နေပြည်တော် အောက်တိုဘာ ၇ ။           ။ စေ့စပ်ညှိနှိုင်းရေးနှင့် တည်ငြိမ်အေးချမ်းရေးပါတီဥက္ကဋ္ဌ ဦးမျိုးမင်းထွန်း(ခေါ်) ပါစီပြည်ဟိန်းက ၎င်းတို့ပါတီ၏ မူဝါဒ၊ သဘောထား၊ လုပ်ငန်စဉ်စသည် တို့ကို အောက်တိုဘာ  ၇ ရက်နေ့ ညပိုင်းက ရေဒီယိုနှင့် ရုပ်မြင်သံကြား အစီစဉ်များမှ ဟောပြော တင်ပြခဲ့ပါသည်။အဆိုပါဟောပြောတင်ပြချက် အပြည့်စုံမှာ အောက်ပါ အတိုင်းဖြစ်ပါသည်။

လေးစားအပ်ပါသော မဲဆန္ဒရှင်ပြည်သူအပေါင်းတို့ခင်ဗျာ-

မင်္ဂလာအပေါင်းနှင့် ခညောင်းပြည့်စုံကြပါစေကြောင်း ဦးစွာပထမ ဆုတောင်းမေတ္တာပို့သလိုက်ပါတယ်။

ကျွန်တော်ကတော့ စေ့စပ်ညှိနှိုင်းရေးနှင့်တည်ငြိမ်အေးချမ်းရေးပါတီမှ ပါတီဥက္ကဋ္ဌ  ဦးမျိုးမင်းထွန်း ခေါ်ပါစီပြည်ဟိန်းဖြစ်ပါတယ်။ ရန်ကုန်တိုင်းဒေသကြီး မင်္ဂလာဒုံမြို့နယ် ပြည်သူ့လွှတ်တော် ကိုယ်စားလှယ်လောင်း ဝင်ရောက်ယှဉ်ပြိုင်မှာ ဖြစ်ပါတယ်။ ကျွန်တော်တို့ပါတီဟာ ၂၀၁၅ ခုနှစ် ဇူလိုင် ၂၃ ရက်နေ့မှစ၍ဖွဲ့စည်းခဲ့တာ ဖြစ်ပါတယ်။ ကျွန်တော်တို့ပါတီဟာ မြန်မာလို စေ့စပ်ညှိနှိုင်းရေးနှင့် တည်ငြိမ်အေးချမ်းရေးပါတီဖြစ်ပြီး အင်္ဂလိပ်ဘာသာအားဖြင့် Negotiation, Stability And Peace Partyဟု ခေါ်ပါသည်။ အတိုကောက်အားဖြင့် NSPP ဖြစ်ပါသည်။ ပြည်သူလူထုတစ်ရပ်လုံး လူမှုဘဝဖွံ့ဖြိုးတိုးတက်စေရန်နှင့် လူသားအခွင့်အရေးများရရှိခံစားစေရန် လူသားထုအတွင်း မပြေလည်မှုများကိုဖြေရှင်းရန်ရည်ရွယ်၍ ကျွန်တော်တို့ပါတီကို ဖွဲ့စည်းရခြင်းဖြစ်ပါတယ်။

မဲဆန္ဒရှင်ပြည်သူအပေါင်းတို့ခင်ဗျား- ကျွန်တော်တို့ပါတီရဲ့အလံနဲ့တံဆိပ်တို့ဟာ အတူတူပဲဖြစ်ပါတယ်။ အလံသည် အနီရောင်နှင့်အစိမ်းရောင်ကို နောက်ခံထားပြီး အလယ်တွင်အပြာရောင် အဝိုင်းကြီး ပါရှိပါတယ်။ အပြာရောင်အဝိုင်းကြီးထဲ၌ အရွယ်တူကြယ်ဖြူ ၁၄ လုံးက လွတ်လပ်ရေးကျောက်တိုင်ကြီးအား ဝန်းရံထားတယ်။ အပြာရောင်အဝိုင်းကြီးထဲတွင် လူသားအချင်းချင်း လက်ဆွဲနှုတ်ဆက် နေသော ပုံသဏ္ဍာန်ပါရှိပါတယ်။

၁။ နောက်ခံအနီရောင်သည် ပြည်သူလူထုတစ်ရပ်လုံး၏ လူမှုအကျိုးစီးပွားဖွံ့ဖြိုးတိုးတက်ရေးကို ရဲရဲဝံ့ဝံ့ အစဉ်တစိုက် ကြိုးပမ်းဆောင်ရွက်ရန် ဖြစ်ပါတယ်။

