အင်အားကြီးပါတီက ဗိုလ်မှူးတစ်ဦးနဲ့ အဓိကယှဉ်ပြိုင်ရမယ့် NLD ပါတီရဲ့ အမျိုးသမီးကိုယ်စားလှယ်လောင်း ဒေါ်ရီရီချိုနဲ့ တွေ့ဆုံခြင်း

အင်အားကြီးပါတီက ဗိုလ်မှူးတစ်ဦးနဲ့ အဓိကယှဉ်ပြိုင်ရမယ့် NLD ပါတီရဲ့ အမျိုးသမီးကိုယ်စားလှယ်လောင်း ဒေါ်ရီရီချိုနဲ့ တွေ့ဆုံခြင်း

အမျိုးသားဒီမိုကရေစီအဖွဲ့ချုပ်ပါတီကို ကိုယ်စားပြုယှဉ်ပြိုင်မည့် တိုင်းဒေသကြီးလွှတ်တော်ကိုယ်စားလှယ်လောင်း ဒေါ်ရီရီချိုသည် မြိတ်မြို့နယ်၊ မဲဆန္ဒနယ်အမှတ် (၂) အတွင်းပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ဦးဝင်းကြူ၊ တိုင်းရင်းသားစည်းလုံးညီညွတ်ရေးပါတီမှ ဦးကြည်သန်း၊ ဒီမိုကရက်တစ်ပါတီ (မြန်မာ) မှ ဦးရန်နိုင်ဖြိုးတို့နှင့်အတူ ပါဝင်ယှဉ်ပြိုင်ရမည့် တစ်ဦးတည်းသော အမျိုးသမီး ကိုယ်စားလှယ်လောင်းဖြစ်သည်။ အမျိုးသမီးကိုယ်စားလှယ်လောင်းတစ်ဦး၏ရည်မှန်းချက်၊လုပ်ဆောင်ချက်နှင့် ဒေသအပေါ်ထားရှိသည့် စေတနာများကို ယခုအင်တာဗျူးတွင် တွေ့ရှိရမည်ဖြစ်ပါသည်။

ဒေါ်ရီရီချို

အမျိုးသားဒီမိုကရေစီအဖွဲ့ချုပ်ပါတီ

ဝင်ရောက်ရွေးချယ်ခံမည့်မဲဆန္ဒနယ် - မြိတ်မြို့နယ်၊ မဲဆန္ဒနယ်အမှတ် (၂)၊ တိုင်းဒေသကြီးလွှတ်တော်။

ဘာကြောင့် ရွေးကောက်ပွဲမှာ ပါဝင်ယှဉ်ပြိုင်ရလဲ ဆိုတဲ့ ရည်ရွယ်ချက်လေးကို သိချင်ပါတယ်။

ကျွန်မအနေနဲ့ ရွေးကောက်ပွဲမှာ ပါဝင်ယှဉ်ပြိုင်ရတာကတော့ နိုင်ငံပြောင်းအလဲဖြစ်နေတဲ့အချိန်ဖြစ်တဲ့အတွက် အရွေ့တစ်ခုအနေနဲ့ ကိုယ်စွမ်းဉာဏ်စွမ်းရှိသရွေ့ ပါဝင်ထမ်းဆောင်လိုတဲ့ အတွက်ဖြစ် ပါတယ်။

ဆရာမအနေနဲ့ လွှတ်တော်အမတ်အဖြစ် ရွေးချယ်ခံရရင် ပြည်သူတွေအတွက် ဘာတွေလုပ်ပေးမယ်၊  ဘာတွေကို ဦးစားပေးပြီးဆောင်ရွက်သွားမယ် ဆိုတဲ့ ရည်မှန်းချက်ရှိပါသလား။

