ရေးသားသူ Ye Myo Myat
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win.
ကျန်းမာရေးဆိုတာ လူသားတိုင်းရဲ့ နေ့စဉ် ဘဝအတွက် အလွန်အရေးကြီးပါတယ်။ တစ်အိမ်သားလုံးရဲ့ စားသောက်နေထိုင်မှုကို တာဝန်ယူထားရတဲ့ အိမ်ထောင်ရှင် အမျိုးသမီးတွေအတွက်ဆိုရင် ပိုပြီးတောင် ခေါင်းစားရပါတယ်။
နေ့တိုင်း ဟင်းတွေ မရိုးရလေအောင် ဘာတွေချက်ပြုတ်ရမလဲ။ စျေးသွားတဲ့အခါ ဘာတွေ ဝယ်သင့်လဲ။ ကိုယ်ချက်လိုက်တဲ့ အစားအစာက ကိုယ့်မိသားစုအတွက် ကျန်းမာရေးနဲ့ ညီညွတ်ပါ့မလား။ အာဟာရရှိတဲ့ အစားအစာ ချက်ပြုတ်ဖို့ ဘယ်လိုရွေးချယ်ပြင်ဆင်ကြမလဲ။ ဒီမေးခွန်းတွေဟာ အိမ်မှုကိစ္စအဝဝကို တာဝန်ယူနေရတဲ့ အိမ်ထောင်ရှင် မမတွေနဲ့ မေမေတွေ မကြာခဏ မေးတတ်ကြတဲ့ မေးခွန်းတွေပဲ ဖြစ်ပါတယ်။
အစားအစာကို ပြင်ဆင်ချက်ပြုတ်တာဟာ ပေါ့သေးသေး အလုပ်တစ်ခုုတော့ မဟုတ်ပါဘူး။ ကျွန်တော်တို့ လူ့ခန္ဓာကိုယ်က နေ့စဉ် လိုအပ်တဲ့ အာဟာရဓာတ်တွေ၊ အလုပ်လုပ်နိုင်စေဖို့ ခွန်အားဖြစ်စေတဲ့ အရာတွေ၊ ကျန်းမာအသက်ရှည်စေဖို့ ဗီတာမင်နဲ့ သတ္တုဓာတ်တွေကို နေ့စဉ် စားသုံးနေတဲ့ အစားအစာကနေ အဓိက ရရှိပါတယ်။
ဒီနေ့ ပြောပြပေးမယ့် အကြောင်းအရာကတော့ ကိုယ့်ရဲ့ မိသားစုအတွက် အရသာလည်းရှိပြီး အာဟာရလည်း ဖြစ်စေဖို့ ချက်ပြုတ်နေတဲ့ အိမ်ထောင်ရှင် အမျိုးသမီးတွေ သိထားသင့်တဲ့ ဆောင်ရန်၊ ရှောင်ရန်အချက်လေးတွေပဲ ဖြစ်ပါတယ်။
၁။ တစ်ပတ်စာ ဘာချက်ရမလဲဆိုတာကို အစီအစဉ်ချမှတ်ထားပါ။
လူတစ်ယောက် နေ့စဉ်လိုအပ်တဲ့ ဗီတာမင်နဲ့ သတ္တုဓာတ်တွေကို အသား၊ ငါး၊ ဟင်းသီးဟင်းရွက်၊ ဥ၊ ပဲအမျိုးမျိုး၊ အစေ့အဆန်၊ သစ်သီးဝလံ၊ နို့ထွက်ပစ္စည်း စတဲ့ အစာအာဟာရတွေကနေ ရနိုင်ပါတယ်။
မနက်စာကို ပေါ့ပေါ့ပါးပါးနဲ့ အာဟာရဖြစ်စေမယ်၊ အလွယ်တကူ ချက်ပြုတ်လို့ ရမယ့် ဟင်းလေးတွေ ရွေးချက်လိုက်မယ်။ နေ့လည်စာကို အရသာလေးပင်ပြီး လျှာပေါ်စွဲကျန်စေလောက်မယ့် ဟင်းတွေ ချက်မယ်။ ညနေ အလုပ်၊ ကျောင်းကနေ ပြန်လာလို့ ပင်ပန်းပြီး အားအင်ကုန်ခမ်းနေတဲ့ အိမ်သားတွေအတွက် အားအင်ဖြစ်စေမယ့် အသားဓာတ်များတဲ့ ဟင်းလျာတွေ အဓိကထားပြီး ချက်ပြုတ်မယ်။ သရေစာအနေနဲ့ အရသာရှိတဲ့ သစ်သီးဝလံမျိုးစုံကို လှီးစိတ်ပြီး ကျွေးမယ်။ ပိတ်ရက်တွေမှာ အာဟာရဖြစ်စေတဲ့ မုန့်တွေကို မိသားစုဝင်တွေ အတူတကွ လုပ်စားကြမယ်။