၂။ နောက်ခံအစိမ်းရောင်သည် ပြည်သူလူထုတစ်ရပ်လုံး၏ လူမှုဘဝဖွံ့ဖြိုးတိုးတက်သာယာဝပြောရေးကို ရည်ညွှန်းပါတယ်။

၃။ အပြာရောင်အဝိုင်းသည် နိုင်ငံတော်ကြီးတစ်ခုလုံး တည်ငြိမ်အေးချမ်း မှုရှိစေရန် ရည်ညွှန်းပါတယ်။

၄။ အရွယ်တူ ကြယ်ဖြူ ၁၄ လုံးသည် တိုင်းဒေသကြီးနှင့်ပြည်နယ် ၁၄ ခုအခွင့်အရေးသာတူညီမျှမှုကို ရည်ညွှန်းပါတယ်။

၅။ လွတ်လပ်ရေးကျောက်တိုင်သည် တိုင်းပြည်၏အထိမ်းအမှတ်လက္ခဏာဖြစ်ပြီး အရွယ်တူကြယ်ဖြူ၁၄ လုံးက ဝန်းရံထားခြင်းသည် ဥမကွဲသိုက်မပျက် လွတ်လပ်စွာနေထိုင်ရန် ဖြစ်ပါတယ်။

၆။ လက်ဆွဲနှုတ်ဆက်နေသည့်ပုံသဏ္ဍာန်မှာ နိုင်ငံတော်အတွင်း ဖြစ်ပွားနေသည့် ပဋိပက္ခများ၊ မတူညီသောအမြင်များ အမျိုးသားရေးပြဿနာများကိုဖြေရှင်းပေးရန်ပါတီ၏ အမည်နာမအတိုင်းစေ့စပ် ညှိနှိုင်းရေးနှင့် တည်ငြိမ်အေးချမ်း ရေးတာဝန်ကို ရည်ညွှန်းပါတယ်။

မဲဆန္ဒရှင်ပြည်သူအပေါင်းတို့ခင်ဗျား-နိုင်ငံရေးဆိုသည်မှာ နိုင်ငံသားတိုင်းနှင့်သက်ဆိုင်ပြီး ကျယ်ဝန်းနက်နဲတဲ့ကိစ္စတစ်ရပ်ဖြစ်ပါတယ်။ ခက်ခဲနက်နဲပြီးရှုပ်ထွေးတဲ့သဘောလည်း ဆောင်ပါတယ်။ ထိုသို့သဘောရှိသော်လည်း မည်သူကမှ နိုင်ငံရေးကို မျက်ကွယ်ပြုလို့မရပါဘူး။ နိုင်ငံရေးရဲ့တကယ့်အနှစ်သာရကို မိမိတို့ပါတီမှပြည်သူလူထုတစ်ရပ်လုံး နားလည်သဘောပေါက်စေ ရန်ချပြရမှာပဲဖြစ်ပါ တယ်။ မိမိတို့ပါတီ၏ ကြိုးပမ်းမှုဖြင့် နိုင်ငံရေး၏စစ်မှန်သော အနက်အဓိပ္ပာယ်ကို ပြည်သူများနားလည်ပြီး နိုင်ငံ့အကျိုး၊ ပြည်သူ့အကျိုးကို တာဝန်သိမှု တာဝန်ယူမှုတို့ဖြင့် ဆောင်ကြဉ်းနိုင်မှာ ဖြစ်ပါတယ်။ လူသားတို့ဟာ မိမိတို့၏စားဝတ်နေရေးလူမှုရေးကိစ္စရပ်များကိုဖြေရှင်းရန်၊ စီမံရန်၊ အုပ်ချုပ်ရန် ကွပ်ကဲထိန်းကျောင်းရန် ပို၍ကောင်းသောနည်းစနစ်များကို ရှာဖွေလာခဲ့ကြပါတယ်။

နိုင်ငံရေးအတွေးခေါ် အယူအဆများ၊ သဘာတရားများ၊ အဖွဲ့စည်းများဖြစ်ပေါ်လာသောကြောင့် ယုံကြည်သည့်အပေါ် အခြေတည်ထားသည့် လူမှုရေးကိုအခြေပြု၍ လွတ်လပ်ခွင့် ရရှိစေရန်ဖော်ဆောင် မည့်သဘောရှိတဲ့ဝါဒပဲ ဖြစ်ပါတယ်။

