ယာဉ်လိုင်းကုမ္ပဏီ Omni Focus ၏ ဥက္ကဋ္ဌ ဦးကျော်နေဝင်းနှင့် တွေ့ဆုံခြင်း
အစိုးရသစ်လက်ထက်တွင် စတင်အကောင်အထည်ဖော်ခဲ့သည့် YBS စနစ်တွင် ဝန်ဆောင်မှုပေးရန် ပုဂ္ဂလိကယာဉ်လိုင်းကုမ္ပဏီ သုံးခုက တရုတ်နိုင်ငံထုတ် ဘတ်စ်ကားအသစ်များကို ဧရာဝတီဘဏ်၏ ချေးငွေဖြင့် ဝယ်ယူခဲ့သည်။ သို့သော် ဘဏ်နှင့် သဘောတူထားသည့်အတိုင်း သတ်မှတ်နှုန်းထားများကို ပြန်မဆပ်သည့်အတွက် ဧရာဝတီဘဏ်က ရန်ကုန်တိုင်းတရားလွှတ်တော်တွင် ဩဂုတ်လ ၁၆ ရက်နေ့က တရားစွဲဆိုလိုက်ပြီဖြစ်သည်။
တရားစွဲဆိုခံရသည့် ကုမ္ပဏီများမှာ ဗိုလ်ချုပ်ကြီးဟောင်း ဦးနေဝင်း၏မြေး ဦးကျော်နေဝင်း ဥက္ကဋ္ဌအဖြစ် တာဝန်ယူထားသည့် ဘက်စုံမြင်ကွင်း အထွေထွေဝန်ဆောင်မှု အများနှင့်သက်ဆိုင်သော ကုမ္ပဏီလီမိတက် (Omni Focus General Services Public Co., Ltd) ၊ Central Yangon Network နှင့် Keen Support Co., Ltd တို့အပြင် YBS ဘတ်စ်ကားများအဖြစ် ဝန်ဆောင်မှုပေးရန် Foton အမှတ်တံဆိပ် ယာဉ်များကို တရုတ်နိုင်ငံမှ တင်သွင်းရောင်းချပေးခဲ့သည့် ခိုင်မြဲခိုင်ကုမ္ပဏီလည်း ပါဝင်ကြောင်း ဧရာဝတီဘဏ်က ထုတ်ပြန်သည်။
ယင်းကြောင့် တရားစွဲဆိုခံထားရမှု အခြေအနေနှင့် ကုမ္ပဏီဘက်က ပြန်လည်တုံ့ပြန်ရန် စီစဉ်နေသည့် အခြေအနေများကို သိရှိနိုင်ရန် Myanmar Now က Omni Focus General Services Public Co., Ltd ဥက္ကဋ္ဌ ဦးကျော်နေဝင်းအား တွေ့ဆုံမေးမြန်းခဲ့သည်။
MYANMAR NOW ။ ။ တရားရုံးက အကြောင်းကြားစာ ရရှိပြီလား။
ဦးကျော်နေဝင်း ။ ။ လက်ရှိအချိန်အထိတော့ ကျွန်တော်နဲ့ပါဝင်ပတ်သက်တဲ့ Omni Focus ကုမ္ပဏီဆီကို တရားရုံးက စာရောက်လာတာ မရှိသေးပါဘူး။ ဒီနေ့ (စက်တင်ဘာ ၅ ရက်နေ့) အထိပေါ့။
MYANMAR NOW ။ ။ ဧရာဝတီဘဏ်က တရားစွဲဆိုတာ ဘာကြောင့်လို့ သိထားလဲ။
ဦးကျော်နေဝင်း ။ ။ (ဘဏ်လုပ်ထုံးလုပ်နည်းကိုပြောရရင်) ငွေချေးချင်တဲ့ လူပုဂ္ဂိုလ် သို့မဟုတ် ကုမ္ပဏီက သူလုပ်ချင်တဲ့ စီးပွားရေးလုပ်ငန်းကို ပြရမယ်။ သူ့မှာ အပေါင်ပစ္စည်း ဘာရှိလဲ။ ရွှေ့ပြောင်းနိုင်တဲ့ဟာလား။ မရွှေ့ပြောင်းနိုင်တဲ့ဟာလား အပေါင်ထားရမယ်။ အဲဒီကနေ ဒီလုပ်ငန်းကို လုပ်မယ်။ လုပ်လို့ အကြွေးပြန်မဆပ်ဘူးဆိုလို့ရှိရင် ဘဏ်က လုပ်ထုံးလုပ်နည်းနဲ့အညီ တရားရုံးကို တင်ပြရမယ်။ မပေးနိုင်ဘူးဆိုရင် တရားရုံးက သိမ်းမယ်။ ဒါက ပုံစံတကျဖြစ်တဲ့ဟာပေါ့နော်။
ကျွန်တော်တို့ ဧရာဝတီဘဏ်နဲ့ဖြစ်တဲ့ဟာကျတော့ သမားရိုးကျပုံစံ မဟုတ်ဘူး။ ဒါကိုလည်း ဧရာဝတီဘဏ်က သိရဲ့သားနဲ့ ဒီလိုအနေအထားတစ်ခုရောက်အောင် ဘာကြောင့် သူတို့လုပ်နေမှန်း ကျွန်တော်လည်း မသိဘူး။ နောက်တစ်ချက်က လွန်ခဲ့တဲ့နှစ်ရက်က ဘယ်လအထိ ကျွန်တော်တို့ အတိုးပြန်ဆပ်နေတယ်။ အဲဒီနောက်ပိုင်း အတိုးပြန်မဆပ်လို့ တရားစွဲဆိုခံရတာဖြစ်တယ်လို့ ဧရာဝတီဘဏ်မှာ … ရေးထားတာ တွေ့လိုက်တယ်။
