ရန်ကုန်၊ ဇူလိုင်လ (၁၅)ရက် ။         ။ ထောက်ကြန့် လှော်ကားလမ်းဘေးတွင်တွေ့ရှိခဲ့သည့် အလောင်း(၃)လောင်းနှင့် ပတ်သက်၍ မည်သူ မည်ဝါဖြစ်ကြောင်း ဆက်သွယ်သတင်းပေးပို့ရန် ထုတ်ပြန်ကြေညာထားသော်လည်း ဆက်သွယ်လာခြင်း မရှိသေးကြောင်း ထောက်ကြန့်နယ်မြေရဲစခန်းမှ တာဝန်ရှိသူတစ်ဦးက မဇ္စျိမသို့ ပြောသည်။

၂၀၁၉ ခုနှစ်၊ ဇူလိုင်လ ၁၃ရက် နံနက် ၈နာရီခွဲ တွင် မင်္ဂလာဒုံမြို့နယ်၊ လှော်ကားမောင်းတံဂိတ်၏ တောင်ဘက် (၂)ဖာလုံခန့်အကွာရှိ လှော်ကားလမ်းဘေး၌ အမည်/နေရပ်(စိစစ်ဆဲ) အသက်(၁၇)နှစ်ဝန်းကျင် လူငယ် အလောင်း(၃)လောင်းကို စတင်တွေ့ရှိခဲ့ခြင်း ဖြစ်သည်။

အဆိုပါ အလောင်းများအနက် အမျိုးသမီး(၁)ဦး၏ အလောင်းမှာ ပက်လက်အနေ အထားဖြင့်လည်းကောင်း၊ အမျိုးသား(၂)ဦးမှာ မှောက်ခုံထပ်လျက် အနေအထားဖြင့် တွေ့ရှိခဲ့သည်ဟု ရန်ကုန်တိုင်းဒေသကြီး ရဲတပ်ဖွဲ့၏ ထုတ်ပြန်ချက်၌ ဖော်ပြထားသည်။

• မင်္ဂလာဒုံမြို့နယ်၌ အလောင်း ၃ လောင်းတွေ့ရှိမှုမှာ လူမှောင်ခိုကူးခံရသူများဟု ယူဆရ

ယင်း အလောင်းများသည် ပြင်ပဒဏ်ရာတစ်စုံတစ်ရာမတွေ့ရှိဘဲ သေဆုံးနေကြောင်းစစ်ဆေးတွေ့ရှိသဖြင့် အင်းစိန်ပြည်သူ့ဆေးရုံသို့ ပို့ဆောင်ခဲ့ကာ ကနဦးစစ်ဆေးချက်များအရ အစာအိမ်တွင် အစာမရှိကြောင်း အဆုတ်လေမွန်းကြပ်၍ သေဆုံးခြင်းဖြစ်ကြောင်း ဦးခေါင်းပိုင်းနှင့်ခန္ဓာကိုယ်တို့တွင် သေစေလောက်သည့် ပြင်ပ ဒဏ်ရာ/ထိုးသွင်း ဒဏ်ရာမရှိကြောင်း ရဲထုတ်ပြန်ချက်တွင် ဖော်ပြထားသည်။

ထို့အပြင် သေဆုံးအလောင်းများ၏ အနီးတွင် မစားရသေးသော ကြွပ်ကြွပ်အိတ်ဖြင့်ထုပ်ထားသည့် ထမင်းထုပ် (၃)ထုပ်နှင့် အလောင်းများတွင် သဲများကပ်နေသည်ကို တွေ့ရှိရကြောင်း ဆက်လက်ဖော်ပြထားသည်။

အဆိုပါအမှုကို ထောက်ကြန့်နယ်မြေရဲစခန်းမှ အမှုဖွင့်စစ်ဆေးလျက်ရှိကြောင်း ရဲတပ်ဖွဲ့က သတင်းထုတ်ပြန် ထားပြီး သေဆုံးသူများသည် မည်သူမည်ဝါဖြစ်သည်ကို သိရှိပါက ဖုန်းနံပါတ်  - 09 250374677၊ 01 9437032၊ 01 2323199 သို့ ဆက်သွယ်ပေးရန် ရန်ကုန်တိုင်းဒေသကြီး ရဲတပ်ဖွဲ့က ထုတ်ပြန်ထားသည်။