မဲဆန္ဒရှင်ပြည်သူအပေါင်းတို့ခင်ဗျား- ကျွန်တော်တို့ပါတီရဲ့ခံယူချက်ကဘယ်ကိစူ္စပဲဖြစ်ဖြစ် စေ့စပ်ညှိနှိုင်းဖြေရှင်းခြင်းဟာ ဒီမိုကရေစီအစစ်အမှန် ဖြစ်ပါတယ်။ စေ့စပ်ညိနှိုင်းဖြေရှင်းခြင်းဟာ ညီမျှခြင်းဖြစ် မှရမယ်။ ညီမျှခြင်းဆိုတဲ့သင်္ချာသင်္ကေတဟာ ဘယ်ဘက်ကိုမှ အလေးသာလို့မရပါဘူး။ ကျွန်တော်တို့ပါတီ ဟာ စစ်မှန်တဲ့ရွေးကောက်ပွဲဖြင့် ပြည်သူလူထုတစ်ရပ်လုံး ယုံကြည်အားကိုး ရသောအစိုးရ တစ်ရပ်ဖြစ်အောင် ကြိုးစားရမှာဖြစ်ပါတယ်။ ပြည်ထောင်စုသမူ္မတမြန်မာနိုင်ငံတော်အစိုးရသည် ပြည်သူတစ်ရပ်လုံး၏ စားဝတ်နေရေး၊ ပညာရေး၊ စီးပွားရေးဘက်စုံ ဖွံ့ဖြိုးတိုးတက်လာစေရန် ကြိုးပမ်း သွားရမည်။

ပြည်တွင်းပြည်ပမှ အတတ်ပညာနှင့်အရင်းအနှီးများကိုဖိတ်ခေါ်ပြီး တိုင်းရင်းသားပြည်သူများပါဝင်သော စီးပွားရေးလုပ်ငန်းများကို ဖော်ဆောင်ပြီး နိုင်ငံတော်၏စီးပွားရေးတိုးတက်ခိုင်မာလာစေရန် ကြိုးပမ်းဆောင်ရွက်ရမှာဖြစ်ပါတယ်။ နိုင်ငံတော်၏ကြွယ်ဝသော သယံဇာတအရင်းအမြစ်များကို တိုင်းရင်းသားပြည်သူများမျှဝေသုံးစွဲနိုင်ရမယ်။ စိုက်ပျိုးရေးလုပ်ငန်း၊ စက်မှုလုပ်ငန်းများတွင် တိုင်းရင်းသား ပြည်သူများ အင်တိုက်အားတိုက် ပါဝင်လုပ်ကိုင်နိုင်ရမယ်။ နိုင်ငံတော်ဖွံ့ဖြိုးတိုးတက်

ရေးအတွက် အဓိကမဏ္ဍိုင်ဖြစ်သည့် ရပ်ကွက်အေးချမ်းသာယာရေးနှင့် တရားဥပဒေ စိုးမိုးရေးလုပ်ငန်းစဉ်များတွင် ပြည်သူတစ်ရပ်လုံးပါဝင်စေရမယ်။

စေ့စပ်ညှိနှိုင်းရေးနှင့် တည်ငြိမ်အေးချမ်းရေးပါတီဆိုသည့် အမည်နာမအရမိမိတို့ပါတီသည် နိုင်ငံတော်အတွင်းရှိ တိုင်းရင်းသားပြည်သူအချင်းချင်း၊ အဖွဲ့အစည်းအချင်းချင်း၊ ပြည်သူနှင့်အုပ်ချုပ်သူအစိုးရကြား မတူညီသည့်အမြင်များ၊ ပဋိပက္ခများ၊ အငြင်းပွားမှုများကို စေ့စပ်ညှိနှိုင်းဖြေရှင်းပေးခြင်းဖြင့် နိုင်ငံတော်တည်ငြိမ် အေးချမ်းမှုရှိအောင် တတ်စွမ်းသမျှကြိုးပမ်းဆောင်ရွက်ရမှာ ဖြစ်ပါတယ်။

