ရခိုင်ဒေသ စစ်ရှောင်ဒုက္ခသည် တိုးပွားလာ၊ ရိက္ခာနှင့် အကူအညီလိုအပ်

ရခိုင်ဒေသ စစ်ရှောင်ဒုက္ခသည် တိုးပွားလာ၊ ရိက္ခာနှင့် အကူအညီလိုအပ်
ယခင်လက တွေ့ရသော ဘူးသီးတောင်မြို့နယ်၊ ဒုံးသိမ်စစ်ရှောင်စခန်း မြင်ကွင်းတစ်ခု (ဓာတ်ပုံ - အောင်ငြိမ်းချမ်း / Myanmar Now)

ရခိုင်မြောက်ပိုင်းတိုက်ပွဲများကြောင့် မြောက်ဦးမြို့နယ်တွင် ထပ်မံ ပေါ်ပေါက်လာသော စစ်ရှောင်ဒေသခံများ အရေးပေါ်အကူအညီ လိုအပ်နေကြောင်း စစ်ရှောင်စခန်း တာဝန်ရှိသူများက ပြောသည်။

ဖေဖော်ဝါရီ ၂၄ ရက်နေ့က  ခူလိုင်၊ နေပူခံ၊ ဆင်အိုး စသည့် ကျေးရွာများမှ ဒေသခံ ၄၀၀ ခန့်သည် တိမ်ညိုရွာသစ်၊ စေတီတောင်ရွာဟောင်း၊ အောက်သားကန် စသည့် ရွာများသို့ ရောက်ရှိနေသည်။

ခူလိုင်ကျေးရွာအုပ်ချုပ်ရေးမှူး ဦးစိန်လှကျော်က ၎င်းတို့ရွာမှ ၅၆ ဦးသည် တိမ်ညိုရွာသစ် ကျေးရွာ စာသင်ကျောင်းတွင် ခိုလှုံနေကြောင်း၊  ရိက္ခာ၊ မီးဖိုဆောင်သုံး ပစ္စည်းများ၊ အဝတ်အထည်များ ရရှိရန် မျှော်လင့်နေကြောင်း  ပြောသည်။

“လိုအပ်တာကတော့ အကုန်လုံးလိုလို လိုတယ်။ ဒီကိုရောက်တဲ့သူတွေ အတွက်တင်မဟုတ်ဘူး၊ ရွာမှာကျန်ခဲ့တဲ့သူတွေအတွက်ပါ စိတ်ပူနေရတယ်” ဟု ၎င်းက ဆိုသည်။

ခူလိုင်ရွာတွင် မပြေးလွှားနိုင်သည့် အသက်ကြီးပိုင်း ၂၀ ကျော်နှင့်  ကျွဲ၊နွား၊ ကြက်၊ ဝက်များကို စောင့်ကြည့် ရန် လူငယ် အယောက် ၂၀ ခန့် ကျန်ရှိခဲ့သည်ဟု ၎င်းက ဆက်ပြောသည်။

ဖေဖော်ဝါရီ လလယ်ပိုင်းက စပြီး မြောက်ဦးမြို့နယ်အတွင်း တပ်မတော်နှင့် ရက္ခိုင့်တပ်မတော် (AA) တို့အကြား တိုက်ပွဲများ ပြင်းထန်စွာဖြစ်ပွားခဲ့သည်။  ဖေဖော်ဝါရီ ၁၉ ရက်နေ့တွင် မြောက်ဦးမြို့နယ်နှင့် ကျောက်တော်မြို့နယ်များမှ ကျေးရွာသား ၅ ဦး ပျောက်ဆုံးခဲ့ပြီး မီးရှို့ခံထားရသည့် လူ ၃ ဦး၏ အလောင်းကို ရန်အောင်ပြင်ကျေးရွာအနီးတွင် တွေ့ခဲ့ရသည်။

ရန်အောင်ပြင်ကျေးရွာအုပ်စု ဆင်အိုးကျေးရွာမှ ဒေသခံ ၁၇၅ ဦးသည်  ရွာအနီး ပစ်ခတ်မှုများကြောင့် ဖေဖော်ဝါရီ ၂၃ ရက်နေ့တွင် စေတီတောင်ကျေးရွာသို့ ပြောင်းရွှေ့လာကြသည်။

နေပူခံရွာမှ  ၁၇၉ ဦးသည်လည်း  ၁ မိုင်ခွဲခန့်ဝေးသည့် အောက်သားကန်ရွာသို့ရောက်ရှိလာကြောင်း၊ လူငယ် ၁၀ ဦးခန့်ကို  ရွာစောင့်အဖြစ် ချန်ထားခဲ့ကြောင်း နေပူခံရွာသား ဦးစိုးလှက ပြောသည်။

အောက်သားကန်ရွာ ဘုန်းတော်ကြီးကျောင်းတွင် တိုးဝှေ့ ခိုလှုံနေရသူများအတွက် အစားအသောက် အဝတ်အထည်များလည်း လိုအပ်နေသည်ဟု ၎င်းက ဆက်လက်ပြောသည်။

“အနီးအနားရွာတွေက ကျွေးလို့ စားနေရတာ။ ရေရှည်ဆို ဆန်လောက်မယ် မထင်ဘူး” ဟု ၎င်းက ဆိုသည်။

ယမန်နေ့ကအထိ ပစ်ခတ်သံများကြားနေရသေးကြောင်း နေပူခံရွာမှ စစ်ရှောင်များက ပြောသည်။

ရခိုင်စစ်ရှောင်များအရေး တစိုက်မတ်မတ် ကူညီပေးနေသည့် စစ်တွေအခြေစိုက် ဝံလက်ဖောင်ဒေးရှင်း၏ အချက်အလက်များအရ တိမ်ညိုရွာသစ်၊ အောက်သားကန်ရွာ နှင့် စေတီတောင် ကျေးရွာများတွင် ရောက်ရှိနေသည့် စစ်ရှောင် ၄၀၀ ကျော်အတွက် စားနပ်ရိက္ခာများ၊ အိမ်သာများနှင့် ဆေးဝါးများ အရေးပေါ်လိုအပ်နေသည်ဟု သိရသည်။

ကုလသမဂ္ဂ လူသားချင်းစာနာမှုဆိုင်ရာ ညှိနိုင်းရေးရုံး(UNOCHA) ၏ ဖေဖော်ဝါရီ ၁၈ ရက်နေ့ ထုတ်ပြန်ချက်အရ ရခိုင်မြောက်ပိုင်းတိုက်ပွဲများကြောင့် ဒေသခံ ၅,၅၀၀ ခန့် တိမ်းရှောင်နေရကြောင်း သိရသည်။ 

ယနေ့ ထွက်ပေါ်လာသည့် ထိုအဖွဲ့၏ ထုတ်ပြန်ချက်တစ်စောင်တွင်လည်း  မြောက်ဦးမြို့နယ်အတွင်း ဒေသခံ ၈၀၀ ခန့် ထပ်မံတိမ်းရှောင်ရသည်ဟု ဖော်ပြထားသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly