မြန်မာပြည်တွင် မဲတစ်ပြားစီ၏ တန်ဖိုး မတူကြပါ

မြန်မာပြည်တွင် မဲတစ်ပြားစီ၏ တန်ဖိုး မတူကြပါ

“မဲဆန္ဒရှင် ပျံ့နှံ့မှု မညီမျှခြင်း”သည် ဒီမိုကရေစီ၏ အဓိက၊အနှစ်သာရဖြစ်သော လူတစ်ဦး၊ မဲတစ်ပြားဆိုသည် ကို ဖောက်ဖျက်ရုံမျှမက မဲလိမ်လည်မှု၊ ခြိမ်းခြောက်မှုများအတွက်လည်း စိုးရိမ်ရသည်။

ရန်ကုန် (Myanmar Now) ။         ။ သမိုင်းတွင်မည့် နိုဝင်ဘာ ၈ ရက်နေ့ ရွေးကောက်ပွဲတွင် မဲပေးကြသည့် သန်းပေါင်းများစွာသော မဲဆန္ဒ ရှင်များထဲမှ လူအများအပြားသည် နှစ်ပေါင်းများစွာ ချုံးချုံးကျနေသော၊  အာဏာရှင်လက်အောက်တွင် ဆယ်စု နှစ် ၅ စု အနှိပ်စက်ခံခဲ့ရသော မြန်မာနိုင်ငံသည် သူတို့၏ မဲများကြောင့်  မျှတသော၊  လွတ်လပ်သော နိုင်ငံသို့ ပြောင်းလဲသွားမည် ဟုမျှော်လင့်အားထားလျက် ရှိပါသည်။

မဲဆန္ဒရှင် ၃၃ ဒသမ ၅ သန်းနီးပါးသည် ပြည်သူ့လွှတ်တော်အမတ် ၃၂၅ ဦးကို ရွေးချယ် တင်မြှောက် ကြမည် ဖြစ်ပါသည်။ သို့ရာတွင် မြန်မာနိုင်ငံ၏ ရွေးကောက်ပွဲစနစ်၏ ထူးခြားသော အပြုအမူ တစ်ခုကြောင့် မဲပြားများ၏ တန်ဖိုးနှင့် ထိရောက်မှုမှာ တစ်ပြားနှင့်တစ်ပြား မတူပါ။ လူဦးရေ အနည်းဆုံးရှိသော မဲဆန္ဒနယ်မှ မဲများသည် လူဦးရေအများဆုံးရှိသော မဲဆန္ဒနယ်မှ မဲများထက် အဆရာပေါင်းများစွာ သြဇာလွှမ်းပါသည်။

ဤသည်မှာ  ပြည်သူ့လွှတ်တော် မဲဆန္ဒနယ်များသည် လူဦးရေအနည်းအများပေါ်တွင် အခြေခံခြင်း မဟုတ်ဘဲ မြို့နယ်များတွင် အခြေခံသည့် အတွက်ကြောင့် ဖြစ်သည်။ မြို့နယ်များတွင် လူဦးရေ ခြားနားခြင်း အများအပြား ရှိနေပါသည်။

“ရွေးကောက်ပွဲ တစ်ခုတည်းမှာပဲ မဲဆန္ဒနယ်တစ်ခုမှာလူ ၅ သိန်းနီးပါးရှိပြီး နောက်မဲဆန္ဒနယ် တစ်ခုမှာ တော့ ၅,ဝဝဝ ပဲရှိတာမျိုးဟာ အတော်ရှားပါတယ်။  ဒါဟာ ပြည်သူတွေအတွက်တော့ တရားမမျှတတာပါဘဲ” ဟု အမည်မဖော်လိုသော် ရွေးကောက်ပွဲ ကျွမ်းကျင်သူ ပညာရှင်တစ်ဦးက ဆိုပါသည်။

