ရေးသားသူ Ye Myo Myat

ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

Sheet Mask ကို အလှအပဂရုစိုက်တဲ့ ပျိုမေတွေ တော်တော်များများကတော့ သိထားပြီးဖြစ်မယ်ထင်ပါတယ်။ အထုပ်သေးသေးလေးထဲမှာ ဆေးရည်တွေ၊ သစ်သီးအနှစ်တွေ၊ အသားအရေကို နူးညံ့စိုပြေစေတဲ့ အရည်တွေနဲ့ စိမ်ထားတဲ့ မျက်နှာကပ်ခွာလိုမျိုးပါပဲ။
အဓိက အားသာချက်တွေက ဘာတွေလဲ။

1. • အထုပ်သေးသေးလေးဖြစ်လို့ သယ်ယူထုတ်ပိုးရ လွယ်ကူတယ်။
2. • သွားလေရာဆောင်သွားလို့ရတယ်။ အိတ်ထဲမှာ နေရာမစားဘူး။
3. • ခရီးသွားတဲ့အချိန်ဆိုလည်း အသုံးပြုလို့ရတယ်။
4. • အချိန် ၁၀ မိနစ်လောက်ပေးရုံနဲ့ ကိုယ့်အသားအရေကို ကောင်းကောင်းထိန်းသိမ်းပေးနိုင်တယ်။
5. • နေ့တိုင်းလုပ်လို့ ရသလို ကိုယ်အားတဲ့အချိန်မှ လုပ်ရင်လည်း အဆင်ပြေတယ်။
6. • အလုပ်မရှုပ်ဘူး။ အိမ်မှာ အမှိုက်မပွဘူး။
7. • သုံးပြီးတာနဲ့ ကပ်ခွာကို ယူပြီး အမှိုက်ပုံးထဲ ပစ်လိုက်ရုံပဲ။
8. ဘယ်လိုအချိန်မှာ အသုံးပြုသင့်လဲ။

မနက်စောစော ဒါမှမဟုတ် ညအိပ်ခါနီးမှာ အသုံးပြုတာတော့ အကောင်းဆုံးပါပဲ။ ဘယ်အချိန်ပဲသုံးသုံး အဓိက မျက်နှာကို သေချာသန့်ရှင်းထားဖို့နဲ့ မိတ်ကပ်၊ နေလောင်ကာခရင်မ်၊ အစိုဓာတ်ထိန်းခရင်မ်တွေအပြင် တခြားအလှကုန်ပစ္စည်းတွေ လိမ်းထားတာမျိုး မဖြစ်ရပါဘူး။ အကြာကြီးလည်း ကပ်ထားဖို့မလိုပါဘူး။ ၅မိနစ်ကနေ ၁၅ မိနစ်လောက်ပဲ ကပ်ပြီးတာနဲ့ ပြန်ခွာချရမှာပါ။
ဘယ်လို Sheet Mask တွေကို ရွေးဝယ်မလဲ။

အဓိကကတော့ ကိုယ့်အသားအရေအမျိုးအစား (Skin Type) နဲ့ လိုက်ဖက်တာတွေကို အညွှန်းသေချာဖတ်ပြီး ဝယ်သင့်ပါတယ်။

1. • အဆီပြန်တဲ့သူဆိုရင် (For Oily Skin, Cleansing)
2. • အသားခြောက်တဲ့သူဆိုရင် (For Dry Skin, Moisturizing)
3. • ထိခိုက်လွယ်တဲ့ အသားအရေပိုင်ရှင်ဆိုရင် (For Sensitive Skin)
4. • အသားအရေက ညိုညစ်ညစ်ဖြစ်နေတယ်ဆိုရင် (Brightening)
5. • ပေါင်းစပ်အသားအရေမျိုးဆိုရင် (For Combination Skin)
6. • နုပျိုတင်းရင်းပြီး အရေးအကြောင်းတွေကို ကာကွယ်ပေးဖို့ (Anti-aging) ဆိုပြီး အညွှန်းကို သေချာဖတ်ပြီးမှ ဝယ်ပါ။