ဟိုတလောကပဲ ဘဏ်ဒုဥက္ကဋ္ဌကြီး (ဗဟိုဘဏ်ဒုဥက္ကဋ္ဌ ဦးစိုးသိမ်း၊ ယခု နုတ်ထွက်စာတင်ထား) ကိုယ်တိုင် (လွှတ်တော်ထဲမှာ) ပြောသွားတာပဲ။ ဘဏ်တွေမှာ စယူကတည်းက အတိုးရော၊ အရင်းရော ပြန်မပေးတဲ့လူတွေ အများကြီးပဲ။ ဒါတွေကိုလည်း အရေးယူဖို့ လုပ်နေပြီလို့ ပြောထားတာ။ တစ်ခုလေးစဉ်းစားရမှာက ဘာဖြစ်လို့ ကျွန်တော်တို့ကိုမှ လုပ်တာလဲ။ ကျွန်တော်တို့ ဘယ်နေ့အထိ အတိုးပေးခဲ့တယ်ဆိုတာ သူတို့(ဧရာဝတီဘဏ်)ကိုယ်တိုင် ပြောခဲ့တာ။
ဒီချေးငွေကို လိုချင်ပါတယ်ဆိုပြီး သူတို့ဘဏ်မှာ လျှောက်ခဲ့တဲ့အထဲမှာ ကျွန်တော်တို့မပါဘူး။ YBS စလုပ်ကတည်းက ကျွန်တော်တို့သည် ကားစီးရေ ၁,၀၀၀ ဝယ်မယ်ဆိုရင် ကျွန်တော်တို့လုပ်တဲ့အချိန်မှာ သူတို့ဘဏ်က ဝန်ထမ်းတွေက ကျွန်တော်တို့နောက်ကို လိုက်ခဲ့တာ။
Money transaction (ငွေပေးငွေယူ) တွေ သွားတဲ့အချိန်အထိ သူတို့ဘဏ်ကို ကျွန်တော် တစ်ခါမှ မရောက်ခဲ့ဖူးဘူး။ ဘဏ်ရဲ့ စာရွက်စာတမ်းတွေနဲ့ ဘဏ်ရဲ့ လုပ်ထုံးလုပ်နည်းတွေအရ သူတို့ပြောသလို ကျွန်တော်တို့က ဘယ်ကမှ ပါလာတာမဟုတ်ဘူး။ … အခုမှ မသိချင်ယောင်ဆောင်ပြီး မလုပ်နဲ့။ အဲဒီအချိန်တုန်းက သူတို့ဘဏ်က လူတွေ တောက်လျှောက် ကျွန်တော်တို့နောက် လိုက်ခဲ့တာ။
မထသကနေ YBS ပြောင်းတဲ့အချိန်မှာ YRTA (ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့) နေ့စဉ်အစည်းအဝေးရှိတယ်။ ကျွန်တော်တို့က YRTA အော်ပရေတာတွေဖြစ်တဲ့အတွက် နေ့တိုင်းတက်ရတယ်။ အဲဒီအချိန်မှာ ဧရာဝတီဘဏ်က ရောက်လာပြီး အဲဒီအစည်းအဝေးကို မတက်ရရင် မျက်စိမျက်နှာတွေ ပျက်ပြီး သူတို့ဖြစ်ခဲ့တာ။ နောက်တစ်ခုရှိနေတာက ဘာကြောင့် သူတို့လုပ်တာလဲ။ အခုချိန်မှာ သူတို့မှာ အကျိုးအမြတ်တွေ အများကြီးပဲလေ။ အလကားလုပ်ပေးရတယ်လို့တော့ မပြောနဲ့။ နေ့စဉ် ကားအစီး ၄၀၀၀ ထွက်သလား၊ ၆၀၀၀ ထွက်သလား။ အဲဒီထွက်သမျှကားတိုင်းက YRTA ကို ပိုက်ဆံသွင်းရတယ်။ YRTA က ဖွင့်ထားတဲ့ Account (ဘဏ်စာရင်း)က ဧရာဝတီဘဏ် တစ်ခုတည်းမှာပဲရှိတာ။ အဲဒီ (ဘဏ်စာရင်း)ထဲကို နေ့တိုင်းထည့်ပေးနေရတာ။
ဘာမှ အကျိုးအမြတ်မရှိပဲနဲ့ သူတို့ကူညီပါတယ်ဆိုရင် အဲဒါ ကျွန်တော်တို့ ပြည်သူလူထုက အရူးတွေမဟုတ်ဘူး။ ပြောရင် ကြည့်ပြော။ ကျွန်တော်တို့သည် အစီးရေ ၁,၀၀၀ ဝယ်တယ်။ အစီးရေ ၁,၀၀၀ ဝယ်တဲ့ဟာကို သူတို့က သူတို့ဘဏ်ကို သုံးပါ။ သူတို့ချေးငွေကို ယူပါလို့ ပြောပြီးတော့မှ ကျွန်တော်တို့က ယူခဲ့တာ။ သူတို့က နောက်ကလိုက်ခဲ့တာ။
နောက်တစ်ချက်က အစီးရေ ၄၀၀ ရဲ့ (လက်ငင်းငွေချေပမာဏ) ဖြစ်တဲ့ ၄၀ ရာခိုင်နှုန်းကို ကျွန်တော်တို့ ကားဝယ်တဲ့ Foton ကုမ္ပဏီကို ကျွန်တော်တို့ ပိုက်ဆံလွှဲတယ်။ သူတို့ဘဏ်ကပဲ သွားတာ။ သူတို့ဘဏ်က သွားတဲ့ transaction (ငွေလွှဲ) ဖြစ်အတွက်ကြောင့် ကျွန်တော့ ဘဏ်စာရင်းထဲလည်း ဝင်လာတာမဟုတ်ဘူး။ သူတို့ဘာ သူတို့ လွှဲတာ။
နောက်တစ်ချက်က နောက်ထပ်အစီးရေ ၆၀၀ ဝယ်တဲ့အခါမှာ ၄၀ ရာခိုင်နှုန်းကို နောက်ထပ်တစ်ကြောင်း ပိုက်ဆံလွှဲတယ်။ အဲဒီလွှဲတဲ့ … နှစ်ကြောင်းလုံး အောင်အောင်မြင်မြင် ပြီးစီးသွားမှ ကျွန်တော်တို့ ပြဿနာဖြစ်တာ။ ဒါတွေကို လူတွေက မသိဘူး။ တစ်ဖက်သတ်ကြီး ကျွန်တော်တို့ကို ပြောတာ။ ကျွန်တော်ပြောတာတွေ အကုန်လုံး ဟုတ်မဟုတ် သူတို့ကို မေးကြည့်ပါ။
