မကွေး၊ ဇူလိုင် ၁၄ ။ ။ ဇူလိုင် ၁၂ ရက်နေ့၊ နေ့လယ်ပိုင်းက မင်းတုန်းချောင်းကူးစက်လှေ တိမ်းမှောက်မှုကြောင့် ပျောက်ဆုံးခဲ့သည့် ကျောင်းသူ ၄ ဦးအနက် ဇူလိုင် ၁၄ ရက်တွင် ကျောင်းသူတစ်ဦး၏ ရုပ်အလောင်းကို ထပ်မံတွေ့ရှိခဲ့သည်။
ဇူလိုင်လ ၁၄ ရက်နေ့၊ နေ့လယ် ၂ နာရီ ၅၀ မိနစ်အချိန်ခန့်တွင် ကံမမြို့နယ် ကျီးမီးကျေးရွာအနီး ချောင်းတွင် မသက်မွန်ဇူလိုင် (အသက် ၁၃ နှစ်၊ ၇ တန်းကျောင်းသူ) ၏ ရုပ်အလောင်းအား ထပ်မံတွေ့ရှိခဲ့သည်။
" ဇူလိုင် ၁၂ ရက်နေ့က စက်လှေမှောက် ၊ ပျောက်ဆုံးနေတဲ့ ကျောင်းသူ ၃ ဦးကို ဒီကနေ့ နံနက်ပိုင်းက အထက်မြန်မာပြည် ကယ်ဆယ်ရေး ရေငုပ်အဖွဲ့က လာရောက်ကူညီရှာဖွေပေးနေပါတယ်။ ဒုတိယမြောက် တွေ့ရှိတာက ကံမမြို့နယ်မှာပါ၊ အခု တွေ့ရှိတဲ့နေရာကနေ မသက်မွန်ဇူလိုင်ရဲ့ရုပ်အလောင်းကို ညနေ ၄ နာရီလောက် မင်းတုန်းမြို့နယ်ကို ပြန်လည်သယ်ဆောင်ခဲ့ပါပြီ" ဟု ရှာဖွေရေးအဖွဲ့ဝင် အမှတ်(၃)ရပ်ကွက်အုပ်ချုပ်ရေးမှူး ဦးမော်ကြီးက ပြောသည်။
ဇူလိုင်လ ၁၃ ရက်နေ့က နဝမတန်းကျောင်းသူ မဂျုးဂျုးဟန် ( အသက် ၁၅ နှစ်) ၏ ရုပ်အလောင်းကို ပထမဆုံး ရှာတွေ့ခဲ့ပြီး ဇူလိုင် ၁၄ ရက်၊ မွန်းလွဲ ၂ နာရီခွဲခန့်က မြေမြှုပ်သင်္ဂြိုဟ်ခဲ့သည်။
ဖြစ်စဉ်မှာ မင်းတုန်းမြို့၊ မင်းတုန်းချောင်းတွင် ဇူလိုင် ၁၂ ရက်နေ့က ကျောင်းကြိုစက်လှေတစ်စီး တိမ်းမှောက်ပြီး ကျောင်းသူ ၄ ဦး ရေထဲမျောပါပျောက်ဆုံးခဲ့ခြင်း ဖြစ်သည်။
မင်းတုန်းချောင်းရေအတွင်း မျောပါပျောက်ဆုံးခဲ့သူများမှာ မသက်မွန်ဇူလိုင်( ၁၃နှစ် ၇ တန်း) ၊ မဇွန်ပွင့်ဖြူ (၁၃ နှစ် ၇ တန်း) ၊ မဂျူးဂျူးဟန်( ၁၅ နှစ် ၉ တန်း)၊ မချစ်စုဝေ (၁၅ နှစ် ၉ တန်း)တို့ ဖြစ်သည်။
အဆိုပါ ဖြစ်စဉ်နှင့်ပတ်သက်ပြီး စက်လှေမောင်းသူ ဇာနည်အောင်ကို မင်းတုန်းမြို့မရဲစခန်းတွင် (ပ) ၁၂၆/ ၂၀၁၉ ရာဇသတ်ကြီး ၂၈၀/၃၃၇ ဖြင့် အမှုဖွင့် အရေးယူထားသည်။