လွှတ်တော်အမတ်တစ်ယောက်ဖြစ်လာရင် ဦးစားပေးဆောင်ရွက်ချင်တာတွေရှိပါတယ်။ ဒီဒေသအတွင်းမှာနေထိုင်နေကြတဲ့နောက်ကျနိမ့်ကျန်နေတဲ့ အမျိုးသမီးတွေရဲ့ဘဝလုံခြုံစိတ်ချရေးကိစ္စတွေ၊ ကလေးသူငယ်တွေ၊ ကျောင်းသားတွေ အာဟာရပြည့်မီပြီး ကျန်းကျန်းမာမာ အေးအေးချမ်းချမ်းနဲ့ လုံခြုံစွာကြီးပြင်းနိုင်ဖို့တွေ၊ ဒီဒေသမှာ မူးယစ်ဆေးဝါးကင်းစင်ဖို့တွေ၊ပညာရေးကောင်းမွန်ဖို့တွေ လုပ်စရာတွေအများကြီးရှိပါတယ်။ ဒါတွေကိုအောင်မြင်အောင် ဒေသခံတွေနဲ့အတူ ပူးပေါင်းဆောင်ရွက်သွားမှာပါ။ ပြီးတော့ ကိုယ်တိုင်က တောင်သူတစ်ဦးဖြစ်တဲ့အတွက်ဒေသ ထွက်ကုန်တွေ ကိုဈေးကွက်စီးပွားရေးဖော်ဆောင်ပေးပြီးဒေသအတွင်းစီးပွားတိုးတက်ရေးကိုလည်း အလေးပေးဆောင်ရွက်ချင်ပါတယ်။

ဆရာမအနေနဲ့ စီးပွားရေးအနေနဲ့ဆိုရင်ရော ဘာတွေလုပ်ကိုင်နေပါသလဲ။ အရင်ကရော ဘာလုပ်ခဲ့ပါသလဲ။

ကျွန်မက အရင်တုန်းကလည်း လယ်ယာနဲ့ရာဘာစိုက်ပျိုးရေးလုပ်ငန်း လုပ်ကိုင်ခဲ့ပါတယ်။ အခုလည်းပဲ ဒီလုပ်ငန်းကိုပဲ ရုံးအဖွဲ့နဲ့အတူလုပ်ကိုင်နေပါတယ်။

ဘာကြောင့် NLD ပါတီကနေ ဝင်ရောက်ယှဉ်ပြိုင်ရတာပါလဲ။

NLD ကတော့မိခင်ပါတီပါ။ ၁၉၈၉ ခုနှစ် ပါတီစတင်ဖွဲ့စည်းချိန်ကတည်းက မြိတ်မြို့နယ် အမျိုးသား ဒီမိုကရေစီအဖွဲ့ချုပ်ရဲ့ အမျိုးသမီးလုပ်ငန်းအဖွဲ့ဘဏ္ဍာရေးမှူးအဖြစ် တာဝန်ထမ်းဆောင်ခဲ့ပါတယ်။ ၁၉၉၀ရွေးကောက်ပွဲမှာလည်း တက်ကြွစွာပါဝင်ထမ်းဆောင်ခဲ့ပါတယ်။ ဒါကြောင့် ၂၀၁၅ ရွေးကောက်ပွဲမှာလည်း NLD က နေပဲ ဝင်ရောက်အရွေးချယ်ခံယှဉ်ပြိုင်တာပါ။

ဆရာမ ဝင်ပြိုင်မယ့် မဲဆန္ဒနယ်မှာ မဲပေးနိုင်တဲ့သူ ဘယ်လောက်ရှိပါသလဲ။ ပါဝင်ယှဉ်ပြိုင်ကြမယ့် ပါတီတွေအနေနဲ့ရော ဘယ်လောက်ရှိနေပါသလဲ။ ပြီးတော့ ကိုယ်အဓိက ယှဉ်ပြိုင် ရမယ့်သူကရော ဘယ်သူဖြစ်မလဲ။