ဤသို့ မဲဆန္ဒနယ်များတွင် လူဦးရေ အလွန်တရာကွဲပြား ခြားနားခြင်းကို မဲလ်အပေါ်းရှင်းမန့် သို့မဟုတ် “မဲဆန္ဒရှင် ပျံ့နှံ့မှုမညီမျှခြင်း” ဟု နိုင်ငံရေး သိပ္ပံပညာရှင်များက ခေါ်ဆိုပါသည်။ “မဲဆန္ဒရှင်ပျံ့နံှ့မှု မညီမျှခြင်း” သည် ဒီမိုကရေစီ၏ အဓိက၊  အနှစ်သာရဖြစ်သော လူတစ်ဦး၊ မဲတစ်ပြားဆိုသည်ကို ဖောက်ဖျက်ရုံမျှမက ရွေးကောက်ပွဲစနစ်၏ အများယုံကြည် လက်ခံနိုင်မှုကို မေးစရာဖြစ်စေသည်။

မဲထောင်ချီရ၍ လွှတ်တော်အ တွင်း ရောက်လာသော အမတ်နှင့် မဲသိန်းချီ၍ ရကာ ရောက်လာသောအမတ်၏ အများထောက်ခံမှုအရ ရရှိ သော လုပ်ပိုင်ခွင့်၊  အာဏာကိုလည်း မေးခွန်း ထုတ်စရာဖြစ် သည်။ ပို၍စိတ်ပူစရာ ကောင်းသည်က လူဦးရေ နည်းသော မဲဆန္ဒနယ်များသည် မဲလိမ်လည်မှု၊  ခြိမ်းခြောက်မှု၊ ဝင်ရောက်စွက်ဖက် ခြယ်လှယ်မှုများ ဖြစ်နိုင် သည့် အခြေအနေများ ပေါ်ပေါက် လာနိုင်ပါ သည်။

“မဲပေးသူ အရေအတွက်များတဲ့ နေရာထက် မဲပေးသူအရေအတွက် နည်းတဲ့ နေရာမှာ နိုင်ဖို့ဆိုတာ ပိုလွယ်ပါတယ်။ တခြားတနည်းနဲ့ ပြောရမယ်ဆိုရင်တော့ မဲဆွယ်တဲ့အခါမှာ ကုန်ကျစရိတ် ဒါမှမဟုတ် တွေ့တဲ့ အခက်အခဲဆိုတာဟာ (မဲဆန္ဒနယ်ရဲ့) အရွယ်အပေါ်မှာလည်း တစ်မျိုးတစ်ဖုံ တည်နေတယ်လေ” ဟု မြန်မာ နိုင်ငံအရေးကို နှစ်ရှည်လများ လေ့လာနေသော နိုင်ငံရေး ဆန်းစစ်သူ ရစ်ချပ်ဟောစီက ဆိုပါသည်။

“မဲဆန္ဒရှင် ပျံ့နံှ့မှု မညီမျှခြင်း” သည် ရွေးကောက်ပွဲများ၏ ရလဒ်ကိုလည်း ပြောင်းလဲသွားစေနိုင်ပါ သည်။ ၂ဝ၁၃ မလေးရှား ရွေးကောက်ပွဲတွင် အာဏာရပါတီ ဘာရီစန်နယ်ရှင်နယ်သည် လူထုတစ်ရပ် လုံး၏ မဲကို ရှုံးခဲ့သော်လည်း “မဲဆန္ဒရှင် ပျံ့နှံံမှု မညီမျှခြင်း” ကြောင့် ပါလီမန်နေရာ ၆ဝ ရာခိုင်နှုန်းနီးပါးကို ရခဲ့သည်ဟု ပညာရှင်များက ဆိုပါသည်။

ယခုအချိန်တွင်ပင် အာဏာရ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီသည် လူကြိုက်များသော အမျိုးသား ဒီမိုကရေစီ အဖွဲ့ချုပ်(NLD)နှင့်  ယှဉ်ပြိုင်ရာတွင် ဤသို့သော ရွေးကောက်ပွဲစနစ်၏ မညီမျှမှုကို မည်သို့ အမြတ်ထုတ်မည်နည်းဟူသော မေးခွန်းများ ပေါ်ထွက်နေပါသည်။ အာဏာရပါတီ၏ အထင်ကရ ဝန်ကြီးများဖြစ်သည့် သမ္မတကြီး ဦးသိန်းစိန်ကိုယ်တိုင် ခန့်ထားသော ဦးစိုးသိန်း၊ ဦးအောင်မင်းတို့သည် ကယားပြည်နယ်တွင် အမျိုးသားလွှတ်တော်အတွက် တစ်သီးပုဂ္ဂလအနေဖြင့် ယှဉ်ပြိင်ကြမည် ဖြစ်သည်။