များသောအားဖြင့် Sheet Mask တွေက ပန်းပွင့်၊ သစ်သီးဝလံ၊ အစေ့အဆန်က ရတဲ့ အဆီအနှစ်တွေနဲ့ လုပ်ထားတာဖြစ်လို့ ကိုယ်ကြိုက်တဲ့ ရနံ့ကို ရွေးဝယ်လို့လည်း အဆင်ပြေပါတယ်။ အနံ့၊ ပါဝင်ပစ္စည်းမတူတဲ့ Sheet Mask တွေကို ဝယ်သုံးပေးနိုင်ရင် ပိုကောင်းပါတယ်။ ကိုယ်နဲ့ ဓာတ်မတည့်တဲ့ အသီးအနှံ၊ ဓာတ်ပစ္စည်းတစ်မျိုးမျိုး ပါဝင်နေတယ်ဆိုရင် မဝယ်ပါနဲ့။
Sheet Mask ကပ်တဲ့အခါ သိထားသင့်တဲ့ ဆောင်ရန်၊ ရှောင်ရန်အချက်လေးတွေ

၁။ အမြဲတမ်း မျက်နှာသစ်ပြီး ရေခြောက်အောင်သုတ်ပြီးသွားတော့မှ Sheet Mask ကို ကပ်ပါ။ မျက်နှာမှာ အလှကုန်ပစ္စည်းတွေ၊ တခြားခရင်မ်တွေ၊ မိတ်ကပ်တွေ ဘာတစ်ခုမှ ရှိမနေဖို့ အရေးကြီးပါတယ်။

၂။ မျက်နှာသစ်ပြီးတာနဲ့ Mask ကို တန်းကပ်ပါ။ အကြာကြီး ဒီအတိုင်းထားမိလိုက်ရင် အသားအရေက အစိုဓာတ်နည်းသွားနိုင်သလို ဖုန်တွေလည်း ကပ်နိုင်တဲ့အတွက် အဆင်မပြေစေပါဘူး။

၃။ Mask ကို ရေခဲသေတ္တာ သို့မဟုတ် အခန်းအပူချိန်မှာ သိမ်းဆည်းထားပါ။ နေရောင်ခြည်အောက်မှာ အကြာကြီးထားရင် အာနိသင်ပျက်ပြယ်သွားနိုင်ပါတယ်။

၄။ Mask ကပ်ဖို့အတွက် အထုပ်တွေ ခွာပြီးသွားတဲ့အခါ အပြန့်အတိုင်း ဖြစ်သွားအောင် လက်နဲ့ သေချာခွာပါ။ Mask ကို လက်နဲ့မဖြဲမိစေဖို့ ဂရုစိုက်ပေးပါ။

၅။ Mask တိုင်းမှာ မျက်လုံးနဲ့ ပါးစပ်အတွက် အပေါက်နေရာ လုပ်ပေးထားပါတယ်။ အဲ့ဒီအပေါက်တွေမှာ ကိုယ့်မျက်လုံးနဲ့ ပါးစပ်ဝင်သွားဖို့ အရင်စကပ်ပါ။ ပြီးမှ အပေါ်ဘက်၊ ဘေးဘက်၊ အောက်ဘက်ကို ညီအောင် ညှိပေးပါ။

၆။ Mask ကပ်ခွာကနေ ပါလာတဲ့ ဆေးရည်တွေကို တစ်သျှူးနဲ့ သုတ်ပစ်စရာမလိုပါဘူး။ လက်၊ လည်ပင်း၊ ဒူးခေါင်းနေရာတွေကို ပွတ်လိမ်းလိုက်လို့ ရပါတယ်။

၇။ မျက်နှာမှာ Mask ကို နေရာတကျ ကပ်ပြီးသွားပြီဆိုရင် ပက်လက်အနေအထားနဲ့ လှဲနေပါ၊ သို့မဟုတ် ထိုင်နေမယ်ဆိုရင်လည်း မျက်နှာကို မျက်နှာကျက်ဘက် ဦးတည်၍ ဦးခေါင်းကို အပေါ်မော့ထားပါ။

၈။ အထုပ်မှာ ပါတဲ့ အညွှန်းအတိုင်း Mask ကပ်ထားလို့ ရပါတယ်။ များသောအားဖြင့် ၁၀ မိနစ်ကပ်ထားပေးရင် လုံလောက်ပါတယ်။ အရမ်း အကြာကြီးတော့ မကပ်ပါနဲ့။ ဘာကြောင့်လဲဆိုတော့ ကြာလွန်းတဲ့အခါ Mask ကပ်ခွာက ခြောက်သွားတဲ့အတွက် မျက်နှာပေါ်မှာ ရှိနေတဲ့ ဆေးရည်တွေကို သူကပြန်စုပ်ယူလိုက်တာကြောင့် မျက်နှာက ရထိုက်တဲ့အာဟာရဓာတ်တွေ နည်းသွားနိုင်ပါတယ်။