မူလပုံစံအတိုင်းပြောမယ်ဆိုရင်တော့ ဘဏ်က ချေးငွေ ချေးတယ်။ ပြန်မဆပ်ဘူး။ ပြန်မဆပ်တဲ့လူက လူလိမ်ပေါ့။ ကျွန်တော်တို့ကကျ အဲဒီလိုပုံစံမဟုတ်ဘူး။ စချေးကတည်းက အဲဒီလိုချေးခဲ့တာ မဟုတ်ဘူး။ စစကတည်းက ကျွန်တော်တို့ စပြောခဲ့တယ်။ Zero down payment (လက်ငင်းငွေချေပမာဏ သုည) ပေးမယ်။ ခုနစ်နှစ် (ပြန်ဆပ်ကာလ) ကျွန်တော်တို့ လိုချင်တယ်။ ရှာဖွေငွေက တစ်ရက်ကို လူတစ်ယောက်ဆီက ကျပ် ၁၀၀၊ ၂၀၀ ပဲ အများဆုံး။ အဲဒါကို ခုနစ်နှစ် ကျွန်တော်တို့ ဆွဲဆန့်ရမယ်။ သူတို့လက်ခံခဲ့တယ်။ Zero down payment နဲ့ သူတို့လုပ်ခဲ့တယ်။ အခုနပြောတဲ့ transaction နှစ်ကြောင်းပြီးတော့မှ လုပ်လို့မရတော့ပါဘူးဆိုပြီးတော့ ကိုဇော်ဇော်ကိုယ်တိုင် ကျွန်တော့်ကို ခေါ်ပြောတာ။ ဒါဆို ဘာလို့အစကတည်းက သူတို့လုပ်ခဲ့တာလဲ။
အခုပြောနေတာက ကျွန်တော့သိက္ခာနဲ့ဆိုင်တယ်။ ကျွန်တော့သိက္ခာအတွက် ဒါတွေအကုန်လုံးကို ကျွန်တော်ကပြောပြရတော့မှာ။ အဲဒီတုန်းက ကျွန်တော်က ခရီးတစ်ခုသွားဖို့ ရှိတယ်။ လူကြီးတစ်ယောက်က ဖုန်းဆက်တယ်။ ခရီးမသွားပါနဲ့ဦးတဲ့။ သူ့ရုံးခန်းကို လာခဲ့ပါဆိုလို့ သူ့ရုံးခန်းကို သွားတယ်။ သူ့ရုံးခန်းကိုသွားတဲ့အခါမှာ ကိုဇော်ဇော်က ထိုင်နေတယ်။ ကိုဇော်ဇော်က သူမလုပ်ပေးနိုင်တော့ပါဘူးလို့ ပြောတယ်။ ကျွန်တော်တို့ အရပ်စကားအရ ပြောမယ်ဆိုရင် ကတိဖျက်တဲ့လူက စရံ အဆုံးပဲ။ အဲဒီအချိန်တုန်းက ကျွန်တော် လုပ်ပစ်လိုက်လို့ရတယ်။ ကျွန်တော်တို့ဆီမှာ … ပြန်ပေးရမယ်ဆိုတဲ့ စာရွက်စာတမ်းလည်း မရှိဘူး။ သူ လူကြီးမဆန်တဲ့ဟာကို ကျွန်တော်ပြောတာနော်။ အဲဒီတော့ ဒါဆိုရင် ဘဏ်မှာ ညှိလိုက်ပါလို့ပြောတာ။ ညှိလို့ရတယ်။ ပြဿနာမရှိဘူး။ ဒါကြီးကို အကျိုးအမြတ်ရှိလို့ လုပ်နေတာမဟုတ်ဘူး။ ဒါကြီးက အကျိုးမြတ်မရှိတာလည်း သိပြီးသား။
ပြီးတော့ သူ့ဘဏ်ကို သွားမယ်တဲ့။ လိုက်ခဲ့မယ်ဆိုပြီး လူကြီးရုံးကနေပြီးတော့ နိုဗိုတယ်ဟိုတယ်မှာရှိတဲ့ AYA Royal Banking ကို ကျွန်တော်တို့သွားတယ်။ အဲဒီမှာ ကျွန်တော့်ဆီကို သူတို့ဧရာဝတီဘဏ်ထဲကပဲ လူကြီးတစ်ယောက်က ဖုန်းဆက်တယ်။ ကိုကျော်တဲ့…သူရုံးခန်းထဲမှာ ဗီဒီယိုရိုက်တယ်တဲ့။ ဟုတ်လား အစ်ကိုကြီး။ ကျေးဇူးတင်ပါတယ်လို့။ ကျွန်တော်အသံသွင်းမိသွားတာ သူ့ကြောင့်။ ကျေးဇူးလည်းတင်တယ်။ ကျွန်တော်ဆိုလိုချင်တာက ကျွန်တော် တစ်ဖက်သတ် အသံသွင်းခဲ့တာမဟုတ်ဘူး။ သူ့အခန်းထောင့်ကနေ ဗီဒီယိုရိုက်နေတာ။ Royal Banking အစည်းအဝေးခန်းထဲမှာ ဗီဒီယိုကင်မရာလေးတွေ ရှိတယ်။ CCTV မဟုတ်ဘူး။ အခန်းထောင့်အပေါ်မှာ တပ်ထားတာ။ အဲဒီကျမှ ဟိုဟာလုပ်လို့မရဘူးတို့၊ ဒီဟာလုပ်လို့မရဘူးတို့ ပြောတာ။ ကျွန်တော်တို့လည်း အကြောက်အကန် ငြင်းတယ်။ မလုပ်နိုင်ပါဘူးလို့ ပြောတယ်။ အဲဒီမှာ သူ့ကို ယုံခဲ့မိတာ ကျွန်တော်မှားတာ။
နံပါတ်တစ်အချက်က “ညီလေးရယ် … အစ်ကိုတို့ဘဏ်ကတော့ အရေးယူခံရပါတော့မယ်။ အစ်ကိုတို့ဘဏ်ကတော့ Fraud Case (မသမာမှု) ကြီး ဖြစ်နေပါပြီ။ အစ်ကိုတို့ဘဏ်ကတော့ ဝန်ထမ်းတွေလည်း အရေးယူရတော့မယ့် criminal case (ပြစ်မှု) တွေ ဖြစ်ကုန်ပါပြီ” လို့ သူပြောတယ်။ ကျွန်တော်တို့လည်း အားနာပြီးတော့ သူလည်း လူကြီးလူကောင်းပဲဆိုပြီး သူပြောတဲ့အတိုင်း လုပ်ခဲ့မိတယ်။
