ရန်ကုန်၊ ဇူလိုင် ၉ ။ ။ အခြေခံဥပဒေ ပုဒ်မ ၅၉ (စ) ကာကွယ်စောင့်ရှောက်ရေးအတွက် ဆိုသည့် ဆန္ဒပြပွဲတစ်ရပ်ကို ဇူလိုင် ၉ ရက်နေ့ မွန်းလွဲပိုင်းအချိန်က ရန်ကုန်မြို့၊ ကြေးသွန်းဘုရားအရှေ့မှ ဆူးလေပန်းခြံအရှေ့အထိ ရဟန်းသံဃာများနှင့် လူပုဂ္ဂိုလ်အချို့က ဦးဆောင်ပြုလုပ်ခဲ့ကြသည်။
" ဒီ ၅၉ (စ) သည် ကျွန်တော်တို့ နိုင်ငံတော်သမ္မတအတွက် အရည်အချင်း ဖြစ်ပါတယ်။ သူတို့ရဲ့ မိသားစုက သွေးနှောမဖြစ်တဲ့ နိုင်ငံခြားအထောက်အပံ့ ယူမထားတဲ့ မိသားစုဝင်ထဲက ဖြစ်တယ်ဆိုရင် နိုင်ငံတော်သမ္မတ အဖြစ်နဲ့ ဒါကို ကျွန်တော်တို့ ခန့်လို့မရဘူးဆိုတဲ့ ၅၉ (စ) သတ်မှတ်ချက် ဖြစ်ပါတယ်။ ဒါကြောင့် ဒီ ၅၉ (စ) သည် အလွန်အရေးကြီးတဲ့အတွက်ကြောင့် ကျွန်တော်တို့ နိုင်ငံ ၊ ကျွန်တော်တို့ လူမျိုး၊ ဘာသာ၊ သာသနာ ကျွန်တေ်ာတို့နိုင်ငံရဲ့ အချုပ်အခြာအာဏာတည်တံ့ခိုင်မြဲရေးအတွက် ဒါကို ဆန္ဒဖော်ထုတ်ခြင်းဖြစ်ပါတယ် " ဟု အမျိုးသားရေး တက်ကြွလှုပ်ရှားသူ ဦးဝင်းထွဋ်က မီဒီယာများကို ပြောသည်။
အဆိုပါ လမ်းလျှောက်ချီတက်ဆန္ဒဖော်ထုတ်မှုတွင် ပုဒ်မ ၅၉ (စ) ကာကွယ်ရေးစောင့်ရှောက်ရေး ဒို့အရေး ၊ အမျိုးဘာသာသာသနာ ကာကွယ်စောင့်ရှောက်ရေး ဒို့အရေး ၊ အမျိုးဘာသာ သာသနာ တည်တံ့ခိုင်မြဲရေး ဒို့အရေး ၊ ဗုဒ္ဓဘာသာ သာသနာတော်ကို ချီးမြှင့်ထောက်ပံ့သော အုပ်ချုပ်သူများ ပေါ်ထွက်လာရေး ဒို့အရေး စသည်တို့ကိုကြွေးကြော်ကာ လမ်းလျှောက်ခဲ့ကြသည်။
ယင်း လမ်းလျှောက်ချီတက်ဆန္ဒဖော်ထုတ်မှုကို တရားဝင် ခွင့်ပြုမိန့်တင်ကာ ဆောင်ရွက်ခဲ့ခြင်း ဖြစ်ပြီး အမျိုးသားရေး တက်ကြွလှုပ်ရှား သူများ ၊ အမျိုးသားရေးတက်ကြွသည့် ရဟန်း၊ သံဃာများ ပါဝင်ခဲ့သည်။
သမ္မတ၊ ဒုသမ္မတ ဖြစ်ခွင့်ရှိသူ၏ အရည်အချင်းကန့်သတ်ချက်များနှင့် ပတ်သက်၍ ၂၀၀၈ဖွဲ့စည်းပုံ အခြေခံ ဥပဒေ အခန်း(၃)၊ ပုဒ်မ(၅၉)(စ)တွင် “ မိမိကိုယ်တိုင်သော်လည်းကောင်း၊ မိမိ၏ မိဘတစ်ပါးပါးသော် လည်း ကောင်း၊ ဇနီး သို့မဟုတ် ခင်ပွန်း၊ သားသမီး၊ သားသမီး၏ ဇနီး/ခင်ပွန်းသည် တိုင်းတစ်ပါး၏ နိုင်ငံသား ဖြစ်သူများ မဖြစ်စေရ”ဟု ပါရှိသည်။
ဒေါ်အောင်ဆန်းစုကြည် သမ္မတဖြစ်ရန် ကန့်သတ်ထားသည်ဟု လူအများက ယုံကြည်ထားသည့် ဖွဲ့စည်းပုံ အခြေခံဥပဒေပုဒ်မ ၅၉(စ)ကို ပယ်ဖျက်ရန် မတ်လ ၁၄ ရက်နေ့က ပြုလုပ်သည့် ဖွဲ့စည်းပုံ အခြေခံဥပဒေ ပြင်ဆင်ရေးပူးပေါင်းကော်မတီအစည်းအဝေးတွင် အာဏာရ NLD ပါတီမှ အဆိုပြု တင်ပြထားခဲ့သေးသည်။
