ရေးသားသူ Ye Zon Aung
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win
COVID-19 ရောဂါကြီးကြောင့် လူအများစုက လမ်းပေါ်မထွက်ဖြစ်ကြတော့ဘူး။ ဒီကြားထဲ သင်္ကြန်ပိတ်ရက်နဲ့ပါ တိုက်ဆိုင်နေတာမို့ အိမ်ထဲမှာပဲနေဖြစ်ဖို့ အရာရာအကြောင်းကဖန်လာပါတယ်။
ဒီလိုအခြေအနေမျိုးမှာ အားလုံးက စားလိုက်၊ အိပ်လိုက်နဲ့ တစ်နေ့တာကို ပျင်းရိငြီးငွေ့စွာဖြတ်သန်းနေကြရတာများပါတယ်။ တစ်ချို့ကတော့ Work Form Home အနေနဲ့ နေအိမ်မှာ အလုပ်လုပ်နေကြရတာမို့ ကွန်ပျူတာနဲ့ မျက်နှာ မခွာနိုင်ပဲ တစ်နေ့တာလုံး ရုံးတက်ချိန်လိုပဲ အလုပ်တွေနဲ့ လုံးပန်းနေကြရတာမျိုးလည်း ရှိကြရဲ့။
ဘယ်လိုပဲဖြစ်ဖြစ် လက်ရှိလူအများစု နေထိုင်နေကြတဲ့ လူနေမှုစတိုင်တွေကတော့ ကျန်းမာရေးနဲ့ မညီညွတ်တာအမှန်ပါပဲ။ တနေ့တနေ့ စားလိုက်သောက်လိုက်နဲ့မို့ ကပ်ကြီးလဲပြီး ဝက်ကြီးလဲဖြစ် ဆိုပြီး လူမှုကွန်ယက်တွေပေါ် မှာတောင် နောက်ပြောင်နေကြရတဲ့အထိပါပဲ။
ပျင်းရိငြီးငွေ့မှုနဲ့ ရောဂါဆိုးကြီးအပေါ် စိုးရိမ်တဲ့ စိတ်ဖိစီးမှုတွေကြောင့် အစားတွေပိုစားဖြစ်၊ ပိုအိပ်ဖြစ်၊ ပိုအညောင်းထိုင်ဖြစ်ကြနဲ့ တချို့များ အိပ်ယာထဲကတောင် မထွက်တဲ့အထိ အရည်ထွက်အောင် ပျင်းနေကြရတယ်ဆိုပဲ။
ဒီလိုပုံနဲ့ဆိုရင် COVID-19 ရောဂါကို ရှောင်နိုင်မရှောင်နိုင်နဲ့ ကပ်ကြီးအပြီးမှာ ဝက်ကြီးဖြစ်မဖြစ်ဆိုတဲ့ ကိစ္စတွေက မသေချာပေမယ့် အိမ်မှာနေရင်း ကျန်းမာရေးထိခိုက်မှာတော့ သေချာနေပါပြီ။ ကိုယ့်အိမ်မှာ အချိန်တွေပိုနေ၊ အနားရနေချိန်မှာ ကိုယ်အလေးချိန် မြင့်တက်တာမျိုးဖြစ်မလာအောင် ဘယ်လိုနေထိုင်ကြမလဲ။
မဖြစ်မနေ လိုက်နာသင့်တဲ့ နည်းလမ်းကောင်းလေး ၇ သွယ်ကို ပြောပြချင်ပါတယ်။
- နေ့စဉ် ကယ်လိုရီပမာဏကို ချိန်ညှိပါ
ကယ်လိုရီ စားသုံးမှုရော၊ ပြန်လည်ချေဖျက်မှုရော နှစ်မျိုးလုံးကို မျှတအောင် ချိန်ညှိနေထိုင်ဖို့ လိုအပ်ပါတယ်။ ဒါက ဆန်းကျယ်တဲ့ ကိစ္စမဟုတ်ပါဘူး။ လူတိုင်းနည်းပါး သိနားလည်ထားတဲ့ ကိစ္စမျိုးဖြစ်ပါတယ်။ လူ့ခန္တာကိုယ်မှာ ကယ်လိုရီအများအပြား စုဝေးလာတဲ့အခါမျိုးမှာ ကိုယ်အလေးချိန် မြင့်တက်လာမှာဖြစ်ပါတယ်။ ပုံမှန်လူတွေရဲ့ နေ့စဉ်လူနေမှုပုံစံတွေကလည်း ကယ်လိုရီစားသုံးမှုက ချေဖျက်မှုထက် ပိုများနေတတ်တာမို့ ဒီကနေ့ခေတ်မှာ အဝလွန်နေတဲ့လူတွေ၊ ရှိသင့်တဲ့ ကိုယ်အလေးချိန်ပမာဏထက် ပိုနေတဲ့လူတွေ များပြားနေတာဖြစ်ပါတယ်။ လေ့ကျင့်ခန်းပြုလုပ်တာမျိုး၊ သစ်သီးဝလံနဲ့ ဟင်းရွက်တွေကို ပိုမိုစားသုံးပေးတာမျိုးတွေ ပြုလုပ်ပေးဖို့ လိုအပ်ပါတယ်။
