စကားပြေအရေးအသား စနစ်တကျ ထဲထဲဝင်ဝင် ပြောဖို့ဆိုဖို့ထား လောလောလတ်လတ် တွေ့နေမြင်နေရတဲ့ စကားလုံးပေါင်းသတ်ပုံအမှားကိစ္စက စကားပြောဖို့ဖြစ်နေပြန်ပါတယ်။
တချို့ စကားလုံးပေါင်းသတ်ပုံအမှားတွေက လူတွေ အထူးသဖြင့် လူငယ်တွေ အချင်းချင်း ပုဂ္ဂိုလ်အရ ရေးကြသားကြ ပေးကြပို့ကြတာမဟုတ်ဘဲ အင်တာနက်လူမှုကွန်ရက်ပေါ်မှာ အမှားကြီးမှားနေကြတာကြတော့ တော်တော် အကြည့်ရဆိုးပါတယ်။ ဒါ့အပြင် စကားလုံးပေါင်းသတ်ပုံ မှားပြီးရေးတာက တခြားနယ်ပယ်တွေမှာအသာထား သတင်းဆက်သွယ်ရေးနယ်ပယ်ဖြစ်တဲ့ မီဒီယာနယ်ပယ်မှာတောင်မှ အမှားကြီးမှားနေကြတာ တွေ့နေရတော့ တော်တော်စိတ်ပူမိပါတယ်။

တခါ စကားလုံးပေါင်းသတ်ပုံအမှားကိစ္စ လွှတ်တော်ကိုယ်စားလှယ်တစ်ဦးက လွှတ်တော်မှာ တင်သွင်းဆွေးနွေးတဲ့သတင်းကြားရလို့ အားတက်သရော ဝမ်းပမ်းတသာ လိုက်ဖတ် လိုက်ပြီးဖတ်ကြည့်ပြန်တော့ ၀ါးလုံးကွဲအောင် ရယ်စရာဖြစ်စေတဲ့စကား ကြားရပြန်တော့ အလိုလိုမှ လူတွေက စကားလုံးပေါင်းသတ်ပုံအမှားကိစ္စအပေါ် ပေါ့ပေါ့တန်တန်သဘောထားလာကြတဲ့အချိန် သူလုပ်ကာမှ ပိုပြီး ပေါ့ပျက်စေ ရယ်စရာဖြစ်စေပြန်တာမို့ သက်ပြင်းသာချမိပါတယ်။ လွှတ်တော်ကိုတင်သွင်းတဲ့အချက်က တစ်ချောင်းငင်နဲ့ နှစ်ချောင်းငင်ကို မှားရေးနေကြတဲ့ကိစ္စ အလေးပေးတင်ပြဆွေးနွေးနေတာဖြစ်လို့ ကတောင်းကျိုက်တခြား ဖင်တခြားဆိုသလို လူတွေအများစု မှားလေ့မှားထရှိတဲ့အမှားမျိုးမဟုတ်ဘဲ အရေးပါမှုအနည်းငယ်သာဖြစ်နေတဲ့အမှားကို လွှတ်တော်ကြီးအထိတင်ရပါ့မလားဆိုပြီး လူတွေဝိုင်းရယ်စရာဖြစ်စေပြန်တော့ အင်မတန်အရေးကြီးလှတဲ့ စကားလုံးပေါင်းသတ်ပုံအမှားပြဿနာဟာ ထောင်တန်တဲ့စကား ရယ်စေပေါ့စေဖြစ်ရပြန်ပါတယ်။ သူလုပ်ကာမှ လူတွေက စကားလုံးပေါင်းဆိုတာ ဘာခက်လို့လည်း ဘာအရေးကြီးလို့လည်းဆိုတဲ့အတွေး တွေးလာအောင်လုပ်လိုက်သလားလို့တောင်မှ တွေးလိုက်မိပါတယ်။

အခု ကျနော်တို့အမြဲတန်း တွေ့နေရတဲ့ စကားလုံးပေါင်းသတ်ပုံအမှားတချို့ဟာ သူလည်းမှား ကိုယ်လည်းမှား အမှားကလည်းကြာလာ ဆိုတော့ကာ အမှားကိုပဲ အမှန်လို့ မသိမသာကနေ သိသိသာသာကြီး ထင်လာကြတဲ့အမှားတချို့ ကျနော်ပြောပါ့မယ်။ တသတ်နဲ့ ပသတ်၊ ကသတ် အမှားများပါပဲ။