စစချင်းမှားတာက ကျွန်တော်တို့ မဟုတ်ဘူး။ ကျွန်တော်တို့က လုပ်နိုင်တယ်၊ မလုပ်နိုင်ဘူးဆိုတာကို ရှင်းပြတယ်။ သူတို့က အတင်းလုပ်ခိုင်းတာ။ ‘ညီလေးရယ် ပြီးရင် အကုန်လုံး အစ်ကိုတို့ ပြန်ညှိပေးမယ်’ ဆိုတဲ့ စကားတစ်ခွန်းတည်းနဲ့ ကျွန်တော်တို့လုပ်ခဲ့တာ။ မူတွေ အကုန်လုံး ပြောင်းပေးခဲ့ရတယ်။ ဘာလို့လဲဆိုတော့ ခုနစ်နှစ်မှ အရင်းကျေကာလ ရမယ်ဆိုတဲ့ဟာကို ပြည်သူလူထုဆီက ပိုက်ဆံတိုးကောက်လို့မှ မရတာ။ ခုနစ်နှစ်ဆိုတာ လက်ခံပြီး အစကတည်းက သူတို့လုပ်ခဲ့ကြတာ။ ဒီစာချုပ်ဖျက်ဖို့အတွက် ဒေါ်လာ ခြောက်သန်း ပြန်သွင်းပေးပါတဲ့။ စဉ်းစားကြည့်၊ ဘယ်သူပြန်သွင်းပေးမှာလဲ။ ကျွန်တော်က အရူးမို့လို့ ပြန်သွင်းပေးခဲ့ရတယ်။ လွန်ခဲ့တဲ့ နှစ်နှစ် မတ်လ လောက်က။
အဲဒီနေ့ပြီး နောက်နေ့မှာ UOB ဘဏ် (United Overseas Bank၊ စင်ကာပူအခြေစိုက်ဘဏ်၊ ထိုစဉ်က ParkRoyal တွင်ဖွင့်) မှာ ဘဏ်က ပိတ်နေပြီ။ အဲဒါကို သူ အတင်းဖွင့်ခိုင်းပြီးတော့ ကျွန်တော်ရယ်၊ Foton ဝယ်တဲ့ ကိုယ်စားလှယ်ရယ်။ ကျွန်တော်တို့နှစ်ယောက်ကို လက်မှတ်ထိုးခိုင်းတယ်။ ကျွန်တော်ကတော့ မထိုးဘူး။ Foton ဝယ်တဲ့ ကိုယ်စားလှယ်ကတော့ ထိုးလိုက်တယ်။ နောက်နှစ်ရက်အကြာမှာ အဲဒီကိုယ်စားလှယ်ရဲ့ UOB ဘဏ်အကောင့်ရော၊ ဧရာဝတီဘဏ်ရဲ့ UOB ဘဏ်အကောင့်ရော နှစ်ခုလုံး freezed (ခဏရပ်) ဖြစ်သွားတယ်။ အဲဒီတော့ သူတို့ကိုယုံပြီး ကျွန်တော်တို့ လုပ်ပေးခဲ့တာ။ နှစ်ခုလုံး freezed ဖြစ်သွားတာ။ ကျွန်တော်ကတော့ ယုံကြည်မှုမရှိတော့ဘူး။
MYANMAR NOW ။ ။ တရားရုံးရောက်တာမှာ သမားရိုးကျမဟုတ်ဘူးလို့ ပြောသွားတယ်။ ရှင်းပြပါ့လား။
ဦးကျော်နေဝင်း ။ ။ သမားရိုးကျမဟုတ်ဘူးဆိုတာက ဘဏ်ရဲ့လုပ်ထုံးလုပ်နည်းအရ သမားရိုးကျမရှိတာ။ ကျွန်တော်နဲ့ ကိုဇော်ဇော်နဲ့ကြားမှာ ပုဂ္ဂိုလ်ရေး ဘာမှ မရှိဘူး။
MYANMAR NOW ။ ။ ချေးငွေယူဖို့ ဧရာဝတီဘဏ်နဲ့ ညှိနှိုင်းခဲ့တုန်းက တိုင်းဒေသကြီးအစိုးရအဖွဲ့က ဘယ်လိုအာမခံပေးခဲ့လဲ။
ဦးကျော်နေဝင်း ။ ။ တိုင်းဒေသကြီးအစိုးရအဖွဲ့က ဘဏ်ကို စာပို့တာက သူတို့အချင်းချင်းပဲပို့တာ။ ကျွန်တော့်ဆီလည်း လိပ်မူထားတာမဟုတ်ဘူး။ ကျွန်တော်လည်း မိတ္တူမရဘူး။ အစိုးရနဲ့က ကျွန်တော်တို့ဆီမှာလည်း ရှယ်ယာမပါသလို အာမခံပေးစရာလည်း မဟုတ်ဘူး။ အရင်ခေတ်လိုမှ မဟုတ်တော့တာ။ အစိုးရက ဘယ်သူ့ကိုမှ အာမခံမပေးဘူး။
MYANMAR NOW ။ ။ အသံဖိုင်အကြောင်း ပြောပြပါလား။ ဦးဇော်ဇော် ဘာပြောထားလဲ။
ဦးကျော်နေဝင်း ။ ။ အဓိကက လက်ရှိတာဝန်ထမ်းဆောင်တဲ့လူတွေရဲ့ မူဝါဒတွေအကြောင်းကို ပြောခဲ့တာရှိတယ်။ နောက်တစ်ချက်က အခုဖြစ်တဲ့အမှုအတွက် အားကောင်းစေမယ့် စကားလုံးတွေကို ပြောခဲ့တယ်။ ဥပမာအားဖြင့် ‘ညီလေးတို့ မှားတာမဟုတ်ဘူး။ အစ်ကိုတို့ဘဏ်က မှားတာ’ ဆိုတဲ့ ကိစ္စမျိုးတွေ ရှိတယ်။ နောက် ဘဏ်က အဆင့်တက်ဖို့ ကြိုးစားနေတယ် ဆိုတာတွေ ပြောခဲ့တယ်။ အဲဒါတွေကို သူတစ်ယောက်တည်း ဆုံးဖြတ်နေတယ်ဆိုတာ ပေါ်လွင်နေတယ်။ နောက်တစ်ချက်ကတော့ ကျွန်တော်တို့ တရားရုံးမှာ ရင်ဆိုင်ရမယ့် အမှုအတွက် အထောက်အကူပြုမယ့် ကိစ္စတွေ ပါတယ်။