ကယားပြည်နယ်သည် မဲဆန္ဒရှင် ပျံ့နှံ့မှု မညီမျှဆုံးသော နေရာများတွင် ပါဝင်ကာ ဦးစိုးသိန်း၊ ဦးအောင်မင်းတို့၏ မဲဆန္ဒနယ်များသည် မြန်မာတစ်နိုင်ငံလုံးရှိ အသေးငယ်ဆုံးသော မဲဆန္ဒနယ်များ လည်း ဖြစ်ပါသည်။ (တစ်သီးပုဂ္ဂလ အမတ်လောင်းများဆိုင်ရာ အချက်အလက်ကို ကြည့်ပါ) ရိုက်တာ သတင်းဌာန၏ စက်တင်ဘာလ သတင်းတစ်ပုဒ်တွင် ဦးစိုးသိန်းသည် သူ၏ သေးငယ်သော ဘောလခဲ မဲဆန္ဒနယ်တွင် ဒေါ်လာသောင်းချီသော စီမံကိန်းများကို ငွေကြေးထောက်ပံ့ခဲ့ကြောင်း ဖော်ပြထားသည်။ ထောက်ပံ့မှုများထဲ တွင် ဂြိုဟ်တုစလောင်း၊ ရေပေးဝေခြင်း၊  ဘောလုံးပြိုင်ပွဲတို့လည်း ပါဝင်သည်။

မြန်မာတစ်နိုင်ငံလုံးတွင် မဲပေးသူ ဒုတိယအနည်းဆုံး မဲဆန္ဒနယ်ဖြစ်သော ကိုးကိုးကျွန်းတွင်လည်း ယခင် ရေတပ်အကြီးအကဲ ဦးသက်ဆွေက အာဏာရပါတီအတွက် ပြည်သူ့လွှတ်တော် အမတ်လောင်းအဖြစ် ယှဉ်ပြိုင်မည် ဖြစ်သည်။

ဘယ်လောက်တောင်ဆိုးသလဲ

“မဲဆန္ဒရှင် ပျံ့နှံံမှု မညီမျှခြင်း”ကို တိုင်းရာတွင် များသောအားဖြင့် မဲပေးသူအများဆုံး မဲဆန္ဒနယ်နှင့် မဲပေးသူအနည်းဆုံး မဲဆန္ဒနယ်၏ အချိုးအစားကို ရှာပါသည်။ မြန်မာနိုင်ငံ၏ “မဲဆန္ဒရှင် ပျံ့နှံံမှု မညီမျှခြင်း” သည် ဤတိုင်းတာချက်အရ ဆိုလျှင် ၃၉၇:၁ ရှိနေသည်။ Myanmar Now က ဤသို့တိုင်းတာရာတွင် သန်းခေါင်စာရင်းကို မှီငြမ်းပါသည်။ သန်းခေါင်စာရင်းသာလျှင် မြန်မာနိုင်ငံ တစ်ဝန်းလုံးကို လွှမ်းခြုံနိုင်ပြီး ထပ်မံ၍ စိစစ် ခွဲဝေနိုင်ပါသည်။

ပြည်ထောင်စု ရွေးကောက်ပွဲကော်မရှင်သည် မဲပေးသူအများဆုံး မဲဆန္ဒနယ် ၅ နေရာနှင့် မဲပေးသူ အနည်းဆုံး မဲဆန္ဒနယ် ၅ နေရာကိုသာ ထုတ်ဖော်ပြောဆိုကာ တစ်နိုင်ငံလုံး၏ မဲဆန္ဒနယ် အချက်အလက်များ ကို ကန့်သတ်ချက်များ ရှိသည်ဆိုကာ ပေးရန် ငြင်းဆိုခဲ့ပါသည်။ ကော်မရှင်၏ အချက်အလက်များ အရဆို လျှင် “မဲဆန္ဒရှင် ပျံ့နှံံမှု မညီမျှခြင်း” အချိုးအစားက ၃၇ဝ:၁ ရှိနေသည်။ ဤအချိုး နှစ်ခုစလုံးသည် နိုင်ငံတကာ စံချိန်စံညွှန်းများနှင့် ယှဉ်ပါက အလွန်မြင့်မားနေသည်ဟု Myanmar Now က ဆက်သွယ်ခဲ့သော ရွေးကောက် ပွဲ ပညာရှင်များက ဆိုပါသည်။ နိုင်ငံတကာ စံချိန်စံညွှန်းများ အရဆိုလျှင် မဲဆန္ဒနယ်များတွင် မဲပေးသူလူဦးရေ သည် တစ်နေရာနှင့်တစ်နေရာ အနီးစပ်ဆုံး တူညီသင့်သည်ဟု သူတို့က ဆိုပါသည်။