ကျွန်မတို့ရဲ့ အမှတ်(၂)  မဲဆန္ဒနယ်မှာဆိုရင်တော့ မဲပေးနိုင်သူဦးရေ လက်ရှိအနေအထားအထိက တော့ ၆၈၅၀၅မဲ ရှိပါတယ်။ နောက်ဆုံးထွက်မဟုတ်တဲ့ မဲစာရင်းအရပေါ့လေ။ ပြီးတော့ ပါတီအနေနဲ့ဆိုရင် လေးပါတီ ယှဉ်ပြိုင်ရမှာပါ။ အဲ့ဒီမှာ အင်အားကြီးတဲ့ပါတီအနေနဲ့ကတော့ USDP ပါတီပါပဲ။ ကျွန်မအနေနဲ့ အဓိကယှဉ်ပြိုင်ရမယ့်အမတ်လောင်းကလည်း USDP ကနေဝင်ရောက်ယှဉ်ပြိုင်မယ့် ဗိုလ်မှူးဝင်းကြူ ပါပဲ။

ဆရာမတို့ဒေသမှာဆိုရင် နိုင်ငံရပ်ခြားကိုပြောင်းရွှေ့ပြီး အလုပ်လုပ်ကိုင်နေတဲ့သူတွေလည်း များပါတယ်။ အဲ့ဒီလို ရွှေ့ပြောင်းအလုပ်သမားတွေ မဲပေးနိုင်မယ့်အနေအထားရှိပါသလား။

လုံးဝမရှိပါဘူးလို့ပဲ ပြောရမှာပါ။

တချို့နေရာတွေမှာဆိုရင်  ဘာသာရေးကိုအကြောင်းပြပြီး မဲဆွယ်နေတာမျိုးတွေ တွေ့ရပါတယ်။ ဆရာမ ဝင်ရောက်ယှဉ်ပြိုင်မယ့် မဲဆန္ဒနယ်မှာရော ဒီလိုမျိုးမဲဆွယ်မှုမျိုးတွေ ရှိပါသလား။

ဘာသာရေးအကြောင်းပြမဲဆွယ်သလားဆိုရင်တော့ ရှိပါတယ်လို့ ပြောရမှာပါ။ တစ်ဘက်ပါတီကြီးတွေက ဘုန်းကြီးကျောင်းတွေမှာ ဆွမ်းကျွေးပွဲတွေ အပတ်စဉ်ပြုလုပ်နေတာမျိုးတွေ တွေ့ရပါတယ်။

စည်းရုံးရေးဆင်းတဲ့အခါမှာ NLD အမတ်လောင်းတွေမှာ ဘယ်လိုစိန်ခေါ်မှုတွေ တွေ့ရပါသလဲ။ လက်ရှိရင်ဆိုင်နေရတဲ့အခက်အခဲ ရှိနေရင်လည်း ပြောပြပေးပါ။

စည်းရုံးရေးဆင်းတဲ့အခါမှာ အချို့နေရာတွေကလမ်းပန်းဆက်သွယ်ရေး လုံးဝမကောင်းပါဘူး။ ကားပျက်တာတွေ၊ ရွှံ့ဗွက်ထဲကားမောင်းရတာတွေ ဆိုရင် ကားဆင်းတွန်းရလို့ အချိန်တွေလည်း နောက်ကျပြီး မဲဆန္ဒရှင်နဲ့ အချိန်မီမတွေ့နိုင်တာမျိုးတွေ ရှိပါတယ်။ အဲ့ဒီလို အချိန်နောက်ကျရတာကလွဲလို့ စိန်ခေါ်မှုကြီးကြီးမားမားတော့ မတွေ့ရသေးပါဘူး။ လက်ရှိရင်ဆိုင်နေရတဲ့အခက်အခဲကို ပြောရမယ်ဆိုရင်တော့  မဲစာရင်းပါပဲ။  အသက်ပြည့်ပြီးတဲ့မဲပေးနိုင်သူတွေ မဲစာရင်းမှာအားလုံးမပါဝင်ကြတာမျိုး၊ ပိုနေတဲ့ ထပ်နေတဲ့ မဲစာရင်းတွေ ရှိနေတာမျိုးကို စိုးရိမ်ဖွယ်တွေ့ရှိနေရပါတယ်။

