နယူးဒေလီ၊ အောက်တိုဘာ ၁၇ ။ ။ လွတ်လပ်ရေးကြိုးပမ်းမှုကာလဝန်းကျင်က အိန္ဒိယ၏ အဆန်းကျယ်ဆုံးဖြစ်ရပ်တစ်ခုကို ဖော်ထုတ်ရန်ကြိုးပမ်းမည်ဖြစ်ကြောင်း ဝန်ကြီးချုပ်မိုဒီက ပြောကြားသည်။
ယင်းသို့ပြောကြားမှုက အတိုက်အခံကွန်ဂရက်ပါတီကို အားနည်းသွားစေနိုင်သည့် ကြီးထွားလာသည့် သမိုင်းစစ်ပွဲတစ်ခုတွင် နောက်ဆုံးထွက်ပေါ်လာသော ကျယ်လောင်သည့် အသံဖြစ်သည်။
ဒုတိယကမ္ဘာစစ်တွင် ဗြိတိသျှတို့ကို ဆန့်ကျင်ရာတွင် ဂျပန်၊ ဂျာမနီတို့နှင့် ပူးပေါင်းခဲ့သည့် အိန္ဒိယအမျိုးသားတပ်မတော်၏ ခေါင်းဆောင်ဖြစ်သော ဆူဘတ်ချန်ဒရာဘို့စ်၏ ကံကြမ္မာမှာ ဆယ်စုနှစ် ခုနှစ်နှစ်ကြာလာသည်အထိ ပဟေဠိတစ်ခုဖြစ်နေဆဲပင်။
၎င်း၏ သေဆုံးမှုလျို့ဝှက်ချက်နှင့် ပတ်သက်သည့် ဖိုင်ရာပေါင်းများစွာကို အိန္ဒိယအစိုးရအဆက်ဆက်က ထိန်းသိမ်းထားခဲ့ကြကာ သတင်းအချက်အလက်ကို ထုတ်ပြန်ခြင်းက ပြည်ပနိုင်ငံများနှင့် မလိုမုန်းထားသည့် ဆက်ဆံရေးများဖြစ်ပေါ်စေကာ ၎င်းမည်သို့သေဆုံးသည်နှင့် ပတ်သက်ကာ လျှိုဝှက်ကြံစည်မှုသီအိုရီများကို မီးထိုးပေးနိုင်သည်ဟု ပြောကြားခဲ့ကြသည်။.
အိန္ဒိယ၏ အဆန်းကျယ်ဆုံးအမျိုးသားရေးဝါဒီသူရဲကောင်းနှင့် ပတ်သက်သော ဖိုင်အားလုံးကို လျှို့ဝှက်အဆင့်ပယ်ဖျက်မည့် ယခုသီတင်းပတ် မိုဒီ၏ ဆုံးဖြတ်ချက်က အငြင်းပွားမှုကို နောက်ဆုံးတွင် အဆုံးသတ်သွားနိုင်သည်။
ထို့အပြင် တွေ့ရှိချက်များက အိန္ဒိယ၏ အကျော်ကြားဆုံးနိုင်ငံရေးမျိုးဆက်အတွက် စိတ်အနှောက်အယှက်ဖြစ်သွားနိုင်သည်။ အကြောင်းမှာ ဘို့စ်သေဆုံးပြီးနောက် ပထမဆုံးဝန်ကြီးချုပ် ဂျဝါဟာလာလ်နေရူးပါဝင်ခဲ့သော အခန်းကဏ္ဍကြောင့်ဖြစ်သည်။
လွန်ခဲ့သည့်နှစ်က အထွေထွေရွေးကောက်ပွဲတွင် နေရူး-ဂန္ဒီ မိသားစု၏ ကွန်ဂရက်ပါတီကို အပြတ်အသတ်အနိုင်ရပြီးကတည်းက မိုဒီသည် အိန္ဒိယ၏ ကိုလိုနီခေတ်လွန်သမိုင်းကို ၎င်းမိသားစု၏ချုပ်ကိုင်မှုအား တစတစဖယ်ထုတ်လျက်ရှိသည်။
ပိုမိုများပြားသည့် ခေါင်းဆောင်များအား ကိုယ်စားပြုနိုင်ရန် နေရူးအား ဂုဏ်ပြုရန် တည်ဆောက်မည့် ပြတိုက်တစ်ခုကို ပြောင်းလဲမည့်အစီအစဉ်များအား မိုဒီ၏အစိုးရက ကြေညာခဲ့သည်။