“ရွေးကောက်ပွဲအတွက် မဲဆန္ဒနယ်များ ရေးဆွဲရာတွင် မဲပေးသူနှင့် အရွေးခံရမည့် ကိုယ်စားလှယ် အချိုးအစားသည် အရပ်ဒေသတိုင်းတွင် အတူတူ ဖြစ်အောင်ထားခြင်းဖြင့် တူညီစွာ မဲပေးပိုင်ခွင့်ကို ထိန်းသိမ်း ရပါမည်” ဟု ဥရောပနိုင်ငံများ၏ လုံခြုံရေးနှင့် ပူးပေါင်းဆောင်ရွက်မှု အဖွဲ့အစည်း(အိုအက်စ်စီအီး) က ဆိုထား ပါသည်။ ဥပမာအားဖြင့်ဆိုလျှင် မက်ဆီဒိုးနီးယားနိုင်ငံတွင် “မဲဆန္ဒရှင် ပျံ့နှံံမှု မညီမျှခြင်း” ဒီဂရီသည် ၃ ရာခိုင် နှုန်းထက် ကျော်လွန်ပါက ရွေးကောက်ပွဲ နယ်နမိတ်ကို ပြန်လည်ရေးဆွဲရပါသည်ဟု အေ့စ် ရွေးကောက် ပွဲဆိုင်ရာ အသိပညာကွန်ယက် အင်တာနက်စ ာမျက်နှာတွင် ဖော်ပြထားသည်။ ဂျာမနီ၊ ချက် သမ္မတနိုင်ငံတို့ တွင်တော့ သတ်မှတ်ထားသော “မဲဆန္ဒရှင် ပျံ့နှံံမှုမ ညီမျှခြင်း”များမှာ ၁၅ ရာခိုင်နှုန်းနှင့် ၂၅ ရာခိုင်နှုန်းစီ ဖြစ်သည်။

ဤနိုင်ငံများနှင့် ယှဉ်လျှင် မြန်မာနိုင်ငံ၏ စနစ်သည် မျှတမှုမရှိ၊ ဝင်ရောက်စွက်ဖက် ခြယ်လှယ်မှုများ ဖြစ်လာနိုင်သော်လည်း ပြောင်းလဲမည့်ပုံ မမြင်သေးပါ။ မြို့နယ်များကို အခြေခံ၍ မဲဆန္ဒနယ်များ ရေးဆွဲမှုမှာ ယခင်စစ်အစိုးရ၏ ဆုံးဖြတ်ချက်ဖြစ်ပြီး ၂ဝဝ၈ အခြေခံဥပဒေတွင် ပြဋ္ဌာန်းထားပါသည်။  တပ်မတော်အတွက် အလွန်တရာ အရေးကြီးသည့် အခြေခံဥပဒေ ပြုပြင်ပြောင်းလဲခြင်းမှာ လာမည့်နှစ် အနည်းငယ်အတွင်း ဖြစ်လာဦးမည် မဟုတ်ပါ။ ရွေးကောက်ပွဲမဝင်ဘဲ လွှတ်တော် ကိုယ်စားလှယ်အဖြစ် ခန့်အပ်ထားသည့် စစ်သား အရာရှိများသည် လွှတ်တော်တွင် ၂၅ ရာခိုင်နှုန်း ရှိပြီး အခြေခံဥပဒေ ပြုပြင်ပြောင်းလဲရန်အတွက် လက်တွေ့ အားဖြင့် သူတို့တွင် ဗီတိုအာဏာ ရှိပါသည်။