- အစားအသောက် ပုံစံပြောင်းလဲပါ
နေ့စဉ် အချိုတွေ၊ အအီတွေ၊ အဆီအဆိမ့်တွေ စားသောက်နေမယ့် အစား အာဟာရဓာတ်ပြည့်ဝပြီး ကိုယ်အလေးချိန်ကို စိစစ်စေမယ့် အစားအသောက်မျိုးတွေကို ပိုမိုစားသောက်ပေးသင့်ပါတယ်။ Food Delivery ကနေ ကိုယ်အလေးချိန်တက်စေမယ့် အဖျော်ယမကာတွေ၊ အသင့်စားအစားအစာတွေ၊ အကြော်အလှော်တွေ၊ အဆီများတဲ့ အစားအစာတွေကို မှာယူစားသောက်နေမယ့်အစား ဟင်းသီးဟင်းရွက်များများပါတဲ့ ဟင်းအမယတွေကို ကိုယ်တိုင်ကိုယ်ကျချက်ပြုတ်စားသောက်တာမျိုးက ကျန်းမာရေးနဲ့ ပိုမိုသင့်လျော်စေမှာဖြစ်ပါတယ်။
- ရေများများသောက်ပါ
ကိုယ်အလေးချိန် လျှော့ချတဲ့ နေရာမှာ ရေများများသောက်ပေးတာက ရိုးရှင်းသလောက် အလွန်ထိရောက်တဲ့ နည်းလမ်းတစ်ခုဖြစ်ပါတယ်။ ခုလို ပူပြင်းတဲ့နွေရာသီမျိုးမှာ ရေဓာတ်မဆုံးရှုံးဖို့အတွက်ရော၊ ကိုယ်အလေးချိန် ထိမ်းသိမ်းဖို့အတွက်ပါ ရေများများသောက်ပေးသင့်ပါတယ်။ ရေများများသောက်တာဟာ သွေးတွင်းသကြားဓာတ်ကိုလည်း လျှော့ချပေးနိုင်သလို၊ ခန္တာကိုယ်ရဲ့ ဇီဝကမ္မဖြစ်စဉ်ကိုလည်း တစ်တပ်တစ်အား အထောက်အကူပြုတာမို့ သွေးတိုးသမားတွေအတွက်လည်း အလွန်သင့်လျော်ပါတယ်။
- Fitness Tracker သုံးပါ
တန်ဖိုးကြီး Fitness Tracker ကြီးတွေကို ဝယ်ယူဖို့ တိုက်တွန်းတာမျိုးမဟုတ်ပါဘူး။ ရှိခဲ့ရင်တော့ ပိုကောင်းပါတယ်။ ဒါပေမယ့် မရှိရင်လည်း ပြဿနာမရှိပါဘူး။ မိုဘိုင်းလ်ဖုန်းတွေကို အကျိုးရှိရှိ အသုံးချလို့ရပါတယ်။ Fitness Tracker တွေပဲဖြစ်ဖြစ် မိုဘိုင်းလ်ဖုန်းထဲက App တွေကို အသုံးပြုတာပဲဖြစ်ဖြစ်ပါ ကိုယ်တစ်နေ့တာလုံးမှာ ဘယ်လိုနေထိုင်စားသောက်တယ်ဆိုတာကို မှတ်တမ်းတင်ထားတာဟာ ရေရှည်မှာ ကိုယ့်ကျန်းမာရေးနဲ့ သင့်လျော်တဲ့ ပုံစံမျိုးနဲ့ နေထိုင်နိုင်ဖို့ အထောက်အကူကောင်းဖြစ်ပါတယ်။ ဘယ်လိုစားမယ်၊ လမ်းဘယ်လောက်လျှောက်မယ်၊ လေ့ကျင့်ခန်း ဘယ်လိုလုပ်မယ်စသဖြင့် တွက်ချက်ဖို့ ဒီနည်းပညာတွေက အထောက်အကူပြုမှာဖြစ်ပါတယ်။
- နေ့စဉ် ကျန်းမာရေးအခြေအနေကို မပြတ်စောင့်ကြည့်ပါ
