ရန်ကုန်၊ နိုဝင်ဘာ ၆ ။ ။ နိုဝင်ဘာ ၈ ရက်တွင် ကျင်းပမည့် အထွေထွေရွေးကောက်ပွဲအတွက် အမျိုးသမီးပါတီ (မွန်) ကို မဲဆွယ်ရက် မတိုင်မီ ၁၀ရက်အလိုမှ ကိုယ်စားလှယ်လောင်းစာရင်း ချပေးသည့်အတွက် ပြင်ဆင်ရန် အချိန်လောက်ငှမှု မရှိ၍ ကိုယ်စားလှယ်လောင်း လေးဦးသာ ပါဝင်ယှဉ်ပြိုင်ဖြစ်ခဲ့သည်ဟု ယင်းပါတီ ဥက္ကဋ္ဌ မိသန်းရှင်က မဇ္ဈိမကို ပြောသည်။
''ပါတီတွေကို စတင်မဲဆွယ်ခွင့်ပေးတဲ့ စက်တင်ဘာ ၈ ရက်နေ့မတိုင်မီ ၁၀ ရက်အလိုမှ ကျွန်မတို့ ပါတီကိုယ်စားလှယ်လောင်းစာရင်းချပေးတယ်။ အချိန်ဘယ်လိုမှ မလောက်တော့လို့ ကျွန်မတို့ ပါတီက အမျိုးသမီး ၄ ဦးပဲ ယှဉ်ပြိုင်နိုင်ပါတယ်။ ပါတီဗဟိုကော်မတီဝင်တွေထဲက လူတွေသာပါဝင်တယ်။ အမျိုးသမီးတွေ မို့လားမသိဘူး မဲဆွယ်တဲ့နေရာမှာ ဘာအခက်အခဲမှ မရှိဘူး၊ အခြားပါတီတွေကလည်း ကူညီကြပါတယ်။'' ဟု အမျိုးသမီးပါတီ (မွန်) ဥက္ကဋ္ဌ မိသန်းရှင်က ပြောသည်။
အမျိုးသမီးပါတီ (မွန်) ကိုယ်စားပြု၍ မွန်ပြည်နယ်၊ သံဖြူဇရပ် မဲဆန္ဒနယ်အမှတ် ၅ အမျိုးသား လွှတ်တော်တွင် မိသန်းရှင်၊ ကျိုက်မရော မဲဆန္ဒနယ်အမှတ် ၃ အမျိုးသားလွှတ်တော်တွင် မိနီနီလွင်၊ မုဒုံမြို့နယ် ပြည်သူ့လွှတ်တော်တွင် မိမိုးမိုးခိုင်နှင့် တနင်္သာရီတိုင်း၊ ရေဖြူမဲဆန္ဒနယ်အမှတ် ၄ အမျိုးသားလွှတ်တော်တွင် မိမြင့်သန်းတို့က ဝင်ရောက်ယှဉ်ပြိုင်ကြမည်ဖြစ်သည်။
ယင်းပါတီသည် အမျိုးသားဒီမိုကရေစီအဖွဲ့ချုပ် -NLD၊ အမျိုးသားဒီမိုကရေစီအင်အားစု -NDF၊ အမျိုးသားဖွံ့ဖြိုးတိုးတက်ရေးပါတီ -NDP၊ ပြည်ထောင်စုကြံ့ခိုင်ရေး နှင့် ဖွံ့ဖြိုးရေးပါတီ -USDP၊ တိုင်းရင်းသားစည်းလုံးညီညွတ်ရေးပါတီ -တ.စ.ည၊ ဖလုံ-စဝေါ်ပါတီ၊ မွန်အမျိုးသားပါတီ၊ မွန်ဒေသလုံး ဆိုင်ရာဒီမိုကရေစီ၊ ၈၈ မျိုးဆက်ကျောင်းသားလူငယ်များ(ပြည်ထောင်စုမြန်မာနိုင်ငံ)ပါတီ တို့နှင့် ယှဉ်ပြိုင်ရမည်ဖြစ်သည်။
ပါတီအား ၂၀၁၄ အောက်တိုဘာ ၈ ရက်တွင် စတင်တည်ထောင်ပြီး ၂၄ ရက်တွင် ကော်မရှင်သို့ မှတ်ပုံတင်ခဲ့သော်လည်း ရွေးကောက်ပွဲ ၂၀၁၅ခုနှစ် ဇူလိုင်လ ၁၅ရက်မှသာ မှတ်ပုံတင် ချပေးခဲ့သည်။
