မြန်မာနိုင်ငံဘက်မှာ မြေမြှုပ်မိုင်းနင်းမိလို့ အိန္ဒိယအမျိုးသားတစ်ဦး ဒဏ်ရာအပြင်းအထန် ရရှိ

မြန်မာနိုင်ငံဘက်မှာ မြေမြှုပ်မိုင်းနင်းမိလို့ အိန္ဒိယအမျိုးသားတစ်ဦး ဒဏ်ရာအပြင်းအထန် ရရှိ
A general view shows Indo-Myanmar International border fencing Moreh a border town in India’s northeastern state of Manipur bordering Myanmar’s Tamu town. Photo: EPA

မတ် ၁၂ ။          ။ အသက် ၃၆ နှစ်အရွယ် အိန္ဒိယနိုင်ငံသားတစ်ဦးဟာ မတ်လ ၁၁ ရက်က မြန်မာနိုင်ငံ နယ်နမိတ်ထဲ ဝင်ရောက်ပြီး သွားလာနေခဲ့စဉ် မြေမြှုပ်မိုင်းတစ်လုံးကို နင်းမိတာကြောင့် ဒဏ်ရာအပြင်းအထန် ရသွားခဲ့တယ်လို့ NDTV သတင်းတစ်ရပ်အရ သိရပါတယ်။

ယင်းဖြစ်စဉ်ဟာ အိန္ဒိယ-မြန်မာ နယ်စပ် နယ်နမိတ်တိုင် အမှတ် ၂ အနီး တောအုပ်တစ်ခုမှာ ဖြစ်ပွားခဲ့တာဖြစ်ပါတယ်။

Bangdukbanga ကျေးရွာမှာ နေထိုင်တဲ့ အဆိုပါ အိန္ဒိယအမျိုးသားဟာ အခြား အဖော်နှစ်ဦးနဲ့အတူ ယင်းနေ့က စားစရာရှာဖို့အတွက် မြန်မာနိုင်ငံဘက်ထဲ ဝင်ရောက် လျှောက်သွားနေခဲ့တာဖြစ်တယ်လို့ ဆိုပါတယ်။

ယင်းနောက် ၎င်းအိန္ဒိယအမျိုးသားဟာ မြေမြှုပ်မိုင်းကို မတော်တဆ တက်နင်းမိရာကနေ မိုင်းပေါက်ကွဲလို့ ဒဏ်ရာအပြင်းအထန် ရသွားခဲ့ပါတယ်။ ပေါက်ကွဲမှုကြောင့် ၎င်းရဲ့ ညာဘက်ခြေထောက် ပြတ်သွားတယ်လို့ သိရပါတယ်။