မိုဒီ၏ အစိုးရသည် နေရူးနှင့် ၎င်းမှဆင်းသက်လာသူများ၏ အမည်များကို အစိုးရအစီအစဉ်များ၊ နေရာများနှင့် စာပို့တံဆိပ်ခေါင်းများမှ ပယ်ဖျက်ခဲ့သည်။
အောက်တိုဘာ ၁၄က အစည်းအဝေးတစ်ခုတွင် မိုဒီသည် ဘို့စ်၏ ဆွေမျိုးများနှင့် တွေ့ဆုံခဲ့ပြီး ဘို့စ်နှင့် ပတ်သက်သည့်ဖိုင်များကို ၎င်း၏ ၁၁၉နှစ်မြောက်မွေးနေ့နှင့် တိုက်ဆိုင်စွာ လာမည့်နှစ် ဇန်နဝါရီမှ စ၍ လျှို့ဝှက်အဆင့်လျှော့ချတော့မည်ဟု မိုဒီက ၎င်းတို့ကို ပြောကြားခဲ့သည်။
"ထင်မြင်ယူဆချက်တွေကို အဆုံးသတ်သွားရင်တော့ လွတ်လပ်ရေးကြိုးပမ်းမှုအတွက် သူရဲ့ပါဝင်ဆောင်ရွက်မှုအပြည့်အစုံကို ကျွန်တော်တို့ အကဲဖြတ်ခွင့် ရတော့မှာပါ"ဟု ဘို့စ်၏မိသားစုနှင့် တွေ့ဆုံခဲ့သော မိုဒီ၏ ဘီဂျေပီပါတီမှ ခေါင်းဆောင်တစ်ဦးဖြစ်သူ ဆစ်ဒါ့သ်နတ်သ်ဆင်းက ပြောသည်။
ဘို့စ်သည် ဒုတိယကမ္ဘာစစ်ပြီးဆုံးပြီးနောက် သုံးရက်အကြာ တိုကျိုသို့သွားရာလမ်းပေါ် ထိုင်ဝမ်တွင် ၎င်း၏လေယာဉ်ပျက်ကျကာမီးလောင်ဒဏ်ရာများဖြင့် သေဆုံးခဲ့သည်ဟု အိန္ဒိယအစိုးရက တရားဝင်ထုတ်ပြန်ထားသည်။
ယင်းထုတ်ပြန်ချက်ကို အိန္ဒိယအများအပြားက ငြင်းဆိုထားသည်။ တချို့က ဖမ်းဆီးခံရမှုကို ရှောင်ရန် သေဆုံးမှုကို ဘို့စ်က အတုလုပ်ခဲ့သည်ဟု ယူဆသည်။ ဘို့စ်သည် ဆိုဗီယက်ယူနီယံ သို့မဟုတ် အိန္ဒိယတွင် ဘာသာရေးဆရာတစ်ဦးအဖြစ် ရုပ်ဖျက်ရင်း နေထိုင်သွားခဲ့သည်ဆိုသည့် သတင်းများလည်း ထွက်သည်။
၂၀၀၆ခုနှစ်က တရားရုံးချုပ်တရားသူကြီးတစ်ဦး ဦးဆောင်သော ခြောက်နှစ်ကြာ စုံစမ်းစစ်ဆေးမှုအရ ဘို့စ်၏လေယာဉ်မှာ ထိုင်ဝမ် သို့မဟုတ် အမေရိကန်တွင် ပျက်ကျသည့် မှတ်တမ်းများမရှိခဲ့ပေ။ တိုကျိုရှိ ဗိမာန်တစ်ခုတွင် ဘို့စ်၏ပြာများဟု ယူဆရသောအရာများလည်း စစ်သားတစ်ဦး၏ ပြာများသာဖြစ်ကြောင်း တွေ့ရှိခဲ့သည်။
ဘို့စ်က ရှင်သန်နေဆဲဖြစ်သော်လည်း ၎င်းအား နိုင်ငံရေးလောကသို့ ပြန်မဝင်ရန် နေရူးအစိုးရက ဆန္ဒရှိခဲ့ကြောင်း ဖိုင်များက ပြသနေပါက ကွန်ဂရက်အတွက် အရှက်ရနိုင်သည်ဟု ဆင်းကပြောသည်။