MYANMAR NOW ။ ။ ဦးကျော်နေဝင်းတို့ဘက်က အတိုးဆပ်ဖို့ သုံးလစောင့်ခဲ့တယ်လို့ ဘဏ်က ပြောထားတာ ရှိပါတယ်။ ဆိုတော့ တရားရုံးမရောက်ခင်မှာ ဦးကျော်နေဝင်းတို့အဖွဲ့နဲ့ ဘဏ်နဲ့ ညှိနှိုင်းတဲ့အခါမှာ ဘာအဆင်မပြေတာရှိလဲ။
ဦးကျော်နေဝင်း ။ ။ ကျွန်တော်တို့ဘက်က နောက်ဆုံး စာပို့ခဲ့တာ ရှိတယ်။ ပြီးခဲ့တဲ့ ဇူလိုင်လ ၁၁ ရက်နေ့က ပို့တာ။ အချက်လေးချက်ပဲ ရှိတယ်။ တစ်အချက်ကတော့ ဧရာဝတီဘဏ်ကနေ Omni Focus အပါအဝင် ကုမ္ပဏီသုံးခုကို တရားစွဲဆိုခဲ့တယ်။ အဲဒီမှာ ကျွန်တော်တို့ကို လုံးဝအသိပေးခြင်းမရှိဘဲ ကျွန်တော်တို့ ဘဏ်စာရင်းထဲကနေ ပိုက်ဆံထုတ်သွားတာ ဖြစ်ခဲ့တယ်။ အဲဒါသည် ဘဏ်ရဲ့ကျင့်ဝတ် လုပ်ထုံးလုပ်နည်းတွေနဲ့ ညီညွတ်မှုမရှိတဲ့အပြင် အပ်နှံသူကုမ္ပဏီသုံးခုက ဧရာဝတီဘဏ်အပေါ် ယုံကြည်မှုကင်းမဲ့တဲ့ကိစ္စဖြစ်ပေါ်ခဲ့တယ်။ အဲဒီလိုကိစ္စတွေ နောက်မဖြစ်ပေါ်ပါဘူးလို့ သူတို့ (ဧရာဝတီ) ဘက်က ကတိပေးရင် နောက်နေ့ (ဆပ်ရမယ့်) ပိုက်ဆံ (ကျွန်တော်တို့က) ထည့်ပေးမယ်ဆိုတဲ့အကြောင်း ပါတယ်။
နောက်တစ်ချက် Hire Purchase (ဘဏ်ကစိုက်ဝယ်စနစ်) နဲ့ ကျွန်တော်တို့ဝယ်တာ အစီး ၁၀၀၊ demand loan (ငွေသားဖြင့်ထုတ်ချေး) ဝယ်တာ အစီး ၄၀၀။ အဲဒီအပေါ်မှာ ကျွန်တော်တို့နဲ့ သူတို့ လက်မှတ်ရေးထိုးခဲ့တာတွေ ရှိတယ်။ လက်မှတ်ရေးထိုးခဲ့တာတွေ အကုန်လုံးကို ပြုပြင်ထားခြင်းမရှိသော လူကြီးမင်းတို့ လက်ဝယ်တွင်ရှိသော စာရွက်လေးတွေကို မိတ္တူပေးပါ (လို့ သူတို့ကို စာပို့ထားတယ်။)
သုံးအချက်က ဧရာဝတီဘဏ်မှာ ဝယ်တဲ့ ကားတွေမှာ တချို့က Demand Loan နဲ့ ဝယ်တာရှိတယ်။ တချို့က Hire Purchase နဲ့ ဝယ်တာရှိတယ်။ အဲဒီနှစ်ခုလုံးမှာ ဘာတွေက ဘယ်လိုရှိနေလဲ။ ချေးငွေပြန်ဆပ်ရမယ့် ကာလကိုလည်းကောင်း၊ ပေးချေမှုလွယ်ကူစေရန် အတိုးအရင်း လအလိုက်တွက်ချက်ပုံ နည်းလမ်းများကို လည်းကောင်း၊ မည်ကဲ့သို့ ပေးချေရမည်ကိုလည်းကောင်း ဖြေကြားပေးစေလို့ ပြောထားတယ်။ ဆိုလိုချင်တာက သူတို့က အတိုး၊ အတိုးတွေပေါင်းလို့ ဖြစ်နေတာ ဒါတွေအကုန်လုံး သိဖို့အတွက် ကျွန်တော်တို့ကို ပေးပါလို့ တောင်းထားတာ။
နောက်ဆုံးတစ်ချက်ကတော့ Repayment Schedule (ငွေပြန်ဆပ်မည့်အချိန်ဇယား) ကျွန်တော်တို့ လုပ်ချင်တယ်။ ကျွန်တော်တို့ကို လုပ်ပေး။ နှစ်ဦးနှစ်ဖက် နားလည် သဘောတူတဲ့ဟာတစ်ခု လုပ်ပေး။ လုပ်ပေးလို့ရှိရင် အဲဒီအတိုင်းပေးမယ်လို့ ပြောထားတာ။ ဒီစာပို့ပြီးမှ နောက်ဆုံး ဒီလိုဖြစ်လာတာ။ တရားရုံးကိစ္စက စာရွက်စာတမ်းအတိုင်းပဲ ကျွန်တော်တို့သွားမယ်။ နိုင်တယ်၊ မနိုင်ဘူးဆိုတာ တရားရုံးက ဆုံးဖြတ်ရမှာ။ တရားရုံးရောက်သွားပြီဆိုရင် အတိုးရပ်သွားပြီ။ ဒီနေ့ ပြန်ပေးချင်ရင်တောင် ပေးလို့မရဘူး။ တရားရုံးကိစ္စပြီးသွားမှပဲ ရမှာ။
MYANMAR NOW ။ ။ တရားစွဲခံရတဲ့ ကုမ္ပဏီသုံးခုလုံးက ဦးကျော်နေဝင်းနဲ့ပတ်သက်တာလား။
ဦးကျော်နေဝင်း ။ ။ ကုမ္ပဏီသုံးခုကို တရားစွဲတယ်ဆိုပြီးတော့ သူတို့ဘက်က ဖြစ်တယ်ပေါ့နော်။ ကျွန်တော်နဲ့ ပတ်သက်တဲ့ ကုမ္ပဏီက တစ်ခုပဲပါတယ်။ နောက်နှစ်ခုလုံးမှာ ကျွန်တော် မပါဘူး။ Liability (ပြန်ဆပ်ရန်တာဝန်) ကျွန်တော့်မှာ မရှိတော့ဘူး။ အားလုံးသိထားတာက အစီး ၅၀၀ လုံးက ကျွန်တော်နဲ့ပဲ ဆိုင်တယ်လို့ပဲ သိထားတာ။ တရားရုံးရောက်သွားရင် ရုံးပေါ်တက်လာတဲ့ စာရွက်စာတမ်းတွေကိုပဲ ကြည့်ပြီး ဆုံးဖြတ်မှာ။ အရင်တုန်းက ဦးကျော်နေဝင်းပိုင်တာတွေ ထည့်စဉ်းစားမှာ မဟုတ်ဘူး။ သူ့စာရွက်စာတမ်းအရ ဒီကုမ္ပဏီမှာ ဦးကျော်နေဝင်းမပါရင် ဦးကျော်နေဝင်းနဲ့မဆိုင်ဘူးပဲ။ ဘာဖြစ်လို့လဲဆိုတော့ ဧရာဝတီဘဏ်ဘက်က ပြောတယ်။ Single Lending Limit (ချေးယူသူတစ်ဦးအား ဘဏ်၏ငွေရင်းနှင့် အမြတ်ပေါင်း၏ ၁၅ ရာခိုင်နှုန်းထက် ပိုမချေးရန်ကန့်သတ်ချက်) ဆိုတာ ရှိတယ်တဲ့။ Single Lending ထက် ကျော်နေတဲ့အတွက် ကျွန်တော့်တစ်ယောက်တည်းကို ချေးပေးလို့မရဘူးတဲ့။ အဲဒါက ကျွန်တော်နဲ့ မဆိုင်ဘူး။ သူတို့နဲ့ ဗဟိုဘဏ်နဲ့ ရှင်းရမယ့်ကိစ္စ။
ကိုဇော်ဇော်က 'ညီလေး ပြောင်းပေးပါ (Omni Focuse မဟုတ်တဲ့ တခြားကုမ္ပဏီနာမည်အသစ်နဲ့ ငွေချေးပါ)' လို့ အတင်းပြောတယ်။ ကျွန်တော်ပြောင်းပေးရအောင် ကျွန်တော်မှာ တခြားကုမ္ပဏီ မရှိဘူး။ ကျွန်တော်တစ်ခုတည်းပဲ လုပ်နေတာ။ liability ကိုလည်း ဒီထဲ (Omni Focus) မှာပဲ ရှိချင်တယ်။ မဟုတ်ဘူး ညီလေး ပြောင်းပေးပါ (လို့ ပြောတယ်။) ဟုတ်ပြီ။ ပြောင်းပေးဖို့က နောက်ထပ် ကျွန်တော် ကုမ္ပဏီအသစ် နှစ်ခု ဖွင့်ရမယ်ဆိုတာကို အစကတည်းက ကိုဇော်ဇော် သိရမယ်။ “နောက်ပိုင်းဖြစ်လာမယ့်ကိစ္စ အကုန်လုံး အစ်ကိုတို့ လုပ်ခိုင်းလို့နော်။ ကျွန်တော်မသိဘူး” လို့ အစကတည်းက ပြောခဲ့တယ်။ ညီလေးရယ်လုပ်လိုက်ပါဆိုပြီး သူပြောလို့ လုပ်လိုက်ရတာ။ ကျွန်တော်ပြောချင်တာက ဘဏ်ကနေ ပြောပြောနေတဲ့ စကားတစ်ခွန်း ရှိတယ်။ “လုပ်ထုံးလုပ်နည်းများနှင့်အညီ ပိုက်ဆံချေးခဲ့တယ်” လို့ ပြောတယ်။
လုပ်ထုံးလုပ်နည်းများနှင့်အညီဆိုရင် အဲဒီကုမ္ပဏီနှစ်ခုကို လက်မှတ်ထိုးပြီး ဘဏ်က ပိုက်ဆံချေးတဲ့ အချိန်မှာ ကုမ္ပဏီနာမည်ပဲ ရှိသေးတယ်။ Register (မှတ်ပုံတင်) ကျတဲ့နေ့က အဲဒီထက် အများကြီး နောက်ကျတယ်။ လုပ်ထုံးလုပ်နည်းနဲ့ တကယ်ညီခဲ့လား ပြောချင်တယ်။ အဲဒီလောက်ကြီးမားတဲ့ ငွေပမာဏကို ချေးမယ်ဆိုရင် ကုမ္ပဏီတစ်ခုရဲ့ သုံးနှစ်စာ (အရှုံးအမြတ်၊ စာရင်းစစ်အစီရင်ခံစာ)အကုန်လိုအပ်တာ။ အဲဒါတွေမရှိဘူးနော် ဆိုတော့ (ဦးဇော်ဇော်က) ‘ညီလေးရယ် ရပါတယ်။ လုပ်လိုက်ပါ’ လို့ ပြောတယ်။ စစကတည်းက မှားတယ်ဆိုတာ ဒါတွေကို ပြောတာ။ တရားရုံးရောက်သွားရင် အချိန်ရယ်၊ နေရာရယ်၊ စာရွက်စာတမ်းရယ်ပေါ်မှာ အများကြီး မူတည်နေပြီ။