ဒါကြောင့် ကိုယ်ဘယ်နေ့မှာ ဘာဟင်းချက်မလဲ၊ ကိုယ့်မိသားစုဝင်တွေ ဘာကြိုက်တတ်လဲ အစရှိသဖြင့် တစ်ပတ်စာ ဟင်းချက်ဖို့ အစီအစဉ် ကြိုဆွဲထားမယ်ဆိုရင် အိမ်ထောင်ရှင်မတွေအတွက် သက်သာစေသလို စျေးသွားပြီး ဝယ်ယူဖို့လည်း ပိုလွယ်ကူသွားနိုင်ပါတယ်။
၂။ ဟင်းသီးဟင်းရွက်နဲ့ သစ်သီးဝလံတွေကို ပိုကျွေးပါ။
ကျန်းမာရေးကို အလေးအနက်ထားတဲ့ မိသားစုတိုင်းအတွက် နေ့စဉ်အာဟာရမှာ ဟင်းသီးဟင်းရွက်နဲ့ အသီးအနှံတွေကို မေ့ထားလို့ မဖြစ်ပါဘူး။ ဗီတာမင်နဲ့ သတ္တုဓာတ်များစွာ ပါဝင်ပြီး ကိုယ်တွင်းအင်္ဂါတွေကို ကောင်းစွာ အလုပ်လုပ်ဖို့ ကူညီပေးတယ်။ ကိုယ်ခံအားစနစ်ကို မြှင့်တင်ပေးလို့ ရောဂါတွေကို အလွယ်တကူ မဖြစ်စေဖို့ ကာကွယ်ပေးတယ်။ ကျန်းမာလှပပြီ အသက်ရှည်စေတယ်။ အစာကြေလွယ်စေပြီး မကြာခဏ အစာစားချင်စိတ်ကို မဖြစ်စေလို့ အဝမလွန်အောင်လည်း ထိန်းပေးနိုင်ပါတယ်။
ဟင်းသီးဟင်းရွက်မကြိုက်တဲ့ မိသားစုဝင်တွေအတွက် အသားတစ်မျိုးမျိုးနဲ့ ရောပြီး ချက်ပြုတ်လို့ ရသလို သစ်သီးဝလံတွေကိုလည်း သေချာလှီးစိတ်ပြီးဖြစ်စေ၊ ဖျော်ရည်အနေနဲ့ ကြိတ်ပြီး သောက်လို့လည်း အဆင်ပြေပါတယ်။
၃။ အသားဓာတ်ကိုလည်း မေ့ထားလို့ မဖြစ်ပါဘူး။
ကြီးထွားဖွံ့ဖြိုးနေဆဲအရွယ်ဖြစ်တဲ့ ကလေးတွေနဲ့ ဆယ်ကျော်သက်အရွယ်တွေ၊ အမြဲရုန်းကန်လှုပ်ရှားနေရတဲ့ အမျိုးသားတွေအတွက် ပရိုတင်းလို့ ခေါ်တဲ့ အသားဓာတ်ဟာ မရှိမဖြစ် အရေးပါတဲ့ အာဟာရဓာတ်ဖြစ်ပါတယ်။ ဒါပေမယ့် အမြဲ အသားချည်းပဲ ကျွေးတာထက် ဟင်းသီးဟင်းရွက်နဲ့ ရောပြီး ချက်ပြုတ်တာ၊ အာဟာရပိုရှိတဲ့ ကြက်သား၊ ငါး၊ ပင်လယ်စာတွေ၊ ပရိုတင်းဓာတ်အပြင် တခြားသော ဗီတာမင်တွေပါဝင်တဲ့ ပဲအမျိုးမျိုးနဲ့ ချက်ပြုတ်ပေးနိုင်ရင် ပိုကောင်းပါတယ်။
၄။ ပမာဏ နည်းနည်းစီကျွေးပါ။
တစ်ပြိုင်တည်း အများကြီးကျွေးတာထက် ပမာဏနည်းနည်းနဲ့ အကြိမ်ရေ များများ ကျွေးပေးတာဟာ ကိုယ်ခန္ဓာအတွက်လည်း အာဟာရဓာတ်တွေ စုပ်ယူရတာ ပိုလွယ်ကူစေသလို အဝလွန်တာ မဖြစ်စေဖို့လည်း ကာကွယ်ပေးနိုင်ပါတယ်။ ချက်တဲ့ ဟင်းလျာကို ရိုးပြီး အီသွားတာမျိုးလည်း မဖြစ်စေလို့ အိမ်ထောင်ရှင်မတွေအတွက် အလွန်သင့်လျော်ပါတယ်။
ပြင်ဆင်ချက်ပြုတ်ရမှာလည်း ဟင်းအမယ် တစ်မျိုးတည်း ချက်တာထက် အစာအာဟာရစုံလင်စေဖို့ မျိုးစုံချက်ပေးပါ။ အသားဟင်းတစ်ခွက်၊ အရွက်ဟင်းတစ်ခွက်၊ ဟင်းရည်တစ်ခွက်၊ အစာစားပြီး အချိုတည်းဖို့ သစ်သီးပန်းကန် ပြင်ဆင်ပေးနိုင်ရင် ပိုလို့ ပြည့်စုံသွားမှာပါ။
၅။ ကျန်းမာရေးနဲ့ ညီညွတ်တဲ့ အဆီတွေ ထည့်သွင်းချက်ပြုတ်ပါ။
ဆီတိုင်းကတော့ ကျန်းမာရေးနဲ့ မညီညွတ်စေတာ မဟုတ်ပါဘူး။ အစားအစာကို ပြင်ဆင်ချက်ပြုတ်ရာမှာ မပြည့်ဝဆီဖြစ်တဲ့ သံလွင်ဆီ၊ နှမ်းဆီ၊ ပဲဆီ၊ ဟင်းသီးဟင်းရွက်ဆီတွေကို အဓိက သုံးစွဲပေးပါ။ ငါးနဲ့ ပင်လယ်စာကနေ ရနိုင်တဲ့ Omega-3 ငါးကြီးဆီ၊ ထောပတ်သီး အဆီအနှစ်တွေဟာလည်း ကျန်းမာရေးအတွက် အထူးကောင်းမွန်တဲ့အပြင် ဦးနှောက်နဲ့ ဉာဏ်ရည်ကိုပါ ဖွံ့ဖြိုးထက်မြက်စေပါတယ်။ ပြည့်ဝဆီဖြစ်တဲ့ စားအုန်းဆီကိုတော့ ရှောင်ပေးနိုင်ရင် အကောင်းဆုံးပါပဲ။
၆။ ဆားနဲ့ သကြားစားသုံးမှုကို ကန့်သတ်ထားပါ။
လူတွေရဲ့ ကျန်းမာရေးကို ခြိမ်းခြောက်နေတဲ့ အရာတွေထဲမှာ အဝလွန်တာလည်း တစ်ခုအပါအဝင်ပါပဲ။ အချို၊ အငန် စားတာများလာရင် ကိုယ်အလေးချိန်တက်ပြီး အဝလွန်လာမယ်။ နောက်ဆက်တွဲအနေနဲ့ ဆီးချို၊ သွေးတိုး၊ ကျောက်ကပ်နဲ့ နှလုံးရောဂါ၊ ကင်ဆာရောဂါအစရှိတဲ့ ကျန်းမာရေးပြဿနာတွေ ဖြစ်လာနိုင်ပါတယ်။ ဒါကြောင့် ဆား၊ သကြားအပြင် အချိုမှုန့်တွေကို အလွန်အကျွံမထည့်မိစေဖို့ သတိထားပါ။
၇။ အိမ်မှာပဲ ချက်ပြုတ်စားပါ။
အပြင်ကနေ အလွယ်တကူ ဝယ်စားတာထက် အိမ်မှာပဲ အာဟာရရှိရှိ၊ ပူနွေးလတ်ဆတ်စွာ ချက်ပြုတ်တာဟာ ကိုယ့်မိသားစုဝင်တွေအတွက် ပိုပြီး ကျန်းမာစေသလို အိမ်လက်ရာခံတွင်းမြိန်စေဖို့ အလေ့အကျင့်လုပ်ပေးတာနဲ့ အတူတူပါပဲ။ ပိတ်ရက်တွေမှာဆိုရင်လည်း မိသားစုလိုက် ပျော်ပျော်ပါးပါး ဟင်းချက်တာ၊ မုန့်အတူလုပ်စားတာဟာ ပျော်ဖို့ ကောင်းသလို မိသားစုဝင်တွေကြား သံယောဇဉ်ကို တိုးစေနိုင်ပါတယ်။
