ပုသိမ်၊ မတ်လ ၃ ရက် ။ ။ အာရှဆင်များ နေထိုင်ကျက်စားလေ့ရှိသည့် ဧရာဝတီတိုင်းဒေသကြီး၌ ၂၀၁၈ ခုနှစ်တွင် ဆင်သတ်ခံရမှု ၈ မှု ဖြစ်ပွားခဲ့ပြီး ယခင်နှစ်ကထက် ထက်ဝက်ကျဆင်းခဲ့ကြောင်း သိရသည်။
“ ဆင်သတ်မှု ၈ မှု ဖြစ်ပွားခဲ့တယ်၊ ဆင် ၈ ကောင် သတ်ခံရခဲ့ပြီး၊၂၀၁၇ ခုနှစ်တွင် ဆင်သတ်မှု ၁၆ မှု ရှိပြီး အသတ်ခံရတဲ့ ကောင်ရေမှာ ၁၆ ကောင်ဖြစ်တယ်” ဟု ဧရာဝတီတိုင်းဒေသကြီး ရဲတပ်ဖွဲ႔မှူးရုံး၊ ဒုတိယ ရဲမှူးကြီး ထွန်းရွှေက ပြောသည်။
ဆင်သတ်ဖြတ်မှုများသည့် ဧရာဝတီတိုင်းတွင် ၂၀၁၈ ခုနှစ်အတွင်း ဆင်မုဆိုး ၁၃ ဦး ဖမ်းဆီးရမိခဲ့ကြောင်း သိရသည်။
“ဆင်သတ်ခံရမှု လျော့ကျအောင်၊ ဒေသခံတွေကိုလည်း ဆင်သတ်မှု မဖြစ်အောင် လှည့်ကင်း၊ ရပ်ကင်း၊ ဝပ်ကင်း စိုးမိုးဆောင်ရွက်ပြီး ပညာပေးဆောင်ရွက်နေမှုတွေလည်း ရှိပါတယ်၊ ဆင်သတ်တဲ့မုဆိုးတွေ တောထဲဝင်လာရင် ရဲတပ်ဖွဲ႔ ကို အချိန်မီ သတင်းပေးဖို႔၊ဆင်သတ်မှု မဖြစ်ပွားအောင် လှည့်ကင်းတွေနဲ့ စိုးမိုးဆောင်ရွက်ထားတယ် ” ဟု ဒုတိယရဲမှူးကြီး ထွန်းရွှေက ပြောသည်။
ဧရာဝတီတိုင်းဒေသကြီး၊ ပုသိမ်ခရိုင်တွင် ဆင်သတ်မှု ဖြစ်ပွားလေ့ရှိပြီး၊ ပုသိမ်နှင့်ငပုတောမြို့နယ်များတွင် အများဆုံး ဖြစ်ပွားသည်။
“ကျွန်တော်တို႔ က ဆင်ရှိတဲ့နေရာပေါ့။ ဆင်ရှိရင် မုဆိုးရှိနိုင်တယ်။ ဆင်ရှိတဲ့နေရာမှာ နေ့ရောညရော ကင်းလှည့်တယ်ပေါ့၊ ဆင်သတ်ခဲ့ဖူးပြီး ထောင်ကျတဲ့သူရှိတဲ့ အိမ်ကို ရောက်အောင် သွားတယ်၊ ဆင် သတ်ဖြတ်မှု မရှိအောင်လို ႔စည်းရုံးရေးပုံစံမျိုး လှည့်စည်းရုံးတယ်ပေါ့။ တစ်ချိန်က ဆင်သတ်ဖြတ်ပြီး ထောင်ကျတဲ့သူတွေကို ကိုယ်နဲ့အတူ တွဲဖက်ပြီးတော့ ဆင်မုဆိုး ဖမ်းဆီးရမိရေးအတွက် ဘယ်နေရာသွားသွား သူတို့ကို ခေါ်သွားတယ်။ တချိန်တုန်းက သူနဲ့ဆက်စပ်တဲ့ဆင်မုဆိုးတွေက ကျွန်တော်တို့နဲ့ ပူးပေါင်းလို့ သတင်းရမှာပေါ့။ ကျွန်တော်တို ့နယ်မြေထဲလာပြီး သတ်ဖြတ်မှု သိပ်မရှိတော့ဘူး။ အဲဒါကြောင့်မို႔ယခင်ထက် ဆင်သတ်ဖြတ်မှု လျော့သွားတယ်”ဟု တင်းချောင်းကျေးရွာအုပ်ချုပ်ရေးမှူး ဦးထွန်းလေးက ပြောသည်။
ဧရာဝတီတိုင်းဒေသကြီးတွင် ၂၀၁၇ ခုနှစ်တွင် တောဆင်ရိုင်း ၁၉ ကောင်၊၂၀၁၆ ခုနှစ်တွင် တောဆင်ရိုင်း ၁၃ ကောင် အသတ်ခံရပြီး၂၀၀၉ ခုနှစ် နှင့် ၂၀၁၀ ခုနှစ် စစ်တမ်းများအရ နေထိုင်ကျက်စားသော အာရှဆင် ၇၀၀ ခန့် အရေအတွက်ရှိကြောင်း သိရသည်။