သူတို့ ပြောပြောနေတဲ့ Hire Purchase နဲ့ ကားအစီးရေ ၅၀၀ ကို ဝယ်ထားတယ်ဆိုရင် Hire Purchase ရဲ့ မူက ဘာလဲ။ အဲဒီကားတွေကို ဘဏ်က ပိုင်ကို ပိုင်ရမှာ။ အဲဒါမှ Hire Purchase လုပ်ခွင့်ရှိတာ။ ဒီကားတွေကို စာရွက်ရွက်စာတမ်းတွေအရ ဘဏ်က ပိုင်ပြီလား။ သူတို့ ပြောပြောနေတဲ့ ကုမ္ပဏီနှစ်ခု (Central Yangon နှင့် Keen Support) က ချေးငွေယူတဲ့အချိန်မှာ အသက်ရှိလား။ ဒီကုမ္ပဏီနှစ်ခုက ကိုဇော်ဇော်ပြောလို့ ဖြစ်လာတာ။ ဒါတွေကို သူတို့ မသိခဲ့တာမဟုတ်ဘူးနော်။
နောက်တစ်ခု ပြောပြချင်တာက ဒီချေးငွေ လိုချင်ပါတယ်ဆိုပြီး သူတို့ဘဏ်မှာ သွားပြောခဲ့တာမဟုတ်ဘူး။ သူတို့ဘက်က လာချေးပါ လာချေးပါ ပြောလို့ ကျွန်တော်တို့ ချပြတယ်။ သူတို့လက်ခံတယ်။ အမှားအယွင်းပါလို့ တစ်ခေါက်ဖြစ်သွားတယ်ဆို မပြောဘူး။ အစီးရေ ၆၀၀ အတွက် နောက်ထပ် transaction (ငွေပေးချေမှု) တစ်ကြောင်း ထပ်ထွက်သွားတယ်။ ဒါကိုလည်း သိစေချင်တယ်။
နောက်တစ်ခုက ဘဏ်ရဲ့ လုပ်ထုံးလုပ်နည်းတွေကို ပြောချင်တယ်။ သူ မသိဘူးလို့ ညာချင်ညာနေမယ်။ ဘဏ်ကလူကြီးတွေ မသိဘူးလို့ သူပြောရင် ပြောနေမယ်။ ဒါပေမဲ့ ချေးငွေတစ်ခု လုပ်မယ်ဆိုရင် ဘဏ်မှာ ချေးငွေကော်မတီ ရှိတယ်။ အဲဒီကော်မတီကို ဒီလောက်ချေးပါမယ်ဆိုပြီး Omni Focus ကို ချေးပါ့မယ်ဆိုပြီး လုပ်တဲ့အချိန်မှာ Single Lending Limit နဲ့ ငြိတယ်ဆိုရင် အဲဒီအချိန်ကတည်းက မပေးနဲ့လေ။ မူအားဖြင့် ဘဏ်မှာ ဘာလုပ်ရမလဲဆိုတော့ ဒီကုမ္ပဏီတစ်ခုကို ချေးငွေလုပ်တော့မယ်ဆိုရင် ချေးငွေကော်မတီကို တင်တယ်။ ချေးငွေကော်မတီက Approved (အတည်) ဖြစ်လို့ ချေးမယ့်ငွေပမာဏက ဘဏ်စာရင်းတစ်ခုထဲကို ဝင်သွားတယ်။ အဲဒါကလည်း ကျွန်တော်တို့ဘဏ်စာရင်း မဟုတ်ဘူး။ သူတို့ကိုင်ထားတဲ့ဘဏ်စာရင်း။
ဒီချေးငွေကို ကျွန်တော်တို့က withdraw (ရုပ်သိမ်းတယ်) လုပ်ခွင့်မရှိဘူး။ ဒီချေးငွေသည် နိုင်ငံခြားကို ကားဝယ်ဖို့ လွှဲရမှာဖြစ်တဲ့အတွက်ကြောင့် ဗမာငွေကို အမေရိကန်ဒေါ်လာနဲ့ လဲရတယ်။ တစ်ရာပဲသွားသွား၊ လေးရာပဲသွားသွား ဒီငွေပမာဏကို ဘယ် exchange rate (ငွေလဲနှုန်း) နဲ့ ဝယ်ပါမယ်ဆိုတာကို ဗဟိုဘဏ်ကို တင်ပြပြီး ဝယ်ရတာ။ သူတို့ ပြောသလို မသိလိုက်ဘူးဆိုတာလည်း မဖြစ်နိုင်ဘူး တစ်ချက်။
အဲဒီငွေက ဒေါ်လာဖြစ်သွားတယ်။ အဲဒီပိုက်ဆံက ၁၀၀ ရာခိုင်နှုန်း ကျန်တယ်။ ၄၀ ရာခိုင်နှုန်းပဲ နိုင်ငံခြားဘဏ်ကို သွားတာဖြစ်တဲ့အတွက် ၆၀ ရာခိုင်နှုန်းက ဘဏ်မှာ ကျန်တယ်။ ချေးငွေ ပေးချေဖို့ ဆိုပြီး ကျန်ခဲ့တာ။ ဒီ ၄၀ ရာခိုင်နှုန်းကို ဘယ်လိုပေးလဲဆိုရင် ဆာလာအိတ်နဲ့ထည့်ပြီး သွားပေးတာမဟုတ်ဘူး။ အကုန်လုံးသည် ဘဏ်တစ်ခုနဲ့တစ်ခု သွားတဲ့ SWIFT code နဲ့ telegraphic transfer သွားတဲ့အတွက်ကြောင့် အဆင့်ဆင့်သွားရတာ ဖြစ်တယ်။ အစီးရေ ၄၀၀ ဝယ်တဲ့အချိန်မှာ telegraphic transfer နဲ့ ၄၀ ရာခိုင်နှုန်း တစ်ကြောင်းရောက်တာ။ အစီးရေ ၆၀၀ ဝယ်တဲ့အချိန်မှာလည်း ဒီအတိုင်းပဲ။
(အကြွေးအကန့်အသတ်ပမာဏ) တွေ ကျော်နေတယ်ဆိုတဲ့ဟာသည် ဖြစ်နိုင်၊ မဖြစ်နိုင်ဆိုတာ ကျွန်တော်လည်း စဉ်းစားပြီလေ။ အစကတည်းက ပြောလေ။ ဘာလို့ အခုမှ လုပ်တာလဲ။