မဲဆန္ဒရှင်ပြည်သူအပေါင်းတို့ခင်ဗျား- နိုင်ငံတော်ဟာ နှစ်ပေါင်းများစွာ နယ်ချဲ့တို့၏ ကျုးကျော်စော်ကားမှုကို ခံခဲ့ရပါတယ်။ လွတ်လပ်ရေးရပြီးသည့်နောက်ပိုင်းတွင်လည်း နိုင်ငံရေးခေါင်းဆောင်များ ယုံကြည် သည့် ဝါဒသဘောတရားများမတူညီမှုများကြောင့် တိုင်းပြည်ဖွံ့ဖြိုးတိုးတက်ခြင်းမရှိခဲ့ဘဲ နိုင်ငံတော်နှင့် ပြည်သူတို့၏ဘ၀ အဘက်ဘက်မှ နိမ့်ကျခဲ့ရပါတယ်။

ကျွန်တော်တို့ဟာတိုင်းဒေသကြီးနှင့် ပြည်နယ်ဟူ၍မခွဲခြားဘဲ တစ်တိုင်းပြည်လုံး စုပေါင်းလုပ်ဆောင်ရမှာ ဖြစ်ပါတယ်။ တိုင်းပြည်နှင့်လူထုကောင်းစားစေရန် အကောင်းဆုံးကျင့်သုံးရမည့် ကျင့်စဉ်အမှန်မှာ ဒီမိုကရေစီကျင့်စဉ်သာလျှင် ဖြစ်ပါတယ်။

ကျွန်တော်တို့ဟာ အတိတ်ကာလ နိုင်ငံရေးဝါဒများ၏ ဆိုးမွေကောင်းမွေများ ဖြစ်သည့် နိုင်ငံရေးဖြစ်စဉ်များ၊ လူ့အဖွဲ့အစည်းရှိ နိုင်ငံရေးသုခမိန်တို့၏ အတွေးအခေါ်များ၊ ဝါဒသဘောတရားများ၊ နိုင်ငံရေး သီအိုရီများကို လေ့လာသိရှိခြင်းဖြင့် မျက်မှောက်ခေတ်ကာလ နိုင်ငံရေးပြဿနာများ မိမိနိုင်ငံနှင့်ပတ်သက်သော ပြဿနာများကို ဖြေရှင်းရာတွင် သင်ခန်းစာများရယူပြီး မှန်ကန်ကောင်းမွန်တဲ့ဆုံးဖြတ်မှု၊ လုပ်ဆောင်မှုအကြံအစည်များ ရယူရန်လိုအပ်ပါတယ်။ စေ့စပ်ညှိနှိုင်းရေးနှင့် တည်ငြိမ်အေးချမ်းရေးပါတီ၏ နိုင်ငံရေးလမ်းစဉ်မှာ ဒီမိုကရေစီဝါဒပဲဖြစ်ပါတယ်။ ပါတီ၏ခံယူချက်က နိုင်ငံတော်အတွင်း လူတစ်ဦးနှင့်တစ်ဦး အဖွဲ့အစည်းအားလုံးသင့်မြတ်စွာနေထိုင်၍ တရားဥပဒေကိုလေးစားလိုက်နာပြီး နိုင်ငံတော်ဖွံ့ဖြိုးတိုးတက် အေးချမ်းသာယာရေးကို အစဉ်အမြဲဦးထိပ်ပန်ဆင်ရမှာ ဖြစ်ပါတယ်။

မဲဆန္ဒရှင် ပြည်သူအပေါင်းတို့ခင်ဗျား-

မိမိတို့ပါတီသည် တိုင်းရင်းသား လူမျိုးစုအားလုံး၏ မတူကွဲပြားသော ယဉ်ကျေးမှု၊ ပညာရေး၊ လူမှုရေး၊ ဘာသာစာပေ၊ ကိုးကွယ်ယုံကြည်မှုတို့ကို ကာကွယ်စောင့်ရှောက် ရမှာဖြစ်ပါတယ်။ တိုင်းရင်းသားပြည်သူများ၏ ပညာရေး၊ ကျန်းမာရေး၊ လူမှုရေး၊ ဖွံ့ဖြိုးတိုးတက်အောင်ကြိုးပမ်းဆောင်ရွက်ရမှာ ဖြစ်ပါတယ်။ လူမှုရေးအမြင်ဆိုသည်မှာ အဖွဲ့အစည်းတစ်ရပ်ပင်ဖြစ်စေ၊ လူ့သမိုင်းတွင်ဖြစ်စေ၊ လူသားတို့၏စွမ်းပကားဖြင့် ဖော်ဆောင်ခဲ့ကြသော ကိုးကွယ်သည့် ဘာသာတရား၊ စာပေစကား၊ သုခုမအနုပညာများ၊ ဓလေ့ထုံးတမ်းများကို လေ့လာ သုံးသပ်၍ တိုင်းရင်းသား လူမျိုးစုတစ်စုချင်း၏တိုးတက် လာသောခေတ်နှင့်အညီ လူမျိုးဂုဏ်၊ ဇာတိဂုဏ်မြင့်မားရေး၊ ယဉ်ကျေးမှု အမွေအနှစ်များ ထိန်းသိမ်းစောင့်ရှောက်ရေးနှင့် လူမျိုးစုများမပပျောက်ရေးကို ဆက်လက်ထိန်းသိမ်းဆောင်ရွက်ရန် ဖြစ်ပါတယ်။

