ရန်ကုန်၊ အောက်တိုဘာ ၁၄ ။           ။ မြန်မာနိုင်ငံအစိုးရ လျှို့ဝှက်ချက်အက်ဥပဒေ၊ သက်ဆိုင်ရာ ဝန်ကြီးဌာနများ၏ ကန့်သတ်ချက်များမှအပ မီဒီယာများ သိရှိလိုသည်များကို တတ်အားသရွေ့ ပေါင်းစပ်ပေးမည်ဟု ပဲခူးတိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ခင်မောင်ဌေးက အောက်တိုဘာ ၁၃ ရက်က ပြောကြားလိုက်သည်။

ပြန်ကြားရေးဝန်ကြီးဌာနနှင့် ပဲခူးတိုင်းဒေသကြီး အစိုးရအဖွဲ့တို့ ပူးပေါင်းစီစဉ်၍ ဒေသဖွံ့ဖြိုးရေးဆိုင်ရာ မီဒီယာလုပ်ငန်းများ တိုးတက်လာစေရန် ရည်ရွယ်ပြုလုပ်သော တိုင်းဒေသကြီးအဆင့် အစိုးရအဖွဲ့ဌာန ဆိုင်ရာများနှင့် သတင်းမီဒီယာသမားများ၏ မီဒီယာလုပ်ငန်းဆိုင်ရာ အလုပ်ရုံဆွေးနွေးပွဲတွင် ယင်းသို့ ပြောကြားခဲ့ခြင်းဖြစ်သည်ဟု ယနေ့ထုတ် နိုင်ငံပိုင်သတင်းစာတွင် ဖော်ပြထားသည်။

ဒီမိုကရေစီစနစ်တွင် ပြည်သူများ၏ လူမှုဘဝဖွံ့ဖြိုးတိုးတက်ရန် မှန်ကန်သည့် သတင်းအချက် အလက်များရရှိရန် လိုအပ်ပြီး မီဒီယာများအနေဖြင့် တဖက်နှင့်တဖက် ဥပဒေနှင့် အညီဖြစ်ရန် နည်းလမ်းများပေးစေလိုကြောင်း ဝန်ကြီး ဖိတ်ခေါ်ထားသည်။

''အစိုးရဌာနဆိုင်ရာများကလည်း မြန်မာနိုင်ငံအစိုးရ လျှို့ဝှက်ချက် အက်ဥပဒေ၊ သက်ဆိုင်ရာဝန်ကြီးဌာနများရဲ့ ကန့်သတ်ချက်များ၊ ညွှန်ကြားချက်များမှအပ မီဒီယာတွေ သိလိုသည်များကို ပေါင်းစပ်ပေးမည်။ မီဒီယာများကလည်း ပြည်သူတွေ သိသင့်သိထိုက်သည်များကို အသိပေးစေလိုပါတယ်။'' ဟု လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ခင်မောင်ဌေးက ပြောသည်။

မီဒီယာများ သတင်းရယူမှုအခက်အခဲ၊ သတင်းရေးသားမှုအပေါ် နောက်ဆက်တွဲ ဖြေရှင်းမှုပြဿနာ၊ သတင်းထုတ်ပြန်ပေးမှုအခြေအနေ၊ သတင်းသမားများ၏ လုံခြုံမှု၊ လွှတ်တော်တွင်း သတင်းရယူရာတွင် ခွဲခြားဆက်ဆံမှုမရှိစေရန်၊ ရွေးကောက်ပွဲတွင် လွတ်လပ်စွာ သတင်းရယူခွင့်ပြုရန် စသည့်ခေါင်းစဉ်များဖြင့် ဆွေးနွေးခဲ့ပြီး သဘောတူညီချက်များကို ထုတ်ပြန်ခဲ့သည်။

ယင်းဆွေးနွေးပွဲသို့ ပဲခူးတိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ခင်မောင်ဌေး၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန ဒုတိယ ညွှန်ကြားရေးမှူးချုပ် ဒေါက်တာသီတာတင် ၊ မြန်မာနိုင်ငံစာနယ်ဇင်းကောင်စီ(ယာယီ)၊ မြန်မာနိုင်ငံသတင်းစာဆရာများအသင်း၊ မြန်မာဂျာနယ်လစ်ကွန်ရက်၊ ပဲခူးတိုင်းဒေသကြီးအတွင်းရှိ သတင်းမီဒီယာများနှင့် တိုင်းဒေသကြီးအဆင့်ဌာန ဆိုင်ရာများ တက်ရောက်ခဲ့ကြသည်။