ရေးသားသူ Aye Thi Mon

ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

ဝက်ခြံ မျက်နှာပေါ်က အလှပျက်စေတဲ့ အရေပြားပြဿနာတစ်ခုပေါ့။ အရွယ်ရောက်လာလေ လှချင်လေလေပါဆိုမှ ဝက်ခြံကြောင့် စိတ်ညစ်နေရတဲ့ ဆယ်ကျော်သက်တွေ အများကြီးနော်။ ဟော်မုန်းအပြောင်းအလဲကြောင့်ဆိုလို သည်းခံခဲ့ပေမယ့်။ ဆယ်ကျော်သက်ကနေ နှစ်ဆယ်ကျော်သက်ရောက်တာတောင် သူတို့က မခွဲမခွာကိုယ့်အနားမှာရှိနေတာ ကစိတ်ပျက်စရာပါနော်။ တစ်ခါတလေများ မိုးလင်းအိပ်ရာနိုးနိုးချင်း မှန်ထဲကြည့်မိရင် သူတို့ကို အရင်မြင်မိတာ စိတ်ပျက် အားငယ်သလိုတောင်ဖြစ်မိတယ်ဟုတ်။ ကဲ ဝက်ခြံကြောင့် တစ်နေ့တာမှာ စိတ်ပျက်တာမျိုး မဖြစ်ရစေဖို့ အခုပြောပြတဲ့နည်းလေးတွေက ကူညီပေးနိုင်မှာပါ။
ဝက်ခြံ သက်သာစေမယ့်နည်းလမ်းအချို့

မျက်နှာပေါ်က ဝက်ခြံ တွေကို ဆေးတွေသုံးပြီး ပျောက်အောင်လုပ်ချင်ပေမယ့် ဘေးထွက်ဆိုးကျိုးရှိလာမှာကို စိုးရိမ်သူတွေအတွက် သာဝ ပစ္စည်းလေးတွေသုံးပြီး သက်သာအောင်လုပ်လို့ရမယ့် နည်းလမ်းလေးတွေပြောပြမယ်နော်။

သခွားသီး – မျက်နှာကို သန့်နေအောင်သစ်ပါ။ ပြီးရင် ခပ်ပါးပါးလွှာပြီး အအေးခံထားတဲ့ သခွားသီးကို မျက်နှာအနှံ့ကပ်ပေးပါ။ နာရီဝက်လောက်ထားပြီး ရေဆေးချလိုက်နော်။ တစ်ပတ် နှစ်ကြိမ်လောက်လုပ်ပေးပါ။

ရှားစောင်းလက်ပပ် – ရှားစောင်းလက်ပပ်အနှစ်ကလည်း ဝက်ခြံသက်သာစေပြီးအသားအရေကောင်းမွန်စေပါတယ်။ ဒါကြောင့် သန့်စင်ထားတဲ့ မျက်နှာပေါ်မှာ ရှားစောင်းလက်ပပ်ကပ်ပေးပြီး ဝက်ခြံတွေကို သက်သာအောင်လုပ်ကြည့်ပါ။

ပျားရည် – စားရတာအရသာရှိသလို အရေပြားမှာလူးပေးရင်လည်း အသားအရေကောင်းမွန်စေပါတယ်။ ဝက်ခြံရှိသူတွေအနေနဲ့ ပျားရည်ကို ဂွမ်းစလေးနဲ့ယူပြီး ဝက်ခြံရှိတဲ့နေရာကို တို့ပေးပါ။ နာရီဝကလောက်ထားပြီးမှာ ရေခပ်နွေးနွေးလေးနဲ့ ဆေးချပေးလိုက်ပါ။

သံပုရာရည် – သံပုရည်ကို ဂွမ်းစလေးနဲ့ယူပြီး ညမအိပ်ခင်ဝက်ခြံပေါ်မှာတို့ထားပေးပါ။ မနက်နိုးလာရင် ရေခပ်နွေးနွေးလေးနဲ့ ဆေးချပေးပါ။

ပူစီနံ – လတ်လတ်ဆတ်ဆတ် ပူစီနံရွက်ကို ကြိတ်ခြေပြီး ဝက်ခြံပေါ်မှာ မိနစ် ၂၀ လောက်လိမ်းထားပေးပါ။ ပြီးရင် ရေနွေးနွေးလေးနဲ့ဆေးချလိုက်ပါ။ နောက်ဆုံးမှာတော့ အစိုဓာတ်ထိန်းခရင်မ်တစ်ခုခုလူးပေးလိုက်ပါ။

ကြက်ဥအကာ – ကြက်ဥအကာရည်ကို မျက်နှာအနှံ့လူးပေးပြီး မိနစ် ၂၀ လောက်ထားပေးပါ။ ပြီးရင် လက်ချောင်းလေးတွေနဲ့ မျက်နှာကို နှိပ်နယ်ပြီး ရေခပ်နွေးနွေးလေးနဲ့ ဆေးချလိုက်ပါ။ ဒီနည်းကလည်း ဝက်ခြံသက်သာစေပါတယ်။

အခုလိုသဘာဝပစ္စည်းတွေကို အသုံးပြုပြီး တစ်ပတ်တစ်ကြိမ် တစ်ပတ်နှစ်ကြိမ်လောက်အထိမျက်နှာကို အာဟာရဖြည့်တင်း ပေါင်းတင်ပေးလို့ရပါတယ်။

•     ဒီလိုပေါင်းတင်ပေးတာနဲ့အတူ
•     အိပ်ရေးဝဝအိပ်မယ်
•     အချိုကဲတာတွေရှောင်မယ်
•     အငန်လျှော့စားမယ်
•     ရေများများသောက်မယ်
•     လေ့ကျင့်ခန်းလုပ်မယ်
•     အသားအရေကို ပုံမှန်သန့်စင်တာတွေလုပ်ပေးမယ်ဆိုရင် ဝက်ခြံကင်းပြီး ​ကြည်လင်တဲ့အသားအရေကို ပိုင်ဆိုင်နိုင်မှာအသေအချာပါ။

ဤဆောင်းပါးကို Mizzima ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။

Mizzima Key Campaign မှာ ပါဝင်ဖို့ ဖိတ်ခေါ်လိုက်ပါတယ်။ Visit Our website: http://building.mizzimafoundation.org/