ဘဏ်က မသိလိုက်ဘူးဆိုရင် ဒီလိုမျိုး လုပ်လို့ရနေတာလား။ သိရဲ့ သားနဲ့ လုပ်တယ်ဆိုရင်လည်း ဒါကြီးက မှားတယ်ဆိုပြီးတော့ မပြောနဲ့လေ။ ကျွန်တော်တို့နဲ့ မဆိုင်တော့ဘူး။ (အကြွေးအကန့်အသတ်ပမာဏ) ထက် ကျော်နေတယ်ဆိုရင် ဘဏ်နဲ့ ဗဟိုဘဏ်နဲ့ ရှင်းရမယ့်ကိစ္စ။ ကျွန်တော်တို့နဲ့ မဆိုင်ဘူး။ ရှေ့လလောက်မှာ ကျွန်တော်တို့ဆီကနေ လူမသိအောင် ပိုက်ဆံထုတ်သွားတဲ့ ကိစ္စတွေကို ဗဟိုဘဏ်တို့၊ သက်ဆိုင်ရာဌာနတို့ကို တင်ပြရမယ့်ကိစ္စတွေ ဖြစ်လာတော့မယ်။ ဘဏ်အနေနဲ့လည်း ဒါကို ပြင်ဆင်ထားဖို့လိုတယ်။
MYANMAR NOW ။ ။ ချေးငွေဆပ်ဖို့အတွက် အချိန်ဇယားက အရင်ကတည်းက မရှိတာလား။
ဦးကျော်နေဝင်း ။ ။ ချေးငွေယူတုန်းက မရှိဘူး။ ဘာဖြစ်လို့လဲဆိုတော့ ဒါတွေအကုန်လုံးသည် Hire Purchase ဖြစ်တဲ့အချိန်မှာ ကားတွေက ရန်ကုန်ကိုလည်း မရောက်သေးတဲ့အတွက် ဘဏ်ရဲ့ပိုင်ဆိုင်မှုက ကားတွေအပေါ်မှာ မရှိသေးဘူး။ (ချေးငွေပြန်ဆပ်ရမယ့်အချိန်ဇယား) မရှိသေးဘူး။ ကျွန်တော်တို့က ချေးငွေတစ်ခုအတွက် သူတို့နဲ့ ကျွန်တော်နဲ့ကြားထဲမှာ အတိုးတစ်ခု သတ်မှတ်လိုက်တယ်။ အဲဒီအတိုးတွေ အကုန်လုံးကို ကျွန်တော် ပေးခဲ့ပြီးပြီ။ ကျွန်တော်တို့ ဘယ်လောက်တောင် လုပ်ပေးခဲ့ရလဲဆိုရင် loan structure တွေကို သူတို့ ပြန်ပြောင်းပစ်တာတွေ ရှိသေးတယ်။ အဲဒီကြိုက်တဲ့ပုံစံနဲ့ ပြောင်းပြီးမှ သူတို့မှားပါတယ်ဆိုတဲ့ loan structure တစ်ခု ရှိခဲ့တယ်။ အဲဒီမှားပါတယ်ဆိုတဲ့ loan structure အပေါ်မှာပါ ကျွန်တော်က ပေးခဲ့ရတာ။ အတိုးမပေးတဲ့အထဲမှာ ကျွန်တော်မပါဘူး။
နောက်တစ်ချက်က လက်ရှိအခြေအနေမှာ အမှန်အတိုင်းကို ချပြနိုင်ဖို့တော့ လိုအပ်တယ်။ ပြည်သူလူထုကိုတော့ မညာပါနဲ့။ ပြည်သူလူထုကို အမှန်အတိုင်း ချပြပါ။
MYANMAR NOW ။ ။ တရားစွဲခံရတာနဲ့ပတ်သက်ပြီး ဦးကျော်နေဝင်းဘက်က ဘာတွေ ပြင်ဆင်ထားလဲ။
ဦးကျော်နေဝင်း ။ ။ အသံဖိုင်၊ စာရွက်စာတမ်းနဲ့ သူတို့ဝန်ထမ်းတွေနဲ့ပဲ။ ဒါတွေပဲ ပြင်ဆင်ထားတာပါ။ အလုပ်လုပ်တာကျတော့ သူတို့ ဘဏ်ဝန်ထမ်းတွေပဲ သိတာလေ။ သူတို့ဝန်ထမ်းတွေကိုပဲ ပြန်သုံးရမှာ။ သူတို့ဝန်ထမ်းကိုပဲ မေးရမှာပဲလေ။ နိုင်သည်၊ ရှုံးသည်က တရားရုံးကို ဘယ်သူမှ ကျော်လွှားပြီး ပြောလို့မရဘူး။ ဒါကြီးက အချိန် အကြာကြီးသွားမှာ။
MYANMAR NOW ။ ။ ဖြည့်စွက်ပြောချင်တာများ ရှိသေးလား။
ဦးကျော်နေဝင်း ။ ။ ဖြည့်စွက်ပြောချင်တာ နှစ်ခုပဲရှိတယ်။ သူတို့ဆီကို ညှိနှိုင်းမှုရလဒ်တစ်ခု ရအောင် ဇန်နဝါရီလ ၁၁ ရက်နေ့က စာပို့ခဲ့တယ်။ သူတို့ဘက်က ဘာမှ ပြန်မလာဘူး။ နောက်တစ်ချက်က ဗဟိုဘဏ် ဒုဥက္ကဋ္ဌကိုယ်တိုင် ပြောပြီးပြီပဲ။ စစချင်းချေးတဲ့လူတွေထဲမှာ အတိုး၊ အရင်း မပေးတဲ့လူတွေ အများကြီးပဲ။ သူတို့ဘဏ်ကိုယ်တိုင်ကလည်း ကျွန်တော်တို့ ဘယ်လောက်အတိုးပေးတယ်ဆိုတာ ပြောပြီးပြီ။ ဒါကြီးကို တရားရုံးတင်တယ်။ ကျွန်တော့်ဘက်က အသင့်ရှိပါတယ်။ ဘဏ်ရဲ့ လုပ်ထုံးလုပ်နည်းအတိုင်း လုပ်မယ်ဆိုရင် သူတို့ စစချင်း လုပ်ထုံးလုပ်နည်းတွေ မညီဘဲ လုပ်ခဲ့တာပါ အရေးယူခံရမှာနော်။ ဒါလေးတော့ ပြောချင်တယ်။
Mizzima Key Campaign မှာ ပါဝင်ဖို့ ဖိတ်ခေါ်လိုက်ပါတယ်။ Visit Our website: http://building.mizzimafoundation.org/
