ရန်ကုန် (Myanmar Now) ။ ။ နိုဝင်ဘာ ရွေးကောက်ပွဲအတွက် သန်း ၃ဝ ကျော် ပြည်သူတွေ မဲရုံသွားဖို့ ရက်သတ္တ ၄ ပတ်သာ လိုတော့တဲ့အချိန်မှာ ရန်ကုန်မြို့ မဲဆန္ဒနယ် အများအပြားမှာ ဝင်ပြိုင်ကြမယ့် အမတ်လောင်းတွေဟာ အဓိက အခက်အခဲကြီးနှစ်ခုနဲ့ ကြုံတွေ့နေရပါတယ်။ အဲဒါကတော့ ရွေးကောက်ပွဲကို စိတ်မဝင်စားသူတွေ မဲပေးချင်လာအောင် ဆောင်ရွက်ရေး၊ အမျိုးသား ဒီမိုကရေစီအဖွဲ့ချုပ် (NLD) ကိုသာ ဝိုင်းဝန်းထောက်ခံနေသူတွေ ကိုယ့်ဘက် ပါလာကြအောင် စည်းရုံးရေးတို့ပဲ ဖြစ်ပါတယ်။
မကြာသေးမီက ရန်ကုန်ရဲ့ မြို့နယ်သုံးခုအတွင်း တွေ့ဆုံမေးမြန်းခဲ့တဲ့ မဲဆန္ဒရှင် ၄၅ ယောက်ဟာ ရွေးကောက်ပွဲနဲ့ ပတ်သက်ပြီး အမြင်အမျိုးမျိုး ရှိတာ တွေ့ရပေမယ့် သူတို့ထဲက ထက်ဝက် ကျော်ကတော့ ဒေါ်အောင်ဆန်းစုကြည်ရဲ့ NLD ပါတီကို မဲပေးကြမယ်လို့ ဆိုကြပါတယ်။ ကျန်လူတွေထဲမှာတော့ အများစုက မဲပေးခြင်းနဲ့ ရွေးကောက်ပွဲကို စိတ်မဝင်စားဘူးလို့ မှတ်ချက်ပေးပါတယ်။ လေးဦးကတော့ ကိုယ်စားလှယ်လောင်းတွေကို လေ့လာပြီးမှ မဲသွားပေးမယ်လို့ ပြောပါတယ်။
အားလုံးနီးပါးက အာဏာရ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ၊ NLD တို့ကိုသာ အကျွမ်းတဝင် ရှိကြပြီး ကျန်တဲ့ပါတီတွေကို မသိကြပါဘူး။ ဒါကတော့ တစ်သီးပုဂ္ဂလ အမတ်လောင်းများ၊ ပါတီငယ် ကိုယ်စားပြု အမတ်လောင်းများ အားလျော့စရာ အချက်ပါပဲ။
ပါတီကြီးဖြစ်တဲ့ NLD က အမတ်လောင်း ရွေးချယ်ရာမှာ ၈၈ မျိုးဆက် ပွင့်လင်း လူ့အဖွဲ့အစည်းက ဦးကိုကိုကြီးနဲ့ လုပ်ဖော်ကိုင်ဘက် အများအပြားကို ပယ်ချခဲ့တဲ့အတွက် ပြီးခဲ့တဲ့လတွေအတွင်း ဒီမိုကရေစီ အင်အားစုတွေကြား အကြီးအကျယ် ဝေဖန်ခံရပါတယ်။ အခြားတစ်ဘက်မှာလည်း အမျိုးသားရေး ဝါဒီတွေရဲ့ လှုပ်ရှားမှု၊ ထိုးနှက်မှုတွေ ရှိနေပါတယ်။ လူဦးရေ ၇ ဒသမ ၃ သန်းရှိတဲ့ ရန်ကုန်မြို့မှာ NLD အများစု အနိုင်ရမယ်ဆိုတဲ့ လူအများရဲ့ ခန့်မှန်းချက်ကို ဒီမြို့နယ်သုံးခုမှာ တွေ့ခဲ့တဲ့ မဲဆန္ဒရှင်တွေရဲ့ ပြောကြားချက်က အတည်ပြုသလို ဖြစ်နေပါပြီ။ မြို့နယ်သုံးခုရဲ့ NLD အမတ်လောင်းများ စာရင်းထဲမှာ ဘလော်ဂါ နေဘုန်းလတ်၊ ဒေါ်ဖြူဖြူသင်း၊ ဒေါက်တာ မြတ်ဉာဏစိုး စတဲ့ ထင်ရှားသူတို့ရဲ့ နာမည်တွေကိုလည်း တွေ့ရမှာပါ။
နိုဝင်ဘာ ၈ ရွေးကောက်ပွဲနေ့ရောက်ရင် NLD အမတ်လောင်းတွေကိုပဲ မဲထည့်ဖြစ်မယ် ဆိုသူတွေထဲမှာ တခြား ရွေးချယ်စရာ ပါတီမရှိဘူးလို့ ပြောသူတချို့လည်း ရှိကြပါတယ်။
“ကိုယ့်မြို့နယ်မှာ ဘယ်သူတွေ ဝင်ပြိုင်တယ် ဆိုတာတော့ အတိအကျ မသိဘူး။ ဒါပေမယ့် ကျွန်တော်တို့ ပေးရမယ့် ပါတီကိုတော့ သိတယ်။ သူ့တံဆိပ်ကိုလည်း သိတယ်။ နှစ်ပေါင်းများစွာ နောက်ကျခဲ့တဲ့ တိုင်းပြည်ကို အပြောင်းအလဲ လုပ်ရမယ့်အချိန်ပဲ” လို့ သင်္ဃန်းကျွန်းမြို့နယ်က ကိုဇေယျာလင်းက ပြောပါတယ်။
“ပတ်ဝန်းကျင်မှာတော့ နိုင်ငံရေးကို သိပ်စိတ်မဝင်စားကြဘူးဗျ။ ကိုယ့်နီးစပ်ရာတွေကို လိုက်တော့ ပြောပြတယ်၊ ဘာဖြစ်လို့လဲဆိုတော့ လက်ရှိတိုင်းပြည်ကို အပြောင်းအလဲ လုပ်နိုင်တာ အမျိုးသား ဒီမိုကရေစီအဖွဲ့ချုပ်မို့လို့။ အဲဒီပါတီကို သိပ်ကြိုက်လား ဆိုရင်တော့ လက်ရှိအချိန်မှာ တခြား ရွေးချယ်စရာမှ မရှိတာ” လို့ သူက ပြောပါတယ်။
မင်္ဂလာတောင်ညွန့်မြို့နယ်က အမည်မဖော်လိုတဲ့ နိုင်ငံ့ဝန်ထမ်းတစ်ဦးရဲ့ ပြောကြားချက်ကလည်း အလားတူပါပဲ။
“အခု ချိန်မှာတော့ အားလုံးက ဒေါ်စု၊ ဒေါ်စုလို့ အော်နေပေမဲ့ (သူဦးဆောင်တဲ့အခါ) သူ့အောက်က လူတွေက မကောင်းရင် ဘယ်လိုလုပ်မလဲ။ လက်ရှိအစိုးရ ဦးသိန်းစိန်ကိုကြိုက်တယ်။ ဒါပေမဲ့ သူအောက်ကလူတွေ မမှန်ဘူး၊ သူ့လိုမဟုတ်ဘူး။ ဒီနှစ်ခုကို ယှဉ်ကြည့်တဲ့ သဘောပါ။ ဒေါ်စုကို ကြိုက်ပါတယ်။ နိုင်ငံရေး အပြောင်းအလဲ ဖြစ်အောင် ထုံးစံအတိုင်း NLD ကိုပဲ ထည့်ရမှာပေါ့” လို့ သူက ပြောပါတယ်။
သင်္ဃန်းကျွန်းက အနှေးယာဉ်မောင်း တစ်ဦးဖြစ်သူ ကိုရန်နောင်စိုးက နိုင်ငံရေးကို စိတ်မဝင်စား၊ သူ့နာမည် မဲစာရင်းထဲမှာ မပါရင်လည်း ဘယ်လိုမှ မခံစားရဘူးလို့ ဆိုပါတယ်။
"ကိုယ့် စားဝတ်နေရေးအတွက် ကိုယ့်ဘာသာ ရုန်းကန်နေရတာ။ ဘယ် ပါတီတက်တက် ကိုယ့်အလုပ် ကိုယ်လုပ်နေရဖို့က အရေးကြီးတာပဲ" လို့ ကိုရန်နောင်စိုးက ပြောပါတယ်။
ရွေးကောက်ပွဲမှာ မဲပေးရမယ့်သူတွေဟာ စိတ်အားထက်သန်မှု နည်းပါး လာတဲ့အကြောင်း ယုံကြည် ရသော ရွေးကောက်ပွဲများ ပေါ်ပေါက်ရေး ပြည်သူများ ပူးပေါင်း လှုပ်ရှားမှုအဖွဲ့က စက်တင်ဘာ ၂၁ ရက်နေ့မှာ သတိပေးလိုက်ပါတယ်။
ပါတီတွေ ကျော်ဖြတ်ရမယ့် တောင်ကုန်းမြင့်မြင့်
ရန်ကုန်မြို့ရဲ့ မြောက်ဘက်အစွန်က ဆင်းရဲနွမ်းပါးသူ အများအပြား နေထိုင်ကြတဲ့၊ စက်မှုဇုန် ရှိတဲ့ လှိုင်သာယာမှာ လွှတ်တော်သုံးရပ်အတွက် ကိုယ်စားလှယ်လောင်း ၅၂ ဦး ရွေးကောက်ပွဲ ဝင်ပါမယ်။ ဒီ အရေအတွက်အရ ဆိုရင် လှိုင်သာယာဟာ မြန်မာပြည်မှာ ကိုယ်စားလှယ်လောင်း အများဆုံး မဲဆန္ဒနယ်မြေ ဖြစ်ပါတယ်။ ဒီနေရာဟာ မဲစာရင်းမှားယွင်းမှု အများဆုံးရှိနေတဲ့မြို့ တွေထဲက တစ်မြို့လည်း ဖြစ်ပါတယ်။
သင်္ဃန်းကျွန်းမှာတော့ လွှတ်တော် အမျိုးမျိုးအတွက် ဝင်ပြိုင်မယ့်အမတ်လောင်း ၂၈ ဦး ရှိပြီး၊ မင်္ဂလာတောင်ညွန့်မှာ ၁၉ ဦး ရှိပါတယ်။ လူဦးရေ သိပ်သည်းမှု ထူထပ်တဲ့ ဒီနယ်မြေနှစ်ခုဟာ တခြား နယ်မြေတွေနဲ့ မတူတဲ့ အချက်တစ်ခုကတော့ မူဆလင် မဲဆန္ဒရှင် အတော်များများကို တွေ့နိုင်ခြင်းပါပဲ။
၂ဝ၁ဝ ရွေးကောက်ပွဲမှာ လှိုင်သာယာနဲ့ မင်္ဂလာတောင်ညွန့်မှာ ပြည်ခိုင်ဖြိုး နိုင်ပါတယ်။ NLD က ခွဲထွက်လာတဲ့ NDF ပါတီခေါ် အမျိုးသား ဒီမိုကရက်တစ်အင်အားစုက သင်္ဃန်းကျွန်းမြို့နယ်မှာ နိုင်ပါတယ်။ ဒါဟာ အင်အားနည်း၊ လူသိနည်းတဲ့ ပါတီတွေ ရန်ကုန်မှာ အနိုင်ရဖို့ ခက်ခဲတယ် ဆိုတာကို မီးမောင်းထိုးပြနေခြင်းပါပဲ။ တကယ်ဆိုရင် ဒီမြို့နယ်တွေဟာ မြန်မာပြည်မှာ ရွေးကောက်ပွဲနဲ့ ပတ်သက်ပြီး ပိုပြီးသိမြင်နှံ့စပ်၊ သတင်းအချက်အလက် ရယူမှု ပိုအဆင်ပြေတဲ့ ဒေသတွေထဲ ပါဝင်နေတာပါ။
ဒီသုံးမြို့နယ်အတွင်း တွေ့ဆုံ မေးမြန်းဖြစ်တဲ့သူတွေထဲမှာ NLD ကို မထောက်ခံသူ တချို့လည်း ပါပါတယ်။ သို့သော်လည်း ဘယ်ပါတီကို ထောက်ခံပါတယ်ဆိုပြီး ပွင့်ပွင့်လင်းလင်း ပြောတဲ့သူ မရှိသလောက်ပါပဲ။ သင်္ဃန်းကျွန်းမှာ ကွမ်းယာ ရောင်းသူတစ်ဦးဖြစ်တဲ့ မောင်မြင့်က ဒီရှားပါးတဲ့ သူတွေထဲက တစ်ယောက်ပါ။
“ကျွန်တော်ကတော့ အရမ်းနာမည်ကြီးနေတဲ့ ပါတီနှစ်ခုလုံးကို မဲမပေးဘူး၊ မကြိုက်လို့။ တစ်ခုကလည်း နာမည်ကြီး၊ လူအများ ကြိုက်တယ်ဆိုပေမယ့် လက်တွေ့ဘာမှ မမြင်ရတော့ အား မပေးချင်ဘူး။ နောက်တစ်ခုကလည်း ဖိနှိပ်လွန်းအားကြီးတဲ့သူတွေ စုဖွဲ့ထားတဲ့ ဟာမို့လို့ မကြိုက်ဘူး” လို့ မောင်မြင့်က ပြောပါတယ်။
“ကိုယ့်လက်ထဲကို ကိုယ်စားလှယ် နှစ်ယောက်ရဲ့ လက်ကမ်း ကြော်ငြာလေးပဲ ရသေးတယ်။ ကျန်တဲ့သူတွေ ဘယ်သူမှ မဲလာဆွယ်သေးတာ မဟုတ်ဘူး။ ကိုယ့်မြို့နယ်မှာ ဘယ်သူတွေ၊ ဘယ်ပါတီတွေ ဝင်ပြိုင်ကြမယ်ဆိုတာလည်း အတိအကျ မသိသေးဘူး”
