ဖေဖော်ဝါရီ ၇။ ။ လက်ရှိကာလမှာ ကိုရိုနာဗိုင်းရပ်စ် အန္တရာယ်နဲ့ပတ်သက်လို့ စိုးရိမ်ပူပန်မှုတွေ မြင့်တက်နေစဉ်မှာပဲ တောင်ကိုရီးယားက ခရစ်ယာန်ဘုရားကျောင်းတစ်ခုမှာတော့ ဖေဖော်ဝါရီ ၇ ရက်က ထောင်နဲ့ချီတဲ့ စုံတွဲတွေရဲ့ စုပေါင်း မင်္ဂလာလက်ထပ်ပွဲတစ်ခုကို ကျင်းပခဲ့ပါတယ်။
ဗိုင်းရပ်စ် ကူးစက်မှုမှာ စိုးရိမ်နေရတာကြောင့် ယခု စုပေါင်းလက်ထပ်ပွဲမှာ မင်္ဂလာစုံတွဲတစ်ချို့လည်း နှာခေါင်းစည်းတွေ တပ်လျက်သား ပါဝင်ဆင်နွှဲခဲ့ကြတာကို မြင်တွေ့ခဲ့ရပါတယ်။
အဆိုပါ ဘုရားကျောင်း တာဝန်ရှိသူတွေကလည်း မင်္ဂလာပွဲတက်ရောက်လာသူ ၃၀,၀၀၀ ခန့်ကို နှာခေါင်းစည်းတွေ ဝေငှပေးခဲ့ပေမယ့် လူတစ်ချို့ကပဲ တပ်ဆင်ခဲ့ကြတာဖြစ်ပါတယ်။
“ ကျွန်မ ဒီနေ့ပဲ လက်ထပ်လိုက်ရလို့ အရမ်းပဲ ပျော်နေမိပါတယ်၊ ခုချိန်မှာ ဗိုင်းရပ်စ် အကူးခံရမှာကို မကြောက်ဘူးလို့ ပြောရင် ကျွန်မ လိမ်ပြောရာ ကျပါလိမ့်မယ်၊ ဒါပေမယ့် ဒီနေ့မှာတော့ ကျွန်မ အကာအကွယ် ရသွားသလို ခံစားမိပါတယ် ” ဆိုပြီး မင်္ဂလာသတို့သမီးတစ်ဦးဖြစ်တဲ့ ချွိုင်ဂျီယန်းက ပြောသွားပါတယ်။
တောင်ကိုရီးယားမှာတော့ လက်ရှိအချိန်မှာ ကိုရိုနာဗိုင်းရပ်စ် ကူးစက်ခံရသူ ၂၄ ဦး ရှိနေပြီး ယင်း ဗိုင်းရပ်စ် ပျံ့နှံ့ကူးစက်မယ့် အရေး ပြည်သူလူထုအကြား စိုးရိမ်ပူပန်မှုတွေ မြင့်တက်နေပါတယ်။
တရုတ်မှာတော့ ယင်းဗိုင်းရပ်စ်ကြောင့် သေဆုံးသူ ၆၀၀ ကျော်သွားပြီး လူပေါင်း ၃၀,၀၀၀ ကျော် ကူးစက်ခံထားရပါတယ်။