ရန်ကုန်၊ ဖေဖော်ဝါရီလ ၂၀ ။ ။ ဧရာဝတီတိုင်းဒေသကြီး ဝန်ကြီးချုပ် ဦးလှမိုးအောင်သည် ဖေဖော်ဝါရီလ ၁၉ ရက်နေ့က နဂါးစာကျွေးခြင်းကို တိုင်းအစိုးရအဖွဲ့ဝန်ကြီးများ အပါအဝင် ဇေကမ္ဘာဦးခင်ရွှေနှင့်အတူ ပြုလုပ်ခဲ့ပြီး ဗုဒ္ဓပူဇနိယပွဲတော်ဖွင့်ပွဲကို တက်ရောက်ခဲ့ကြောင်း သိရသည်။
“ပုသိမ်ခရိုင်၊ ငပုတောမြို့နယ်၊ ဟိုင်းကြီးကျွန်းမြို့ရှိ မဟာမကုဋရံသီ ဆံတော်ရှင်မြတ်မော်တင်စေတီတော်ကြီး သို့ (၁၉ .၂.၂၀၁၉)ရက်နေ့၊ နံနက်(၇:၃၀)အချိန်တွင် ရောက်ရှိ၍ ဇေယျသေနနဂါးမင်းအား နဂါးစာကျွေးခြင်း ပြုလုပ်ခဲ့ပြီး ဆံတော်ရှင်မြတ်မော်တင်စေတီတော်မြတ်ကြီး ဗုဒ္ဓပူဇနိယပွဲတော် ဖွင့်ပွဲအခမ်းအနားသို့ တက်ရောက်၍ အခမ်းအနား ဖွင့်လှစ်ပေးခဲ့ကြောင်း” ဧရာဝတီတိုင်းဒေသကြီးအစိုးရ ဖေ့ဘွတ်ခ်ပေ့ချ်တွင် တင်ထားခဲ့ခြင်းဖြစ်သည်။
အဆိုပါပွဲတွင် ဧရာဝတီတိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီးအစိုးရအဖွဲ့အတွင်းရေးမှူး၊ တိုင်းဒေသကြီး လွှတ်တော်က်ိုယ်စားလှယ်များ၊ တိုင်း/ခရိုင်/မြို့နယ်အဆင့်ဌာနဆိုင်ရာများ၊ ဆရာတော် သံဃာတော်ရှင်မြတ်များ၊ မြန်မာနိုင်ငံလုံးဆိုင်ရာ ထေရဝါဒဗုဒ္ဓဘာသာအဖွဲ့ချုပ်နှင့် နယ်စပ်တောင်တန်းဒေသ သာသနာ့ နုဂ္ဂဟအသင်းဗဟိုဥက္ကဋ္ဌ ဝဏ္ဏကျော်ထင်ဒေါက်တာခင်ရွှေ၊ ပြည်သူများနှင့်အတူ တက်ရောက်ခဲ့သည် ဟု ဖော်ပြထားသည်။
ဆက်လက်၍ ဝန်ကြီးချုပ်နှင့်အဖွဲ့သည် ဗုဒ္ဓပူဇနိယပွဲတော် ဖွင့်လှစ်ပွဲ ရေစက်ချမဟာမင်္ဂလာအခမ်းအနားသို့ ရောက်ရှိ၍ ဆရာတော်သံဃာတော် အရှင်သူမြတ်များထံမှ ပရိတ်တရားတော်များနာယူခြင်း၊ သံဃာတော်များအား လှူဖွယ်ပစ္စည်းများ ဆက်ကပ်လှူဒါန်းခဲ့ကြကြောင်း သိရသည်။
