တီဟီရန်၊ ဇန်နဝါရီ ၈ ။ ။အီရန်နိုင်ငံ ဘိုရာဂျန်မြို့ ဘူရှဲနျူကလီးယားဓာတ်အားပေးစက်ရုံမှ ကီလိုမီတာ ၅၀ (မိုင် ၃၀) ခန့်အကွာ၌ ဒီကနေ့ (ဇန်နဝါရီ ၈ ရက်) ပြင်းအား ၄ ဒသမ ၅ အဆင့်ရှိ မြေငလျင်တစ်ခုလှုပ်ခတ်သွားကြောင်းသိရသည်။
ငလျင်သည် ဘိုရာဂျန်မြို့ အရှေ့တောင်ဘက် ၁၇ ကီလိုမီတာအကွာဝေးရှိ မြေအောက် ၁၀ ကီလိုမီတာအနက်၌ ဒေသစံတော်ချိန် နံနက် ၆ နာရီ ၄၉ မိနစ်က လှုပ်ခတ်သွားသည်ဟု အမေရိကန်ဘူမိဗေဒစောင့်ကြည့်လေ့လာရေးအဖွဲ့က ထုတ်ပြန်ခဲ့ခြင်းဖြစ်သည်။
အဆိုပါငလျင်သည် အီရန်နိုင်ငံ၏တစ်ခုတည်းသော ဘူရှဲနျူကလီးယားစက်ရုံအနီးတွင် လှုပ်ခတ်ခဲ့ခြင်းဖြစ်ကြောင်း အီရန်အစိုးရသတင်းဌာန IRNA က ဆိုသည်။ အပျက်အစီးနှင့် လူအသေအပျောက်သတင်းများကိုမူ မကြားရသေးပေ။
ဓာတ်အား ၁၀၀၀ မဂ္ဂါဝပ်ထုတ်လုပ်နိုင်သည့် ဘူရှဲနျူကလီးယားဓာတ်အားပေးစက်ရုံကို ရုရှားက အပြီးသတ်တည်ဆောက်ပေးခဲ့ပြီး ၂၀၁၃ ခုနှစ် စက်တင်ဘာက တရားဝင်လွှဲပြောင်းပေးခဲ့ခြင်းဖြစ်သည်။
၂၀၁၆ ခုနှစ်ကလည်း ရုရှားနှင့်အီရန်ကုမ္ပဏီများသည် ဘူရှဲ၌ နောက်ထပ် ၁၀၀၀ မဂ္ဂဝပ်ထုတ်လုပ်နိုင်သည့် ဓာတ်ပေါင်းဖိုနှစ်ခုကို စတင်ဆောက်လုပ်ခဲ့ပြီး ၁၀ နှစ်အကြာတွင် အပြီးသတ်နိုင်မည်ဟု မျှော်မှန်းထားသည်။