ယခင်အစိုးရသည် ဤစနစ်ကို ရွေးချယ်ခဲ့ခြင်းမှာ သန်းခေါင်စာရင်း အချက်အလက်လည်း မရှိ၊  အရွယ်ညီမျှသော မဲဆန္ဒနယ်များ ရေးဆွဲခြင်းသည် အလွန်တရာ ရှုပ်ထွေးနိုင်သောကြောင့် ဖြစ်နိုင်သည်ဟု ရစ်ချပ်ဟောစီက ဆိုပါသည်။ “လွယ်ကူသက်သာအောင် လုပ်လိုက်တာလို့ ထင်ပါတယ်။ အုပ်ချုပ်ရေး ယူနစ် မှာပဲ ထားမယ်ဆိုပြီး ဆုံးဖြတ်လိုက်တယ်လို့ ထင်ပါတယ်” ဟု သူက ပြောသည်။

နေပြည်တော်ရှိ ပြည်ထောင်စု ရွေးကောက်ပွဲကော်မရှင် ညွှန်ကြားရေးမှုး ဦးစိုင်းကျော်သူကို ဆက်သွယ် မေးမြန်းရာစနစ်သည် ကွာဟခြားနားချက်များ ရှိသော်လည်း ပြောင်းလဲရန်ဟူသည်မှာ ၎င်းတို့၏ တာဝန်မဟုတ်ဟု ပြောပါသည်။ “မတရားဘူးဆိုတာ ဟုတ်ပါတယ်။ ဒါက ဘာကြောင့်လဲဆိုတော့ ကျွန်တော် တို့ရဲ့ မဲဆန္ဒနယ်တွေဟာ လူဦးရေအပေါ်မှာ အခြေမခံဘဲ မြို့နယ်ပေါ်မှာ အခြေခံလို့ပါ။ ဒါဟာ ဖွဲ့စည်းပုံ အခြေခံဥပဒေမှာ ပြဋ္ဌာန်းထားတာပါ။ ဖွဲ့စည်းပုံ အခြေခံဥပဒေနဲ့ ရွေးကောက်ပွဲ ဥပဒေတွေ ပြောင်းလဲနိုင်ရင် တော့ အဲဒီအတိုင်းပဲ ကျွန်တော်တို့ ပြောင်းမှာပါ” ဟု သူက ဆိုပါသည်။

NLD ၏ ပြောရေးဆိုခွင့်ရှိသူ ဦးဝင်းထိန်ကလည်း ဤ “မဲဆန္ဒရှင် ပျံ့နှံံမှု မညီမျှခြင်း” ကို စိုးရိမ်သော် လည်း မဲစာရင်းမှားခြင်း၊ ကြိုတင်မဲပေးခြင်းများကို လတ်တလော ကိုင်တွယ်ရမည့် ကိစ္စများအဖြစ် အာရုံစိုက် နေရကြောင်း ပြောသည်။ “အခု လောလောဆယ် အခြေအနေက မမျှတဘူးဆိုတာ သိတယ်။ ဒါပေမယ့် မြို့နယ်တွေအပေါ်မှာ မူတည်နေတော့ ပြောလို့မရဘူး” ဟု ဆိုသည်။

လူဦးရေကွာခြားမှုအများအပြား

မြန်မာနိုင်ငံ၏လူဦးရေ ၅၁ ဒသမ ၄၈၆ သန်းအရဆိုလျှင် မြို့နယ်တစ်ခု၏ ပျမ်းမျှလူဦးရေသည် ၁၅၆,ဝဝဝ မျှ ရှိပါသည်။ သို့ရာတွင် ကချင်ပြည်နယ်မှ အင်ဂျန်းယန်မြို့နယ်တွင်  ၁,၇၃၂ ဦးသာ ရှိပြီး ရန်ကုန်၊ လှိုင်သာယာမြို့နယ်တွင် ၆၈၇,၈၆၇ ဦး ရှိနေသည်။ သန်းခေါင်စာရင်းကို Myanmar Now က လေ့လာကြည့် ရာ မြို့နယ်အများအပြား ၈၂ မြို့ သို့မဟုတ် မဲဆန္ဒနယ်အားလုံး၏၂၅ ရာခိုင်နှုန်းတွင် လူဦးရေ ၇၈,ဝဝဝ နှင့် အောက် ရှိသည်။ လူဦးရေ ၃၁၂,ဝဝဝ နှင့်အထက် ရှိသောမြို့နယ်ပေါင်း ၂၁ မြို့နယ် ရှိပါသည်။

