ဧပြီ ၁ ၊ မြောင်းမြ။ ။ ပြည်သူကို ပေးခဲ့သည့်ကတိအတိုင်း မြောင်းမြတံတားကို ဖွင့်လှစ်နိုင်ခဲ့ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။
“ကျွန်မအတွက် မြောင်းမြတံတားဖွင့်ရတာဟာ အထူး အရေးကြီးပါတယ်၊ဘာဖြစ်လည်းဆိုတော့ မြောင်းမြတံတား ပြတ်သွားတုန်းကလည်း ကျွန်မ လာကြည့်ခဲ့ပါတယ်၊အလုပ်တစ်ခုဟာ စပြိီးဆိုရင် ဆုံးခန်းတိုင်အောင် အောင်မြင်အောင်လုပ်ဖို့က ကျွန်မတို႔ အားလုံးမှာ တာဝန်ရှိပါတယ်၊အဲဒီတုန်း က အမြန်ဆုံး ပြန်လည်တည်ဆောက်ပေးပါမယ်လို့ ပြည်သူကို ကတိကဝတ်ပေးခဲ့ပါတယ်၊ဒါဟာလည်း အင်မတန်အရေးကြီးပါတယ်၊အစိုးရတစ်ခု အုပ်ချုပ်ရေးယန္တရားများ တာဝန်ယူတဲ့အဖွဲ႔ အစည်းတစ်ခုဟာ ပြည်သူကိုပေးတဲ့ကတိတွေ တည်ဖို႔ ဆိုတာ အင်မတန်မှကို အရေးကြီးပါတယ်၊ပြည်သူနဲ့ အစိုးရ ကြားမှာ ယုံကြည်မှုရှိဖို ့၊ တစ်ဦးနဲ့တစ်ဦးယုံကြည့်ဖို ၊ တစ်ဦးနဲ့တစ်ဦးလေးစားဖို႔ ဆိုရင် နှစ်ဘက်စလုံးက ကိုယ့်တာဝန်ကိုယ်ကျေပြီးတော့ ၊ ကိုယ့်အခွင့်အရေးတွေကိုလည်း ကိုယ်စောင့်ရှောက်နိုင်ရပါမယ်၊အစိုးရရဲ့တာဝန်တစ်ခုဟာ ပြည်သူလူထုတွေကို ပေးထားတဲ့ကတိကို တည်ဖို့ပဲ ဖြစ်ပါတယ်”ဟု နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က မြောင်းမြတံတားဖွင့်ပွဲတွင် ပြောသည်။
ဧပြီ ၁ ရက်နေ့က ဧရာဝတီတိုင်းဒေသကြီး၊ မြောင်းမြတံတားသစ်ဖွင့်ပွဲတွင် ယင်းသို့ ပြောကြားလိုက်ခြင်း ဖြစ်သည်။
" ကျွန်မတို႔ ပေးထားတဲ့ကတိအတိုင်း ဒီနေ႔ မှာ ဒီတံတားကို ဖွင့်နိုင်တာ အင်မတန်မှ ဝမ်းသာပါတယ်" ဟု နိုင်ငံတော်၏အတိုင်ပင်ခံပုဂ္ဂိုလ်က ဆက်လက် ပြောကြားခဲ့သည်။
ယနေ့ ဧပြီ ၁ ရက်နေ့တွင် ပြန်လည်ဖွင့်လှစ်ပေးနိုင်ခဲ့သည့် မြောင်းမြတံတားသည် ၂၄ ပေအကျယ်ရှိ နှစ်လမ်းသွားတံတားလည်း ဖြစ်သည်။
၂၀၁၈ ခုနှစ်၊ ဧပြီ ၁ ရက်နေ့ နံနက် ၁ နာရီခန့်က ဆိုင်းကြိုးပြတ်တောက်ကာ ပြတ်ကျခဲ့ခြင်း ဖြစ်ပြီး ကုန်တင်ကားတစ်စင်းပြုတ်ကျကာ လူ ၂ ဦး သေဆုံးခဲ့သည်။ ထို့နောက် တံတားသစ် အမြန်ဆုံး တည်ဆောက်ရန် အစိုးရမှ ကတိကဝတ်ပြုခဲ့ခြင်း ဖြစ်ပြီး တစ်နှစ်တိတိပြည့်သောနေ့တွင် တံတားသစ်ဖွင့်လှစ်နိုင်ခဲ့သည်။
မြောင်းမြမြို့နယ်ပြည်သူ့လွှတ်တော်ကိုယ်စားလှယ်ဒေါက်တာစိုးမိုးသူက”၂၀၁၆ခုနှစ်၊နိုဝင်ဘာလတွင် ပြည်သူလွှတ်တော်တွင် မြောင်းမြကြိုးတံတားအန္တရာယ်ရှိနေပြီးဖြစ်လို့ တံတားတစ်စင်း တည်ဆောက်ပေးဖို႔ မေးခွန်းမေးခဲ့ပါတယ်" ဟုပြောသည်။
“ကတိကဝတ် ရရှိတယ်၊တံတားဆောက်နေဆဲကာလမှာ ၂၀၁၈ ခုနှစ်၊ ဧပြီ ၁ ရက်နေ႔ မှာ တံတားကျိုးကျသွားခဲ့ပါတယ်၊ဆောက်လုပ်ဖို႔ နောက်နှစ်နှစ်ကျန်တာကို ပြန်လည်စိစစ်တယ်၊အမြန်ဆုံးပြီးနိုင်ဖို အတွက်ကို ဒီဇိုင်းပုံစံပါ ပြောင်းလိုက်တယ်၊လိုအပ်တဲ့ရန်ပုံငွေကို သမ္မတအရေးပေါ်ရန်ပုံငွေကသုံးခဲ့ပါတယ်”ဟု မြောင်းမြမြို့နယ်ပြည်သူလွှတ်တော်ကိုယ်စားလှယ် ဒေါက်တာစိုးမိုးသူက မဇ္စျိမသို႔ ပြောသည်။
ယခင် ပြတ်ကျသွားသော မြောင်းမြကြိုးတံတားအစား ယခုမြောင်းမြတံတားကို ကျပ် ၂၅ ဘီလီယံနီးပါးဖြင့် တည်ဆောက်ခဲ့ခြင်း ဖြစ်သည်။
မြောင်းမြတံတားပြတ်သွားချိန်မှ စတင်ပြီး ခရီးသွားပြည်သူများ သွားလာမှုလွယ်ကူစေရန် တိုင်းအစိုးရက ဇက်ရေယာဉ်များ ပြေးဆွဲပေးခဲ့သည်။
