ပလက်ဝမြို့နယ်အတွင်းအတွင်း ခြေကုပ်ယူထားသော ရခိုင်လက်နက်ကိုင်အဖွဲ့(AA)၏ မဟာ ဗျူဟာ ကျသည့် ပွိုင့်ကုန်း သုံးခုနှင့် ကာကင်းစခန်း လေးခုကို ယနေ့ နံနက်ပိုင်းမှာ သိမ်းပိုက်နိုင်ခဲ့သည်ဟု တပ်မတော်သတင်းမှန်ပြန်ကြားရေးအဖွဲ့က ထုတ်ပြန်ခဲ့သည်။

အဆိုပါ ထုတ်ပြန်ချက်တွင် ချင်းပြည်နယ်၊ ပလက်ဝမြို့၏ အနောက်တောင်ဘက် မီတာ ၂၅၀၀ ခန့်အကွာရှိ ပလက်ဝမြို့အား စိုးမိုးထားသည့် ပွိုင့် ၆၀၂၊ ပွိုင့် ၅၆၅ နှင့် ပွိုင့် ၅၄၀ သုံးခုနှင့် ကာကင်းစခန်းများကို ယနေ့ နံနက် ၈ နာရီခန့်တွင် တပ်မတော်က အပြီးတိုင် သိမ်းပိုက်ရရှိခဲ့သည်ဟု ဖော်ပြထားသည်။

တပ်မတော်က “ ပလက်ဝ ဒေသ နယ်မြေလုံခြုံရေး၊ လမ်းကြောင်းလုံခြုံရေးနှင့် လမ်းပန်းဆက်သွယ်မှု လုံခြုံရေး ကို ခြိမ်းခြောက် လျက်ရှိပြီး ချင်းပြည်နယ်အစိုးရနှင့် အလှူရှင်များက ပလက်ဝ ဒေသခံများအတွက် ပေးပို့ လှူဒါန်းသည့် ထောက် ပံ့ ရေး ပစ္စည်းများနှင့် WFP မှ လှူဒါန်းသည့် ထောက်ပံ့ရေးရိက္ခာပစ္စည်းများကိုလည်း နည်းလမ်းမျိုးစုံဖြင့် ခြိမ်း ခြောက်ရယူသုံးစွဲနေကြောင်း သတင်း ဖော်ထုတ်ရရှိသဖြင့် လုံခြုံရေး တပ်ဖွဲ့ဝင်များက မေလ ၂၄ ရက်မှ စတင်၍ ပလက်ဝမြို့ဝန်းကျင် နယ်မြေ စိုးမိုးရေးလုပ်ငန်းများကို အသေးစိတ်ဆောင်ရွက်ခဲ့ သည်”ဟု ပြောသည်။

ထိုသို့ ဆောင်ရွက်ခဲ့ရာ မေ ၂၄ ရက်တွင် ပွိုင့် ၅၄၉ တောင်ကုန်းအား စတင် တိုက်ခိုက်သိမ်းပိုက်ရရှိခဲ့ပြီး အဆင့် ဆင့် ခြေကုပ်ယူတိုက်ခိုက်ခဲ့ရာ မေ ၂၅ ရက်တွင် ၎င်းစခန်း၏ အရှေ့ဘက်နှင့် အရှေ့တောင်ဘက်ရှိ ကာကင်း စခန်း နှစ်ခုအားလည်းကောင်း၊ မေ ၃၀ ရက်တွင် ပွိုင့် ၆၀၂ ၏ ရှေ့ကာကင်းစခန်းအားလည်းကောင်း အသီးသီး သိမ်းပိုက်ရရှိခဲ့ကာ တပ်မတော်စစ်ကြောင်းများအနေဖြင့် ပွိုင့် ၅၆၅၊ ပွိုင့် ၆၀၂ နှင့် ၎င်းတောင်ကုန်း နှစ်ခုကို အထောက်အကူပြုထားသည့် ကြား ကာကင်းကုန်းတို့အား ရင်ဆိုင်ထိန်းချုပ်ထားရှိခဲ့ပြီး ဆက်လက်တိုက်ခိုက်ခဲ့ ရာ ပွိုင့် ၆၀၂ ၊ ပွိုင့် ၅၆၅၊ ပွိုင့် ၅၄၀ အခိုင်အမာနေရာများနှင့် ကာကင်းစခန်း လေးခုတို့အား ယနေ့ နံနက်ပိုင်း အပြီးတိုင် တိုက်ခိုက်သိမ်းပိုက်ရရှိခဲ့သည်ဟု တပ်မတော်၏ ထုတ်ပြန်ချက်တွင် ဖော်ပြထားသည်။