၉။ Mask ကို ခွာချပြီးတဲ့အခါ မျက်နှာကို ချက်ချင်းမသစ်ပါနဲ့။ ညဘက်မှာ အသုံးပြုတယ်ဆိုရင် ခွာပြီးတာနဲ့ တန်းအိပ်လိုက်ရုံပါပဲ။ မနက်ပိုင်းဆိုရင်တော့ အနည်းဆုံး တစ်နာရီလောက် ခြားပြီးမှ မျက်နှာသစ်တာမျိုး လုပ်သင့်ပါတယ်။

၁၀။ Mask ခွာပြီးသွားရင် မျက်နှာကို လက်ဖဝါးနဲ့ ဖွဖွလေး ပုတ်ပေးပါ။ ပွတ်ဆွဲတာမျိုးတော့ မလုပ်ပါနဲ့။ အရည်တွေ မျက်နှာပေါ်မှာ အရမ်းများနေရင်တော့ လက်နဲ့ နည်းနည်းယူပြီး တံတောင်ဆစ်၊ ဒူးခေါင်း၊ လည်ပင်းတွေကို လိမ်းလို့ရပါတယ်။

၁၁။ အထုပ်ကိုလည်း ချက်ချင်းလွှင့်မပစ်လိုက်ပါနဲ့။ အထဲမှာ များသောအားဖြင့် ဆေးရည်တွေ အများကြီးကျန်နေခဲ့ပါတယ်။ ဒီဆေးရည်တွေကို မျက်နှာမဟုတ်ဘဲ တခြားကိုယ်လက်အင်္ဂါတွေကို လိမ်းလို့ရပါတယ်။

၁၂။ Sheet Mask မကပ်ဖြစ်တဲ့ရက်တွေမှာ ထုံးစံအတိုင်းပဲ မျက်နှာသစ်ပြီးရင် အစိုဓာတ်ထိန်းခရင်မ် (Moisturizer) ပြီးရင် Eye Cream တွေ ပြန်လိမ်းပေးပါ။ Sheet Mask သုံးပြီးသွားရင်လည်း Moisturizer ပါးပါး လိမ်းပေးလို့ရပါတယ်။ အပြင်ထွက်တော့မယ်ဆိုရင်တော့ နေလောင်ကာခရင်မ် (Sunscreen) ကို မဖြစ်မနေ လိမ်းပေးဖို့ လိုပါတယ်။

၁၃။ Sheet Mask ကို နေ့တိုင်းသုံးလို့ရပေမယ့် တစ်ရက်ခြား တစ်ကြိမ်လောက် သုံးပေးတာ ပိုကောင်းပါတယ်။

နောက်ထပ် သတိထားသင့်တာကတော့ Mask ကပ်နေရင်းနဲ့ မျက်နှာက ယားလာတာ၊ ကိုယ်လက်တွေမှာ အဖုအပိမ့်တွေ၊ အင်ပျဉ်တွေ ထလာတာ၊ အသက်ရှူကျပ်လာတာ၊ ဖောရောင်လာတာမျိုး ဖြစ်ရင် ချက်ချင်းခွာပစ်ပြီး ရေ၊ ဆပ်ပြာနဲ့ ပြန်ဆေးချပါ။ Sheet Mask ဆိုတာက သုံးရတာလည်း လွယ်ကူပြီး အလုပ်မရှုပ်စေသလို ကျား၊ မ အသက်အရွယ်မရွေး သုံးလို့ရတာကြောင့် အလှအပဂရုစိုက်တဲ့ သူတိုင်း သုံးပေးနိုင်ရင်တော့ အကောင်းဆုံးပါပဲ။

Hello ဆရာဝန်ပရိတ်သတ်ကြီးလည်း ကျန်းမာပျော်ရွှင်ပြီး စိတ်ချမ်းသာစရာကောင်းတဲ့ နေ့ရက်တွေကို ပိုင်ဆိုင်ရပါစေလို့ ဆုတောင်းပေးရင်း ဒီမှာပဲ နိဂုံးချုပ်လိုက်ပါတယ်။

ဤဆောင်းပါးကို Mizzima ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။

Mizzima Key Campaign မှာ ပါဝင်ဖို့ ဖိတ်ခေါ်လိုက်ပါတယ်။ Visit Our website: http://building.mizzimafoundation.org/