ကျနော်ကတော့ ခင်မင်သူများက မှားရေးထားတာတွေ့ရင် မသိမသာပြင်ပေး အကြံပေး လုပ်တာပါပဲ။ ဒါပေမယ့် တခါတလေ မှားလို့ပြင်ပေးတာတောင်မှ အဓိပ္ပါယ်နှစ်မျိုးနဲ့ ပြန်ပြီးတုန့်ပြန်ကြတာ တွေ့ရတတ်ပါတယ်။ တစ်ခုက မှားရေးသူဟာ သူမှားလို့ပြင်ပေးတာပါလားဆိုတာတောင်မှမသိလောက်အောင် အမှားကို အမှန်အဖြစ် ကျကျနန မြင်နေတတ်တဲ့အဖြစ်နဲ့ ဟာကွာ ဒါက အရေးမကြီးပါဘူး လူတကာဒီလိုပဲရေးနေကြတာပဲဟာ ဆိုတဲ့အထိ ဖြစ်လာနေတဲ့တုန့်ပြန်မှုပါပဲ။

ဥပမာ အသိမိတ်ဆွေ သတင်းထောက်တစ်ဦးက သူ့ရဲ့ ဖေ့ဘုတ်စာမျက်နှာမှာ စာတစ်စောင်ရေးတင်တဲ့အခါ ဒီလိုစာကြောင်းတစ်ကြောင်းပါလာပါတယ်။
…….လူတွေဟာ ပညာမ(တက်)ရင် စဉ်းစားဆင်ခြင်မှု နည်း(တက်)ကြပါတယ်။ ဒီလိုစဉ်းစားဆင်ခြင်မှု နည်းတဲ့အခါ ခဏခဏ ပြဿနာဖြစ်ပါတယ်။ ကျမမိတ်ဆွေ အမျိုးသားတစ်ဦးဆိုရင် အဲသလို စဉ်းစားဆင်ခြင်မှုနည်းလွန်းလို့ သူ့ခမျာ ခဏခဏ ပြဿနာဖြစ်ရ ကျမတို့က ၀ိုင်းကူပြီးရှင်းပေးရပါတယ်။ သူ့ပြဿနာကို အကြိမ်ပေါင်းများစွာ ဝင်ရှင်းပေးရလွန်းလို့ အခုတော့ ကျမလည်း မ(တက်)နိုင်တော့ဘူးပေါ့လေ…..
ဒီစာပိုဒ်ထဲမှာ ကွင်းစကွင်းပိတ်နဲ့ပြထားတဲ့ စကားလုံးတွေ တသတ်နဲ့ ကသတ် မှားရေးထားတဲ့ အမှားစကားလုံးတွေပါပဲ။ ဒီစာပိုဒ်ထဲက နောက်ဆုံးစာကြောင်းထဲက ကျမလည်း မ(တက်)နိုင်ဘူးပေါ့လေ လို့ရေးထားတဲ့ ကွင်းစကွင်းပိတ်စကားလုံးအမှားကိုဖတ်ရတော့ ကျနော့်မှာ ပြုံးပင်ပြုံးမိပါတော့တယ်။

ဒါနဲ့ပဲ ကျနော်က သူ့ရဲ့ ဖေ့စ်ဘုတ်စာမျက်နှာပေါ်က ကွန်းမင့်ရေးတဲ့အကွက်မှာ သူ့အားနည်းချက်ကို အများတကာရှေ့မှာ ချနင်းသလိုလည်းမဖြစ်ရအောင် မှားတာကို မှားနေမှန်းကလည်း သိစေချင်လို့ “တတ်” ဆိုတဲ့စကားလုံး တစ်လုံးပဲရေးတင်ပေးလိုက်ပါတယ်။ သူကလည်း ချက်ချင်းဆိုသလို စာပြန်လာပါတယ်။ “ဆရာကလည်း လာနောက်နေပြန်ပြီ” တဲ့။ ဒီတော့လည်း မတတ်သာတဲ့အဆုံး မှားနေတဲ့စကားလုံးသုံးခုကို အမှန်က တသတ်နဲ့ရေးရမယ့်စကားလုံးတွေသာဖြစ်တာကိုသိစေချင်လို့ “တတ်” ဆိုပြီး ပြင်ပေးလိုက်တာပါ လို့ပြောရတဲ့အထိ ဖြစ်လာပါတယ်။ ဒီအခါကြတော့ သူထပ်ပြီးပြန်ပြောတဲ့စကားက “ဟာ ဆရာကလည်း လူတကာဒီိလိုပဲရေးနေကြတာပဲဟာ” တဲ့။ ကျနော့်မှာ ဘာဆက်ပြောရမှန်းပင်မသ်ိလောက်အောင် ဆွံ့အသွားရပါတော့တယ်။

အမှန်တော့ အဲဒီ “တသတ်၊ ပသတ်၊ ကသတ်” စကားလုံးတွေဟာ တကယ့်ကို လွယ်လွယ်ကူကူ မှတ်သားရလွယ်တဲ့ စကားလုံးတွေဖြစ်တာတော့ အမှန်ပါပဲ။ ဒါပေမယ့် အခု လူငယ်အတော်များများကတော့ အဲဒီ တသတ်၊ ပသတ်နဲ့ ကသတ်ကို ထင်သလိုမှားနေကြတာဟာ မှားလို့မှားမှန်းမသိ၊ အမှားကိုပဲ အမှန်လို့မြင်လာကြတဲ့အပြင် အားလုံးဒီလိုရေးနေကြပြီမို့ ဒီစကားလုံးတွေက ဘာကိုဆိုလိုတယ်ဆိုတာ လူတိုင်းနားလည်တာပဲဟာဆိုပြီး အလွယ်တကူပဲ ဆက်မှားနေကြတာဟာ အသားကျသလိုဖြစ်နေပါပြီ။

