တရုတ်ဂျီဒီပီဖွံ့ဖြိုးမှု ၂၀၀၉ ခုနှစ်နောက်ပိုင်း အဆိုးရွားဆုံးအဖြစ် ၆.၉ ရာခိုင်နှုန်းသို့ အရှိန်လျော့ကျ

တရုတ်ဂျီဒီပီဖွံ့ဖြိုးမှု ၂၀၀၉ ခုနှစ်နောက်ပိုင်း အဆိုးရွားဆုံးအဖြစ် ၆.၉ ရာခိုင်နှုန်းသို့ အရှိန်လျော့ကျ

ပေကျင်း၊ အောက်တိုဘာ - ၁၉ ။           ။ တရုတ်အမျိုးသား စာရင်းအင်းဗျူရိုက တနင်္လာနေ့က ထုတ်ပြန်သည့်ကိန်းဂဏန်းများအရ တရုတ်နိုင်ငံ၏ တစ်ဦးချင်းထုတ်ကုန်တန်ဖိုး ဂျီဒီပီမှာ တတိယသုံးလပတ် ကာလတွင် ယမန်နှစ်က အလားတူကာလနှင့် နှိုင်းယှဉ်ပါက ၆.၉ရာခိုင်နှုန်းအထိ ကြီးထွားပြန့်ကားလာခဲ့သည်ဟု ဆိုသည်။

CNNMoney ၏ စီးပွားရေးစစ်တမ်းက မျှော်မှန်းထားသည့် ဖွံ့ဖြိုးမှုနှုန်း ၆.၇ရာခိုင်နှုန်းထက် ပိုမိုကောင်းမွန်သော်လည်း ယခုနှစ် နှစ်ဝက်ကာလ မျှော်မှန်းချက် ၇ရာခိုင်နှုန်းမှ အရှိန်လျော့ကျ သွားခဲ့ခြင်းပင်ဖြစ် သည်။

ဝေဖန်သုံးသပ်သူများကမူ တရုတ်စီးပွားရေး နှေးကွေးကျဆင်းသွားလိမ့်မည်ဟု ကာလကြာမြင့်စွာကတည်းက သိနေခဲ့ကြသည်။ နိုင်ငံကို လမ်းများ၊ မီးရထားလမ်းများ၊ အိမ်ယာများ တည်ဆောက်မှုအပေါ် မှီခိုနေရသည့် အခြေအနေမှ စားသုံးသူအသုံးစရိတ်ဖြင့် လည်ပတ်သည့် စီးပွားရေးစနစ်ပုံစံသို့ ပြောင်းရွေ့ရန် ရည်ရွယ်သည့် ပြုပြင်ပြောင်းလဲမှုများကို ပေကျင်းက အကောင်အထည်ဖော်နေစဉ်တွင်ပင် စီးပွားရေးက နှေးကွေးသွားရမည်ဖြစ်သည်။

ထိုခန့်မှန်းချက်မှာ ယခု တကယ်ဖြစ်လာခဲ့ပြီ ဖြစ်သည်။ ပေကျင်း၏ ယခုနှစ်ဖွံ့ဖြိုးမှု ရည်မှန်းချက်မှာ ၇ရာခိုင်နှုန်းဖြစ်သည်။ ပထမ၆လတွင်မူ ထိုရည်မှန်းချက်မှာ ပြည့်မှီခဲ့သည်။ သို့ရာတွင် ၇ ရာခိုင်နှုန်း ဆိုသည်မှာလည်း ပုံမှန် ဂျီဒီပီ ၁၀ရာခိုင်နှုန်းဖြင့် မှန်မှန်ကြီးဖွံ့ဖြိုးနေခဲ့သည့် ပျော်ရွှင်ဖွယ်နေ့ရက်များနှင့် စာလျှင်မူ အတော်အတန် ခြားနားပါသည်။ သို့ရာတွင် တရုတ်နိုင်ငံမှာ အလုပ်ပေးနိုင်မှု အဆင့် ကိုရေရှည်ထိန်းထားနိုင်အောင်တော့ လုံလုံလောက်လောက် သန်မာနေပါသေးသည်။

Oxford Economics မှာ စီးပွားရေးပညာရှင်တစ်ဦးဖြစ်သည့် လူးဝစ် ကွီကမူ ဂျီဒီပီအချက်အလက်မျုားက တရုတ်နိုင်ငံမှာ ထင်သာမြင်သာသည့် နှေးကွေးကျဆင်းမှုကို ရှောင်လွှဲနိုင် ခဲ့ပြီဖြစ်ကြောင်း ကိုဖော်ပြနေသည်ဟု ပြောကြားပါသည်။

သို့ရာတွင် ပေကျင်းအနေဖြင့် ၎င်း၏ ဖွံ့ဖြိုးမှုရည်မှန်းချက်ကို လက်လှမ်းမီသော အတိုင်းအတာအတွင်း ဆက်ထိန်းထားလိုပါက ဆတိုးနှုန်းဖြင့် စီးပွားရေးလှုံ့ဆွမှုအစီအစဉ်များ လိုအပ်မည်ဖြစ်သည်ဟု ဆိုပါသည်။   

တရုတ်သမ္မတ ရှီကျင့်ဖျင်ကမူ စီးပွားရေးနှေးကွေး ကျဆင်းသွားမည်ကို စိုးရိမ်မှုများက ကမ္ဘာ့လူသုံးကုန်ပစ္စည်းဈေးနှုံးများကို ရိုက်ခတ်မှုရှိပြီး၊ တရုတ်နိုင်ငံသို့ ပို့ကုန်အပေါ် မှီခိုနေရသည့် နိုင်ငံများကိုလည်း ထိခိုက်နစ်နာစေသည့်အချက်ကို အသိအမှတ်ပြုပါသည်။

‘နိုင်ငံတကာ ဈေးကွက်နဲ့ နီးနီးကပ်ကပ် ချိတ်ဆက်ထားတဲ့ စီးပွားရေးတစ်ရပ်အနေနဲ့ ကမ္ဘာနှင့်အဝန်း စီးပွားရေးစွမ်းဆောင်ရည် ကင်းမဲ့မှုဒဏ်ကို တရုတ်တစ်နိုင်ငံတည်း ကြံ့ကြံ့ခံမနေနိုင်ပါဘူး’’ဟု ရှီက အင်တာဗျူးတစ်ခုတွင် ရိုက်တာသို့ ပြောကြားခဲ့သည်။ ‘တရုတ်စီးပွားရေးနဲ့ ပတ်သက်လို့ ကျနော်တို့မှာလည်း စိုးရိမ်သောကတွေရှိသလို၊ အဲဒါတွေကို ဖြေရှင်းနိုင်ဖို့ အပြင်းအထန် ကြိုးစားနေပါတယ်’ဟုလည်း ရှီက ပြောကြားခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly