ရန်ကုန်၊ ဇွန်လ ၁၉ ။ ။ တပ်မတော်မှ တရားစွဲဆိုခြင်းခံထားရသည့် ဒေါင်းတို့မျိုးဆက် သံချပ်အဖွဲ့ဝင် ၅ ဦးကို ဇွန်လ ၁၉ ရက်နေ့ မွန်းလွဲ ပိုင်းက မရမ်းကုန်းမြို့နယ် တရားရုံးတွင် ရုံးထုတ်စစ်ဆေးခဲ့ပြီး ရုံးချိန်းတွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ၏ ၇၄ နှစ်မြောက် မွေးနေ့အတွက် ဆုတောင်းမှုများ ပြုလုပ်ခဲ့သည်။
"ဒီနေ့က တရားလို ဗိုလ်မှူးကြီးသန်းထွဋ်မြင့် ကိုစစ်ပါတယ်။အစ အဆုံးပါပဲ၊ တစ်ဘက်က အရင်စစ်ပါတယ်။ တရားလို ဘက်က ဥပဒေအရာရှိ စစ်တယ်။ ဆရာမက အပြန်အလှန် မေးခွန်းမေးတယ်။ဆရာမ မေးပြီးတော့ ၁၊ ၂၊ ၄ ၊ စွပ်ဆွဲခံရသူ ကိုယ်စား မေးတယ်။ ၃ နဲ့ ၅ ကိုစွပ်ဆွဲခံရသူ ရဲ့အကျိုးဆောင်က မေးပါတယ်။ ဒီနေ့ အပြန် အလှန်မေးခွန်း အကုန်လုံးပြီးသွားပါပြီ။ နောက်ရုံးချိန်း နောက်တစ်ပတ်ကျရင် တရားလိုပြသက်သေကို စစစ်တော့မှပါ”ဟု ဒေါင်းတို့မျိုးဆက်သံချပ်အဖွဲ့ကို ရှေ့နေအဖြစ် လိုက်ပါဆောင်ရွက်ပေးသော တရားလွှတ် တော်ရှေ့နေ ဒေါ်စန်းစန်းမြင့် က ပြောသည်။
- တပ်မတော်၏ ဖိအားကြောင့် လက်ထိပ်ခတ်စစ်ဆေးခြင်းဟု ရဲက ပြောခဲ့ကြောင်း ဒေါင်းတို့မျိုးဆက်အဖွဲ့ဝင် ပြောဆို
- "အခုချိန်မှာ တပ်နဲ့ ပတ်သက်ပြီးတော့ နိုင်ငံရေးအရ ထွက်သွားဖို့ ...
- ဒေါင်းတို့မျိုးဆက်အဖွဲ့ဝင် ၅ ဦးအမှု ရုံးထုတ်စဉ် တရားခွင်ရုံးအတွင်း ရုန်းရင်းဆန်ခတ်ဖြစ်
- ဒေါင်းတို့မျိုးဆက် သံချပ်အဖွဲ့အမှု တရားလိုဘက်မှ တင်သွင်းသော သက်သေခံပစ္စည်းများကို တရားရုံး လက်ခံ
ယခုရုံးချိန်းတွင် ထူးခြားဖြစ်စဉ်အဖြစ် တရားလိုပြသက်သေ ၅ ဦး ထဲမှ တရားလိုပြသက်သေတစ်ဦး ဖြစ်သော ဗိုလ်မှူးရဲရင့်ဝင်း ဆိုသူသည် လွှတ်တော်ကိုယ်စားလှယ်တစ်ဦး ဖြစ်နေသောကြောင့် တရားလိုပြ သက်သေအဖြစ်မှ ပယ်လိုက်ကြောင်း သိရသည်။
ဒေါင်းတို့မျိုးဆက် သံချပ်အဖွဲ့ဝင် ၅ ဦး၏ ယခုရုံးချိန်းတွင် ရဲတပ်ဖွဲ့ဝင်အင်အား ၅၀ ခန့် ဖြင့် လုံခြုံရေး ရယူ ခဲ့ပြီး ရုံးချိန်းအပြီးတွင် ဒေါင်းတို့မျိုးဆက် သံချပ်အဖွဲ့ဝင် ၅ ဦး မှ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်း စုကြည်၏ မွေးနေ့အတွက် အဖြူရောင်ပိတ်စပေါ်တွင် " ၇၄ နှစ်မြောက်မွေးနေ့မှစ၍ ဒီမိုကရေစီအရေး ၊ ငြိမ်းချမ်းရေး၊ ဖွဲ့စည်းပုံပြင်ဆင်ရေးတို့ကို အပြီးသတ်အောင်မြင်စွာ လုပ်ဆောင်နိုင်ပါစေကြောင်း ဆုတောင်း ပေးအပ်ပါသည် " ဟု ရေးထိုးထားသည့် ပိတ်စကို ကိုင်ကာ မွေးနေ့ဆုတောင်းခဲ့ကြသည်။
" ဒီအမှုက တပ်ကဆွဲတဲ့အမှု ဆိုတော့ ကျွန်တော်တို့အများကြီး မမျှော်လင့်ပါဘူး။ပြစ်ဒဏ်ကလည်း ချမယ်ဆို ၂ နှစ်ပဲ ချမယ်ဆိုတော့ ဒါပေမဲ့ တရားမျှတမှုအတွက် နောက်ဆုံးခံတပ်က တရားရုံးပါ။ တရားရုံးမှာပါ တရားသူကြီးတွေ တရားမျှတမှု မရှိရင် ကျွန်တော်တို့အတွက် တရားစီရင်ရေး စနစ်က မျှတမှုက လုံးဝ ဖြစ်လာမှာ မဟုတ်ပါဘူး " ဟု ဒေါင်းမျိုးဆက်အဖွဲ့မှ ကိုပိုင်ရဲသူ က ရုံးချိန်းအပြီးတွင် ပြောဆိုခဲ့သည်။
ဒေါင်းတို့မျိုးဆက် သံချပ်အဖွဲ့ဝင် ၅ ဦး ကို ပြီးခဲ့တဲ့ ဧပြီလ အတွင်းက သံချပ်သီဆိုဖျော်ဖြေရာတွင် တပ်မတော်၏ ဂုဏ်သိက္ခာကို ထိခိုက်စေသော အသုံးအနှုန်းများ ပါဝင်သည်ဟုဆိုကာ ရန်ကုန်တိုင်းစစ်ဌာနချုပ်မှ ဒုဗိုလ်မှူးကြီး သန်းထွန်းမြင့်က ရာဇသတ်ကြီး ဥပဒေပုဒ်မ ၅၀၅(က)ဖြင့် တရားစွဲဆိုထားခြင်း ဖြစ်သည်။
အဆိုပါအမှုအတွက် ရုံးချိန်းကို ဇွန်လ ၂၆ ရက်နေ့သို့ ပြန်လည်ချိန်းဆိုခဲ့သည်။