မဲဆန္ဒရှင်ပြည်သူအပေါင်းတို့ခင်ဗျား- တိုင်းပြည်ဖွံ့ဖြိုးတိုးတက်ခြင်း၏ အဓိကပြယုဂ်မှာ တိုင်းပြည်၏ စီးပွားရေးခိုင်မာတောင့်တင်းမှုဖြစ်ပါတယ်။ ကျွန်တော်တို့နိုင်ငံဟာ မြေလွတ်မြေရိုင်းလယ်ယာမြေများ အလွန်ပေါများသောကြောင့် လက်မှု လယ်ယာမှစက်မှုလယ်ယာသို့ တစ်နိုင်ငံလုံးအဆင့်မြှင့်တင်ပြီး စိုက်ပျိုးရေးကဏ္ဍကို အားသွန်ခွန်စိုက်ဆောင်ရွက်ရမှာဖြစ်ပါတယ်။

ပြည်တွင်းပြည်ပမှ အတတ်ပညာနှင့် အရင်းနှီးများကို ဖိတ်ခေါ်၍ ပြည်တွင်းရှိ သယံဇာတများနှင့်ကုန်ကြမ်းများကို ကုန်ချောအဖြစ်ထုတ်လုပ်၍ ပြည်ပနိုင်ငံများသို့ တင်ပို့ရောင်းချနိုင်သည့် စီးပွားရေးမျိုးအဓိက ထားလုပ်ဆောင်နိုင်ရန်ကြိုးပမ်းရမှာဖြစ်ပါတယ်။ သဘာဝနယ်မြေများ သမိုင်းဝင်နယ်မြေများကို ဆွဲဆောင်မှုရှိအောင်၊ စီမံ၍ ကမ္ဘာ့ခရီးသွားများဝင်လာအောင် ခရီးသွားလုပ်ငန်းကို အဆင့်မြှင့်တင်ဆောင် ရွက်ရမှာ ဖြစ်ပါတယ်။

စီးပွားရေးလုပ်ငန်းများကို တိုင်းရင်းသားလုပ်ငန်းရှင်များ လုပ်ကိုင်နိုင်အောင်စီမံပေးခြင်းဖြင့် ပုဂ္ဂလိကလုပ်ငန်းရှင်များ ပေါ်ထွန်းလာစေရန် လုပ်ဆောင်ပေးရမှာဖြစ်ပါတယ်။ နိုင်ငံခြားရင်းနှီးမြှုပ်နှံသူများကို အနှောင့်အယှက်အဟန့်အတားဖြစ်စေသည့် မြေယာတန်ဖိုးကြီးထွားနေခြင်းကို နိုင်ငံတော်မှဥပဒေများ ပြဋ္ဌာန်း၍ ကာကွယ်ပေးရမယ်။

မဲဆန္ဒရှင် ပြည်သူအပေါင်းတို့ခင်ဗျား- နိုင်ငံတော်ဖွံ့ဖြိုးတိုးတက်စေရန် အခြေခံအကျဆုံးသည် ပညာရေးကဏ္ဍပဲဖြစ်ပါတယ်။ နိုင်ငံတကာအဆင့်မီပညာရေးအတွက် ပညာရေးကဏ္ဍတွင် ကြီးမားစွာမြှုပ်နှံ ရမည်။ ဆရာ၊ ဆရာမများကို အရည်အသွေးကောင်းမွန်အောင် လေ့ကျင့်ပျိုးထောင်ပေးရမှာ ဖြစ်ပါတယ်။ နိုင်ငံတော်၏ ပညာရေးစနစ်အခြေအနေနှင့် တိုးတက်သည့် နိုင်ငံများ၏ပညာရေးစနစ် အခြေအနေ များကို စဉ်ဆက်မပြတ်လေ့လာနှိုင်းယှဉ်ရမည်။

