ဒေးဒရဲမြို့နယ်၊ ကျုံဒါးရဲစခန်းမှ စခန်းမှူးတစ်ဦးသည် လင်မယားစကားများရာမှာ မိမိကိုယ်ကိုယ် သေနတ်ဖြင့် ပစ်ခတ်ကာ အဆုံးစီရင်မှုတစ်ခု ဖြစ်ပွားခဲ့ကြောင်း ဧရာဝတီတိုင်းဒေသကြီး ရဲတပ်ဖွဲ့မှူးရုံးမှ ဒုတိယ ရဲမှူးကြီး ထွန်းရွှေက ပြောသည်။
ဒေးဒရဲမြို့နယ်၊ကျုံးဒါးနယ်မြေရဲစခန်းမှ စခန်းမှူး ရဲအုပ်စောလှဌေး (၄၅)နှစ်သည် ဇနီးဖြစ်သူနှင့်အတူ ဒေးဒရဲမြို့ အမှတ်(၁)ရပ်ကွက်၊ ဗိုလ်ချုပ်လမ်းရှိ၊ ဒေးဒရဲ အအေးခန်း ဧည့်ရိပ်သာတွင် တည်းခိုနေစဉ် စက်တင်ဘာ ၂ ရက် ည ၈ နာရီခန့်၌ လင်မယားချင်း စကားများ ရန်ဖြစ်ရာမှ စခန်းမှူးက ၄င်းဇနီးအား သေနတ်ဖြင့် ညာဘက်ပေါင်သို့ နှစ်ချက်ပစ်ကာ ကိုယ့်ကိုယ်ကိုယ် သေနတ်ဖြင့် ပစ်ခတ်၍ အဆုံးစီရင်ခဲ့ခြင်း ဖြစ်သည်။
သေဆုံးသွားသော စခန်းမှူး၏ ရုပ်အလောင်းကို စစ်ဆေးမှုများ ဆောင်ရွက်နေပြီး ဒဏ်ရာရသွားသည့် စခန်းမှူး၏ ဇနီးဖြစ်သူ ဒေါ်ချောဥမ္မာအား ဖျာပုံပြည်သူ့ဆေးရုံကြီးသို့ပို့ဆောင်ထားကြောင်း သိရသည်။
အဆိုပါ အမှုကို ဒေးဒရဲမြို့နယ်ရဲစခန်းတွင် သေမှုသေခင်းအမှုအမှတ် ၁၂/၂၀၁၉ဖြင့် အမှုဖွင့်လှစ် စစ်ဆေး လျက်ရှိကြောင်း သိရှိရသည်။
ရိုက်ကူး - စည်သူမောင်မောင်
