သမ္မတ ဦးသိန်းစိန်က သူ၏ ပြုပြင်ပြောင်းလဲရေး လုပ်ငန်းများကို ဖေါ်ညွှန်းပြောဆိုရာတွင် သူ၏ သမ္မတ သက်တမ်းအတွင်း အကျင့်ဟောင်း၊ အတွေးအခေါ်ဟောင်းနှင့် ကိုယ်ကျိုးအတွက် ရှေ့တန်းတင်မှုတို့ကို ဖယ်ရှားခဲ့ရပြီး အလွန်ခက်ခက်ခဲ ခဲ့သည်ဟု ပြောဆိုလိုက်သည်။
“အစိုးရ သက်တမ်းတစ်ကြိမ်အတွင်းမှာ ဒီလိုကြီးလေးလှတဲ့ လုပ်ငန်းစဉ်များ ပြီးမြောက်အောင် ဆောင်ရွက်နိုင်ဖို့ဆိုတာ ခက်ခဲပါတယ်။ ကျွန်တော့်အနေနဲ့ သမ္မတ တာဝန်ယူပြီး အစိုးရ အဖွဲ့ကိုဦးဆောင်ရတဲ့ ပထမဆုံးသက်တမ်းမှာ အတွေးအခေါ်ဟောင်း၊ အမူအကျင့်ဟောင်းတွေနဲ့ ကိုယ်ကျိုးအတ္တကို ရှေ့တန်းတင်မှုတွေကို ဖယ်ရှားဖို့ကြိုးပမ်း လျှောက်လှမ်း ရတာဟာလည်း အလွန် သိမ်မွေ့နက်နဲလှပါတယ်” ဟု သမ္မတက သူ၏ လစဉ်ရေဒီယို မိန့်ခွန်းတွင် ပြောသည်။
သမ္မတက လာမည့် ရွေးကောက်ပွဲနှင် ပတ်သက်၍ အထူးတလည် ပြောဆိုသွားပြီး လာမည့် ရွေးကောက်ပွဲ ရလဒ်ကို လက်ခံကြရန်လည်း နိုင်ငံရေးပါတီများ၊ လူပုဂ္ဂိုလ်များသို့ တိုက်တွန်းထားသည်။
“၂၀၁၅ အထွေထွေ ရွေးကောက်ပွဲ ရလဒ်များဟာ ပြည်သူများရဲ့ ဆန္ဒအစစ်အမှန်တွေကို ထင်ဟပ်မယ်ဆိုတာ အခိုင်အမာ ယုံကြည်ထားပါတယ်။ ဒါကြောင့် နိုင်ငံရေးပါတီများနဲ့ လူပုဂ္ဂိုလ် အသီးသီး အနေနဲ့လည်း ပြည်သူများရဲ့ ဆန္ဒကိုလေးစားပြီး ရွေးကောက်ပွဲရလဒ်များ အပေါ်မှာ အလေးထား ကြိုဆိုလက် ခံကြဖို့လည်း တိုက်တွန်း ပြောကြားလိုပါတယ်” ဟု သမ္မတက ပြောသည်။
အလားတူ ရွေးကောက်ပွဲ မဲပေးမှုနှင့် ပတ်သက်၍ ပြည်သူသို့ တိုက်တွန်းရာတွင် “တစ်ဦးချင်း ဆုံးဖြတ် ရွေးချယ်ရာမှာလည်း ပထမဆုံးအနေနဲ့ ရိုးသားတည်ကြည်မှု၊ စိတ်ရှည် သဘောထားကြီးမှုနဲ့ အမြော်အမြင်ကြီးမှုစတဲ့ နိုင်ငံသားတန်ဖိုး၊ လူမှုတန်ဖိုးများကို နှလုံးသွင်းပြီး စဉ်းစားဆုံးဖြတ် ရွေးချယ်ကြ စေလိုပါတယ်” ဟု ပြောသည်။
အလားတူ သန့်ရှင်းသည့် ရွေးကောက်ပွဲဖြစ်ရန်လည်း ရာနှုန်းပြည့် ကြိုးစားထားသည်ဟု သမ္မတက ဆိုသည်။ “ရာနှုန်းပြည့် ပြီးပြည့်စုံတဲ့ ရွေးကောက်ပွဲ ဆိုတာတွေကို ကျင်းပဖို့ အခက်အခဲများ ရှိနေတာကိုလည်း ကျွန်တော့်အနေနဲ့ နားလည် လက်ခံထားပါတယ်။ သို့သော်လည်းပဲ ကျွန်တော်တို့ အစိုးရအဖွဲ့ အနေနဲ့ သန့်ရှင်းလွတ်လပ်တဲ့ ရွေးကောက်ပွဲများကို ငြိမ်းချမ်းစွာ ကျင်းပနိုင်ဖို့ အတွက် ရာနှုန်းပြည့် ကြိုးစားလုပ်ဆောင်ထားကြောင်း အသိပေး ပြောကြား လိုပါတယ်” ဟု ပြောခဲ့သည်။