ကိုယ်က ကျန်းမာနေသည်ဖြစ်စေ၊ မကျန်းမာသည်ဖြစ်စေ အိမ်မှာ အားနေချိန်တွေမှာ နေ့စဉ် ကျန်းမာရေး အခြေအနေတွေကို မပြတ်စောင့်ကြည့်တာကလည်း ပျင်းမနေစေဖို့ နည်းလမ်းကောင်းတစ်ခုဖြစ်သလို စိတ်ဝင်စားစရာ ကိစ္စတစ်ခုဖြစ်စေမှာပါ။ ကိုယ်အလေးချိန်၊ သွေးတိုး၊ ဆီးချို၊ ခန္တာကိုယ် အပူချိန်စတာတွေကို ပုံမှန်တိုင်းတာနေမယ်ဆိုရင် ကိုယ့်ကျန်းမာရေးအခြေအနေကိုသာမက ကိုယ်ဆောင်သင့်ရှောင်သင့်တာတွေကိုလည်း သိလာမှာဖြစ်သလို ဒီလိုသိလာမယ်ဆိုရင် ကိုယ်အလေးချိန် ထိမ်းသိမ်းရေးအတွက် ဘာတွေလုပ်ရမယ်ဆိုတာကိုလည်း စဉ်းစားလို့ရလာမှာဖြစ်ပါတယ်။
- လေ့ကျင့်ခန်း ပုံမှန်လုပ်ပါ
အိမ်မှာ ပျင်းနေလို့ပဲဖြစ်ဖြစ်၊ ကိုယ်အလေးချိန် လျှော့ချလိုရင်ပဲဖြစ်ဖြစ်၊ ဘယ်လိုအကြောင်းအရင်းကြောင့်ပဲဖြစ်ဖြစ် ခုလို အားလပ်နေချိန်၊ အိမ်မှာ ရှိနေချိန်တွေမှာ လေ့ကျင့်ခန်း ပုံမှန်ပြုလုပ်တာက ကျန်းမာရေးအတွက်အထောက်အကူဖြစ်စေမယ့်နည်းလမ်းတစ်ရပ်ဖြစ်ပါတယ်။ နေ့စဉ် ပုံမှန်လေ့ကျင့်ခြင်းပုံမှန် ကစားပေးမယ်ဆိုရင်ကယ်လိုရီတွေကိုအများအပြား လောင်ကျွမ်းပေးနိုင်သလို ကိုယ်အလေးချိန်လျော့ကျစေဖို့လည်း အထောက်အကူပြုမှာဖြစ်ပါတယ်။ တစ်ခု သတိထားရမှာကတော့ ခုကာလဟာ နွေရောသီဖြစ်တာမို့ အလွန်အမင်းပြင်းထန်တဲ့ လေ့ကျင့်ခန်းမျိုးတွေကိုရှောင်ကြဉ်ပြီး ပေါ့ပါးတဲ့ လေ့ကျင့်ခန်းမျိုးတွေကိုသာ ကစားပေးသင်တယ် ဆိုတာပါပဲ။ ပြင်းထန်ပင်ပန်းလွန်းတဲ့ လေ့ကျင်ခန်းတွေဟာ လူကို ပိုမိုနွမ်းနယ်စေဖြစ်တာမို့ ကျန်းမာရေးနဲ့ ကိုက်ညီမှုမရှိတာမျိုးဖြစ်လာစေနိုင်ပါတယ်။
- ကိုယ့်ကိုယ်ကို စိန်ခေါ်မှုထားပါ
Challenge လုပ်ပါဆိုလို့ Facebook ပေါ်မှာ ဓာတ်ပုံတွေ တင်ပြီးလုပ်တဲ့ Challenge မျိုးကို ဆိုလိုတာမဟုတ်ပါဘူး။ ဒီလို အိမ်မှာနေနေရတဲ့ ကာလမျိုးမှာ “နေ့စဉ် ကယ်လိုရီပမာဏ ဘယ်လောက် လောင်ကျွမ်းအောင် လုပ်မယ်” ၊ “ကိုယ်အလေးချိန် ဘယ်ပမာဏအထိ လျော့ကျအောင်လုပ်မယ်” ၊ “လက်ရှိဝိတ်ကို မတိုးပဲ တည်ငြိမ်နေအောင်ထားပြမယ်” စသဖြင့်သော စိန်ခေါ်မှုမျိုးတွေပြုလုပ်ပြီး တကယ်ဖြစ်အောင် လုပ်ကြည့်ပါ။ ကိုယ့်ကိုယ်ကို Challenge ခေါ်ပြီး ကိုယ်တစ်ကယ်စွမ်းဆောင်နိုင်တယ်ဆိုတာကို သက်သေပြလိုက်ပါ။ ဒါဆို ကပ်ဘေးကြီး ပြီးချိန်၊ သူများတွေ ဝက်ဖြစ်ချင်ဖြစ်နေနိုင်ပေမယ့် ကိုယ်ကတော့ ခန္တာကိုယ် လှလှလေးကို ထုတ်ကြွားလို့ရပြီလေ။