တစ်နိုင်ငံလုံးရှိ ကလေးသူငယ်များနှင့်စာမတတ်သူသူများအား စာတတ်မြောက်လာအောင် ဆောင်ရွက်ပေးရမည်။ ပညာသင်အရွယ်ဖြစ်သည့် ကလေးသူငယ်အားလုံး ကျောင်းစာ သင်ခန်းမများသိုရောက် ရှိစေရမည်။ ပညာမသင်ဘဲ လုပ်ငန်းခွင်၌ အဓမ္မခိုင်းစေခြင်းခံရသော ကလေးသူငယ်များအား ရရှာဖွေဖော်ထုတ်၍ စာသင်ခန်းမများသို့ ပြန်လည်ပို့ဆောင်ပေးရမည်။ ကလေးသူငယ်များအား စိတ်ပိုင်းဆိုင် ရာ၊ ရုပ်ပိုင်းဆိုင်ရာ လိင်အနိုင်ကျင့်မှုများ မဖြစ်ပေါ်စေရေးအတွက် မိမိတို့ပါတီမှ အထူးအလေးထားပြီး ဆောင်ရွက်သွားမှာ ဖြစ်ပါတယ်။

မဲဆန္ဒရှင်ပြည်သူအပေါင်းတို့ခင်ဗျား-

အခြေခံ ကျန်းမာရေး စောင့်ရှောက်မှုများကို နိုင်ငံတော်နှင့် ပုဂ္ဂလိကလုပ်ငန်းရှင်တို့မှ ဝိုင်းဝန်းလုပ်ကိုင်စေပြီး သက်သာသောနှုန်းထားများဖြင့် ဝန်ဆောင်မှုပေးနိုင်ရန် ဆောင်ရွက်ရမှာဖြစ်ပါတယ်။ ကျန်းမာရေးအတွက် ကိုယ်လက်လှုပ်ရှားအားကစားများကို လူထုလှုပ်ရှားမှုအသွင်ဖြင့် ဆောင်ရွက်နိုင်စေရမည်။ ဆေးလိပ်နှင့်အရက်အလွန် အကျွံသောက်သုံးခြင်းများကို တားမြစ်နိုင်စေရမည်။ ကျန်းမာရေးအတွက် ပညာပေးသရုပ်ပြခြင်းများကို တစ်နိုင်ငံလုံးအတိုင်းအတာဖြင့် စီမံဆောင်ရွက်ပေးရမည်။

မဲဆန္ဒရှင်ပြည်သူအပေါင်းတို့ခင်ဗျား- နိုင်ငံတော်သည် စိုက်ပျိုးရေးနိုင်ငံဖြစ်သည့်အလျောက် လယ်သမားများသည် တိုင်းပြည်၏ အရေးကြီးသောအခန်းကဏ္ဍ၌ရှိနေပြီး လယ်သမားများအတွက် လယ်ယာမြေ လုပ်ပိုင်ခွင့်များကိုသားစဉ်မြေးဆက် လုပ်ကိုင်ဆောင်ရွက်နိုင်စေရန် စီစဉ်ပေးရမှာဖြစ်ပါတယ်။လယ်သမားများ သားစဉ်မြေးဆက်လယ်ယာလုပ်ငန်းကို တစိုက်မတ်မတ်လုပ်ကိုင်နိုင်စေ ရန်အတွက်နိုင်ငံတော် မှအားပေးကူညီဆောင်ရွက်ပေးရမည်။ စားနပ်ရိက္ခာသည် လူသားတို့အတွက် အရေးကြီးသဖြင့် လယ်မြေများပေါ်တွင် မြို့ရွာများချဲ့ထွင်လာမှုကို ဥပဒေများပြဋ္ဌာန်း၍တားဆီးရမည်။

