ရန်ကုန်၊ ဖေဖော်ဝါရီ ၂၀ ။ ။ အစိုးရ၏ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) မှတာဝန်ရှိသူများနှင့် ကချင်ပြည် လွတ်လပ်ရေးအဖွဲ့(KIO/KIA) မှကိုယ်စားလှယ်တို့ တွေ့ဆုံဆွေးနွေးရေးကိစ္စ KIO ဘက်မှပို့ထားသည့်စာကို NRPC ဘက်မှအကြောင်းပြန်ခြင်းမရှိသေးဟု ကချင်ငြိမ်းချမ်းရေးအကျိုးဆောင်အဖွဲ့(PCG) မှ ဦးခွန်းအောင် ကပြောသည်။
တရုတ်နိုင်ငံ၊ ကူမင်းမြို့တွင် ဇန်နဝါရီ ၂၁ ရက်နေ့ ကပြုလုပ်ခဲ့သော NRPC နှင့် KIO တို့၏အလွတ်သဘော တွေ့ဆုံမှုတွင် မြောက်ပိုင်းမဟာမိတ် ၄ ဖွဲ့နှင့် တွေ့ဆုံမည့် နေ့ရက်ကို ပြည်ထောင်စုနေ့အပြီး တစ်ရက်ရက်တွင် ပြုလုပ်ရန် နှစ်ဖက် သဘောတူခဲ့သည်။
သို့သော်လည်း လွန်ခဲ့သည့်ရက်ပိုင်းက ဖေဖော်ဝါရီ ၂၅ နေ့ တွေ့ဆုံရန် မြောက်ပိုင်းမဟာမိတ်အဖွဲ့ဝင်ဖြစ်သည့် KIO ဘက်မှ တင်ပြထား ခြင်းကို NRPC ဘက်မှအကြောင်းပြန်ခြင်းမျိုးမရှိသေးခြင်းလည်းဖြစ်ကြောင်း သိရသည်။
“ စာပေးတဲ့ကိစ္စ အဆင်ပြေပြီ၊ မပြေဘူး အဲ့တာမသိရသေးဘူး။ KIO ကတော့ NRPC ကိုအကြောင်းကြား ထားတာရှိတယ်။ NRPC ကစာပြန်ပို့မယ်လို့ သိထားတာ နောက်ဆုံးပဲ” ဟု ကချင် ငြိမ်းချမ်းရေး အကျိုးဆောင် အဖွဲ့ Peace-talk Creation Group (PCG) မှ ဦးခွန်းအောင်ကပြောသည်။
အဆိုပါတွေ့ဆုံမှုတွင် တအောင်းအမျိုးသားလွတ်မြောက်ရေးတပ် (PSLF/TNLA)၊ ရက္ခိုင့်တပ် (ULA/AA)၊ မြန်မာအမျိုးသား တိုးတက် ဖွံ့ဖြိုးရေးတပ်မတော် (MNTJP/MNDAA) နှင့် ကချင်လွတ်လပ်ရေးတပ် (KIO/KIA) တို့နှင့်တွေ့ဆုံမည်ဖြစ်ပြီး စစ်ဘေးရှောင် များနေရပ် ပြန်ရေး၊ တိုက်ပွဲများလျော့ချရေးတို့အပြင် အပစ်ရပ် လက်မှတ်ရေးထိုးရေးတို့ကိုဆွေးနွေးကြရန် ရှိကြောင်းလည်းသိရသည်။
KIO အဖွဲ့သည် ယခင်သမ္မတဟောင်း ဦးသိန်းစိန်အစိုးရလက်ထက် အပစ်ရပ်ဆွေးနွေးမှုများတွင် ပါဝင်ခဲ့ သော်လည်း တိုက်ပွဲများဆက်လက်ဖြစ်ပွားနေပြီး လက်ရှိအစိုးရလက်ထက်တွင် တရားဝင် ဆွေးနွေးပွဲများ ပြုလုပ်နိုင်သေးခြင်းမရှိပေ။
အလားတူ ရက္ခိုင့်တပ် (ULA/AA) သည်လည်း လက်ရှိတွင် တပ်မတော်နှင့် တိုက်ပွဲများပြင်းပြင်းထန်ထန်ဖြစ်ပွား နေသည့်အဖွဲ့ လည်းဖြစ်သည်။
ထို့ကြောင့် ယခုတွေ့ဆုံမှုသည် တိုက်ပွဲဖြစ်ပွားနေသော ဒေသများမှ ဒေသခံများအတွက် နေရပ်ပြန်ရန် မျှော်လင့်ချက်တစ်ခု လည်းဖြစ်ဖွယ်ရှိနေသည်။