ဇယား၁ ။ သန်းခေါင်စာရင်းအရ လူဦးရေအလိုက် မြို့နယ်များ စီထားခြင်း

ရွေးကောက်ခံ ပြည်သူ့လွှတ်တော်ကိုယ်စားလှယ်တစ်ယောက်သည် မဲဆန္ဒရှင်အရေအတွက် မည်မျှကို ကိုယ်စားပြုသနည်းဟု တွက်ချက်ကြည့်ရာ ကွာဟမှုများ၊ မညီမျှသော ကိုယ်စားပြုမှုများပို၍ သိသာသွားသည်။ ကိုယ်စားပြုမှု အရေအတွက်ကို ကြည့်လျှင် ပြည်သူ့လွှတ်တော် ကိုယ်စားလှယ်တစ်ယောက်သည် ကယားပြည် နယ်တွင် လူပေါင်း ၂၄,ဝဝဝ ကို ကိုယ်စားပြုနေပြီး ဧရာဝတီတိုင်းဒေသကြီးတွင် ၁၅၅,ဝဝဝ အထိ ကိုယ်စားပြု နေသည်။

ဇယား ၂ ။ ရွေးကောက်ခံ ပြည်သူ့လွှတ်တော် ကိုယ်စားလှယ်တစ်ယောက်၏ ကိုယ်စားပြုသူ လူဦးရေ

တိုင်းရင်းသား ကိုယ်စားလှယ်ပြုမှုနှင့် “မဲဆန္ဒရှင် ပျံ့နှံံမှု မညီမျှခြင်း”

“မဲဆန္ဒရှင် ပျံ့နှံံမှု မညီမျှခြင်း”သည် ရွေးကောက်ပွဲ လုပ်နည်းအရ ကောင်းမွန်ခြင်း မရှိသော်လည်း လိမ်လည်မှု မဟုတ်ဘဲ အမြဲတမ်းလည်း ဆိုးကျိုး မသက်ရောက်ပါဟုယူဆသည့် ပညာရှင်များလည်း ရှိသည်။ တကမ္ဘာလုံးတွင် တွေ့မြင်နေရသည့်အပြင် မြန်မာနိုင်ငံကဲ့သို့ လွှတ်တော်နှစ်ရပ်ဖြင့် ဥပဒေပြဋ္ဌာန်းမှု ပုံစံ စနစ် ရှိသော နိုင်ငံများတွင် ပိုပြီး တွေ့ရပါသည်။ ဤသည်မှာ နိုင်ငံရေးအရ အာဏာလျော့ နည်းသော ပြည်နယ်များ ကို အသားပေးရန် လုပ်ထားခြင်း ဖြစ်ပါသည်။

ဤစနစ်ကို ထောက်ခံသူများက မညီမျှခြင်း များပြားသော နိုင်ငံတို့တွင် ချမ်းသာကြွယ်ဝမှုများကို ပြန်လည် ပေးဝေခြင်းများ ဖြစ်လာစေရန် အားပေးမှုပြုသည်ဟု ဆိုကြသည်။ မြန်မာနိုင်ငံမှ သေးငယ်သော မဲဆန္ဒနယ် အများစုမှာ တိုင်းရင်းသား ဒေသများတွင် ရှိနေသည်။ သို့သော်လည်း အကုန်လုံး မဟုတ်ပေ။ (အောက်မှ မြေပုံကို ကြည့်ပါ) လူဦးရေ ၅ဝ,ဝဝဝ မပြည့်သော မဲဆန္ဒနယ် ၄၄ နယ်တွင် ၁ဝ မြို့နယ်သည် စီပွားရေး အချက်အချာကျသော ရန်ကုန်မှ ဖြစ်ပါသည်။