လယ်သမားများ လိုအပ်သည့် စက်ပစ္စည်းယန္တရားများ၊ ငွေကြေးများကိုထောက်ပံ့ပေးနိုင်ရမည်။ လက်မှုလယ်ယာမှစက်မှုလယ်ယာသို့ ရာနှုန်းပြည့်ပြောင်းလဲနိုင်ရမည်။ စီးပွားရေးတွင် ဆန်စပါးကို အဓိက ပို့ကုန်အဖြစ်ထားရှိပြီးအခြားသီးနှံများကိုလည်း ဖြစ်ထွန်းအောင်မြင်စေရမည်။ အလုပ်သမားများ လုပ်ငန်းခွင်အန္တရာယ်ကင်းရှင်းစွာ လုပ်ကိုင်နိုင်ရေးနှင့် သတ်မှတ်လုပ်အားခ များပြည့်ဝစွာ ရရှိရေးဆောင်ရွက်ပေးနိုင်ရမည်။ အလုပ်သမားထု၏ စားဝတ်နေရေးသက်သာချောင်ချိရေးကို စီမံဆောင်ရွက်ပေးရမှာ ဖြစ်ပါတယ်။

မဲဆန္ဒရှင်ပြည်သူအပေါင်းတို့ခင်ဗျား- နိုင်ငံတော်၏ အချုပ်အခြာအာဏာနှင့်ပိုင်နက်နယ်မြေတည့်တံ့မှုသည် တပ်မတော်၏အဓိကတာဝန်ဖြစ်သည်။ တပ်မတော်အင်အားရှိမှ တိုင်းပြည်အင်အား ရှိမှာဖြစ် တယ်။ ထို့အတွက်ကြောင့် တပ်မတော်ကို ခေတ်မီစေရမယ်။ ခေတ်မီလက်နက်ဆန်းများ တပ်ဆင်ပေးရမှာဖြစ်တယ်။ ကြည်းတပ်၊ ရေတပ်၊ လေတပ်တို့အတွက် သက်ဆိုင်ရာလက်နက်များ တပ်ဆင်ပေး ရမယ်။ နိုင်ငံတကာစစ်ရေးအမြင်ရှိစေရန် တပ်မတော်သားများကို ပြည်ပ နိုင်ငံများသို့ စေလွှတ်ပေးရပါမယ်။

ပြည်ပနိုင်ငံများ၏ စစ်တပ်များနှင့် ပူးတွဲစစ်ရေးလေ့ကျင့်မှုများ အခါအားလျော်စွာ ပြုလုပ်ပေးရပါမည်။ နိုင်ငံတော်ကို ကာကွယ်စောင့်ရှောက်ရန်အရွယ်ရောက်သူတိုင်း စစ်ပညာသင်ကြားစေပြီး လိုအပ်လျှင် စစ်မှုထမ်းရမည်။ ပြည်တွင်းလုံခြုံရေးအတွက် အဓိကအင်အားစုမှာ တပ်မတော်ဖြစ်ပြီး ဒုတိယ အင်အားစုဖြစ်သော မြန်မာနိုင်ငံရဲတပ်ဖွဲ့အား လက်ရှိအင်အားထက် ငါးဆတိုးချဲ့ပြီး အင်အားတောင့်တင်း ခိုင်မာစေရန် စီမံဆောင်ရွက်ရပါမည်။

မဲဆန္ဒရှင်ပြည်သူအပေါင်းတို့ခင်ဗျား-

ယနေ့ မြန်မာ့နိုင်ငံရေးအခင်းအကျင်းသည် တစ်ဦးကောင်းတစ်ယောက်ကောင်းလုပ်လို့မရပါ။ နိုင်ငံရေးအင်အားစုအားလုံး၊ အဖွဲ့အစည်းအားလုံး ပြည်သူအားလုံး ပူးပေါင်းပါဝင်ဆောင်ရွက်ရမှာဖြစ်ပါ တယ်။ စေ့စပ်ညှိနှိုင်းဖြေရှင်းရေးသည် ညီမျှခြင်းမဖြစ်ဘူးဆိုရင် ငြိမ်းချမ်းရေးလုပ်ငန်းစဉ်များတွင်လည်း ရေရှည်တည်တံ့သော ငြိမ်းချမ်းရေးလုပ်ငန်းစဉ် များမဖြစ်နိုင်ပါ။ တိုင်းပြည်ဟာ နိုင်ငံရေးခရီးလမ်းမှာ ကြမ်းတမ်းစွာမောင်းနှင်နေရဆဲဖြစ်ပါတယ်။ လက်နက်ကိုင်များ၊ လူမျိုးစုများ၊ ပြည်တွင်းအင်အားစုများနိုင်ငံရေးပါတီများအကြားရှိ သဘောထားကွဲလွဲမှုများ အမြင်မတူမှုများ၊ အားပြိုင်မှုများ ပြင်းထန်နေဆဲဖြစ် ပါတယ်။ တိုင်းပြည်ဟာ ရှေ့ကိုမရောက်နိုင်ဘူးဖြစ်နေပါတယ်။အုပ်စုများအကြား အငြိုးအတေးတွေ နာကြည်းမုန်းတီးမှုတွေကို အဆုံးသတ်ပြီးAll Inclusive  အားလုံးပါဝင်သော တိုင်းပြုပြည်ပြုလူထု အကျိုးပြုလုပ်ငန်းများကို လုပ်မှရတော့မယ်။

