ဇွန် ၁၉ ။ ။ ခန့်မှန်းမှောင်ခိုပေါက်စျေး ကန်ဒေါ်လာ ၁ ဘီလီယံကျော် ရှိ ကိုကင်း ၁၆ တန်ကို သိမ်းဆည်းရမိခဲ့ကြောင်း အမေရိကန် အာဏာပိုင်တို့က ဇွန်လ ၁၈ ရက်တွင် ပြောသည်။
ပင်ဆယ်ဗေးနီးယားပြည်နယ် ဖီလာဒဲလ်ဖီးယားမြို့ ဆိပ်ကမ်းတွင် ဆိုက်ကပ်ထားသော ကုန်တင်သင်္ဘောတစ်စင်းပေါ်ရှိ ကုန်သေတ္တာ ခုနစ်လုံံးထဲတွင် အဆိုပါ သမိုင်းဝင် များပြားသည့် ကိုကင်းများကို ဖမ်းမိခဲ့ခြင်း ဖြစ်သည်။
“ ဒါ အမေရိကန် သမိုင်းမှာ အကြီးဆုံးသော မူးယစ်ဆေးဝါး ဖမ်းမိမှု တစ်ခုပါ” ဟု ဖီလာဒဲလ်ဖီးယား အရှေ့ဘက် ဒေသ အမေရိကန် ရှေ့နေ ဝီလီယံ မက်ဆွိုင်းက ပြောသည်။
“ သင်္ဘော အမှုထမ်း အားလုံးကိုလည်း ဖမ်းထားလိုက်ပါပြီ၊ တရားစွဲဖို့လည်း လုပ်နေပါတယ်” ဟု ၎င်းက ဆိုသည်။
ယင်း မူးယစ်ဆေးများ တွေ့ရှိခဲ့သော ကုန်တင်သင်္ဘော MSC Gayane သည် ချီလီ၊ ပနားမား နှင့် ဘဟားမားဆိပ်ကမ်းတို့တွင် ဆိုက်ကပ်ရပ်နားခဲ့ပြီးနောက် အမေရိကန်သို့ ဆိုက်ကပ်ခဲ့ခြင်းဖြစ်ကာ ယင်းကနေတဆင့် ဥရောပသို့ ဆက်လက်ထွက်ခွာရန် အစီအစဉ် ရှိခဲ့ကြောင်း သိရသည်။
