ကဘူးလ်၊ အောက်တိုဘာ ၂၀ ။ ။ အမေရိကန်တပ်ဖွဲ့ဝင်များက ဗုံးကြဲခဲ့သော နယ်စည်းမခြားဆရာဝန်များ၏ဆေးရုံကို အာဖဂန်အစိုးရကို တိုက်ခိုက်နေသော သောင်းကျန်းသူများက အသုံးပြုနေခဲ့သည်ဟု အာဖဂန်ယာယီ ကာကွယ်ရေးဝန်ကြီးက ပြောကြားလိုက်သည်။
တာလီဘန်သောင်းကျန်းသူများနှင့် ပါကစ္စတန်တိုက်ခိုက်ရေးသမားများဖြစ်နိုင်ဖွယ်ရှိသူများသည် ကန်ဒုဇ်မြို့ရှိ နယ်စည်းမခြားဆရာဝန်များ၏ ဆေးရုံကို လုံခြုံသည့်နေရာတစ်ခုအဖြစ် အသုံးပြုနေခဲ့သည်ဟု ဝန်ကြီး မာဆွမ်းစတန်နက်ဇိုင်းက အောက်တိုဘာ ၁၉ တွင် ပြောကြားခဲ့သည်။
ဆေးရုံကို အောက်တိုဘာ ၃ ရက်နေ့ အစောပိုင်းက အမေရိကန် AC-130 ရဟတ်ယာဉ်က ဗုံးကြဲခဲ့ရာ အနည်းဆုံးလူ ၂၂ယောက်သေဆုံးခဲ့ပြီး အများအပြားဒဏ်ရာရရှိခဲ့သည်။ ဆေးရုံ၏ ပင်မအဆောက်အဦမှာ ပျက်စီးသွားခဲ့ပြီး ဆေးရုံမှာ ပိတ်လိုက်ရသည်။
ဗုံးကြဲခံရချိန်က တာလီဘန်တိုက်ခိုက်ရေးသမားများ ရှိမနေဟု နယ်စည်းမခြားဆရာဝန်များအဖွဲ့က အကြိမ်ကြိမ်ငြင်းဆိုထားသည်။ ဆေးရုံခြံစည်းရိုးတစ်ဝိုက်တွင် တာလီဘန်အလံလွှင့်ထူထားသည်ဟု ဝန်ကြီးကပြောသည်။ ထို့အပြင် ဆရာဝန်များအဖွဲ့က တောင်းဆိုထားသကဲ့သို့ လွတ်လပ်သော စုံစမ်းစစ်ဆေးမှုကို ထောက်ခံမည်မဟုတ်ဟုလည်း ၎င်းက ပြောကြားခဲ့သည်။