ဇန်နဝါရီ ၈။ ။အီရတ်နိုင်ငံရှိ အမေရိကန် တပ်ဖွဲ့ဝင်များရှိရာ စစ်အခြေစိုက် စခန်းနှစ်ခုကို အီရန်က ဒုံးကျည်ဖြင့် တိုက်ခိုက်ခဲ့ပြီးနောက် ထိခိုက်သေဆုံးမှု အခြေအနေနှင့်ပတ်သက်၍ ကနဦး အကဲဖြတ် စစ်ဆေးခဲ့ရာတွင် အားလုံး အခြေအနေ ကောင်းမွန်လျက် ရှိကြောင်း အမေရိကန်သမ္မတ ဒေါ်နယ်ထရမ့်က ပြောသည်။
သမ္မတ ဒေါ်နယ်ထရမ့်က “ သေဆုံး ထိခိုက် ဒဏ်ရာရမှု၊ ပျက်စီးဆုံးရှုံးမှု နဲ့ပတ်သက်လို့ အကဲဖြတ် စစ်ဆေးမှုတွေ ခုလုပ်နေပါပြီ၊ ခုချိန်အထိတော့ အတော်လေး ကောင်းပါတယ်” ဟု သူ၏ တွစ်တာကနေတဆင့် ပြောသွားသည်။
သို့သော် ဇန်နဝါရီ ၈ ရက် မနက်အစောပိုင်းမှာ ဝါရှင်တန်မှ ကြေညာချက်တစ်ရပ် ထုတ်ပြန်သွားမည်ဟု ထရမ့်က ပြောသည်။
“ ကျွန်တော် ၈ ရက်နေ့ မနက် ကြေညာချက်တစ်ခု ထုတ်ပါမယ်” ဟု ထရမ့်က ပြောသည်။
အီရတ်နိုင်ငံရှိ အမေရိကန် စစ်အခြေစိုက် စခန်းနှစ်ခုကို ဇန်နဝါရီ ၈ ရက် အစောပိုင်းတွင် အီရန်က ဒုံးလက်နက်များဖြင့် ပစ်ခတ်တိုက်ခိုက်ခဲ့ခြင်း ဖြစ်သည်။
ပြီးခဲ့သည့် အပတ်က အီရန်စစ်တပ် ထိပ်တန်းတပ်မှူး ဗိုလ်ချုပ်ကြီး ဆိုလေမာနီ အမေရိကန် လက်ချက်ဖြင့် သေဆုံးမှု အတွက် လက်စားချေသည့်အနေဖြင့် ယခုတိုက်ခိုက်မှုကို အီရန်တို့ လုပ်ဆောင်ခဲ့ခြင်းဖြစ်သည်ဟု သိရသည်။