သြဂုတ် ၂၂ ။            ။ ပြင်သစ်နိုင်ငံ ပါရီမြို့ ဆင်ခြေဖုံးရပ်ကွက်တစ်ခုက အထပ်မြင့် အဆောက်အအုံတစ်လုံးမှာ သြဂုတ်လ ၂၁ ရက် ညပိုင်းက မီးလောင်ကျွမ်းမှုဖြစ်လို့ အနည်းဆုံး လူ တစ်ဦး သေဆုံးပြီး လူတစ်ချို့ ထိခိုက်ဒဏ်ရာတွေ ရသွားတယ်လို့ သိရပါတယ်။

ပါရီမြို့ အရှေ့တောင်ပိုင်းက Creteil အရပ်က Henri-Mondor ဆေးရုံရဲ့ ကပ်လျက် အဆောက်အအုံမှာ ယင်း မီးလောင်ကျွမ်းမှု ဖြစ်ပွားခဲ့တာဖြစ်ပါတယ်။

ယင်း မီးလောင်မှုမှာ မီးသတ်သမားတွေဟာ နှစ်နာရီကျော်ကြာ ငြိမ်းသတ်ခဲ့ကြရပြီး သြဂုတ် ၂၂ ရက် မနက် ၁ နာရီ ၃၀ မိနစ်ဝန်းကျင်မှာ ငြိှမ်းသတ်လိုက်နိုင်တယ်လို့ သိရပါတယ်။

မီးကတော့ ယမန်နေ့ ည ၁၁ နာရီခန့်က စတင်လောင်ကျွမ်းခဲ့တာဖြစ်ပြီး ဆေးရုံ ဝန်ထမ်းတွေ နေထိုင်တဲ့ ဆယ်ထပ် အဆောက်အအုံမှာ လောင်ကျွမ်းခဲ့တာဖြစ်တယ်လို့ ပါရီမြို့ မီးသတ်ဌာန ပြောခွင့်ရသူတစ်ဦးက ပြောသွားပါတယ်။

မီးလောင်မှုကြောင့် အမျိုးသမီးတစ်ဦး အသက်ဆုံးရှုံးသွားခဲ့ကြောင်း ၎င်းက ထပ်လောင်း အတည်ပြုသွားခဲ့ပါတယ်။

ယင်း အဆောက်အအုံ မီးလောင်ရခြင်း အကြောင်းရင်းကိုတော့ စုံစမ်းစစ်ဆေးနေလျက် ရှိပါတယ်။