ဘဏ္ဍာရေး အခက်အခဲရှိတဲ့ အတွက်ကြောင့် မဲဆွယ်တာတွေကို ရွေးကောက်ပွဲရက်နီးမှ လုပ်ဖြစ်မယ်လို့ စီစဉ်ထားတဲ့ ပါတီတစ်ခုကတော့ ကမန် အမျိုးသားပါတီ ဖြစ်ပါတယ်။
“ကျွန်တော်တို့ပါတီကို မေ့သွားမှာစိုးလို့ ရွေးကောက်ပွဲနီးမှ စည်းရုံရေး လုပ်တာပါ။ ပါတီကြီးတွေကတော့ လူလည်းရှိတယ်၊ ငွေလည်းရှိတယ်ဆိုတော့ လုပ်ချင်တာ လုပ်လို့ရတယ်။ အဲဒီပါတီတွေ နည်းနည်းငြိမ်မယ့် အချိန်မှာ ကိုယ့်ပါတီက စည်းရုံးရေးထလုပ်မယ်” လို့ ပါတီရဲ့ ဒုဥက္ကဋ္ဌ လှတိုးက ပြောပါတယ်။ သူကိုယ်တိုင်လည်း မင်္ဂလာတောင်ညွန့်၊ ပြည်သူ့လွှတ်တော် မဲဆန္ဒနယ်မှာ ဝင်ပြိုင်ပါမယ်။
ပတ်ဝန်းကျင်ကြောင့် NLD ကို ထောက်ခံလာသူများ
NLD ကို အကြွင်းမဲ့ ယုံကြည်ထောက်ခံသူတွေ ရှိသလို၊ ပါတီအကြောင်း မသိပေမယ့် ကိုယ့် ဝန်းကျင်မှာ ရှိသူတွေနည်းတူ လိုက်ပါထောက်ခံ သူတွေလည်း ရှိပါတယ်။
“အိမ်ကဘွဲ့ရပြီးသား အစ်ကိုဝမ်းကွဲကလည်း NLD အကြောင်း ပြောတယ်။ ကိုယ့်နား ပတ်ဝန်းကျင်ကလည်း NLD ပဲ ပြောနေကြတော့ ကိုယ်လည်း NLD ပဲ ထည့်ဖို့ဆန္ဒရှိပါတယ်။ အမြဲတမ်း ကြားနေကျဆိုတော့ စိတ်စွဲနေသလို ဖြစ်နေတာပါ” လို့ မင်္ဂလာတောင်ညွန့်မှာ မုန့့်ရောင်းတဲ့ အသက် ၅ဝ အရွယ် ဒေါ်သန်းသန်းဆွေက ရှင်းပြပါတယ်။
“ကလေး ဘဝကတည်းက ဗိုလ်ချုပ်အကြောင်းကို ကြားဖူးနေတာ၊ သူ့သမီးဆိုတော့ စိတ်ဝင်စား တာလည်း ပါတာပေါ့။ NLD ထည့်လို့ကိုယ်အတွက် ဘာပြောင်းလဲ သွားမလဲ ဆိုတာတော့ မသိပါဘူး။ တစ်နေ့လုပ်မှ တစ်နေ့စားရတဲ့ သူတွေပါ။ ဘာမှလည်း မမျှော်လင့်ပါဘူး”
ဒီသုံးမြို့နယ်အတွင်း မေးမြန်းကြည့်တဲ့အခါ မဲရုံထဲ မဲပေးပုံအဆင့်ဆင့် အကြောင်း နားမလည် သေးသူ အများအပြားရှိတာ တွေ့ရပါတယ်။ ရွေးကောက်ပွဲဆိုင်ရာ ဗဟုသုတ အကန့်အသတ် ရှိသူတွေထဲမှာ လှိုင်သာယာက မကြည်ကြည်စန်းလည်း ပါဝင်ပါတယ်။
“အရင်တစ်ခါက မဲထည့်ဖူးတယ်။ မဲထည့်ပုံ ထည့်နည်းတွေတော့ မသိသေးဘူး။ ဘာတွေ ပြောင်းလဲမယ် ဆိုတာတော့ မပြောတတ်ဘူး။ ဘာတစ်ခုမှ မသိပါဘူး။ ကိုယ်ကတော့ ခွပ်ဒေါင်းအလံ တွေ့ရင် ရင်ခုန်ပြီး ပီတီဖြစ်နေတာပဲ” လို့ ဈေးသည် တစ်ဦးဖြစ်တဲ့ မကြည်ကြည်စန်းက ပြောပါတယ်။