ပြည်သူတွေကရော ရွေးကောက်ပွဲနဲ့ပတ်သက်ပြီး စိတ်ဝင်စားမှုအခြေအနေ ဘယ်လိုရှိကြပါသလဲ။ မဲတကယ်လာထည့်ကြမယ်လို့ ထင်ပါသလား။

ပြည်သူတွေအနေနဲ့ကတော့ ပြောင်းလဲမှုတစ်ခုကို လိုလိုချင်ချင်ရှိနေပြီလို့ထင်ပါတယ်။ ဘာလို့လဲ ဆိုတော့ ရွေးကောက်ပွဲနီးလာလေ စိတ်ပါဝင်စားမှုပိုများပြီး ပါဝင်မှုနှုန်းပိုများ လာလေဖြစ်နေ တာကို မြင်နေရလို့ပါ။ မဲပေးတဲ့နေ့မှာလည်း မဲတကယ်လာထည့်ကြမယ် ထင်ပါတယ်။ အဲ့ဒီလို မဲလာထည့်ဖြစ်အောင်လည်း ကျွန်မတို့က တိုက်တွန်းနှိုးဆော်နေပါတယ်။

နိုဝင်ဘာ ၈ ရက်ဆိုရင် မဲပေးရတော့မယ်။ အဲ့ဒီအတွက် ဆရာမတို့အနေနဲ့ ဘာတွေ ပြင်ဆင်ထားပါသလဲ။

ကြိုတင်ပြင်ဆင်မှုအနေနဲ့ ပြောရမယ်ဆိုရင်တော့ မဲရေတွက်ရာမှာအဓိကကျတဲ့မဲရုံကိုယ်စားလှယ်နဲ့ အကူကိုယ်စားလှယ်တွေကို သင်တန်းထပ်တလဲလဲပေးနေပါတယ်။ ငွေစာရင်းတွေကို တိတိကျကျဖြစ်ဖို့အရေး ပြင်ဆင်ထားပါတယ်။ မဲရုံပြင်ပမှာ စောင့်ကြည့်သူတွေ ရှိနေဖို့အတွက်လည်း ချိတ်ဆက်ဆောင်ရွက်ထားပါတယ်။

နောက်ဆုံးတစ်ခုမေးချင်တာကတော့အမျိုးသမီးအမတ်တွေ လွှတ်တော်ထဲမှာ များများရှိနေရင် ဘယ်လိုအရာတွေကို ပြောင်းလဲစေမယ်လို့ ယုံကြည်မျှော်လင့်ထားပါသလဲ။

အမျိုးသမီးတွေသာ လွှတ်တော်ထဲမှာ များများရှိနေမယ်ဆိုရင် အကျိုးကျေးဇူးလည်းအများကြီးရှိမယ်လို့ ယုံကြည်ပါတယ်။ အမျိုးသမီးတွေရဲ့ စေ့စပ်ညှိနှိုင်းမှုကျွမ်းကျင်ခြင်း၊ အုပ်ချုပ်စီမံခန့်ခွဲ မှုစွမ်းရည် ရှိခြင်း ဆိုတဲ့ မွေးရာပါစွမ်းရည်နဲ့ အမျိုးသားတွေမမြင်နိုင်တဲ့ကိစ္စရပ်တွေကို ဖြေရှင်းရာမှာတင်းမာမှုကိုလျှော့ချပြီး လိမ္မာပါးနပ်စွာ ဖြေရှင်းနိုင်မယ်။ ပြီးတော့ နိုင်ငံလူဦးရေထက်ဝက်ကျော်က အမျိုးသမီး ဆိုတော့ ကိုယ်စားပြုမှုနှုန်းများလေ နိုင်ငံအတွင်းမှာရှိတဲ့ နိုင်ငံသားတွေရဲ့အသံကို လွှတ်တော်ထဲယူဆောင်နိုင်လေဖြစ်ပြီး နိုင်ငံတိုးတက်မှုကို ဆောင်ကျဉ်းနိုင်မယ်လို့ ယုံကြည်ပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly