ရန်ကုန်၊ ဧပြီ ၅ ။ ။ ယမန်နေ့ ဧပြီ ၃ ရက်က ရခိုင်ပြည်နယ် ဘူးသီးတောင်မြို့နယ် ဝါးခုတ်ချောင်းကျေးရွာအနီးတွင် AA နှင့် တပ်မတော်တို့ တိုက်ပွဲဖြစ်ပွားရာ အနီးနားကျေးရွာများမှ ဘင်္ဂါလီရွာသား ၆ ဦး သေဆုံးခဲ့သည်ဟု တပ်မတော် ဘက်မှ ထုတ်ပြန်ထားသည်။
ဝါးခုတ်ချောင်းကျေးရွာ၏ အရှေ့ဘက် စိုင်းဒင်ချောင်းတစ်ဝိုက်ရက္ခိုင့်တပ် AA အင်အား ၁၅၀ ခန့်ကို တပ်မတော် စစ်ကြောင်းက သွားရောက်ရှင်းလင်းခဲ့သည်ဟု သိရသည်။
စိုင်းဒင်ချောင်းအနီး ဖြစ်ပွားသောတိုက်ပွဲတွင် အနီးနားရှိ သရက်ပြင်၊ ဒဖြူချောင်း၊ ကင်းတောင်၊ ထိပ်တူးပေါက် နှင့် ဖုန်ညိုလိပ်ကျေးရွာများမှ ဘင်္ဂါလီရွာသား ၆ ဦး သေဆုံးခဲ့ပြီး ၉ ဦး ဒဏ်ရာရခဲ့သည်ဟု တပ်ဘက်မှ ထုတ်ပြန်ထားသည်။
အဆိုပါနေ့ ညပိုင်းတွင် ဘူးသီးတောင် မြို့နယ် ဖုန်ညိုလိပ်ကျေးရွာအနီးရှိ နယ်မြေခံတပ်ဌာနချုပ်အား AA မှ လာရောက် တိုက်ခတ်ခဲ့သည်ဟု ထုတ်ပြန်ချက်တွင်ပါရှိသည်။
အဆိုပါကိစ္စနှင့်ပတ်သက်ပြီး နောက်ဆက်တွဲသတင်းများနှင့် AA ဘက်သို့ မေးမြန်းချက်များကို မဇ္ဈိမမှ ဆက်လက် ဖော်ပြသွားမည် ဖြစ်ပါသည်။
“ ကျွန်တော်တို့နဲ့ တိုက်ပွဲမဖြစ်ဘူး အဲ့နေ့က။ သူတို့ အဲ့ဒီမှာ အသားလွတ်ကြီး လာပစ်တာ။ အဲ့ဒီမှာ ရွာသားတွေ ထိသွားတာ။ ကျွန်တော်တို့ ကြားတာ အဲ့ဒီမှာ ရွာသားက ဆယ်ဂဏန်းနီးပါးထိတောင် သေကြေတယ်လို့ ပြောတယ်။ နောက်ပြီးတော့ ဒဏ်ရာရတာလည်း ၂ဝ နီးပါးလောက်တောင် ရှိတယ်လို့ ကြားတယ်” ဟု AA ၏ ပြောရေးဆိုခွင့်ရှိသူ ဦးခိုင်သုခက ဧပြီ ၃ ရက် ညနေ ၃ နာရီခွဲက မဇ္ဈိမသို့ပြောသည်။
အဆိုပါ ဒဏ်ရာရရှိသူများကို ဘူးသီးတောင်မြို့၊ တပ်မတော်ဆေးရုံသို့ ပို့ဆောင်ကာ ဆေးဝါးကုသမှုများ၊ ထောက်ပံ့မှုများ ဆောင်ရွက်ပေးထားပြီး လိုအပ်သော စိစစ်မှုများ ဆောင်ရွက်လျက်ရှိကြောင်း တပ်မတော် ဘက်မှ ထုတ်ပြန်ထားသည်။
“ အဲ့ဒီ ဘင်္ဂါလီတွေသာ တကယ်တမ်း AA နဲ့အတူ ရှိနေလို့ ရှိရင် သူတို့ အဲ့ဒီစစ်ဆေးရုံမှာ တင်ပြီးတော့ ဆေးကု နေစရာ လိုလို့လား။ စစ်ဌာနချုပ်ကနေပြီးတော့ တစ်ခါတည်း ့ အမှုဖွင့်ပြီးတော့ အရေးယူပေါ့။ AA နဲ့ အတူ ရှိနေတယ်ဆိုလို့ရှိရင်” ဟု AA ဘက်မှ ဦးခိုင်သုခက ပြောသည်။
ရခိုင်ပြည်နယ်အတွင်း ၂၀၁၉ ခုနှစ် ဇန်နဝါရီ ၄ ရက်နေ့ မှ မတ်လ ၂၈ ရက်နေ့အထိ တပ်မတော်နှင့် AA တို့အကြား ထိတွေ့တိုက်ပွဲဖြစ်ပွားမှုပေါင်း ၁၀၃ ကြိမ်ဖြစ်ပွားခဲ့ပြီး မိုင်းပေါက်ကွဲမှုဖြစ်စဉ်ပေါင်း ၄၄ ကြိမ်အထိ ဖြစ်ပွားခဲ့သည်ဟု မတ်လ ၂၉ ရက်နေ့က နိုင်ငံတော်သမ္မတရုံးတွင် ပြုလုပ်သည့် သတင်းစာရှင်းလင်းပွဲ တွင် ဦးဇော်ဌေးက ဆိုထားသည်။
