နိုဝင်ဘာ ၁၀၊ ရန်ကုန် ။ ။ MMA ဖိုက်တာနှစ်ဦးဖြစ်သည့် အောင်လအန်ဆန်နှင့် ဖိုးသော်တို့သည် ရွှေပြည်သာ မြို့နယ် ၊ စက်မှုဇုန် ၂ ၊ ၁၈ ရပ်ကွက်တွင် ရှိသည့် မြန်မာ့ ရွှေ့လျားပညာရေး စီမံကိန်း(myME Project ) တွင် ပညာသင်ကြားနေသော ကလေးများကို နိုဝင်ဘာ ၁၀ ရက်နေ့ က သွားရောက် တွေ့ဆုံခဲ့သည်။
အဆိုပါ တွေ့ဆုံပွဲတွင် အောင်လအန်ဆန် နဲ့ ဖိုးသော်တို့သည် ကလေးများအတွက် စိတ်ဓါတ်ခွန်အားဖြစ်စေမည့် အကြောင်းအရာများကို မျှဝေခဲ့ပြီး ကလေးများ၏ မေးမြန်းချက်များကို လည်း ပြန်လည်ဖြေကြားပေးခဲ့သည်။
ဖိလစ်ပိုင်နိုင်ငံသား ဘရန်ဒန်ဗဲရာကို မကြာသေးခင်က အနိုင်ယူပြီး One Championship Light Heavyweight World Championship ခါးပတ်ကို ကာကွယ်နိုင်ခဲ့သည့် အောင်လအန်ဆန်သည် နိုဝင်ဘာ ၉ ရက်နေ့က ရန်ကုန်မြို့သို့ ခေတ္တ ပြန်လည်ရောက်ရှိလာခဲ့ပြီးနောက် ယခုကဲ့သို့ သွားရောက်တွေ့ဆုံခြင်းလည်း ဖြစ်သည်။
ပညာရေးအရေးကြီးကြောင်းနှင့် ပတ်သက်ပြီး လူငယ်များကို ဝေမျှခွင့်ရသည့် အတွက် ဝမ်းသာကြောင်း အောင်လအန်ဆန်က ပြောသည်။
“ကျနော်စိတ်ထဲမှ လူတစ်ယောက်ရဲ့ ပညာရေးက အရမ်းအရေးကြီးတယ်။ ဒီနေ့က myME Project အနေနဲ့ ကလေးငယ်တွေနဲ့ သွားတွေ့ဆုံရတယ်။ သူတို့ကို အားပေးစကားပြောခွင့်ရတယ်။ ကျနော်အရမ်းဝမ်းသာတယ်။ ကျနော်စိတ်ထဲမှာ လူငယ်ရဲ့အနာဂတ် ၊ လူငယ်ရဲ့အိပ်မက် တွေ ဖြစ်လာဖို့ အရမ်းအရေးကြီးတာ သူတို့ရဲ့ ပညာရေး ပဲ ။ လူငယ်တွေကို ပညာရေး ဘယ်လောက် အရေးကြီးလဲဆိုတာ ကျနော် ပြောချင်တာ “ ဟု အောင်လအန်ဆန်ကပြောသည်။
အောင်လအန်ဆန်အနေဖြင့် အမေရိကန်သံရုံးက ပြုလုပ်မည့် မူးယစ်ဆေးဝါးမသုံးစွဲရေး လှုပ်ရှားမှုတစ်ခုနှင့် အီးယူက လုပ်မည့် အိမ်တွင်းအကြမ်းဖက်ဆန့်ကျင့်ရေးလှုပ်ရှားမှုများတွင် ပါဝင်ဆောင်ရွက်ရန်ရှိကြောင်းသိရသည်။
“ အခုက U.S.Embassy နဲ့ မူးယစ်ဆေးဝါး မသုံးစွဲရေး လှုပ်ရှားမှုရှိတယ်။ အဲ့တာက ကျနော်တို့ဆီမှာ အရေးကြီးတယ်လို့ထင်တယ်။ ဘာကြောင့်လဲဆိုတော့ မြစ်ကြီးနားမှ မူးယစ်ဆေးဝါး သုံးစွဲတာ အများကြီးရှိတယ်။ နောက်ပြီးတော့ EU နဲ့ Anti Domestic Violence Campaign လုပ်ဖို့ရှိတယ် “ ဟု အောင်လအန်ဆန်က မီဒီယာများကို ပြောသည်။
မြန်မာရွေ့လျားပညာရေးစီမံကိန်း ( myME ) သည် ၂၀၁၅ ခုနှစ်က စတင်အကောင်အထည် ဖော်ခဲ့ပြီး ပညာသင်ရမည့် အရွယ်တွင် ဘဝပေးအခြေအနေများကြောင့် ဝမ်းရေးအတွက် ရုန်းကန်နေရသည့် ကျောင်းပြင်ပရောက် ကလေးငယ်များ၏ အခြေခံလိုအပ်ချက်များကို သင်ကြား လုပ်ဆောင်ပေးနေသည့် အဖွဲ့အစည်းလည်း ဖြစ်သည်။
Mizzima Key Campaign မှာ ပါဝင်ဖို့ ဖိတ်ခေါ်လိုက်ပါတယ်။ Visit Our website: http://building.mizzimafoundation.org/