အင်အားစုအားလုံး မတူတာတွေဖယ်ရှားပြီး တူတာတွေကို လုပ်ရတော့မယ်။၂၀၁၅ ခုနှစ် ရွေးကောက်ပွဲဟာ သည်းထိတ်ရင်ဖိုဇာတ်လမ်း တစ်ခုဖြစ်ပါတယ်။ဘယ်သူပဲနိုင်နိုင် ဘယ်သူပဲရှုံးရှုံး နိုင်သူရှုံးသူ အားလုံးပြုံပြီး တိုင်းပြည်အတွက် ကောင်းအောင်လုပ်မှဖြစ်တော့မယ်။

ဒီနေရာမှာပဲ ကျွန်တော့်ရဲ့ဟောပြောမှုကို နိဂုံးချုပ်လိုက်ပါတယ်။ မဲဆန္ဒရှင် ပြည်သူအပေါင်း ကိုယ်စွတ်နှစ်ဖြာ ကျန်းမာချမ်းသာကြပါစေ။

စေ့စပ်ညှိနှိုင်းရေးနှင့် တည်ငြိမ်အေးချမ်းရေးပါတီ

၁။	ပါတီအမည်	-	စေ့စပ်ညှိနှိုင်းရေးနှင့် တည်ငြိမ်အေးချမ်းရေးပါတီ
၂။	ပါတီအမည်(English)	-	Negotiation, Stability and Peace Party (NSPP)
၃။	ပါတီတည်ထောင် ခွင့်လျှောက်ထားသည့်နေ့	-	၈.၄.၂၀၁၅
၄။	လာရောက်လျှောက်ထားစဉ်ပါတီအင်အား	-	ဦးမျိုးမင်းထွန်း(ခ)ပါစီပြည်ဟိန်းပါ(၁၆) ဦး
၅။	လာရောက်လျှောက်ထားစဉ်ခေါင်းဆောင်နှင့် ဒုတိယခေါင်းဆောင်	-	ဦးမျိုးမင်းထွန်း(ခ)ပါစီပြည်ဟိန်း၊ ဦးဇော်ဝင်း
၆။	ပါတီတည်ထောင်ခွင့်ပြု့သည့်နေ့	-	၂၃.၆.၂၀၁၅
၇။	ပါတီမှတ်ပုံတင်ခွင့်လျှောက်ထားသည့်နေ့	-	၁.၇.၂၀၁၅
၈။	ပါတီမှတ်ပုံတင်ခွင့်ပြုသသည့်နေ့	-	၂၃.၇.၂၀၁၅
၉။	ခွင့်ပြုသည့်ပါတီအမှတ်စဉ်	-	အမှတ်စဉ်(၉၈)
၁၀။	ခွင့်ပြု့သည့်ပါတိအလံ	-
၁၁။	ခွင့်ပြု့သည့် ပါတီတံဆိပ်	-
၁၂။	ပါတီဥက္ကဋ္ဌ နှင့်ဗဟိုအလုပ်အမှုဆောင်စာရင်း	-
၁၃။	ပါတီနယ်မြေ	-	ပြည်ထောင်စုတစ်ဝန်းလုံး
၁၄။	ပါတီ ရုံးချုပ်တည်နေရာ	-	အမှတ်(၄/၃၆၁)၊ ကာယ (၁၂) လမ်း၊သင်္ဃန်းကျွန်းကြီး၊ မင်္ဂလာဒုံမြို့နယ်၊ ရန်ကုန်တိုင်းဒေသကြီး
၁၅။	ဆက်သွယ်ရန် ဖုန်း နှင့် ဖက်စ်	-	၀၉-၄၅၀၅၄၃၀၆၁ (ဦးမောင်မောင်စော)၊ ၀၉-၈၅၀၀၅၅၁ (ဦးဇော်ဝင်းထွန်း)
၁၆။	ပါတီ၏ မူဝါဒလမ်းစဉ်များ	-	PDFDownload