စကားလုံးပေါင်းသတ်ပုံမှားရင် အဓိပ္ပါယ်လည်း လိုရာမရောက်ဘဲ မလိုရာရောက်စေမှာ အသေအချာပါပဲ။ မိန်းကလေးတစ်ယောက်က ယောကျင်္ားလေးတစ်ယောက်ကို လက်လျှော့လိုက်လို့ ကျမတော့ မတတ်နိုင်တော့ပါဘူးလို့ တသတ်နဲ့ရေးရမယ့်အစား ကျမတော့ မတက်နိုင်တော့ပါဘူးလို့ရေးလိုက်ရင် အဓိပ္ပါယ်က တော်တော်ကွဲပြားသွားတာဟာ ရယ်စရာပင်ဖြစ်စေလောက်အောင် အဓိပ္ပါယ်ပြောင်းသွားတာ သိသာလွန်းပါတယ်။ ဒါပေမယ့် အခုတော့ လူငယ်တချို့ဟာ အဲဒီအမှားကိုပဲ အလွယ်တကူ ပျော်ပျော်ကြီး အမှားညီနေကြတာတွေ့ရလို့ စိတ်ပူမိတယ်။

အဲဒီ တသတ်၊ ပသတ်၊ ကသတ် စကားလုံးတွေဟာ သေးသေးတင်တို့ လုံးကြီးတင်တို့ တစ်ချောင်းငင်တို့ နှစ်ချောင်းငင်တို့ထက် ပိုမှားပြီးရေးတတ်ကြပါတယ်။ ဘာပြုလို့လည်းဆိုတော့ အသုံးများတဲ့ စကားလုံးတွေဖြစ်တဲ့အပြင် အသံထွက်ကလည်း ဆင်တူယိုးမှား(တကယ်တော့ သေချာမှန်ကန်စွာအသံထွက်ဖတ်ရင်တော့ ဆင်တူယိုးမှားမဖြစ်ပါဘူး။)ဖြစ်နေတဲ့ စကားလုံးတွေဖြစ်နေလို့ပါပဲ။ လူတွေ စ လုံးနဲ့ ဆ လိမ် အသံထွက်ပီအောင် မဖတ်တတ်ကြသလိုမျိုးပါပဲ။ ဒီတော့ကာ အဲဒီအသံထွက်ကိုပဲ စာအနေနဲ့ ချရေးတဲ့အခါ တ သတ်နဲ့ ပသတ် အလွယ်တကူ မှားကုန်ကြတော့တာပါပဲ။ စာမတတ်ဘူးလား ဆိုတဲ့စကားနဲ့ စာမတပ်ဘူးလား ဆိုတဲ့ တသတ် ပသတ် အမှားမျိုး မှားတတ်ကြပေမယ့် အဓိပ္ပါယ်ကြတော့ လုံးဝကွဲပြား ခြားနားကြပါတယ်။ ဒါကို သေသေချာချာ သတိပြုရပါမယ်။

စကားပြေအရေးအသားကိုလေ့လာတဲ့အခါ ကျနော်တို့အားလုံး မလွဲမသွေ ဦးစွာပထမ ထိတွေ့ရမယ့်အရာ ဦးစွာပထမ ဖြတ်ကျော်ရမယ့်အရာနဲ့ အခြေခံကျတဲ့အရာက စကားလုံးပေါင်းသတ်ပုံပါပဲ။ ဒါကို ကြေညက်မှုမရှိဘဲ စကားပြေအရေးအသား ဆက်သွားကြမယ်ဆိုရင် အမှားဟာ အဲဒီကတည်းက သန္ဒေတည်တော့မယ့်သဘောပါပဲ။ ဒါကြောင့်မို့ လူငယ်များ စကားလုံးပေါင်းသတ်ပုံကိစ္စ မပေါ့တန်စေချင်ပါဘူး။ သူများမှားလို့ ကိုယ်လည်း အလွယ်တကူလိုက် မမှားစေချင်ပါဘူး။ စကားလုံးပေါင်းသတ်ပုံဟာ စကားပြေရဲ့အခြေခံကိစ္စ အရေးပါလှတဲ့အဆင့်ဖြစ်ကြောင်း အလေးအနက်ထား တင်ပြလိုက်ပါတယ်။
လူငယ်များ စကားပြေအရေးအသား မှန်ကန်ကြွယ်ဝ လှပနိုင်ကြပါစေ။