အဆိုပါ ပွိုင့်ကုန်းများနှင့် ကာကင်းစခန်းများ သိမ်းပိုက်နိုင်ရေး တိုက်ပွဲတွင် AA ဘက်မှ အလောင်း၊ လက်နက် ကြီးများ အပါအဝင် လက်နက်မျိုးစုံ၊ ခဲယမ်းနှင့် ဆက်စပ်ပစ္စည်းများ သိမ်းဆည်းရရှိခဲ့ပြီး လုံခြုံရေးတပ်ဖွဲ့ဝင် တချို့ ကျဆုံး၊ ထိခိုက်ဒဏ်ရာ ရရှိခဲ့ကြောင်း တပ်မတော်က ထုတ်ပြန်ထားသည်။

ထို စိုးမိုးပွိုင့်ကုန်း သုံးခုနှင့် ကာကင်းစခန်း လေးခုသည် ပလက်ဝဒေသ နယ်မြေလုံခြုံရေး၊ ကုလားတန်မြစ် ကြောင်း တလျှောက် လမ်းကြောင်းလုံခြုံရေးနှင့် လမ်းပန်းဆက်သွယ်မှု လုံခြုံရေးများ အပါအဝင် ကုလားတန် မြစ်ကူး တံတားနှင့် လမ်းဖောက်လုပ်ရေး စီမံကိန်းတို့အား နှောင့်ယှက်ခြိမ်းခြောက်နိုင်သည့် မဟာဗျူဟာမြောက် ခြေကုပ်စခန်းများဖြစ်ကြောင်း သိရသည်။

AA သည် ပလက်ဝမြို့အနီးရှိ စိုးမိုးတောင်ကုန်းများဖြစ်သည့် ပွိုင့် ၆၀၂ ၊ ပွိုင့် ၅၆၅ နှင့် ပွိုင့် ၅၄၀ တောင်ကုန်း နေရာများ၌ အခိုင်အမာ နေရာယူ၍ ၂၀၁၉ ခုနှစ်၊ နိုဝင်ဘာ ၃ ရက်တွင် ချင်းပြည်နယ်၊ မဲဆန္ဒနယ် အမှတ်(၁၁)မှ အမျိုးသားလွှတ်တော်ကိုယ်စားလှယ် ဦးဝှေ့တင်းအား ဖမ်းဆီးခေါ်ဆောင်ခဲ့သည့်ဖြစ်စဉ်၊ ၂၀၂၀ ပြည့်နှစ်၊ မတ်လ ၂၃ ရက်တွင် ပလက်ဝ- ဇိုရမ်ပူကာလမ်းဖောက်လုပ်နေသည့် C&C ကုမ္ပဏီမှ အိန္ဒိယနိုင်ငံသား ရှစ်ဦး၊ စကားပြန် နှစ်ဦးနှင့် လုပ်သား ငါးဦးတို့အား ဖမ်းဆီးခေါ်ဆောင်သွားသည့် ဖြစ်စဉ်များ ဖြစ်ပွားခဲ့ကြောင်း တပ်မတော်က ဆိုသည်။

ထို့ပြင် ၂၀၂၀ ပြည့်နှစ်၊ ဧပြီ ၂၂ ရက်တွင် ပလက်ဝမြို့အတွင်းသို့ လက်နက်ကြီး၊ လက်နက်ငယ်များဖြင့် အကြောင်းမဲ့ နှောင့်ယှက်ပစ်ခတ်မှုကြောင့် မြို့တွင်းရှိ မြန်မာ့စီးပွားရေးဘဏ်အနီး ကျရောက်ပေါက်ကွဲခဲ့သဖြင့် ဘဏ်ဝန်ထမ်းများနှင့် မိသားစုဝင်များ သေဆုံး၊ ဒဏ်ရာရရှိမှုဖြစ်ပွားခဲ့သလို ဧပြီ ၁၂ ရက်တွင် အရပ်သားများ အသွင် အယောင်ဆောင်၍ ပလက်ဝမြို့အတွင်း ဝင်ရောက်ကာ မြို့နယ် စည်ပင်သာယာရေးကော်မတီဥက္ကဋ္ဌ ဖြစ်သူ ဦးမြင့်မောင်အား ဖမ်းဆီး ခေါ်ဆောင်သွားသည့် ဖြစ်စဉ်များလည်း ရှိခဲ့သည်ဟု တပ်မတော်က ထုတ်ပြန် ထားသည်။