“မြန်မာနိုင်ငံရဲ့ အမျိုးသားလွှတ်တော်ကို ကြည့်မယ်ဆိုရင် “မဲဆန္ဒရှင် ပျံ့နှံံမှု မညီမျှခြင်း”ကို တမင် ထည့်သွင်းထားတာ တွေ့ရမှာပါ။ ဘာလို့လဲဆိုတော့ ပြည်နယ်နဲ့ တိုင်းဒေသကြီး တစ်ခုစီဟာ သူတို့ဆီမှာ လူဦးရေ ဘယ်လောက်ပဲရှိရှိ ကိုယ်စားလှယ်လောင်း အရေအတွက်က အတူတူပဲ။ ဒါဟာ နိုင်ငံရေးအရ ဆုံးဖြတ်ချက် ချထားတာပါ။ မြန်မာနိုင်ငံလိုမျိုး တိုင်းရင်းသား၊ လူမျိုးစုံတဲ့ နိုင်ငံတစ် နိုင်ငံမှာ ဒါဟာ အားလုံးကို တန်းတူညီတူ ကိုယ်စားပြုမှုကို ပေးတာပါ။ အမေရိကားက အထက်လွှတ်တော် ဆီးနိပ်လိုပဲပေါ့”ဟု ရီချပ် ဟောစီက ပြောသည်။

ယခုအခြေအနေကို ပြောင်းရန် မြန်မာနိုင်ငံ၏ မဲဆန္ဒနယ်များကို လူဦးရေ တူညီအောင် လုပ်ပေးပါက အခြားပြဿနာများ ပေါ်ပေါက်လာနိုင်သည်ဟု သူကဆိုသည်။ ဥပမာအားဖြင့် တိုင်းရင်းသား လူမျိုးစုများ၏ ကိုယ်စားပြုမှုကို လျော့ကျသွားစေပြီး မဲဆန္ဒနယ်ကို မသမာသော ရည်ရွယ်ချက်ဖြင့် ရေးဆွဲသတ်မှတ်မှုများ ဖြစ်လာ နိုင်သည်ဟု ပြောသည်။

ထို့အပြင် ရှုပ်ထွေးမှုရှိပြီး နှစ်ရှည်လများ ကြာသွားနိုင်သည်။ ပြည်သူအများစုက မြို့နယ်အုပ်ချုပ်ရေး စနစ်ကို ကျင့်သားရနေပြီ ဖြစ်သည်ဟု သူက ဆိုသည်။ အချို့ကမူ မြန်မာနိုင်ငံ၏ ယခုလက်ရှိ “မဲဆန္ဒရှင် ပျံ့နှံံမှု မညီမျှခြင်း”သည် အလွန်တရာ ဆိုးဝါးလွန်း၍ တစ်ခုခုတော့ လုပ်သင့်သည်ဟုဆိုသည်။ “လူတွေရဲ့မဲတွေ တချို့နေရာတွေမှာ အရမ်းကို အားပျော့သွားစေတာဟာ၊ တချို့နေရာတွေမှာ အဆ ၃ဝ လျော့ပြီး ကိုယ်စားပြု ခံရတယ် ဒါမှမဟုတ် အဆ ၅ဝဝ ပိုပြီး ကိုယ်စားပြုခံရတယ်ဆိုတာဟာ တကယ်တော့ အခြေခံတရားမျှတမှုနဲ့ ဆိုင်ပါတယ်” ဟု အမည်မဖော်လိုသော ရွေးကောက်ပွဲပညာရှင်က ဆိုပါသည်။

“ဒီ “မဲဆန္ဒရှင် ပျံ့နှံံမှု မညီမျှခြင်း” ဆိုတာဟာ ရွေးကောက်ပွဲပြီးတဲ့ အချိန်အတွက် အလွန်ကြီးကျယ် သော မေးခွန်းပါပဲ။ အဲဒါဟာ ဖွဲ့စည်းပုံ အခြေခံဥပဒေ ပြုပြင်ပြောင်းလဲမဲ့ ကိစ္စနဲ့ ယှက်နွယ်နေပြီး ရွေးကောက်ပွဲ ပြန့်၍ ပုံသွင်းခြင်း၊ ဗဟိုချုပ်ကိုင်မှုကို လျော့ချခြင်းနဲ့ ဖက်ဒရယ်လဇ်ဇမ်ဆိုတဲ့ ပြည်ထောင်စု ဝါဒတွေနဲ့လည်း ဆိုင်ပါတယ်။ ဒါတွေဟာ မေးခွန်းအကြီးကြီးတွေပါ” ဟု ပြောသည်။

Mizzima Weekly

Tags